مجاهد: امریکایۍ 'سیګار' اداره د طالبانو حکومت خلاف تبلیغات کوي
د عکس سرچینه، Getty Images
افغانستان کې د طالبانو حکومت ویاند ذبیح الله مجاهد وايي د افغانستان بیارغونې لپاره د امریکا د ځانګړي سرپلټونکي اداره 'سیګار' د دوی د حکومت خلاف پروپاګند او تبلیغات کوي.
ښاغلي مجاهد یکشنبه په یوه اعلامیه کې ویلي دغه اداره چې "په افغانستان کې د امریکايي مصارفاتو د کنټرول، محاسبې او څېړلو لپاره رامنځته شوې وه" اوس "په اسلامي امارت [د طالبانو حکومت] پسې د پروپاګند کولو دنده په غاړه اخیستې ده."
د یادونې ده چې سیګار وړمه ورځ پر خپل ټویټر د طالبانو له بیا واکمنېدو وروسته د افغانستان امنیتي وضعیت په تړاو د ملګرو ملتونو امنیت شورا د فبرورۍ میاشتې د رپوټ یوه برخه خپره کړې چې پکې راغلي 'افغانستان مرکزي او سویلي اسیا ته د ترهګریزو ګواښونو بنسټیزه سرچینه پاتې ده" دا چې ګوندې د القاعده، ټيټيپي او داعش په ګډون بېلابېلو ترهګرو ډلو د طالبانو لخوا د یوې کارنده امنیتي ستراتېژۍ د نشتوالي له کبله دغه هېواد کې د تګ راتګ ډېره ازادي موندلې ده.
سیګار یکشنبه په یوه بل ټویټ کې د اپریل میاشتې خپل رپوټ له مخې دا هم ویلي چې د "داعش خراسان څانګې افغانستان کې د طالبانو او مذهبي لږکیو پر ضد خپل کمپاین ته دوام ورکړی او د طالبانو د واکمنۍ پر وړاندې تر ټولو د جدي ګواښ په توګه پاتې ده."
د سیګار اټکل دا دی چې دغه ډله په افغانستان کې د ۱۰۰۰ او ۳۰۰۰ ترمنځ جنګیالي لري.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 1
خو ښاغلي مجاهد خپله اعلامیه کې ویلي "موږ د سیګار دغه ډول پروپاګند په کلکه ردوو" د طالبانو حکومت "پر وضعیت باندې بشپړ کنترول لري او اجازه به ورنه کړي چې هېڅ کومه ډله یا جهت افغانستان بي امنه کړي او یا د افغانستان خاوره د بل چا په ضد وکاروي."
هغه ټینګار کړی چې "هېڅ بهرنۍ مسلح ډله په افغانستان کې فعاله نه ده" او دا چې د نوموړي په وینا "د داعش په نامه استخباراتي پروژه هم سخته ځپل شوې او د نابودۍ په سرحد ولاړه ده".
د طالبانو ویاند همدا راز افغانستان کې د داخلي وسله والو ګواښونو شته والی هم رد کړی دی.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای, 2
دا په داسې حال کې ده چې داعش ډلې پر افغانستان د طالبانو له بیا واکمنېدو وروسته د بېلابېلو خونړیو بریدونو مسوولیت په غاړه اخیستی.
په دغو بریدونو کې د طالبانو حکومت یو شمېر مهم چارواکي او ملاتړي هم وژل شوي دي.
دې ډالې په دې وروستیو کې پر خپله النبآ مجله کې د 'سرونو وهلو' سرلیک سره یوه خپاره کړي اینفوګرافیک کې د طالبانو د هغو ۶ چارواکو نوملړ خپور کړی چې د دوی بریدونو کې وژل شوي.
د یادونې ده چې د ملګرو ملتونو د امنیت شورا پر بندیزونو د څار کمېټې هم څه موده وړاندې افغانستان کې د طالبانو حکومت لخوا له القاعده شبکې او د پاکستاني طالبانو تحریک "ټيټيپي" سره د پیاوړو اړیکو د پاللو او دوام خبره کړې وه.
دې کمېټې ویلي و چې ځینې ترهګرې ډلې د طالبانو تر واکمنۍ لاندې د مانورو ډېره خپلواکي لري، له دې ازادۍ ښه ګټه پورته کوي او دا چې ګوندې په افغانستان او سیمې دواړو کې د ترهګرۍ ګواښ مخ په زیاتېدو دی.
خو د طالبانو حکومت ویاند د امنیت شورا دغه رپوټ "یو اړخیز، غیر متوازن او له واقعیته لېرې" بللی و.
ذبیح الله مجاهد په خپله اعلامیه کې تازه یو ځل بیا یادونه کړې چې "افغانستان د هېچا لپاره تهدید نه دی" او دا چې حکومت یې د امریکا په ګډون له نړیوالو سره ښې او رغند اړیکې غواړي.
