تاسې د وېبسایټ داسې بڼه ګورئ چې یوازې متن لري او لږ انټرنېټ کاروي. که غواړئ عکسونه او ویډیوګانې وګورئ، نو د وېبسایټ اصلي (لومړنۍ) بڼې ته ورشئ.
د وېبسایټ اصلي بڼې ته مې وروله
د وېبسایټ دې بڼې په اړه چې ډېر انټرنېټ نه مصرفوي نور معلومات دلته موندلای شئ.
پاکستان کې مې نهمې احتجاجونو یو کال: لومړي وزیر او د پوځ مشر وايي حساب کتاب به کېږي
نن (پنجشنبه) پاکستان کې پوځ خلاف د تحریک انصاف ګوند د ملاتړو له تاوتریخوالي د ډکو احتجاجونو لومړۍ کلیزه ده.
د دغه هېواد لومړي وزیر شهباز شریف په همدې تړاو اسلام اباد کې یوې غونډې ته په خبرو کې یو ځل بیا ټینګار کړی چې د مې نهمې پېښو کې ښکېلو کسانو ته به خامخا سزا ورکول کېږي.
هغه دغه احتجاجونو ته په هېواد کې دننه "د وېش د سیاست، بغاوت او د پوځ دننه" درځ رامنځته کولو هڅې نوم ورکړی دی.
ښاغلي شریف دغو احتجاجونو کې ښکېلو کسانو ته د سزا ورکول ځکه "ضروري" بللي، چې د نوموړي په وینا "څوک په راتلونکې کې بیا د دا ډول فکر کولو جرات ونه کړي."
د ۲۰۲۳ کال د مې پر نهمه د پاکستان بېلابېلو ښارونو کې له تاوتریخوالي ډک لاریونونه تر هغې وروسته پیل شول چې امنیتي ځواکونو د پاکستان پخوانی لومړی وزیر او د تحریک انصاف ګوند مشر عمران خان ونیو.
هغه د نیول کېدو پر مهال د اسلام اباد لوړه محکمه کې و.
احتجاج کوونکو راولپنډۍ کې د پوځ د مرکز مخې ته راټول شوي او په لاهور ښار کې یې پر 'کور کمانډر هاوس' برید کړی و.
پر همدې ورځ د خیبر پښتونخوا مرکز پېښور او بلوچستان کې هم لاریونونه شوي وو چې پر مالي زیانونو سربېره مرګژوبله هم پکې اوښتې وه.
اوس د پاکستان لومړی وزیر وايي دا د "بغاوت یوه منظمه دسیسه وه."
هغه ویلي "قانون به پلی کېږي، عدالت به تامینېږي، پرې نه نږدو چې بیا کله داسې ورځ راشي."
د شهباز شریف کابینې پنجشنبه په دې تړاو ځانګړې غونډه هم جوړه کړې وه.
نوموړي د کابینې غونډې ته هم ویلي وو چې "د مې د نهمې [احتجاجونه] د پاکستان د حکومت، پوځ او سپه سالار خلاف بغاوت و چې ناکامه کړای شو."
ښاغلی شریف زیاته کړې، چا چې دغه سازش کړی و، غواړي نن یې هم اور بل وساتي او د ده په وینا د ولس پر سترګو د "درواغو پرته" واچوي.
هغه وویل که د پاکستان دیموکرایت غورځنګ د عمران خان خلاف د ماليفساد دوسیه پر مخ نه وای وړې او د هغه لاسپوڅی حکومت یې نه وای بېواکه کړی، نو ښايي د مې نهمې پېښې نه وای شوې.
منیر: "جوړجاړی به ونشي"
هممهال د پاکستان د پوځ لوی درستیز جنرال عاصم منیر هم ویلي چې د مې د نهمې پېښو سازمانوونکو خلاف "نه ردېدونکي شواهد" موجود دي او دا چې جوړجاړی ورسره نشي کېدای.
هغه ویلي د دغو احتجاجونو اصلي طراحان به چې اوس ځانونه د ده په وینا د غېزمنو په توګه معرفي کوي، د خپلو کړنو ځواب وايي.
د پاکستان پوځ د مطبوعاتو او عامه اړیکو دفتر 'ایاېسپيار' لخوا یوه خپاره شوي بیان کې د ښاغلي منیر له خولې ویل شوي چې "د مې نهمې پلان جوړوونکي، اسانچاري او مجرمان به د ملکي قانون له مخې د عدالت میز ته کېنول شي."
د پاکستان د پوځ مشر زیاته کړې، چې که په دې تړاو د پاروونکو د ځواب ویلو خبره شي، نو د پوځ زغم هم یو حد لري او باید دا زغم یې کمزوری ونه ګڼل شي.
هممهاله د پاکستان د لومړي وزیر د سیاسي چارو سلاکار رانا ثناالله چې د مې د نهمې احتجاجونو پر مهال د کورنیو چارو وزیر و – دغه لاریونونه "مجرمانه عمل" بللی چې د نوموړي په وینا "جرمي محاکمې" ته اړتیا لري.
هغه ویلي په دې تړاو چا سره خبرو اترو ته هېڅ اړتیا نشته.
د عمران خان د خوشې کېدو غوښتنه
بله خوا د پنجاب ایالتي اسمبلۍ کې د تحریک نصاف ګوند غړو د مې پر نهمه بیا احتجاج کړی او د عمران خان د خوشي کېدو غوښتنه یې کړې ده.
دوی په خپل احتجاج کې د عمران خان عکسونه هم پورته کړي وو او د هغه په ملاتړ یې شعارونه ورکول.
هممهاله پنجاب کې د تحریک انصاف د دوو ښځینه مشرانو د نیول کېدو ناتایید شوي رپوټونه هم ورکړ شوي دي.
خو پولیسو دغه رپوټونه رد کړي.
پولیسو ویلي سیالکوټ کې یې د "یوه غیر قانوني لاریون" د مخنیوي هڅه کړې او دا چې د ریحانه ډار او روبا ډار په نومونو دا ښځې پخپله د ورغلو پولیسو موټر ته پورته شوې دي.
د سیالکوټ د پولیسو یوه مشر ویلي، پولیسو دغه ښځې خپل کور سره خوشې کړې.