امیر خان متقي د هند له ځانګړي استازي سره لیدنه کې 'د چابهار بندر له لارې د سوداګرۍ پر زیاتولو خبرې کړې'
د عکس سرچینه، Abdul Qahar Balkhi@
د افغانستان لپاره د هند ځانګړي استازي جي پي سینګ په افغانستان کې د طالبانو حکومت د بهرنیو چارو له وزیر امیر خان متقي سره په کابل کې لیدلي دي.
د افغانستان بهرنیو چارو وزارت ویاند عبدالقهار بلخي پر اېکس خواله رسنۍ په دې هکله یوه پیغام کې ویلي، ښاغلي متقي په دې لیدنه کې د افغانستان او هند تر منځ ''د سیاسي او او اقتصادي اړیکو پراختیا'' او په ځانګړې توګه ''د چاه بهار بندر له لارې د سوداګرۍ ودې'' هیله څرګنده کړې.
د طالبانو حکومت د بهرنیو چارو وزیر د ''هند بشردوستانه مرستو'' مننه کړې او په وینا یې د خپل متوازن بهرني سیاست پر بنسټ له هند سره د سیمې یوه مهم هېواد په صفت د سیاسي او اقتصادي اړیکو پراختیا غواړي.
نوموړي دغه راز له هندي استازي غوښتي چې د افغانانو لپاره د هند تعلیمي، سوداګریزو او درملنې ویزو په اسانه کولو کې مرسته وکړي.
د هند ځانګړي استازي نن په افغانستان کې د طالبانو حکومت د صنعت او سوداګرۍ له وزیر نورالدین عزیزي سره هم لیدلي دي.
د طالبانو حکومت د ۲۰۲۲ کال په وروستیو کې له هند سره د سوداګرۍ ودې لپاره هغه هوايي دهلیز بیا پرانیست چې په ۲۰۱۹ کې یې د پخواني ولسمشر محمد اشرف غني حکومت بنسټ ایښی و.
د افغانستان مخکیني حکومت په وروستیو کلونو کې ویل کېدل، چې له هند سره د افغانستان د سوداګریزې راکړي، ورکړي کچه نژدې یو نیم میلیارد ډالرو ته رسېده، خو د تېر کال د شمېرو له مخې دا کچه یوازې ۲۴ میلیونو ډالرو ته ټیټه شوې ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د ۲۰۲۱ کال په اګست کې چې طالبانو د کابل کنټرول ترلاسه کړ، د نورو هېوادونو په څېر هندي دیپلوماتان هم له افغانستانه ووتل، خو پوره یو کال وروسته د ۲۰۲۲ په اګست کې له سفیر پرته د هندي دیپلوماتانو یوه ډله کابل ته د هند سفارت پرانیستلو په موخه ورسېده.
د هند این ډي ټي وي خبري شبکې هغه مهال د هند بهرنیو چارو وزیر جی شنکر له قوله ویلي و چې د هندي دیپلوماتانو یوه ډله ''له افغانستان سره تاریخي اړیکو ته په کتو د ولسي اړیکو د دوام په خاطر '' استول شوې ده.
د یادونې ده، چې په دا وروستیو میاشتو کې افغان سوداګرو ویلي، چې د خپلو سوداګریزو توکو لېږد، رالېږد لپاره یې د پاکستان کراچۍ بندر پر ځای د ایران چاه بهار بندر لارې ته مخه کړې ده.
د ایران په سویل ختیځ کې چاه بهار بندر د افغانستان ودې او پرمختیا لپاره پر ایران د امریکا متحدو ایالتونو له لګول شویو بندیزونو ''مستثنی'' بلل شوی دی.
