د اوکرایین دفاع وزیر: روسیې ۵۰۰ زره ځواکونه راټول کړي، بل ستر برید ته چمتووالی کوي
د عکس سرچینه، Getty Images
د اوکرایین دفاع وزیر اولېکسي رېزنیکوف وايي روسیه اوکرایین کې یوه بل ستر برید ته پر چمتووالي بوخته ده.
هغه خبرداری ورکړی چې دا برید ښايي پر اوکرایین د روسیې یرغل د یوه کال د پوره کېدو پر ورځ (د فبرورۍ پر ۲۴مه) پیل شي.
دا ستر احتمالي برید د 'پلرني هېواد د مدافع' له ورځ سره هم سمون درلودی شي، چې روسیه کې هر کال د فبرورۍ پر ۲۳مه د پوځ ستایلو لپاره نمانځل کېږي.
د ښاغلي رېزنیکوف په وینا مسکو دغه برید لپاره شاخوا ۵۰۰ زره ځواکونه راټول کېږي.
د روسیې ولسمشر ولادیمیر پوتین تېر سپتمبر کې د جبري پوځي خدمت له لارې د یوه ۳۰۰ زره کسیز ځواک د راټولېدو اعلان وکړ.
هغه وویل دا ګام د هېواد د 'ځمکنۍ بشپړتیا' تضمین لپاره اړین دی.
خو اوس د اوکرایین دفاع وزیر وايي د دغه امر له مخې پوځ کې د ګومارل شویو او اوکرایین ته د استول شویو روسانو اصلي شمېر ښايي تر دې ډېر لوړ وي.
هغه فرانسوۍ 'بي اېف اېم' شبکې ته ویلي "دوی رسمآ د ۳۰۰ زرو اعلان وکړ خو کله چې پر پوله ځواکونو ته ګورو نو زموږ د ارزونو له مخې دا شمېر تر دې ډېر لوړ دی."
بي بي سي په خپلواک ډول دا شمېر نه شي تاییدولی.
که څه هم ختېځ کې له دونباس سیمې د سختو جګړو راپورونه شته، خو د اوکراییني ځواکونو لخوا د خېرسون تر بېرته نیول کېدو راوروسته دواړه خواوې کوم پام وړ پرمختګ نه لري.
دې موده کې یوازنی ستر بدلون دا دی چې روسانو سولېدار ښار نیولی.
د عکس سرچینه، Getty Images
اوس ښاغلی رېزنیکوف وايي د دوی پوځي قوماندان به لومړیو کرښو کې د پښو له ټینګولو وروسته ځوابي عملیاتو ته چمتووالی وکړي.
هغه ویلي "باورمن یم چې ۲۰۲۳ به کېدای شي د پوځي بريا کال وي." خو نوموړي دا هم زیاته کړې چې اوکراییني ځواکونه باید د وروستیو میاشتو د 'عمل ابتکار' له لاسه ورنه کړي.
د اوکرایین دفاع وزیر د اضافه "اېم جي-۲۰۰" هوايي دفاع رادارونو د پېرلو تړون لپاره فرانسې ته تللی.
هغه ویلي دا به "د هوايي اهدافو موندلو لپاره د اوکرایین د وسله والو ځواکونو وړتیا پام وړ لوړه کړي."
په دغو هدافو کې د ده په وینا بالېستیک او نور توغندي او همدا راز د ډرون بېلابېل ډولونه هم شاملېږي.
ښاغلي رېزنیکوف دا څرګندونې داسې مهال کړې چې د اوکرایین د استخباراتي مالوماتو له مخې، ولسمشر پوتین خپلو ځواکونو ته تر پسرلي وړاندې د دونباس د نیولو امر کړی.
له دې سره هممهاله د اوکرایین د دفاع مرستیالې وزیرې هانا مالیار ویلي چې دونباس کې سخته جګړه دوام لري.
د عکس سرچینه، Reuters
د هغې په وینا دغلته روسي ځواکونه او د واګنر ګروپ وسله وال هڅه کوي چې باخموت ښار ونیسي.
اغلې مالیار زیاته کړې چې روسي ځواکونه د لیمان د بېرته نیولو هڅه هم کوي.
روسي پوځیانو له دغه ښاره اوکرایین کې عملیاتو لپاره د لوجیستیکي مرکز په توګه ګټه اخیسته خو اوکراییني ځواکونو اکتوبر کې ترې وایستل.
هغې د ټېلېګرام یوه پیغام کې لیکلي "روسي ځواکونه پرله پسې هڅه کوي چې د ډونېڅک او لوهانسک سیمو پولو ته ځان ورسوي. زموږ سرتېري د اوکرایین خاورې د هر سانتي متر دفاع کوي."
