بریتانیا: د هغه چا ملاتړ نه کوو چې افغانستان کې د تاوتریخوالي له لارې د سیاسي بدلون هڅه کوي

بریتانیا وايي، د هغه چا ملاتړ به و نه کړي چې غواړي افغانستان کې د تاوتریخوالي له لارې سیاسي بدلون راولي.

دوحه کې د افغانستان لپاره د بریتانیا شارژدافیر هوګو شارټر په خپره شوې اعلامیه کې ویلي، بریتانیا د افغانانو په ګډون د هر هغه چا ملاتړ نه کوي چې موخه یې افغانستان کې د تاوتریخوالي زیاتول وي.

ښاغلي شارټر همدا راز ویلي، بریتانیا به اجازه ور نه کړي چې د تاوتریخوالي د زیاتېدو په برخه کې یې خاوره وکارول شي.

په دغه خبر پاڼه کې دا هم راغلي چې هر ډول تاوتریخوالی نه د افغانستان او نه هم د نړۍ په ګټه دی او "موږ د هر ډول ترهګریزو بریدونو مخالف یوو او سخت یې غندو."

بريتانيا وايي طالبان له کړکېچه د افغانستان د ايستلو وړتيا نه لري

بورېس جانسن له طالبانو سره د تعامل غوښتنه کړې؛ طالبانو يې هرکلی کړی

بریتانیا سفارت په دغه اعلامیه کې افغانستان سره پر بشري مرستو ټیګار شوی او ویلي یې دي:

" افغانستان کې د سولې او ثبات د ودې او ټینګښت لپاره افغانانو ته د بشر دوستانه مرستو د رسولو او د امنیت په برخه کې د ګډو اندېښنو د حل لپاره د افغانستان له اوسنۍ ادارې سره له عملي ښکېلتیا پرته بله لار نشته او دا هغه څه دي چې موږ یې کوو"

بریتانیا مخامخ کومې ځانګړې ډلې ته اشاره نه ده کړې خو د پخواني حکومت يو شمېر غړي په بريتانيا کې مېشت دي.

د طالبانو مرستيال وياند بلال کريمي پر ټوېټر پاڼه د بريتانیا د دې څرګندونو هرکلی کړی دی.

همدا ډول د تېر اګسټ میاشت راهیسې واک ته د طالبانو له رسېدو سره د "ملي مقاومت جبهې" په نامه د طالبان یوې مخالفې وسله واله ډلې د طالبانو حکومت پر وړاندې جګړه پیل کړې او په وار وار یې له نړیوالوغوښتي چې د طالبانو حکومت په رسمیت و نه پېژني.

نړيوال په داسې حال کې افغانستان کې پر ثبات راوستو ټینګار کوي چې دغه هېواد کې خونړي بریدونه زیات شوي چې د ډېرو مسولیت یې د اسلامي دولت (داعش) په نامه وسله والې ډلې پر غاړه اخیستی.

تېره ورځ هم په کابل کې د سکانو پر عبادت ځای برید شوی و چې مرګ ژوبله یې لرله او داعش ډلې یې مسولیت منلی.

پر افغانستان د طالبانو له ولکي وروسته د بریتانیا په ګډون یو شمېر نور لویدیځ هېوادونه خپلې حکومتي چارې له دوحې پر مخ بیایي.