ټاکنو کمېسیون: ۷ ولایتونو کې د رایو بیا شمېرنې بهیر به ژر بشپړ شي
د عکس سرچینه، Getty Images
د افغانستان د ټاکنو خپلواک کمېسیون په وینا په سرپل، پنجشیر او جوزجان ولایتونو کې د رایو بيا شمېرنې او څېړنې بهير بشپړ شوی دی. په وینا یې، په تخار او بدخشان ولایتونو کې هم د رایو بیاګڼل به دېر ژر پایه ته ورسوي.
تر دې مخکې د افغانستان په ۲۷ ولایتونو کې د رایو بیا شمېرنه پای ته رسېدلې وه.
د دغه کمیسیون د دارالانشاء مشر حبیب الرحمن ننګ وايي، د افغانستان په اوو شمالي ولایتونو کې تر ۱۳۵۰ د زیاتو محلونو د رایو د بیاشمېرنې پرېکړه شوې وه، چې لویه برخه یې په بغلان او فاریاب کې ده.
د افغانستان د ټاکنو خپلواک کمیسیون کارکوونکو د شمال په دغو اووه ولایتونو کې د رایو بیاشمېرنه د ثبات او همپالنې ټاکنډلې د مشر عبدالله عبدالله له اجازې وروسته پېل کړه.
ښاغلي عبدالله تېره جمعه له خپلو پلویانو وغوښتل چې په دې اړه خپل اعتراض بس کړي. د ده پلویانو ۳۰۰زره رایې تقلبي بللې او د هغوی پر باطلېدو يې ټينګار کاوه.
د عکس سرچینه، Iec
تازه جنجال هله پېل شو چې د ټاکنو کمېسیون نژدې یوه میاشت وړاندې په ۳۴ ولایتونو کې د شاوخوا ۸۵۰۰ محلونو د رایو د بیا شمېرلو پرېکړه وکړه.
د ثبات او همپالنې ټاکنیزې ډلې په ګډون ځينو نورو ټاکنډلو هم د کمیسیون د دغه ګام پر ضد اعتراضونه پېل کړل.
د یادولو ده چې وار له مخه په ۲۷ ولایتونو کې د رایو د بیاګڼلو بهیر بشپړ شوی دی.
د تلې پر شپږمه د ترسره شویو ولسمشریزو ټاکنو د لومړنیو پایلو نېټه د همدغو ناندريو او تخنیکي ستونزو له کبله دوه ځلې وځنډېده خو اوس د ټاکنوخپلواک یو ځل بیا ژمنه کړې چې د روانې اونۍ تر پایه به یې اعلان کړي.
