Yn ôl yr arolygon tywydd dydd Gwener 17 Mehefin fydd diwrnod poetha'r flwyddyn hyd yma yng Nghymru, gyda'r disgwyl i'r tymheredd gyrraedd yr 20Ciau uchel.
Ond wyddoch chi pryd oedd y diwrnodau poethaf ac oeraf erioed yng Nghymru?... Dyma olwg ar 'chydig o'r ystadegau.
Y diwrnod poetha' swyddogol
Roedd haf 1990 yn un hynod o boeth, ac mi fydd yr Eisteddfodwyr brwd yn ein mysg yn cofio'r prifwyl chwilboeth yng Nghwm Rhymni y flwyddyn honno.
Cerddwyr yn edrych ar gronfa ddŵr wag ym Mannau Brycheiniog yn dilyn gwres mawr 1990
Ar 2 Awst 1990 cofnodwyd tymheredd o 35.2C (95.4 °F) ym Mhont Penarlâg, Sir y Fflint. Dyma'r tymheredd swyddogol uchaf erioed yng Nghymru.
I'w roi mewn cyd-destun mae'n werth nodi'r tymheredd poethaf erioed yng ngwledydd eraill y Deyrnas Unedig.
Y diwrnod poethaf erioed yn Lloegr oedd ar 25 Gorffennaf, 2019 - 38.7 °C (101.7 °F) yng Nghaergrawnt.
Ond mae'r tymheredd ar y dydd hwnnw yn Y Fflint yn 1990 yn boethach na'r record yn Yr Alban ac yng Ngogledd Iwerddon.
Yn Yr Alban y tymheredd poethaf erioed yw 32.9 °C (91.2 °F) yn Greycrook ar 9 Awst, 2003. Ac yng Ngogledd Iwerddon y record yw 31.3 °C (88.3 °F) yn Castlederg, Tyrone, ar 21 Gorffennaf, 2021.
Y man sy'n cael y mwyaf o haul
Y man yng Nghymru a gafodd y nifer uchaf o oriau o heulwen mewn mis yw pentref Dale yn ne Sir Benfro, ac hynny ym mis Gorffennaf, 1955. Cafodd Dale 354.3 awr o heulwen y mis hwnnw.
Mae hyn dipyn yn uwch na'r nifer uchaf o heulwen erioed ar gyfartaledd i'r Deyrnas Unedig sef 266 awr ym mis Mai 2020.
Cwm Elan i'r gorllewin i Rhaeadr Gwy yn Sir Faesyfed
Y tymheredd isaf erioed
Os mai gogledd ddwyrain Cymru sydd â'r record am y diwrnod poethaf erioed, canolbarth Cymru sydd gan y record am yr oeraf.
Yn Rhaeadr Gwy ar 21 Gorffennaf, 1940, fe blymiodd y tymheredd i −23.3 °C (−9.9 °F).
Y tymheredd oeraf erioed yn Yr Alban yw −27.2 °C (−17.0 °F) - a ddigwyddodd yn 1895 ac yn 1955. Yn Lloegr y tymheredd isaf yw −26.1 °C (−15.0 °F) ar 10 Ionawr, 1982 yn Swydd Amwythig.
Ac yn yr un man recordiodd yng Ngogledd Iwerddon y cofnodwyd y tywydd oeraf a phoethaf erioed, sef tref Castlederg yn Tyrone. Y tywydd oeraf yno oedd −18.7 °C (−1.7 °F) ar 24 Rhagfyr, 2010.
Hefyd o ddiddordeb: