जेरुसलेम किन पवित्र?

जेरुसलेमको भविष्य नै इजरेल-अरब द्वन्द्वको सबैभन्दा विवादास्पद मुद्दामध्येको एक हो।

जेरुसलेम शहर इसाई, इस्लाम र यहुदी धर्मावलम्बीहरुका लागि किन धेरै महत्त्वपूर्ण छ भन्ने बारे बीबीसीकी एरिका चेर्नोफस्कीले तयार पारेको यो विवरण।

ती तीनवटै धर्मले आफूहरुको साझा उत्पत्तिको सन्दर्भ बाइबलमा उल्लेखित एक पात्र अब्राहमसँग जोड्ने गर्छन्।

जेरुसलेम नाम इसाई, यहुदी र मुसलमानहरुको हृदयमा समान रुपले बसेको छ र त्यसको सम्बन्ध ती तीनवटै धर्मका अनुयायीहरुको शताब्दीऔं लामो र विवादित इतिहाससँग पनि छ।

हिब्रु भाषामा येरुशलइम र अरबीमा अल-कुद्स नामले चिनिने उक्त शहर संसारका सबैभन्दा पुराना शहरहरुमध्येमा पर्दछ।

सो शहरलाई समय क्रममा धेरैले जित्ने, नष्ट गर्ने र पुनर्निर्माण गर्ने गरेका छन्।

र, त्यहाँको जमिनको हरेक तहले सो शहरको इतिहासको एउटा फरक पत्रलाई देखाउने गर्छ।

के हो जेरुसलेम विवाद?

ओल्ड सिटी

सो शहरको केन्द्रमा "ओल्ड सिटी" भनिने पुरानो शहरको भाग रहेको छ जहाँ साँघुरा गल्लीहरु र ऐतिहासिक संरचनाहरु छन्।

तिनीहरुले उक्त शहरको चार विभिन्न खण्डहरुको चरित्रलाई उजागर गर्दछन् - इसाई, मुस्लिम, यहुदी र आर्मेनियाली।

सो शहर चारैतिर किल्लाको शैलीमा ढुंगाको पर्खालबाट घेरिएको छ र त्यहाँ संसारका सबैभन्दा पवित्रत स्थानहरु रहेका छन्।

शहरको प्रत्येक खण्डले आफ्नै बासिन्दाको प्रतिनिधित्व गर्दछन्।

इसाईहरुका दुई खण्ड छन् किनकि आर्मेनियालीहरु पनि इसाईहरु हुन् र चारमध्ये तिनीहरुको खण्ड सबैभन्दा सानो रहेको छ।

तर त्यो संसारको सबैभन्दा पुरानो आर्मेनियाली केन्द्रहरुमा पर्दछ।

र, तिनीहरुले सेन्ट जेम्सेज चर्च र पादरीघरको परिसरभित्र तिनीहरुले आफ्नो बेजोडको संस्कृति र सभ्यतालाई जोगाइराखेका छन्।

गिर्जाघर

इसाई खण्ड अर्थात् क्रिश्टियन क्वार्टरमा चर्च अफ द होली सेपल्कर रहेको छ, जहाँ इशा मसिहको चिहान रहेको ठानिन्छ।

त्यो चर्च रहेको स्थान इशा मसिहको जीवनकथा, उनको मृत्यु, उनलाई क्रुसमा झुण्ड्याइएको घटना र उनको पुर्नजीवनसँग पनि सम्बन्धित छ।

मस्जिद

मुस्लिम खण्ड अर्थात् मुस्लिम क्वार्टर, त्यहाँ रहेको चार खण्डमध्ये सबैभन्दा ठूलो छ। त्यहाँ डोम अफ रक र अल-अक्सा मस्जिद रहेको छ। जुन स्थानलाई मुस्लिमहरुले हरम अल-शरिफ भन्ने गर्छन्, सज्जनहरुको आश्रयस्थल।

उक्त मस्जिद इस्लाम धर्ममा तेस्रो सबैभन्दा पवित्र धार्मिकस्थल हो।

पर्खाल

यहुदी खण्ड अर्थात् जुइश क्वार्टरमा कोटेल भनिने वेस्टर्न वाल अर्थात् पश्चिमी पर्खाल अवस्थित छ।

त्यो कुनै समय यहुदीहरुको पवित्र मन्दिर रहेको ढिस्कोलाई अड्याउन बनाइएको पर्खालको अवशेष हो।