Astar Àrnoil: Daoine a' dol "cho luath 's a tha iad ag iarraidh"

Tha muinntir Àrnoil air taobh siar Leòdhais air athchuinge a chur gu Comhairle nan Eilean Siar agus iad ag iarraidh casg-astair air trafaig tron bhaile 's air a' phrìomh rathad.

Tha seo a' tighinn agus draghan ann mu cho luath 's a tha cuid a' draibheadh seachad air taighean anns a bheil teaghlaichean agus clann òga.

Faodaidh draibhearan a dhol aig 60msu tron bhaile fhèin agus air an earrann seo den A858.

Chaidh casg-astair iarraidh roimhe bho chionn 10 bliadhna ach dh'fhàilig an oidhirp sin.

Tha Iain Mac a' Ghobhainn a' fuireach ann an Àrnol.

"Tha sinn air a bhith a' gearan mu dheidhinn bho chaidh an rathad a dhèanamh às ùr," thuirt e.

"Tha an rathad math agus mar sin dheth, tha daoine den bheachd gum faod iad a dhol cho luath 's a tha iad ag iarraidh."

"'S bidh iad a' dèanamh sin."

Thuirt Iain gu bheil comhairle coimhearsnachd na sgìre air a bhith a' bruidhinn ris a' chomhairle fad bhliadhnaichean airson rudeigin a dhèanamh mu dheidhinn.

"Chan eil iad ag èisteachd," thuirt e.

"Agus cha tug iad riamh dhuinn adhbhar carson nach eil casg-astair againn mar a th' aig bailtean eile."

Tha athchuinge a-nis air a dhol chun na comhairle le iarrtas airson casg-astair 40msu air an rathad mhòr agus 30msu tron bhaile.

Tha Àrnol fo bhratach Comhairle Coimhearsnachd Shiaboist.

'S e Tormod Caimbeul à Àrnol cathraiche na buidhne.

"Bha dhroch thubaist againn ann an seo, saoilidh mi gur ann an 2008," thuirt e.

"Bhàsaich bodach. 'S e rathad gu math luath a th' ann."

A rèir Thormoid, tha rathad a' bhaile, an rathad cùl mar a th' aca fhèin air, cha mhòr a cheart cho trang ris a' phrìomh rathad.

Thuirt e: "Tha an taigh dubh againn agus tha busaichean ann.

"Nuair a bhios soithichean luchd-turais a-staigh ann an Steòrnabhagh, 's dòcha gum bi bus a-staigh an seo 10-12 turas san là.

"Sin a bharrachd air na busaichean àbhaisteach".

Bidh Murchadh MacGilleEathain a' gabhail cuairt anns a' bhaile a h-uile là agus tha e a' faighinn tàir leis an astar a th' aig càraichean.

Ach aig a' cheart àm, tha e teagmhach mu shoidhnichean casg-astair.

"Faodaidh iad an cur an àirde ach an dèan iad mòran diofar?

"Cha chreid mise gun dèan.

"Bidh daoine a' dol aig an aon astar co-dhiù.

"Chan eil iad a' dol a thoirt feart sam bith do shoidhne no do chàil eile."

Bha Coinneach Macleòid, fear de chomhairlichean an Taobh Siar agus Nis agus fear-gairm na comhairle, an sàs san iomairt a bh' ann roimhe airson casg-astair.

"Tha fhios againn gu bheil tòrr de na carbadan a bhios a' siubhal tro Àrnol, gu bheil iad a' dol aig astar," thuirt e.

"Cuideachd, tha sinn air faicinn thairis air na 25 bliadhna mu dheireadh gu bheil tubaistean air a bhith air an rathad seo.

"Cumaidh sinn oirnn a' strì gum faigh sinn casg-astair oir thathas a' coimhead air casgan-astair a chur air rathaidean air feadh nan eilean, mar a tha iad a' dèanamh ann an àitichean eile.

"Sin rud a thàinig bho Riaghaltas na h-Alba - gun dèidheadh coimhead a-rithist air far a bheil casgan-astair air na rathaidean mòra agus càite am bu chòir dhaibh a bhith air an cur."