Hamas ekwela ịtọhapụ mmadụ iri ha ji ma chọọ nkwụsị agha na-adịgide na nzaghachi mba Amerịka

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere

1. 21 Mee 2025Trump ekpuheela atụmatụ ịrụ ‘Golden Dome’ ga-echekwa ihu eluigwe mba Amerịka megide ogbunigwe

   Onyeisiala mba Amerịka bụ Donald Trump ekpugheela atụmatụ ha ịrụ ngwaagha ga-egbochi ogbunigwe ịda na mba ha.

   Trump dị na mbụ kwepụta mmasị ya ịrụ ngwaagha nchekwa ahụ, nke ọ kpọrọ ‘Golden Dome’ na Bekee, ma ọ bụrụ ọ banye n’ọkwa n’afọ 2025 ma kwuo na ngwaagha nchekwa ga-arụ ọrụ tupu ọ na-arịtu n’ọkwa n’afọ 2029.

   Onyeisiala Trump kwuru na ngalaba ndịagha ụgbọelu mba Amerịka ga-arụ ngwaagha nchekwa a, nke ọnụego ya bụ otu narị ijeri dọla na ijeri iri asa na ise ($175bn).

   O kwuru na igwe mgbochi ogbunigwe a ga-enwe akụrụngwa tekịnụzụ ọgbara ọhụrụ, iji chekwaa mba ha megide ogbunigwe ndị e si n’elu tụbata site na mpaghara ụwa ọbụla.

   O kwuru na mba Amerịka etinyekwala uche n’isonye n’atụmatụ nchekwa ahụ ga-agbaso ntọala nke ndị Izrel, bụ nke na-echekwa mba Izrel kamgbe afọ 2011.

   Dịka ọ dị ugbua, e tinyela ego ruru ijeri dọla iri abụọ na ise ($25bn) n’ọrụ ahụ site n’agba mbụ nke mkpata na mmefu – gọọmentị Amerịka kwuru na ngwa nchekwa ahụ nwereike iri ọtụtụ ego karịa ihe a na-atụ anya ya.

   Ndị ọrụ gọọmentị kwuru na ụdịrị nchekwa mba Amerịka nwere ugbua agaghị egbochinwu mwakpo site na mba na-ebuso ha agha bụ ndị ji tekịnụzụ ọgbara ọhụrụ arụpụta ngwaagha ha.

   Onyeisiala Trump kwuru na onye ga-anọ n’isi ọrụ ahụ bụ ọchịagha Michael Guetlein nke ngalaba ndịagha nchekwa n’Amerịka ma bụrụkwa osote onyeisi ndịagha ụgbọelu.

   O kwuru na ngwaagha nchekwa a ga-enyochapụta, gbochie ma mebie ogbunigwe ọbụla e si na mpaghara ọbụla na mbaụwa tụọ.

2. 21 Mee 2025Ụmụ ibe unu asaala chi?

   Anyị ji aka na i hiri ụra ọfụma?

   Biko, jisie ike na-anọnyere anyị n'ọgbakọ BBC Igbo mgbe niile.

   Ndewo!

3. 20 Mee 2025UK akwụsịtụla mkparịtaụka azụmahịa n’etiti ha na mba Izrel ma kpọọ onye nnọchitanya ha oku

   Mba UK akwụsịtụla mkparịtaụka azụmahịa ha na mba Izrel ma kpọọ onye nnọchịteanya Izrel oku maka oke mwakpo na Gaza.

   Praịm misita Keir Starmer kwuru na mbawaye mwakpo Izrel na-eme bụ ihe na-atụ egwu ebe odeakwụkwọ mmekọ mba ofesi bụ David Lammy kwuru na agha ahụ na-apụta ihe a na-atụghị anya.

   Cheta na otu UN kwuru na Izrel enyela ikike ka e bubata nnukwu ụgbọla otu narị bu nri na ihe enyemaka na Gaza ka ha gbochiri ya ruo izuụka iri na otu.

   Ụbọchị Mọnde 19, Mee, 2025, Izrel nyere ụgbọala ise ohere ịgafe okeala ha mana onye na-ahụ maka enyeamaka n’ụlọọrụ UN bụ Tom Fletcher kwuru na nke a enweghị uru ọbụla ọ ga-aba.

   Fletcher kwuru na ụmụaka ruru 14,000 nwereike ịnwụ na Gaza n’ime abalị abụọ na-abịa ma ọ bụrụ na ha enwetaghị nri na ihe enyemaka ndị ọzọ.

   N’aka nke ọzọ, Praịm minista mba Izrel bụ Benjamin Netanyahu kwuru na e nwereike ịkwụsị ọgụ ahụ echi (Wenezde 21 Mee) ma ọ bụrụ na Hamas tọghapụ ndị ha ji ma tọgbọ ngwa agha ha.

4. 20 Mee 2025Trump ekwuola na mkparịtaụka udo n'etiti Rọshịa na Yukren ga-amalite ozugbo

   Onyeisiala mba Amerịka bụ Donald Trump ekwuola na mba Rọshịa na Yukren ga-amalite mkparịtaụka ịkwụsị ịkwa mgbọ ma kwụsị agha ha na-alụ “ngwa ngwa”.

   Nke a na-abịa dịka Trump na ogbo ya nke Rọshịa bụ Vladimir Putin nwechara mkparịtaụka n’ekwentị nke were ihe ruru awa abụọ.

   Trump kwuru na mkparịtụka ha abụọ gara ọfụma ma sị e kwesịrị inwe mkparịtaụka udo n’etiti mba abụọ ndị a.

   Trump onye kpọkwara Onyeisiala mba Yukren bụ Volodymyr Zelensky n’ekwentị na-atụ anya ga a kwụsị ịkwa mgbọ ahụ mana ọ dịka isi apụtachabeghi.

   Putin n’aka nke ye kwuru na ọ dị njikere ya na mba Yukren ịrụkọ ọrụ iji “tinye aka n’akwụkwọ nkwekọrịta udo”, ebe Zelensky kwuru na nke a bụ “oge dị oke mkpa”, ma rịọ mba Amerịka ka ha ewezugala onwe ha na mkparịtaụka ahụ.

   Mgbe a na-agba Trump ajụjụọnụ n’obi ọchịchị ya, o kwuru na mba Amerịka agaghị ewezuga onwe ya n’ime ka udo dị n’etiti Rọshịa na Yukren, kama na o nwere oge ọ ga-eru na ọ kwụsị ịkwagide ha.

5. 20 Mee 2025Igbo ndị e ji eme ọnụ, unu abọọla chi?

   Udo na obi aṅụrị ka anyị ji anabata gị n'ọgbakọ BBC Igbo taa ma na-asị ka ụwa maara gị mma.

   Dịka ị na-eso anyị n'ọgbakọ anyị taa, ihe ọma niile ị na-achọ n'ụbọchị taa ga-erute gị aka.

   Ndewo!

6. 19 Mee 2025Saut Africa ga-agba akwụkwọ mkpegharị ikpe megide ụkọchukwu Naịjirịa a tọhapụrụ maka idina mmadụ n'ike

   Ndị ọchịchị Saụt Africa sị na ha ga-agba akwụkwọ mkpegharị ikpe megide onye ụkọchukwu Naịjirịa bụ Timothy Omotoso a tọhapụrụ maka idina mmadụ n'ike n’ọnwa Eprel 2025 dịka ọ hapụrụ mba ahụ.

   Omotosho, onye e boro ebubo idina mmadụ n'ike na inye ụmụagbọghọ na-aga ụka ya na Port Elizabeth nsogbu, gọnarịrị ebubo ahụ.

   Ụlọọrụ na-ahụ maka ikpe mpụ na mba ahụ bụ National Prosecuting Authority (NPA) na-ekwu na ha ga-ekpegharị ikpe ahụ nke chọpụtara na aka onye ụkọchukwu ahụ dị ọcha

   Ụlọọrụ na-ahụ maka ihe ndị na-eme na Saụt Africa sị na Omotosho ahapụla obodo ha ma bata n’obodo ya bụ Naijiria.

7. 19 Mee 2025Izrel ga-ahapụ ka nri ụmụaka banye na Gaza dịka ha na-akwado mwakpo ọzọ

   Kemgbe izuụka iri na otu Izrel kwụsịrị ihed oriri ịbata na Gaza nke mere agụụ ji emekpa ndị no na ebe ahụ ahụ, Onyeisiala mba Izrel bụ Benjamin Netanyahu ekwuola na ha ga-enye ohere ka nri ụmụaka na ngwa ahụike bata.

   A gwala ndị bi na mpaghara ndịda nke Khan Younis ka ha pụọ ebe ahụ dịka Izrel na-akwado mwakpo ọzọ na Gaza.

   Ụlọọrụ ahụike Gaza sị na ihe ruru mmadụ 136 anwụọla n'ime awa iri abụọ na anọ gara aga nke na-eweta ọnụọgụgụ ndi nwụrụ kemgbe agha Izrel na Hamas bidoro 53,475.

8. 19 Mee 2025A nwuchiela nwamba maka ibu ọgwụike

   Ndị ọrụ nchekwa anwụchiela nwamba bu ngwugwu ọgwụike abụọ n’ahụ ya n’ụlọmkpọrọ ‘Pococi Penitentiary’ dị na mba Costa Rica .

   Mịnịstrị na-ahụ maka ikpe n amba ahụ kwuru n’akara Facebook ha na ndị nche hụrụ anụmanụ ahụ n’abalị isii nke ọnwa Mee, afọ 2025 ebe ọ na-agaje n’out akụkụ mkpọrọ ahụ.

   Nwamba ahụ bu ngwugwuigbo dị 235.65g na-arọ nakwa ngwugwu hereoin dị 67.76gram na-arọ.

   Ozi ahụ gara n’ihu kwuo na e jichiela ọgwụike ebe enyefere ngalaba na-ahụ maka anụmanụ a kpọrọ ‘National Animal Health Service’ maka nnyocha ahụike anụmanụ ahụ.

9. 19 Mee 2025Aka akpara ụfọdụ ndị a na-enyo so gbuo ụmụaka anọ n'Ibagwa-Aka, Enugwu steeti

   Ụmụaka anọ anwụnyụọla anya pịị n’obodo Ibagwa-Aka di Nsukka nke okpuruọchịchị Igbo-Eze South dị n’Enugwu Steeti.

   Ihe mgbawa obi ahụ mere na mgbede Fraide ụbọchị 16 nke ọnwa Mee 2025.

   Onyeisioche Igbo-Eze South ahụ bụ ọkaiwu Ferdinand Ugwueze kọwara n’ozi o wepụtara “obi agbawaala m maka ọnwụ ụmụaka anọ n’Ibagwa-Aka, ọ bụ ihe igba gharịị ka mmadụ sị kaa obi gbuo ụmụaka amaghị ihe ọbụla”

   “Ngwa ngwa m nụrụ ya, mụ na ndị ọrụ nchekwa gụnyere uweojii, DSS na Civil Defence soro gaa ebe mkpamkpa ahụ kpara iji sị nne na nna ụmụaka ahụ nakwa ndị obodo ha ndo”

   Ọ gara n’ihu kọwaa na aka akparala ụfọdụ n’ime ndị omekome ahụ mana o nwere ndị nke gbapụrụ ọsọ.

   Ugwueze rịọrọ ndị ntoroọbia ka ha ghara imebi ihe n’iwe, kama ka ha dere juu ma nyere ndị ọrụ nchekwa aka ijide ndị niile mere arụ ahụ ma nye ha ntaramahụhụ ruuru na.

   Ugwueze ji ohere ahụ rịọ ndị mmadụ ka ha wetara ya ozi ma ha hụụ ndị ahụ gbara ọsọ.

   Otu onye bụ Mazi Godwin Nweke kwuru na nwoke kpara arụ ahụ na ekwu na ya na-eme ekpere , na enyekwa ọgwụ Igbo, na-agwọ ndị ara nakwa amanshi di iche iche.

   “Ka anyị gbatara be nwoke ahụ, anyị hụrụ na o ji ọdụ tigbuo ụmụaka anọ ahụ. Nne ụmụaka ahụ gara ahịa, anyị chọpụtara na ọ bụ makana nne ha anọghị ka o jiri rabata ha n’ụlọ ya wee gbuo ha, dọwe ozu ha n’ugbo.”

   Nne na nna ha lọtaziri wee hụ ozu ụmụaka ha anọ n’ime ugbo.

   “Anyi nụrụ na ndị uweojii ejidela ụfọdụ mmadụ maka ya bụ ihe mana ha ejidebeghi onye isi ndị omekome ahụ”

   Ebe niile na ya bụ obodo Ibagwa-Aka nọ n’ọgbaghara ugbua n’ihi arụ a mere n’obodo.

10. 19 Mee 2025Onyeisiala Tinubu enyela ikike ka a malite igwupụta mmanụ na mpaghara ugwu nke Naịjirịa

    Onyeisiala Bola Tinubu enyela ikike ka a malite atụmatụ igwupụta mmanụ agbidi na mpaghara Bauchi na Gombe Steeti nke a kpọrọ Kolmani Integrated Development Project.

    Minista nta na-ahụ maka mmanụ agbidi bụ Sịnetọ Heineken Lokpobiri kwupụtata nke a mgbe ọ na-agbape ụlọakwụkwọ ebe a na-amụ maka mmanụ gaasị na agbidi dị na Bauchi Steeti dịka akwụkwọ onye ndụmọdụ ya bụ Nnaemeka Okafor wepụtara n’ụbọchị Sọnde si kwuo.

    Ozi ahụ kwuru na atụmatụ a dị ezigbote mkpa iji wulite ngalaba mmadụ agbidi nke Naịjirịa.

    Cheta na n’izuụka gara aga, Onyeisi ụlọọrụ na-ahụ maka mmanụ agbidi bụ Nigerian National Petroleum Company Limited (NNPCL) bụ Bayo Ojulari kwuru na ụlọọrụ ha ga-amalitekwa igwupụta mmanụ na mpaghara ugwu.

    Gọvanọ Bauchi Steeti bụ Bala Mohammed kelere gọọmentị etiti maka ihiwe ụlọakwụkwọ ahụ ma kwuo na ha ga-agba mbọ hụụ na ụlọakwụkwọ ahụ mịtara ezi mkpụrụ.

11. 19 Mee 2025A chọpụtala ọrịa kansa 'prostrate' n'ahụ Joe Biden bụbu Onyeisiala mba Amerịka

    A chọpụtala ọrịa kansa ‘prostrate’ n’ahụ Joe Biden bụbu Onyeisiala mba Amerịka dị afọ 82 dịka ozi si n’ụlọọrụ ya si kwuo. Ọrịa ahụ amụbawala ma ruo n’ọkpụkpụ ya.

    Biden onye rịturu n’ọkwa ọchịchị n’ọnwa Jenụwarị a mana e nyochapụtara ọrịa a n’ụbọhị Frịade dịka ọ hụchara onye dọkịnta mana nsogbu ịnyụ mamịrị.

    Ọrịa kansa bụ ọrịa dị ọjọọ nke ukwuu, a sị na ogogo nke ya ruru ihe dịka itoolu n’ime iri. Nke a pụtara na ọrịa a nọ n’ogogo dị elu na o nwere ikike ịgbasa ngwa ngwa dịka nnyocha ụlọọrụ Briten si kwuo.

    Biden na ezinaụlọ ya na-atụgharị uche ụzọ dị iche iche e nwereike iji agwọ ya bụ ọrịa. Ụlọọrụ ya kwuru na e nwereike ịchịkwalata ya.

    N’ozi ụlọọrụ Biden wepụtara n’ụbọchị Sọnde: “N’izu gara aga, a chọpụtara mkpụrụ kansa ‘prostrate’ n’ahụ Onyeisiala Joe Biden dịka dịka o nwere njirimaara nsogbu ịnyụ mamịrị.

    “Na Fraịde, a chọpụtara na o bu ọrịa kansa prostrate nke ogogo ya ruru itoolu bụ nke bawanyere ruo n’ọkpụkpụ ya.

    “Na-agbanyeghi na ogogo ọrịa a dị ukwuu ma dịkwa ọjọọ, ohere dị na e nwereike ịchịkwalata ya.”

    Dịka ozi ahụ pụtachara n’ọha, Onye bụbu onyeisiala natara nkwado si n’ebe dị iche iche.

    Onyeisiala Donald Trump dere n’akara soshal media ya ‘Truth Social’ na ya na nwunye ya bụ Melania Trump nwere “obi mwute mgbe ha nụrụ maka ọrịa Joe Biden.”

    “Anyị na-ezigara Jill na ezinaụlọ ya ozi itiaka n’obi nakwa nkwado” ka o kwuru, dịka ọ na-arụ nwunye Biden bụ Jill Biden. “Anyị na-asị ka ha Biden gbakee ngwa ngwa.”

    Kamala Harris bụbu osote onyeisiala mba Amerịka n’oge Biden zigakwara ezinaụlọ Joe Biden ozi nkwado ma kwuo na ọ na-ekpere ha ekpere.

    N’otu aka ahụ Barack Obama bụbu onyeisiala mba Amerịka site n’afọ 2009 ruo 2017 kwuru na ya nwunye ya bụ Mitchelle na-etinye ezinaụlọ Biden n’ekpere.

    Praịm Minista mba Briten bụ Kier Starmer depụtara na obi dị ya njọ mgbe ọ nụrụ maka ọrịa kansa Joe Biden ma kwuo na ọ na-ekpere ya na ezinaụlọ ya ekpere.

12. 19 Mee 2025Igbo ndị ọma anyị ekele gị.

    Obi ọcha ka anyị ji anabata gị n'izu ọhụrụ a ma na-asị ka ọ dịrị gị na mma.

    Biko gbalịa na-anọnyere anyị n'ọgbakọ BBC Igbo maka akụkọ ndị gbapụtara ihe.

    Daalụ!

13. 18 Mee 2025Ụmụakwụkwọ 15 gara ule JAMB efughị efu - Ndị uweojii Imo steeti

    Ụlọọrụ ndị uweojii Imo steeti ewepụtala ozi gbasara ụmụakwụkwọ iri na ise a sị furu oge ha gara ule JAMB na mpaghara Ọkigwe.

    Ozi ọnụ na-ekwuru ndị uweojii Imo steeti bụ Henry Okoye wepụtara n'ụbọchị Sọnde 18 Mee 2025 kwuru na enweghị oge ọbụla a tọọrọ ụmụakwụkwọ ahụ si n'ụlọakwụkwọ Eminent Scholars Imperial Academy dị n'Ọnịcha, Anambra steeti.

    Dịka ozi ahụ siri kwuo, ha bụ ụmụakwụkwọ na onye nwe ụlọakwụkwọ ha rutere Imo steeti n'udo n'ụbọchị 16 Mee 2025 ma leekwa ule ha dịka e siri hazie ya.

    Okoye kwuru na ọ bụ oge ụmụakwụkwọ ahụ na-ala ka ụgbọala ha mebiri na mpaghara Amuro dị n'Ọkigwe, bụ ebe ikuku nzirịtaozi na-adịghị.

    Ọ sịrị na ọnọdụ ahụ gbochiri mkparịtaụka n'etiti ụmụakwụkwọ ahụ na ndị nwe ha, bụ nke mere ụfọdụ mmadụ jiri fesaa ozi ụgha na soshal midịa gbasara nchekwa ha.

    "Oge anyị natara ozi ahụ, ndị uweojii Imo steeti na ụlọọrụ nchekwa ndị ọzọ gbapụrụ ọsọ chọta ụmụakwụkwọ ahụ ma duru ha bata n'Owere".

    "Dịka e dozichara ụgbọala ha, ụmụakwụkwọ ahụ na onye nwe ụlọakwụkwọ ha bidokwara njem ha ma laruo Ọnịcha n'ụbọchị 17 Mee 2025 na-enweghị nsogbu," ka Okoye kwuru.

    Ọ gara n'ihu kelee ọhanaeze maka ezi mmetụta ha ma nye ndụmọdụ ka onye niile wepụ aka n'ifesa akụkọ ụgha.

14. 18 Mee 2025Ụlọọgwụ niile dị na mgbago ugwu Gaza enweghịzi nke na-arụ ọrụ - Mịnịstrị ahụike

    Mịnịstrị na-ahụ maka ahụike na Gaza ekwuola na ulọọgwụ niile dị na mgbago ugwu Gaza enweghịzi nke na-arụ ọrụ dịka ndị agha Izrel gara n'ihu na-ebuso ma na-anwụchi ndị nọ na mpaghara ahụ.

    N'ụbọchị Sundee 18 Mee, ndị agha Izrel wuchiri n'ụlọọgwụ dị na Beit Lahia ma gbochie ndị na-arịa ọrịa, ndị ọrụ ahụike na ihe ndị e ji arụ ọrụ ịbata ebe ahụ.

    Mịnịstrị na-ahụ maka ahụike na Gaza kwuru na kemgbe e mebiri ụlọọgwụ Beit Hanoun Hospital na Kamal Adwan Hospital, ọ bụ Indonesian Hospital bu naanị ụlọọgwụ nke na-aru ọrụ mana ndịagha Izrel akpachiela ya.

15. 18 Mee 2025Popu Leo XIV ewepụtara ihe ga-akacha mkpa n’ọchịchị ya

    Popu Leo XIV weputere ihe ndị ga-akacha mkpa n’ọchịchị ya dịka Popu n’ụbọchị Sọnde, n’oge a kaara ya ụka e jiri duo ya n’aka Chukwu na St Peter Square.

    Popu Leo XIV jiri ohere ahụ katọọ mmegbu ndị ogbenye na ndị ọchịchị aka ike.

    Ọ katọrọ "ịkpọasị, mmadụ ime ibe ya ihe ike, nkewa, na usoro akụnaụba nke na-erigbu akụ ụwa niile ma na-eleda ndị kasị daa ogbenye anya" na ihe ndị ọzọ.

    Popu kwuru na ya chọrọ ịhụ na ụlọụka dị n'otu karịa, nakwa na ndị mmadụ ekwesịghị ike onwe ha na nkenke na nkenke otu na-eme ka ha akacha ndị ọzọ mma n’ụwa.

    Ọ gwara ndị ụka na-ege ya ntị sị “Ana m abịakwute gị dị ka nwanne”.

    O kwukwara na ya ga-ejisiike "gbanarị ọnwụnwa nke ị bụ onye ọchịchị aka ike".

    Osote Onyeisiala mba Amerịka bụ JD Vance, Odeakwụkwọ mba Amerịka bụ Marco Rubio na Onyeisiala mba Yukren bụ Volodymyr Zelensky so na ndị bịara ya bụ ụka maasị a kaara na Vatikan.

    Popu kwuru na ya ga-emecha zute Zelensky na nzuzo iji kparịtaụka maka agha Rọshịa na Yukren.

16. 18 Mee 2025Mmadụ abụọ anwụọla dịka ụgbọmmiri ndịagha Meziko kpọkara n’akwammiri Brooklyn

    Mmadụ abụọ anwụọla ebe opekatampe iri na itoolu ndị ọzọ merụrụ ahụ oge ụgbọmmiri ogologo e ji enye ndịagha mmiri Meziko ọzụzụ kpọkara n’akwammiri Brooklyn dị na New York.

    Ndị uweojii kwuru na mmadụ 227 nọ n’ime ụgbọmmiri ahụ a maara dịka Cuauhtémoc tupu ọ nyụọ oge onye na-akwọ ụgbọmmiri na-erugharị n’osimiri, bụ nke mere o ji suo n’akwammiri.

    Otu onye bi na Brooklyn bụ Nick Corso hụrụ ka ọdachi ahụ siri mee ma kwuo na ọnọdụ ahụ tinyere ọtụtụ mmadụ na nnukwu ụjọ.

    Ọ gwara ụlọmgbasaozi AFP na “a nụrụ ka ọtụtụ mmadụ na-eti mkpu ebe ụfọdụ ndị gara jide aka n’igwe.”

17. 18 Mee 2025Agaghịm azọ ọkwa Onyeisiala n’afọ 2027 maka ihi Tinubu – Wike

    Nyosom Wike bụbu Gọvanọ chiri Rịva steeti ma bụrụkwa mịnịsta na-ahụ maka Abuja ekwuola na ya enweghị mmasị ịzọ ọkwa Onyeisiala Naịjirịa n’afọ 2027.

    Nyosom Wike kwuru nke a ma kọwaa na ya enweghị mmasị ịjiri otu Patị Peoples Democratic Party (PDP) nwere zọsa Onyeisiala Bola Tinubu ọkwa n’afọ 2027.

    Cheta na tupuu a malite ntụlịaka Onyeisiala Naịjirịa n’afọ 2023, Nyesom Wike gbara mbọ ịzọ ọkwa Onyeisiala n’otu PDP mana Atiku Abubakar meriri ya ma jiri otu Pati ahụ zọọ ọkwa.

    Kamgbe ahụ Wike kwuru na PDP emeteghị ya maka na ha nyere Onye mpaghara Ogwu Naịjirịa akọrọtọ ị jiri pati ha zọọ ọkwa Onyeisiala n'agbanyeghị na Mahamadu Buhari na-apụ n'ọkwa mgbe ahụ bụ onye ugwu .

    N’oge BBC gbara Wike ajụjụ ọnụ ka o kwuru na PDP enweghị ike ọbụla imeri na ntuliaka nke Onyeisiala n’afọ 2027 ma ọ bụrụ na ha emezighị ma hazie otu pati ha.

18. 18 Mee 2025Popu Leo XIV ebidola ịka maasị mmalite ọchịchị dịka Popu

    A ga-ekpunye Popu Leo XIV okpu ọchịchị dịka Popu n’ụka maasị a na-aka na St. Peter’s Square taa.

    Ụka ahụ ga-abụ ihe nrụbaama na Popu ebidola ọrụ ya kpọmkwem dịka onye ndu ụka Katọlik.

    A họpụtara Leo dị ka onye ndu ọhụrụ nke Ụka Katọlik na mbido ọnwa bu mee mgbe onye bubụ ya bụ Pope Francis nwụrụ, na Vatican City.

    Popu Leo kara ụka nke mbụ ya na Sistine Chapel n’ụbọchị Mee 9, 2025 ka a họpụtachara ya na ntụliaka ndị kadịnal mere na kọnklav.

    Leo bụ Popu ụka Katọlik nke 267 ma bụrụkwa Popu nke mbụ si mba Amerịka.

19. 18 Mee 2025Ụmụ Igbo, ụtụtụ ọma

    Anyị na-asị ka ụbọchị taa maara onye ọbụla mma

    Anyị ji obiụtọ anabata unu n'ọgbakọ BBC News Igbo n'ụbọchị taa.

    Biko gaa n'ihu nọnyere anyị maka akụkọ niile mere n'ala Igbo, Naịjirịa, Afrịka na ụwa dum gbaa gburugburu.

20. 17 Mee 2025INEC ewepụtala ozi banyere ndị na-azọ ọkwa Gọvanọ Anambra Steeti

    Dịka a na-akwado maka ntuliaka ọkwa Gọvanọ Anambra steeti, ụlọọrụ Independent National Electoral Commission (INEC) ewepụtala ozi banyere ndị ga-azọ ọkwa na ntuliaka ahụ.

    INEC kwuru na ha wepụtara ozi banyere ndị na-azọ ọkwa Gọvanọ na ndị osote ha n’isi ụlọọrụ ha nakwa ụlọọrụ ha dị n’okpuru ọchịchị 21 steeti ahụ.

    Ozi INEC wepụtara n’akara X ha kwuru na ha wepụtara ozi maka ndị na-azọ ọkwa Gọvanọ ahụ iji nye ndị Anambra steeti ohere inyocha ha ma chọpụta ihe dị iche iche banyere ha dịka ebe a mụrụ ya, ụlọakwụkwọ ha gara, ihe ha na-eme nakwa ihe ndị ọzọ banyere ha.

    Cheta na otu pati 16 họpụtara ndị ga-azọrọ ha ọkwa na ntuliaka ahụ a ga-eme ụbọchị Satọde, 8 Nọvemba, 2025.