Kanada akwadoola ịnabata Palestine dịka mba nweere onwe ya

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 17 Julaị 2025Onyeisiala Syrịa aṅụọla iyi ichekwa Druze dịka Izrel wakporo Damaskọs

   

   Ebe foto si, Reuters

   Onyeisiala Syria bụ Ahmed al-Sharaa ekwuola na ọ kwụrụ chịm ichekwa ndị obodo Druze dịka Izrel kwuru na ha ga-awakpo ndịagha ha kwuru na ha wakporo mpaghara Suweida.

   N’ozi o wepụtara dịka Izrel wakporo Damaskọs, Ahmed al-Sharaa kwuru na Syrịa anaghị atụegwu ọgụ maọbụ agha dị n’ụdị ọbụla.

   Akụkọ kwuru na ndịagha amalitela ịpụ na mpaghara Suweida dịka e nwere nkwekọrịta ịkwụsị ịkwa mgbọ ha na ndị isi obodo Druze nwere, mana o doghị anya ka nke a ọ bụ eziokwu.

   Akụkọ kwuru na ihe ruru mmadụ 350 kemgbe ndị otu ndịagha nnupuisi Druze na ndị Bedouin malitere ịwakpo onwe ụbọchị Sọnde 13 Julaị, 2025.

2. 17 Julaị 2025Mba Amerịka achụọla ọkaipe nọchitere anya ha n’ikpe Sean ‘Diddy’ combs n’ọrụ

   

   Ebe foto si, Reuters

   Gọọmenti mba Amerịka achụọla nwaanyị ọkaikpe nọchitere anya ha n’ikpe gbasara mmetọ ịkwaso mmadụ iko n’ike gbasara Jeffrey Epstein,Ghislaine Maxwell, na otiegwu a maama bụ Sean "Diddy" Combs.

   Ọkaikpe ahụ aha ya bụ Maurene Comey ka a napụrụ ọrụ ya na mpaghara Saụt, New York mana enwebeghị onye maara ihe e ji napụ ya ọrụ ya.

   Maurene Comney bụ nwa onye bụbu onyeisi FBI aha ya bụ James Comey bụ onye Onyeisiala mba Amerịka bụ Donald Trump chụrụ n’ọrụ n’afọ 2017.

   Ngaraba iwu nke gọọmenti mba Amerịka achụọla ndị ọkaiwu n’ọrụ ọkachasị ndị nọchịtere anya gọọmenti n’okwu dị icheiche nke were Onyeisiala Trump iwe .

   Ms Comey bụ ọkaiwu na-anọchịta anya gọọmenti n’ikpe dị icheiche na-ada ụda kamgbe afọ 2015 na mpaghara Manhattan mana achụrụ ya n’ọrụ ma hara ịgwa ya ihe mere I jiri chụọ ya n’ọrụ dịka ndị maara ihe na-eme si gwaa Politico.

3. 17 Julaị 2025Mmadụ 60 anwụọla n’ọkụ gbara ogige azụm ahịa n’Ịraq

   

   Ebe foto si, Reuters

   Akụkọ kwuru na mmadụ 60 nwụrụ oge ọkụ gbara ogige azụm ahịa dị na mpaghara Kut mba Ịraq.

   Ndị ọchịchị kwuru na ọkụ ahụ gbara ogige azụm ahịa ahụ malitere ọrụ n’abalị ise gara aga, bụ n’abalị Wenezde 16 Julaị ka ọ malitere.

   Ihe onyonyo pụtara ihe na soshal midia gosiri oge ndị ọrụ gbatagbata na-agba mbọ ịzọpụta ndị mmadụ oge ọkụ malitere.

   Gọvanọ mpaghara ahụ bụ Mohammed al-Miyahi kwuru na oke ọdachị adakwasịla ha ma kwuo na ha ga-enyocha ma kpọpụ onye nwe ụlọ azụm ahịa ahụ ụlọikpe.

4. 17 Julaị 2025Ụtụtụ ọma Igbo ndị ọma

   Anyị na-anabata gị n'ọgbakọ BBC Igbo taa bụ Tọzde 17, Julaị, 2025.

   Anyị kwụrụ chịm iwetara gị akụkọ niile gbara ọkpụrụkpụ si mbaụwa. Biko gaa n'ihu sonyere anyị n'akara soshal midia anyị dị iche iche ma sonyere Whatsapp Channel anyị.

   Ndewo.

5. 16 Julaị 2025Aka akparala otu nwaanyị ji onyonyo mmekọ ya na ndị 'monk' anapụla ha ego n'ike

   

   Ebe foto si, Getty Images

   Ndị uweojii na Thailand anwụchiela otu nwaanyị e boro ebubo na o dinara ndị nchụaja ‘Monk’ ma were ihe onyonyo aramara ha na-anapụ ha ego n’ike.

   Ndị uweojii sị na nwaanyị a ha kpọrọ “Ms Golf” na ndị monk ruru itoolu nwere mmekọ anụahụ. Ha kwuru na ha o nwetere ego ruru nde dọla 11.9 ($11.9m) n’ime afọ atọ gara aga.

   Ndị ọrụ nnyocha nyochara ụlọ nwaanyị ahụ hụrụ foto na onyonyo karịrị puku iri asatọ (80,000) nke o ji na-eyija ndị monk ahụ, ka ọnụ na-ekwuru ndị uweojii kwuru.

   Nke a bụ ọgbaghara ọhụrụ ga-adakwasị obodo Thailand n’ime nzuko ndị okpukperechi Buddhist, bụ ndị e borola ebubo na ndị monk na-eme akwamiko ndị mmadụ ma na-aṅụkwa ọgwụike.

   Ndị uweojii sị na ha nwetere mkpesa ahụ n’ọnwa Juun, mgbe otu onye monk hapụrụ ọrụ ya na otu nwaanyị na-anapụ ya ego n’ike.

   Ha kwuru na nwada Golf na onye monk ahụ nwere mmekọ n’ọnwa Mee 2024. Mana o kwuru na ọ mụụrụ ya nwa ma sị ka a kwụọ ego dị nde baht asaa maka iji lekọta nwa ha.

   Ndị ọrụ chọpụtara na ọtụtụ ndị Monk ndị ọzọ zigaara nwada Golf ego – nke ndị uweojii kwuru na “ọ bụ usoro o si arụ ọrụ ya”.

   Ndị uweojii kwuru na ha chọpụtara na ego niile ahụ na a dọrọchaala ya ma were ụfọdụ ya gbaa chaachaa n’ịntanetị.

6. 16 Julaị 2025Mba Amerịka achụpụla mmadụ isi maka ime ihe ọjọọ, kpọga ha Eswatini

   

   Ebe foto si, Alamy

   Mba Amerịka achụpụla mmadụ ise maka ajọ ihe ha mere ma kpọga ha mba Eswatini dị n’Afrịka.

   Mmadụ ise ndị ahụ si mba dị icheiche gunyere Kuba, Vietnam, Yemen, Laos na Jamaika.

   N’ime mmadụ ise ndị ahụ ka ụlọikpe mara ikpe maka ihe ọjọọ dị icheiche dịka ịma nwatakiri elu n’ike, nakwa igbu mmadụ dịka etu onye ọrụ Gọọmenti mba Amerịka bụ Tricia McLaughlin si kwuo.

   McLaughlin kwuru na “mba Amerịka bugara ndị ahụ n’Eswatini mgbe mba ha dị icheiche ekweteghị anabata ha ise”.

   Ndị ọchịchị Eswatini kwetere na ọ bụ eziokwu na e bubatara mmadụ ise ndị ahụ na mba ha ma kwuo na ha ghọtara “mmasị igwe mmadụ nwere banyere ị nabata ndị ahụ”.

7. 16 Julaị 2025Mba Izrel amalitela ịtụ ogbunigwe na Damascus, mba Syria

   

   Ebe foto si, Reuters

   Mba Izrel ekwuola na ha tụrụ ogbunigwe n’ogige ndịagha Syria dị nso n’obi ọchịchị onyeisiala mba ha dị n’obodo Damascus.

   Ogbunigwe ahụ tụrụ n’isiụlọọrụ ndịagha Syria dị n’obodo ahụ - otu onye nkịtị nwụrụ ebe mmadụ iri na asatọ merụrụ ahụ na mwakpo ahụ dịka minista ahụike mba Syria si kwuo.

   Izrel kwuru na ha na-achọ ichekwa ụmụafọ Druze nọ na mpagara south-west nke Syria bụ ebe a na-enwe ọgbaghara dị egwu.

   “Anyị na-agba mbọ ịzọpụta ụmụnne anyị ndị Druze ma kpọchapụ ndị ekperima na-akpa ikpe,” Praịm minista Izrel bụ Benjamin Netanyahu kwuru.

   Odeakwụkwọ gọọmentị mba Amerịka bụ Marco Rubio kwuru na ọgụ ahụ na-ada na Syria “na-enwe ha nsogbu”.

   O kwuru na ha agwala mba abụọ ndị a ka ha kwụsị ya bụ ọgụ. Na ha chọrọ ka ọgụ ahụ kwụsị.

   

   Ebe foto si, Getty Images

   Kedụ ndị bụ ndị Druze?

   Druze bụ okpukperechi gbapụtara site n’akarala okpukperechi ndị Alakụba ‘Shia’, o nwere njirimaara ha na nkwenye ha dị iche.

   Ọnọdụ ha na ndọrọ ndọrọ ọchịchị mba Syria dị njọ, ọkara n’ime otu nde mmadụ na-eso ha bi na Syria dịka ha mejupụtara pasentị atọ n’ọnụọgụgụ ndị mba ahụ, ebe ndị ọzọ bi na Lebano, Izrel na Golan Height.

   Praịm minista mba Izrel dọrọ aka na ntị na ọ gaghị ekwe ka ihe ọbụla mee ndị Druze dịka e nwere onyeisi agha ọhụrụ na Syria.

8. 16 Julaị 2025Atiku Abubarka apụọla na PDP

   

   Ebe foto si, Atiku Abubarka / Facebook

   Atiku Abubarka ji otu ndọrọ ndọrọ ọchịchị Peoples Democratic Party (PDP) were zọọ ọkwa Onyeisiala Naịjirịa n’afọ 2023 edeela akwụkwọ sị na ya-apụọla dịka onye otu ahụ.

   Atiku degara onye isi Patị ahụ na Jada ‘ward one’ dị na opkuru ọchichi Jada, Adamawa steeti bụ nke ha wetere n’abalị Julaị 14, 2025 ma kówaa ihe mere ya ji pụọ na PDP.

   O kenerele PDP maka ohere e nyere ya ịbụ ihe niile ọ bụ na Pati ahụ ọkachasị ị bụ Osote Onyeisiala Naịjirịa site n’afọ 1999 ruo afọ 2007.

   Atiku kwuru na ihe mere ya ji pụọ bụ etu ọnọdụ si dị na PDP ugbua bụ nke ọ kọwara dịka ihe na-esoghị n’ebum n’obi ndị guzobere ya.

9. 16 Julaị 2025Trump kwuru na ọkaiwu Amerịka kwesịrị iwepụta ozi 'ntụkwasị obi' maka Epstein

   

   Ebe foto si, Getty Images

   Onyeisiala mba Amerịka bụ Donald Trump ekwuola na onye ọkaiwu Pam Bondi kwesịrị iwepụta ozi ọbụla “o chere nwere ntụkwasị obi” maka onye omempụ mmekọahụ Jeffrey Epstein, na nzaghachi anaghị ahụkebe dịka ọ chọrọ itinye oke n’ihe gbasara ikpe ahụ.

   Cheta na ọtụtụ ndị nkwado ọchịchị Onyeisiala Trump katọrọ Bondi dịka o kwuru n’izu gara aga na-enweghị ihe akaebe ọbụla gosiri na Epstein dobere akwụkwọ listi na-egosi ndị ahịa ya maọbụ na ọ na-eyi ndị a ma ama n’ọchịchị egwu.

   N’ime izuụka gara aga, Onyeisiala Trump gwara ndị nkwado ya ka ha “ghara imefu oge na ike ha” n’ikpe ahụ. Mana ndị nkwado Onyeisiala Trump gụnyere onyeisi Ndị Nnọchiteanya Mike Johnson, na-akpọ oku maka "aka ịkwụ ọtọ".

   Chetakwa na ọnwụ Epstein n’afọ 2019 n’ime ụlọmkpọrọ mba Amerịka mgbe a na-eche gọọmenti etiti ikpebi ikpe ya, ka e kwuru na ọ bụ ọnwụ igbu onwe.

10. 16 Julaị 2025Egburu mmadụ 20 n’ebe enyemaka Gaza - Otu enyemaka GHF

    

    Ebe foto si, Reuters

    Otu enyemaka mba Amerịka na Izrel na-akwado bụ Gaza Humanitarian Foundation (GHF) ekwuola na mmadụ iri abụọ anwụọla n’ihe a kpọrọ ‘ọnọdụ ọjọọ’ n’otu ebe enyemaka dị na mpaghara ndịda Gaza.

    E kwuru na eji ụkwụ zọgbuo mmadụ iri na itoolu ebe amagburu otu onye “n'etiti ọgbaaghara ahụ” nke mere n’ebe dị na mpaghara Khan Younis.

    Ọ gbakwụnyere na o kwenyere na ọ bụ "ndị na-eme ihe ike n'ime igwe mmadụ ahụ" bụ ndị ha na Hamas nwere mmekọ kpalitere ọgbaaghara ahụ.

    Ka ọ dị ugbua, ụlọmgbasa ozi BBC emebeghị nnoycha banyere akụkọ a.

    Mana, ndị ọrụ ụlọọgwụ Nasser dị na Khan Younis kwuru na mbụ na ihe karịrị mmadụ iri ka egburu dịka ndị ọzọ merụrụ ahụ n'ihi ekughị ume dịka ndị ọrụ nchekwa GHF mechiri saịtị enyemaka ahụ.

11. 16 Julaị 2025Trump amalitela nnyocha omume azụmaahịa 'ezighị ezi' nke mba Brazil

    

    Ebe foto si, Getty Images

    Ọchịchị onyeisiala mba Amerịka bụ Donald Trump ekwuola na ha ga-amalitela nnoycha omume azụmaahịa ‘ezighị ezi’ nke mba Brazil.

    E kwuru na nnoycha ahụ gụnyere iwu gọọmentị Brazil "metụtara azụmaahịa dijitalụ na ọrụ ịkwụ ụgwọ eletrọnịkị; tarifu mmasị; mgbochi nrụrụaka", dịka nkwupụta sitere n’aka onye nnọchianya azụmaahịa mba Amerịka siri kwuo.

    Ọzọ, nnoycha ahụ bụ iji chọpụta ma mba Brazil "a na-emegbu maọbụ ịkpa oke maọbụ igbochie azụmahịa nke mba Amerịka."

    Cheta na izu gara aga, Onyeisiala mba Amerịka bụ Donald Trump gwara ndị ọchịchị Brazil ka ha kwụsị mmegbu ha na-emegbu onye bụbu Onyeisiala Jair Bolsonaro nke a na-ebo ebubo na ọ “na-emegịde" mba ahụ.

    Onye nnọchi anya azụmaahịa mba Amerịka Jamieson Greer kwuru na a na-ebido nnyocha a na ntụzịaka Onyeisiala Trump maka “mwakpo Brazil wakporo ụlọọrụ mgbasa ozi Amerịka yana omume azụmaahịa ndị ọzọ na-ezighi ezi na-emerụ ụlọọrụ Amerịka, ndị ọrụ, ndị ọrụ ugbo na ndị na-emepụta teknụzụ”.

12. 16 Julaị 2025Ụtụtụ ọma ndị be anyị

    Nnọọ n'ọgbakọ BBC News Igbo taa bụ Wenezde, 16 Julaị, 2025.

    Anyị na-asị ka taa mịtara anyị niile mkpụrụ ọma.

    Biko, na-esonyere anyị dịka anyị na-ewetara unu akụkọ ihe na-eme na Naịjirịa, Afrịka nakwa ụwa niile.

    Ndewo!

13. 15 Julaị 2025Ndịagha Etiopịa 'gburu' ndị ọrụ enyemaka n’agha Tigray - Ọrụ ebere

    

    Ebe foto si, MSF

    Ndịagha gọọmentị Etiopịa “gburu” mmadụ atọ ndị ọrụ enyemaka ahụike nke ụlọọrụ Médecins Sans Frontières (MSF) mgbe ha gara njem ọrụ ebere n’Etiopịa n’ebe ahụ agha na-aga n’ihu na mpaghara ugwu Tigray afọ anọ gara aga, otu onye ọrụ MSF gwara BBC.

    Raquel Ayora kwuru nke a mgbe MSF wepụtara ozi nnoycha ha mere banyere ihe ha kpọrọ “kpachapụru anya" gbuo mmadụ atọ - otu onye mba Spen na ndị Etiopia mmadụ abụọ - n'oge ọgbaaghara Tigray nke kwụsịrị ugbu a.

    "E gburu ha," Nwaada Ayora, onyeisi ụlọọrụ MSF Spen kwuru.

    "Ha chere ndị wakporo ha n’ihu mgbe a gbara ha mgbọ egbe na nso nso... ọtụtụ oge."

    Ka ọ dị ugbua, ụlọmgbasa ozi BBC ajụọla gọọmentị Etiopịa ka ha wepụta nzaghachi banyere ebubo a.

    Cheta na onye Spen dị afọ iri atọ na ise María Hernández Matas, yana Yohannes Halefom Reda dị afọ iri atọ na abụọ na Tedros Gebremariam dị afọ iri atọ na otu, nwụrụ na 24 Juun 2021 ka ha na-eme njem na mpaghara etiti Tigray iji chọpụta mkpa ahụike na mpaghara ahụ agha na-aga n’ihu oge ahụ.

14. 15 Julaị 2025Onyeisiala Trump kwuru na obi adịghị ya mma ebe Putin nọ

    

    Ebe foto si, Getty Images

    Onyeisiala Donald Trump ekwuola na obi adịghị ya mma dịka ya nwere mmụọ nkụda ebe Onyeisiala mba Rọshịa bụ Vladimir Putin nọ mana ya na Putin emechabeghị.

    Onyeisiala mba Amerịka gwara ụlọmgbasa ozi BBC na mkparịtaụka ekwe ntị na ya enweghị ntụkwasa obi n’onye ọ bụla mgbe a jụrụ ya ma o nwere ntụkwasa obi n’ebe onye ndu mba Rọshịa ahụ nọ.

    Na zaghachiri, o kwuru: “E nweghị ntụkwasị obi n’ebe onye ọbụla nọ.”

    Trump kwupụtara nke a dịka ọ gachara awa ole na ole o kwupụtachara na mba Amerịka ga-eziga ngwaagha na Yukren ma dọọ aka na ntị na ya ga-etinye ụtụisi dị elu na mbubata niile si Rọshịa ma ọ bụrụ na enweghị nkwekọrịta nkwụsị ịkwa mgbọ n’abalị iri ise.

    Na mkparịtaụka ahụ nke ha nwere n’ụlọọrụ onyeisiala mba Amerịka, Onyeisiala Trump kwadoro otu Nato. O kwupụtara nkwado ya n’ebe usoro nchekwa nke otu ahụ dị.

15. 15 Julaị 2025Ndị be anyị, ụtụtụ ọma nu

    Nnọọ n'ọgbakọ BBC News Igbo taa bụ Tuzde, 15 Julaị, 2025.

    Ekpere anyị taa bụ ka ọ dịrị onye ukwu na onye nta mma.

    Biko, na-esonyere anyị dịka anyị na-ewetara unu akụkọ ihe na-eme na Naịjirịa, Afrịka nakwa ụwa niile.

    Udo dịrị gị!

16. 14 Julaị 2025E liela ozu Eze Sikiru Kayode Adetona ‘Awujale of Ijebu land’

    

    Ebe foto si, Babajide Sanwo-Olu/X

    E liela ozu Eze Sikiru Kayode Adetona jị ọkwa ‘Awujale of Ijebu land’ n’ulọ ya dị n’Igbe, Ijebu Ode, Ogun Steeti.

    Eze Sikiru nwụrụ ụbọchị Sọnde 13, Julaị, 2025 ka ọ gbara afọ 91.

    Akụkọ kwuru na e liri ozu n’elekere anọ nke mgbede n’ụbọchị Mọnde 14 Julaị, 2025 dịka usoro okpukperechi siri kwu.

    Ọtụtụ ndị a ma ama bịara kwanyere ya ugwu ikpeazụ gụnyere Gọvanọ Dapo Abiodun na-achị Ogun steeti onye kwuru na ọnwụ Eze Sikiru bụ nnukwu ọdachi dakwasịrị steeti ahụ, ala yoroba niile nakwa Naịjịrịa.

    Ndị ọzọ bịara olili ozu ahụ bụ Gọvanọ Babalide Sanwo-Olu na-achị Legọs steeti, Yemi Osinbajo bụbu osote onyeisiala Naịjirịa, Gọvanọ Gboyega Oyetola na-achị Osun steeti nakwa ọtụtụ ndị ọzọ ọnụ na-eru n’okwu na Naịjirịa.

    

    Ebe foto si, Babajide Sanwo-Olu/X

17. 14 Julaị 2025Mmadụ 30 anwụọla n’ọgbaghara dị n'etiti Druze na Bedouin na ndịda Syrịa

    

    Ebe foto si, Reuters

    Ihe ruru mmadụ iri atọ anwụọla n’ihi ọgbaghara dị n’etiti agbụrụ Sunni Bedouin na ndịagha nnupụisi Druze na ndịda Syrịa, dịka minista na-ahụ maka ime obodo siri kwuo.

    Ọgbaghara a malitere n’obodo Druze na mpagahra nke Suweida n’ụbọchị Sọnde, ka ọ gachara abalị abụọ akụkọ kwuru na a tọrọ onye ọchụnta ego Druze n’okporoụzọ Damaskọs.

    Mịnịstrị na-ahụ maka ime obodo kwuru na ọnọdụ ahụ ga-ebute ihe ize ndụ ọjọọ ma kwuo na a na-ebuga ndị ọrụ nchekwa iji gbaa mbọ iweghachi udo na mpaghara ahụ.

    Ọ bụ ntiwapụ ọhụrụ a na-akpata ọgbaghara n’etiti agbụrụ na mba ahụ kemgbe ndịagha nnupụisi nke ndị Alakụba na-edu kwaturu ọchịchị Onyeisiala Bashar al-Assad na Disemba.

18. 14 Julaị 2025Onyeisiala Trump ekwuola na mba Amerịka ga-ezigara Yukren akụrụngwa 'ọkaibe' dị iche iche

    

    Ebe foto si, EPA

    Onyeisiala mba Amerịka bụ Donald Trump ekwuola na Amerịka ga-eziga ngwaagha "ọkaibe" dị iche iche na Yukren.

    Dịka o kwuru na abalị Sọnde, Onyeisiala mba Amerịka kwupụtara na ngwaagha ndị ahụ ga-agụnye usoro nchebe ngwaagha Patriot, "nke mba Yukren chọrọ nke ukwuu."

    Onyeisiala Trump katọrọ Onyeisiala mba Rọshịa bụ Vladimir Putin na-ekwu na "Putin tụrụ ọtụtụ mmadụ n'anya - ọ na-ekwu okwu dị mma mana mgbede ọ na-atụ onye ọ bụla bọmbụ."

    Cheta na Onyeisiala mba Yukren Volodymyr Zelensky kwuru n’izu gara aga, na mba Amerịka amalitela izitere ha ngwaagha dịka mwakpo mba Rọshịa na-akawanye njọ.

    Onyeisiala Trump kwuru na a ga-akwụghachi Amerịka ụgwọ ya ruo pasent "100" maka akụrụngwa ọhụrụ ndị a, na-agbakwụnye, sị: "Ọ bụ otu a ka ọ kwesịrị ịdị ogologo oge gara aga."

19. 14 Julaị 2025Igbo ndị ọma, anyị ekele unu

    Nnọọ n'ọgbakọ BBC News Igbo taa bụ Mọnde, 14 Julaị, 2025.

    Anyị na-asị ka izu ọhụrụ a mịtara anyị niile mkpụrụ ọma.

    Biko, na-esonyere anyị dịka anyị na-ewetara unu akụkọ ihe na-eme na Naịjirịa, Afrịka nakwa ụwa niile.

    Ndewo!

20. 13 Julaị 2025Mba Amerịka akwụsịla ikpe a na-ekpe dọkịnta maka ebubo imebi agwụ mgbochi covid-19

    

    Ebe foto si, Reuters

    Onye ọkaiwu gọọmentị Amerịka enyela iwu ka akagbuo ebubo e boro dọkịnta Micheal Moore Jr sị na ọ mebiri ọgwụ mgbochi Covid-19 nke ọnụ ahịa ya ruru puku dọla iri abụọ na asatọ ($28,000/£20,742)

    Ebubo ọzọ e boro ya bụ ikesa kaadị ndekọ nke iwu na-akwadoghị na inye ụmụaka ọgwụ salịn kama ịgba ha ọgwụ mgbochi Covid-19.

    Onye ọkaiwu gọọmentị bụ Pam Bodi kwupụtara nke a si na dọkịnta Micheal Moore Jr. "nyere ndị ọrịa ya ohere ịhọrọ mgbe gọọmentị enweghị ike".

    E boro Dọkịnta Michael ebubo ahụ n'oge ọchịchị onye bụbu Onyeisiala mba Amerịka bụ Joe Biden n'afọ 2023.

    Onye na-arụ ọrụ dịka ọkaiwu mba Amerika na mpaghara Utah bụ Felice John Viti gbara akwụkwọ ka a kagbuo ebubo ahụ n’ụbọchị Satọde 12 Julaị, 2025, na-ekwu na nke a bụ "n'ihi ikpe ziri ezi".