Ndị isi mpaghara Etiti Ọwụwa Anyanwụ na Yurop anabatala atụmatụ udo Gaza nke Trump

Nchịkọta akụkọ ndị kachasị mkpa mere na mbaụwa n'ọnwa Septemba 2025.

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

11 Septemba 2025Ndị uweojii anwụchiela ndị omekome karịrị puku ise n’ọnwa isii n’Enugwu Steeti
Ebe foto si, Nigeria Police Force
Kọmishọna ndị uweojii Enugwu steeti bụ Mamman Bitrus Giwa ekwuola na ndị ọrụ ya anwụchiela ndị omekome dị puku ise, nari iri asaa na isii (5,176 ) n’onwa isii ọ malitere ọrụ dịka kọmishọna ndị uweojii steeti ahụ.
O kwuru na ndị omekome ahụ gụnyere ndị ohi, ndị ntọrị, ndị otu nzuzo, ndị na-azọ nwere onwe nakwa ndị dara iwu obodo di iche iche.
Giwa kọwapụtara na oge ọ malitere ọrụ n’ọnwa isii gara aga, o kpebiri ibelata mkpa mkpa ndị omekome na-akpa n’Enugwu steeti site na-inye ngalaba ndị uweojii dị iche iche nke steeti nkwado zuru oke n’ọrụ ha.
Ihe o kwuru ha nwetara n’aka ndị omekome ahụ gụnyere ego dị nde naira iri bụ nke ha napụtara ndị ntọrị, egbe 105 dị iche iche gụnyere AK 47 asatọ, otu egbe G-3 automatic, mgbọ egbe 271, ụgbọala 71, anwụrụ ike, uwe ndịagha nke adigboroja, egbe ọka, na ihe ndị ọzọ.
Kọmishọna Giwa mere ka o doo anya na ndị uweojii Enugwu Steeti kwụrụ chịm ibuso ndị omekome agha na steeti ahụ ma hụ na Enugwu steei nwere ezi nchekwa.
Ebe foto si, Nigeria Police Force
11 Septemba 2025FBI ewepụtala foto onye a na-eyo eyo na ọ gbagburu Charlie Kirk
Ebe foto si, FBI
Ụlọọrụ FBI mba Amerịka ewepụtala foto nwaamadị a na-eyo eyo na ọ gbgburu Charlie Kirk ma kwuo na a ga-enye onye ọbụla nwere ozi ga-enyeaka chọta nwoke ahụ onyinye ego puku narị dọla ($100,000).
E kwuru na a na-achọ nwaamadị ahụ achọ mana a hụla nnukwu egbe n’ime ọhịa dị nso n’ebe ahụ nakwa nzọ ụkwụ mmadụ.
A gbagburu Kirk bụ onye nkwado Onyeisiala Trump na mahadum Utah University, mana ndị ọrụ nchekwa kwuru na onye a na-eyo eyo na ọ bụ ya gbagburu Kirk bụ nwata akwụkwọ.
Ka ọ dị ugbua, ndị ọrụ nchekwa atọhapụla mmadụ abụọ ha nwuchiri na mbụ.
Onyeisiala Trump kwuru na ọ ga-enye Kirk nkwanye ugwu “Presidential Medal of Freedom” n’ọnwụ.
11 Septemba 2025Saụt Afrịka - Ụlọikpe kachasị ekpebiela na nwoke chọọ ọ zaa aha nna nwunye ya
Ebe foto si, Visual Ideas/Getty Images
Nkọwa foto, Di na nwunye
Ụlọikpe kachasị na mba Saụt Afrịka ekpebiela na nwoke nwereike ịza aha nna nwunye ya.
Mkpebi ọhụrụ ha kpeharịrị mkpebi ụlọikpe dị ala nyere nke machiri nwoke ịza aha nna nwunye ya.
Di na nwunye nwetere okwu ahụ n’ụlọikpe kọwara mkpebi nke machiri nwoke ịza aha nna nwunye ya dịka mlpagbu umunwaanyị nakwa ịkpaoke okiki mmadụ.
Nke a dịka mmeri di na nwunye nwetere okwu ahụ n’ụlọikpe.
A napụrụ Henry van der Merwe ikike ịza aha nna nwunye ya bụ Jana Jordaan ebe Andreas Nicolas Bornman enweghị ikike ịgbakwụnye aha nwunye ya bụ Donnelly.
Aha nwunye Andreas bụ Jess Donnelly-Bornman.
Ugbua ndị omeiwu na mba Saụt Afrịka ga-agbanwe iwu gbasara ndekọ ndị a mụrụ ọhụrụ nakwa ndị nwụrụ anwụ.
11 Septemba 2025A tụọla ụmụafọ Chaịna mkpọrọ maka ntọrị na mba Saụt Afrịka
Ebe foto si, Buthanani Thobela/Department of labour
Nkọwa foto, Ọtụtụ ndị mmadụ nabatara mkpọrọ atụrụ ndị amaala Chaịna na Saụt Afrịka
Atụọla ụmụafọ Chaịna asaa mkpọrọ afọ iri abụọ maka ịkpọbata ndị Malawi n'ụzọ iwu na-akwadoghị na mba Saụt Afrịka ma tinye ha n'ọrụ ike.
Ụlọikpe Saụt Afrịka chọpụtara ndị nwoke anọ ahụ na ụmụnwaanyị atọ ndị a mara ikpe ịtụ mgbere mmadụ na ntọrị na mmalite afọ a.
Nke a na-abịa n'ime afọ isii a nwuchiri ha mgbe dị ọchịchị obodo wakporo ụlọọrụ mmepụta ihe dị na mpaghara Johannesburg wee hụ ndị mba Malawi iri itoolu na otu, nke mmadụ iri atọ na asaa n'ime ha bụ ụmụaka, ebe ha na-arụ ọrụ n'ọnọdụ jọgburu onwe ya.
Ndị a tụrụ mkpọrọ bụ Kevin Tsao, Chen Hui, Qin Li, Jiaqing Zhou, Ma Biao, Dai Junying na Zhang Zhilian.
11 Septemba 2025Trump ekwuola na ọnwụ Charlie Kirk bụ oge ọchịchịrị n'Amerịka
Ebe foto si, Getty Images
Onye otu Conservative a ma ama na-agbakọrọ Donald Trump aka bụ Charlie Kirk anwụọla ka a gbachara ya egbe n'otu mmemme a haziri n'ogige mahadum dị n'Utah.
Na mgbasaozi o mere n'onyonyoo, Onyeisiala Amerịka kwuru na obi ya jupụtara "n'iwe na iru uju maka ogbugbu e gburu nwaokoroọbịa ahụ", ma kọwaa ya dịka "oge ọchịchịrị n'Amerịka".
E mechara tọghapụ mmadụ abụọ ndị a nwuchiri n'ihi na ndị nchekwa kwuru na o nweghị ihe jikọrọ ha na egbe a gbara.
A ka na-achọ onye aka ya dị n'ọnwụ Kirk, mana ndị nchekwa echeghị na onye ahụ ka nọ n'ogige mahadum, ka onye ntaakụkọ anyị nọ na Utah Valley University kwuru.
Ndị nchekwa kwenyere na ọ bụ n'elu ụlọ ka e siri gbaa egbe ahụ, dịka BBC Verify nyocharala onyonyoo e kesara n'ọbaozi oge a gbachara egbe ahụ.
Kirk dị afọ iri na asatọ oge o hiwere otu ndị conservative a kpọrọ Turning Point USA. Ya na Onyeisiala Amerịka bụ Donald Trump na ezinaụlọ ya dị na mma nke ukwuu.
11 Septemba 2025Igbo ndị ọma, ụnụ asaala chi, Ka ụbọchị taa maara onye niile mma
Obiụtọ ka anyị ji anabata gị n'ọgbakọ BBC News Igbo n'ụbọchị taa bụ Tọzde Orie 11 Septemba, 2024.
Gaa na websaịtị, Facebook, Instagram nakwa Whatsapp Chanelụ anyị ka i nweta akụkọ niile na-akpọtụ n'ụwa.
N'ụtụtụ a, ọ bụ Chinonso Ugorji na Marvelous Obomanu ka gị na ha ga-anọrị mana Uzoamaka Ewuzie, Michael Ngene na Michael Ilediagu ga-emecha buru oche n'oge ehihie.
Biko gaa n'ihu nọnyere anyị.
10 Septemba 2025Gọọmenti Qatar ekwuola na ọ manyeghị iwu ọhụrụ n'usoro ndị Naịjirịa ji enweta akwụkwọ njem visa
Ebe foto si, Getty Images
Mịnịstrị mba Qatar na-ahụ maka ihe na-eme n’ime obodo emeela ka o doo anya na akụkọ ahụ na-efegharị na ha manyere iwu ọhụrụ n’usoro ndị Naịjirịa ji enweta akwụkwọ njem visa abụghị eziokwu.
Mịnịstrị ahụ gwara BBC na onye Naịjirịa ọbụla tozuru etozu chọrọ ime njem na Qatar nwere ikike ịga n’ihu tinye akwụkwọ iji nweta akwụkwọ njem visa.
Cheta na n’ime abalị ole na ole gara aga, akụkọ malitere ifeagharị na mba Qatar manyere iwu ọhụrụ nke gbochiri ndị ntorobịa Naịjirịa ime njem na Qatar belụzọ na ọ bụ ya na ezinaụlọ ya na-eme njem ahụ.
Akụkọ ahụ kwuru na iwu ọhụrụ ahụ kwuru na onye ọbụla Naịjirịa ọbụla na eme njem na Qatar ga-akwụ ụgwọ njem ụgbọelu uje na ụla ma kwuọ ụgwọ n’ụlọ oriri na ọṅụṅụ 5-star tupu e nye ya akwụkwụ visa.
Nchọpụta kwuru na ọ bụ ụlọọrụ Discover Qatar wepụtara akụkọ banyere iwu ọhụrụ a. Ha kwuru na ihe mere e ji tinye iwu ọhụrụ ahụ bụ maka na ọtụtụ ndị Naịjirịa na-anọ karịa ohere akwụkwọ njem visa e nyere.
Ụlọọrụ Hayya bụ ụlọọrụ na-ahụ maka inweta akwụkwọ njem E-visa mba Qatar, gwara BBC na usoro inweta akwụkwọ njem visa mba Qatar na-aga n’ihu ma kwuo na enweghị iwu ọhụrụ ọbụla maọbụ mmachi ọbụla a machiri ndị Naịjirịa inweta akwụkwọ njem Qatar.
10 Septemba 2025Trump na-agbado Yorup ka ha tinye 100% tarifu na mbubata Chaịna na Ịndịa
Ebe foto si, Getty Images
Nkọwa foto, Vladimir Putin na Donald Trump enwebeghị nkwekọrịta udo maka agha Yukren
Onyeisiala mba Amerịka bụ Donald Trump akpọọla otu mba Yorup bụ European Union (EU) oku ka ha tinye tarifu pasent 100 na mbubata si Chaịna na Ịndịa iji manye Onyeisiala mba Rọshịa bụ Vladimir Putin ka ọ kwụsị agha Yukren.
Onyeisiala mba Amerịka kwuru nke a n'oge nzukọ dị n'etiti ndị ọrụ mba Amerịka na EU n’ụbọchị Tuzde, ma na-atụle etu a ga-esi arụgide akụnaụba nke Rọshịa, dịka otu onye maara maka mkparịtaụka ahụ siri gwara BBC.
Cheta na Onyeisiala Trump kweburu nkwa ịkwụsị esemokwu ahụ na "ụbọchị mbụ" ọ bụrụ onyeisiala, ka na-agbasi mbọ ike ime ka nkwekọrịta udo dị n'etiti Moscow na Kyiv, n’agbanyeghị na mwakpo ndị Rọshịa Yukren abawanyela.
N’aka nke ọzọ, Trump gwara ndị ntaakụkọ n’ụbọchị Tuzde na ọ na-ezube ịgwa Putin okwu n’ekwentị n'izu a maọbụ na mbido izu na-abịa.
10 Septemba 2025A gbagbuola onye Ọkaiwu mba Kenya na Nairobi
Ebe foto si, Faith Odhiambo/LSK
Ihe ịtụnanya mere na mba Kenya oge ndị ji ọgbaatumtum kwaa mgbọ aghara aghara n’otu ogbe dị na Naịrobi gbagburu onye Ọkaiwu ọkwa ya dị elu.
Ọkaiwu ahụ a na-akwanyere ugwu aha ya bụ Matthew Kyalo Mbobu ji ụgbọala ya na-ala n’abalị Tuzde tupu ndị ojiegbe ahụ bu ọgbaatumtum akwụsị n’akụkụ ụgbọala ya ma gbaa ya egbe aghara aghara.
Ndị hụrụ ka o si mee n’okporoụzọ si Lang’ata gawa Magadi kwuru na ha nụrụ ọtụtụ ụda egbe.
A matabeghị ebumnobi e ji mee mwakpo ahụ mana o yiri ogbugbu e gburu otu Ọkaiwu na mmalite afọ a. Ka o sina dị, a malitela ime nnyocha.
Otu jikọtara ndị Ọkaiwu na Kenya bụ Law Society of Kenya akọwaala ogbugbu ahụ dịka “nke ha anabataghị” ma kwuo na a ga-elebarịrị anya n’arụ ahụ ozugbo nakwa n’ụzọ doro anya.
Ha gosiri mmetụta gbasara egwu a na-eyi ndị Ọkaiwu, ma gbakwunye na ogbugbu ndị ahụ nwechara ihe gosiri na ha bụ igbu ọchụ.
Onyonyoo e kesara n’ọbaozi soshal midịa gosiri mpio ụgbọala a gbakara agbaka tinyere ozu onye Ọkaiwu ahụ ọbara juru n’ahụ ya.
10 Septemba 2025Poland agbatuola droonu mba Rọshịa – Ka Praịm Minista ha kwuru
Ebe foto si, EPA
Praịm Minista Poland bụ Donald Tusk ekwuola na “ọtụtụ droonu mba Rọshịa” nupuruisi n’usoro na-achịkọta iji ikuku eme ihe, oge ha wakporo ọdịda anyanwụ mba Yukren.
Oge ọ na-ekwu okwu ka a na-eche maka nzukọ gbatagbata, Tusk sịrị na nke ahụ bụ oge mbụ a na-agbatu droonu mba Rọshịa na Poland.
Ndịagha akwụsịla ọrụ ha dịka mba Poland na otu Nato zipụrụ ụgbọelu ha, tinyekwara na ọtụtụ ọdọụgbọelu emepeghachila.
Ka o sina dị, mba Rọshịa ekwubeghị okwu ọbụla.
Droonu ndị febatara na Poland bụ akụkụ mwakpo gbara ọkpụrụkpụ e si n’elu mee na Yukren, bụ ebe Rọshịa zigara droonu narị anọ na iri na ise n’ime abalị.
Oyeisiala Yukren bụ Volodymir Zelensky kwuru na “opekatampe droonu asatọ e ji atụ ogbunigwe” chewere ihu na Poland, ma kọwaa ya dịka “nke dị ezigbo njọ maka mba Yurop”.
10 Septemba 2025Igbo kara aka, ụnụ abọọla chi, Ka ụbọchị taa maara onye niile mma
Obiụtọ ka anyị ji anabata gị n'ọgbakọ BBC News Igbo n'ụbọchị taa bụ Wenezde Eke 10 Septemba, 2024.
Gaa na websaịtị, Facebook, Instagram nakwa Whatsapp Chanelụ anyị ka i nweta akụkọ niile na-akpọtụ n'ụwa.
N'ụtụtụ a, ọ bụ Ikechukwu Kalu na Chinonso Ugorji ka gị na ha ga-anọrị mana Uzoamaka Ewuzie, Michael Ngene na Michael Ilediagu ga-emecha buru oche n'oge ehihie.
Biko gaa n'ihu nọnyere anyị.
9 Septemba 2025A gbaala ụlọ ndị omeiwu ọkụ na mba Nepal dịka Praịm Mịnịsta ha rituru n’ọkwa
Ebe foto si, EPA/Shutterstoc
Nkọwa foto, Obi gọọmenti na Nepal
Praịm mịnịsta mba Neapal bụ KP Sharma Oli arịtuola n’oche dịka ndị na-eme ngagharịiwe gbara ụlọ ndị omeiwu ọkụ na mba ahụ.
Ụmụamaala mba Nepel ji iwe maka mmadụ iri na itoolu so eme ngagharịiwe e gburu n’ụbọchị monde garaaga mgbe ndị na-eme ngagharịiwe na ndị uweojii kwatara.
N’ụbọchị Tuzde ka ndị na-eme ngagharịiwe mwakporo ụlọ ọrụ ndị omeiwu na-kwa ụlọọrụ gọọmenti dị icheiche ma gbaa ha ọkụ.
E gburu mmadụ atọ n’ime ndị na-eme ngagharịiwe ebe ndị nọ na mkpọrọ ruru narị itoolu si na nga gbapụ na mkpaghara ọdịda anyanwụ mba ahụ dịka gọọmenti ha si kwuo.
Mmachi gọọmenti machiri soshal midia bụ ihe butere ngagharịiwe na mba Nepal mana n’agbanyeghị na gọọmenti enwepụla iwu ahụ n’ụbọchị mọnde, ndị mmadụ jụrụ ma ṅṅụọ iyi na gọọmenti ga-apụ n'ọchịchị.
Etu ọnọdụ dị ugbua amabeghị onye ga-anọchị anya Praịm mịnịsta KP Sharma Oli rituru n'ọkwa.
9 Septemba 2025Nwunye onye bụbu onyeisiala enwetela ikike ịzọ ọkwa onyeisiala mba Ivory Coast
Ebe foto si, AFP via Getty Images
Nwunye onye bụbu onyeisiala Aịvrị Kost bụ Simone Gbagbo dị afọ iri asaa na isii esonyela n’aha mmadụ ise e nyere ikike ịzọ ọkwa onyeisiala mba ahụ na ntụliaka a ga-ahazi n’ọnwa na-abịa abịa.
Simone Gbagbo ga-azọ ọkwa ahụ megide Onyeisiala Alassane Ouattara dị afọ iri asatọ na atọ, bụ onye weere oche oge ya na di ya bụ Laurent Gbagbo pụrụ n’ọchịchị.
Cheta na a nwụchiri Laurent Gbagbo na nwunye ya n’obi ọchịchị mba Aịvrị Kost oge e nwere ọgbaaghara na mba ahụ n’ihi ntuliaka afọ 2010.
Ka o sina dị, a machiri Laurent ịzọ ọkwa ahụ, tinyere onye bụbu Praịm Minista bụ Pascal Affi N'Guessan nakwa Onyeisi ụlọakụ Credit Suisse bụ Tidjane Thiam.
9 Septemba 2025Ndịagha Izrel ekwuola ihe mere ha ji mwakpoo Doha, Isi obodo mba Qatar
Ebe foto si, Reuters
Nkọwa foto, Doha, Qatar
Ụlọọrụ Israel Defense Forces (IDF) ekwuola ihe mere ha ji mwakpo otu ụlọ dị na Doha isi obodo mba Qatar ma kọwaa na ọ bụ ndị isi Hamas ka ha chọrọ igbu.
N’ozi ha wepụtara ka ha kwuru na “ndị isi otu Hamas ahụ ha tụrụ ogbunigwe na Doha so na ndị kpara nkata ma mwakpoo mba Izrel n’Ọktoba 7 bụ ebe ha gburu ọtụtụ ndị Izrel ma tọrọ ndị ọzọ”.
“Tupuu anyị atụọ ogbunigwe n’ebe ha nọ na Doha, anyị gbara mbọ mee ka ọ hara ịmetụta ndị nkịtị”
“IDF na ISA ga-ejisi ike merie ndị otu Hamas maka arụ ha kpara n’Ọktoba 7”.
9 Septemba 2025ICC ebidola ikpe Joseph Kony bụ onye ndu ndịagha nnupuisi na mba Uganda maka nrụrụaka n’agha
Ebe foto si, AFP via Getty Images
Nkọwa foto, Joseph Kony
Ụlọikpe mba ụwa bụ Iinternational Criminal Court (ICC) ebidola ikpe Joseph Kony bụ onye ndu ndịagha nnupuisi na mba Uganda maka nrụrụaka n’agha n’agbanyeghị na ọ nọghị n’ụlọikpe.
Nke a dịka nwale ICC na-eme ị jiri malite ikpe ndị nnukwu mmadụ nwere agba ikpe ọkachasị ndị ha enweghị ike ime ka ha bịa zara ọnụ ha n’ụlọikpe.
N’agbanyeghị na ICC nyere iwu ka e jichie ya kamgbe afọ iri abụọ garaaga mana Kony bụ onye wepụtara otu ndịagha ahụ bụ Lord's Resistance Army (LRA) gbanara oge niile a chọrọ ijide ya.
A na-ebo ya ebubo iri atọ na itoolu nke gunyere igbu mmadụ, ịtọrọ mmadụ, ịmanye ụmụaka ka ha gaa nụọ agha, ịmetọ ụmụnwaanyị na arụ ndị ọzọ.
Kony na-ebuso gọọmenti mba Uganda agha kwuo na ya chọrọ iguzobe ọchịchị nakwa gọọmenti ga-agbado ụkwụ n’iwu nke Chiukwu ọnụ ọgụgụ ya dị iri dịka ọ dị n’akwụkwọ nsọ.
Mana ndịagha ya na-eme arụ dị icheiche ma na-egbu ndị mmadụ maọbụ nwere mma bepụ ha akụkụ ahụ ha, aka maọbụ meruo ha ahụ n’ihu.
9 Septemba 2025Ụlọikpe atụọla onye bụbu Praịm Minista mba Thailand mkpọrọ
Ebe foto si, Getty Images
Ụlọikpe Kachasị na mba Thailand atụọla onye bụbu Praịm Minista mba ahụ bụ Thaksin Shinawatra mkpọrọ.
Ọkaiwu nọ na Bangkok gwara Shinawatra na njichi e jichiri ya n’ụlọọgwụ oge a machara ya ikpe nrụrụaka adịghị n’iwu.
O nyeziri iwu ka e jichie Maazị Thaksin n’ụlọmkpọrọ ruo otu afọ.
Onye ahụ bụbu Praịm Minista nabatara ikpe ahụ ma kwuo na ya ga-eme ihe niile a gwara ya mee na-enweghị nsogbu ọbụla.
N’ọnwa gara aga, ka a manyere nwa ya nwaanyị bụ Shinawatra, ịgba arụkwaghịm dịka Praịm Minista.
9 Septemba 2025Ndịagha Izrel agwala ndị bi n’obodo Gaza ka ha kwakọrọ pụọ ngwa ngwa
Ebe foto si, Reuters
Ndịagha Izrel enyela ndị bi na Gaza iwu ka ha si n’obodo ahụ pụọ ngwa ngwa ma kwuo na ha chọrọ iji aka ike arụ ọrụ dị egwu ebe ahụ.
N’ozi gbasara na soshal midia, onye na-asụrụ ndịagha a asụsụ Arab “gwara ndị nọ nso n’akụkọ obodo ahụ ka ha kwara pụọ ma gaa n’ogige ebe a na-enyere ndị mmadụ.”
“Izrel na-enye ndị mmadụ ruru ọnụọgụgụ otu nde ka ha si n’obodo pụọ - mana UN kwuru na o nweghi ebe “nchekwa” dị na Gaza, ka Wyre Davies nọ na Jerusalem si dee.
Ebe foto si, Reuters
Nke a na-abịa dịka ndị omeiwu mba Izrel kwadoro atụmatụ iwere ọchịchị na Gaza kpam kpam n’obodo ahụ a kachasị anụ aha ya n’ụwa - ọtụtụ ndị mmadụ n’ụwa akatọọla atụmatụ a.
Gọọmenti Izrela anaghị ekwe ka ndị ntaakụkọ si mbaụwa gụnyere BBC banye na Gaza ma kọọ akụkọ ihe na-eme ebe ahụ.
9 Septemba 2025Ndị na-eme ngagharịiwe na Nepal agbaala ụlọ onye bụbu Praịm mịnịsta ọkụ
Ebe foto si, Getty Images
Nkọwa foto, Ọ bụ ndị ntoroọbịa ọgbọ ọhụrụ a kpọrọ Gen Z nọ n'isi ngagharịiwe a na-eme megide mpụ na nrụrụaka na Nepal
Ndị na-eme ngagharịiwe megide mpụ na nrụrụaka na mba Nepal agbaala ụlọ onye bụbu Praịm mịnịsta ha ọkụ dịka ọgbaghara na-arị ibe ya elu.
Dịka ọ dị ugbua ndị mịnịsta atọ agbaala arụkwaghịm n’ọrụ ha.
Nke a na-abịa dịka gọọmenti wepuru mmachị dị aṅaa ha machiri ọgbakọ sọshal midia iri abụọ na isii, gụnyere Facebook na YouTube.
Ọ bụ mmachi ahụ butere ngagharịiwe na nsọkata isi ndị uweojii na ndị na-eme ngagharịiwe nke buterela ọnwụ mmadụ iri na itoolu.
A tinyeburu mmachi ahụ maka mgbasaozi megide nrụrụaka e ji soshal midia na-agbasa a kpọrọ ‘nepo babies’ nke metụtara ụmụaka ndị ndọrọ ndọrọ ọchịchị maka ndụ dị oke ọnụ ha na-ebi.
Ngagharịiwe ahụ na-arị ibe ya elu na-agbanyeghi ọnọdụ onye apụla ezi e tinyere n’akụkụ isiobodo mba ahụ bụ Kathmandu.
9 Septemba 2025Igbo ndị ọma mma mma nụ ooo!
Obiọma ka anyị ji anabata gị n'ọgbakọ BBC Igbo taa.
Biko buru oche gị bịa ka ị gụrụ akụkọ ndị gbapụtara ihe n'ụwa gbaa gburu gburu.
8 Septemba 2025Amerịka akpọọla oku ka mba Yurope tinye aka iji kwụsị agha dị na Yukren
Ebe foto si, Getty Images
Nkọwa foto, Nke a na-abịa dịka mba Roshịa wakpọrọ Yukren n’ụbọchị Sọnde 8 Septemba, 2025.
Odeakwụkwọ ego mba Amerịka sị na mba Amerịka dị njikere ịkwanyekwu Rọshịa ọkụ n'ahụ iji hụ na ha kwụsịrị agha dị n'etiti ha na Yukren.
Nke a na-abịa dịka mba Rọshịa wakporo Yukren n’ụbọchị Sọnde 8 Septemba, 2025.
Scott Bessent bụ Odeakwụkwọ ego Amerịka gwara ndị ntaakụkọ na ọ bụrụ na mba Yurope na Amerịka jikọọ aka ha ọnụ ma wepụta ụtụisi ọhụrụ manye mba ndị na-azụ Rọshịa mmanụ agbidi, ọ ga-emetụta akụnaụba Rọshịa.
Onyeisiala mba Amerịka sị na ọ dị njikere itinye mmachi na Rọshịa mana akọwaghị otu mmachi ahụ ga-adị.