Ndị isi mpaghara Etiti Ọwụwa Anyanwụ na Yurop anabatala atụmatụ udo Gaza nke Trump

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 21 Septemba 2025Praịm Mịnịsta Keir Starmer ga-ekwuputa na UK anabata Palestinia dịka steeti kwụrụ onwe ya

   Praịm Mịnịsta Keir Starmer ga-anọ n’ụbọchị Sọnde 21 Septemba, 2025 kwuputa na UK anabatala Palestinia dịka steeti kwụụrụ onwe ya.

   N’ọnwa Julaị ka Starmer kwuru na mba UK ga-agbanwe nkwenye ha ma ọ bụrụ na Izrel emezughị ụfọdụ ihe gụnyere nkwekọrịta ịkwụsị ịkwa mgbọ na Gaza nakwa nkwekọrịta udo nke ga-enye Palestinia ohere ịkwụrụ onwe ya.

   Mana mba Izrel anabataghị nke a kemgbe agha bidoro oge otu Hamas wakporo mpaghara Saụt Izrel na 7 Ọktoba, 2023 ma gbuo mmadụ 1,200 ma nwuchie mmadụ 251.

   Mkpebi Keir Starmer bụ nke gọọmenti mba Izrel, ezinaụlọ ndị a nwuchiri katọrọ.

   N’aka nke ọzọ Praịm Mịnịsta mba Izrel bụ Benjamin Netanyahu kwuru na ịhụta Palestinia dịka steeti kwụụrụ onwe ya ga-ebute agha.

2. 20 Septemba 2025Mwakpo e mere n'ịntanetị ebutela ndọghachiazụ n'ọdọụgbọelu Heathrow na ndị ọzọ

   Ọdọụgbọelu Heathrow so na ọtụtụ ọdọụgbọelu nọ na mpaghara Yurop nke mwakpo ịntanetị na-emetụta usoro iji akụrụngwa eletrọnịkị enyocha ndị mmadụ na ngwongwo na-abanye ụgbọelu.

   Ndị ọrụ ọdọụgbọelu dọrọ aka na ntị maka igbu oge n'ihi nsogbu teknụzụ ahụ na-emetụta ngwanrọ nke Collins Aerospace nyere ọtụtụ ụgbọelu.

   Ka ọ dị ugbua, ọdọụgbọelu nke mba Belgium kwuru na mwakpo ịntanetị n'abalị Fraịde 20 Septemba 2025 mere ka e jri aka na-enyocha ndị njem tupu ha wee banye n’ụgbọelu, ebe ọdọụgbọelu Brandenburg nke mba Jamini kọkwara na ọ na-ewe ndị njem ogologo oge echere n'ihi nsogbu ahụ.

   Mana ụlọọrụ RTX nwe akụrụngwa Collins Aerospace kwuru na ọ mara maka mwakpo nke ịntanetị ahụ mere n’ụfọdụ ọdọụgbọelu ma kwuo na ọ na-agba mbọ imezi ya.

3. 20 Septemba 2025Trump agbakwunyela $100,000 n’ụgwọ akwụkwọ njem ‘visa’ ndị ọrụ aka

   Onyeisiala mba Amerịka bụ Donald Trump ebinyela aka n’iwu ọhụrụ nke ga-agbakwunye ego ruru $100,000 n’ụgwọ ndị na-achọ akwụkwọ njem ‘visa’ H-1B nke ndị ọrụ aka na-akwụ kwa afọ.

   Iwu ọhụrụ a Onyeisiala Trump wepụtara kwuru na ọ bụ maka "mmetọ" nke ndị batara mba Amerịka site na mmemme ahụ, ma kwuo na ọ ga-amachibido ọtụtụ ịbanye na mba ma ọ bụrụ na ha akwụghị ụgwọ ahụ.

   Ndị nkatọ na-arụ ụka ogologo oge na inye akwụkwọ njem ‘visa’ H-1Bs na-emebi ndị ọrụ Amerịka, ebe ndị na-akwado ya - gụnyere onye ọchụ nta ego bụ Elon Musk - na-arụ ụka na ọ na-enye mba Amerịka ohere ịdọta ndị ọrụ pụrụ iche site na gburugburu ụwa.

   Kemgbe 2004, gọọmenti mba Amerịka tinyere ọnụ ọgụgụ ndị ha na-enye akwụkwọ njem ‘visa’ H-1B na puku iri asatọ na ise (85,000) kwa afọ.

   Ruo ugbu a, ụgwọ nchịkwa dị iche iche ndị na-achọ akwụkwọ njem ‘visa’ H-1B na-akwụ gbakọtara $1,500.

4. 20 Septemba 2025Mwakpo e mere n’ụlọ alakụba na mba Sudan egbuola mmadụ iri asaa na asatọ

   Ihe karịrị mmadụ iri asaa anwụola dịka atụrụ ogbunigwe n’ụlọ alakụba nọ na mpaghara Darfur nọ na Sudan, dịka otu onye ọrụ ahụike si kwuo.

   Akụkọ kwuru na ọ bụ ndịagha Rapid Support Forces (RSF) mere mwakpo a n’ụbọchị Fraịde 19 Sepụtemba na obodo el-Fasher mana RSF ekwubeghị ma ọ bụ ha mere ya.

   Ndị agha RSF na ndịagha Sudan na-enwe agha obodo kemgbe afọ abụọ.

   Otu onye bi na mpaghara ebe ọdachi a mere si na atụrụ ogbunigwe ahụ mgbe a na-eme ekpere isi ọtụtụ nke mere ọtụtụ mmadụ ji nwụọ ozugbo dịka a ka na-achọ ọtụtụ ndị mmadụ.

5. 20 Septemba 2025Mba Estonia na-achọ ndụmọdụ Nato ka ụgbọelu mba Rọshịa batara na mbara ikuku ha

   Mba Estonia na-achọ ndụmọdụ mba ndị mejupụtara NATO ka ụgbọelu mba Rọshịa batara na mbara ikuku ha n’ụbọchị Fraịde 19 Sepụtemba, 2025.

   Gọọment Estonia kwuru na ụgbọelu Rọshịa atọ MiG-31 eji alụ ọgụ batara n’ikuku ha “na-enweghị ikike ha natara mba Estonia ma nọọrọ na mbara ikuku ha rụọ nkeji iri na abụọ” tupu ha efepu.

   Praịm Minista Estonia Kristen Michal si na “Nzaghachi Nato maka mkpasu iwe ọ bụla ga-adị n'otu ma sie ike."

   Rọshịa ekwuola na ha abataghị na mbara ikuku Estonia. Mana ndị mmadụ na-enwe obere ọbere ụjọ kemgbe mba Poland na Romania kwuru na ha hụrụ ụgbọelụ Rọshịa na mbara ikuku ha.

6. 20 Septemba 2025Ndị uweojii anwuchiela ndị ojiegbe ezu ma wetaghachi ụgbọala ise e zuru n'Ebonyi Steeti

   Ndị uweojii Ebonyi steeti anwuchiela mmadụ anọ a na-enyo enyo na ha na atọrọ mmadụ ma wetaghachi ụgbọala ise e zuru ezu.

   Na nkwupụta onu na-ekwushitere ndị uweojii n’Ebonyi steeti Joshua Ukandu wepụtara, ọ kọwara na ndị ọrụ uweojji na-emegide ntọọrọ mmadụ wuchiri ebe nzuzo ha n’ụlọ nkwari akụ nọ na Nwagana na obodo Umuhuali, ọchịchị ime obodo Ishielu.

   Ndị ha nwuchiri mgbe ha ruru ebe ahụ bụ Chinedu Okorie na Okpaga Chibueze nke ndị uweojii na-enyo enyo ugbu a ma wetaghachi ụgbọelu Lexus nke bu akara LSR 895 DB.

   Ọ gara n’ihu kwuo na nkwupụta ndị ahụ ejidere mere ka ndị uweojji gaa Abuja ebe ndị otu ha mmadụ abụọ, Stanley Benson Agada na Joshua Noah Olatunji nọ ma jide ha.

   Ha wetaghachiri ụgbọalọ anọ n’aka mmadụ abụọ ndị otu n’atọrọ mmadụ ahụ ha jidekwara na Abuja nke gunyere ụgbọala Toyota Corolla (KWL 141 CE), Toyota Highlander Jeep (LSD 589 JX), Toyota Venza (LXR 272 JH) nakwa Toyota Sienna Bus (RSH 196 DF).

   Ndị uweojii amatala ndị nwe ụgbọala ndị ahụ. A na-atụ anya na-emecha ihe akwụkwọ nọya n’ime ha ga-enyeghachi ha ụgbọala ha.

7. 20 Septemba 2025Ndị uweojii Malawi anwụchiela mmadụ asatọ maka ebubo ime wayo na nrụrụaka na ntuliaka

   Onyeisi ndị uweojji na mba Malawi Merlyne Yolamu ekwuola na ha ejidela mmadụ asatọ maka ebubo ime wayo na nrụrụaka dịka ndị Malawi na-eche ka ndị ụlọọrụ na-ahụ maka nhazi ntuliaka wepụta aha ndị meriri na ntuliaka emere n’ụbọchị Tuezde.

   Yolamu si na ndị a ejidere nọ na-arụ ọrụ dịka ndị odeakwụkwọ na-etinye akara vootu ndị mmadụ chọrọ imegharị ọnụgụgụ vootu ndị mmadụ tupu ejide ha.

   N’aka nke ọzọ, akụkọ na-ekwu na ọ dị ka Mutharika na-emeri ntulika ọkwa onyeisiala dịka onye nọ na ọchịchị bụ Lazarus Chakwera na-esote ya n’azu.

   Ụlọọrụ na-ahụ maka nhazi ntuliaka nwere ruo ụbọchị Wedenezde 24 Sepụtemba ịkpọpụta aha onye meriri ntuliaka ọkwa onyeisiala mba Malawi.

8. 20 Septemba 2025Ndị be anyị, unu asaala chi, ka ụbọchị taa wetara anyị ihe ọma!

   Igbo bụ Igbo, unu asaala chi, ka ụbọchị taa wetara anyị ihe ọma!

   Obiụtọ ka anyị ji anabata gị n'ọgbakọ BBC News Igbo n'ụbọchị taa bụ Satọde 20 Septemba, 2025.

   Gaa na websaịtị, Facebook, Instagram nakwa Whatsapp Chanelụ anyị ka i nweta akụkọ niile na-akpọtụ n'ụwa.

   N'ụtụtụ a, ọ bụ Marvelous Obomanu ka gị na ya ga-anọrị mana Uzoamaka Ewuzie na Michael Ilediagu ga-emecha buru oche n'oge ehihie.

   Biko gaa n'ihu nọnyere anyị.

9. 19 Septemba 2025Ejidela ọtụtụ ichi “Placenta” n’aka onye ọrụ ahụike na mba Saụt Afrịka

   Ndị uweojii ejidela onye ọrụ ahụike e wetela ọtụtụ ichi ndị bekee na-akpọ “placenta” n’aka ya na mpaghara Mpumalanga na mba Saụt Afrịka.

   Onye ahụ a na-enyo enyo bụ Rose Mnisi na-achọ ndị ga-azụ ichi ndị ahụ tupuu ndị uweojii ejide ya.

   Mgbe a na-agba ya ajụjụ ọnụ ka ọ gwara ndị uweojii na ya bụ onye na-arụ ọrụ mkpocha na nzacha n’ụlọọgwụ.

   Nwaanyị ahụ dị afọ iri atọ na itoolu bịara n’ụlọikpe maka ebubo inwe akụkụ ahụ mmadụ.

   Dịka ndị uweojii napụrụ ya ichi ndị ahụ ma nwega ya ebe a ga-eme nyocha nke ọma banyere ya mana nwaanyị ahụ enwebeghị ihe o kwuru banyere ebubo e boro ya.

10. 19 Septemba 2025Gọọment Afghanistan amachiela akwụkwọ ọbula ụmụnwannyị dere na mahadum ha

    Ndị Taliban amachiela akwụkwọ ọbula ụmụnwanyị dere dị na mahadum Afghanistan.

    Gọọment Taliban nọ na ọchịchị na mba Afghanistan enyela iwu ka ewepụ akwụkwọ niile ụmụnwannyị dere na Mahadum Afghanistan dịka ha machịrị ikuzi ihe ọbụla gbasara ikike mmadu na iyi egwu mmekọahụ.

    Ha gara n’ihu gwa mahadum ndị ahụ na ha agaghịzi akụzi ihe ọmụmụ iri na asatọ, ebe onye ọrụ Taliban kwuru na ụfọdụ ihe ọmumụ ndị ahụ "na-emegide ụkpụrụ Sharia na iwu ha".

    Iwu a nke metụtara ụmụnwannyị nke ukwu bụ ọtụ n’ime mgbochi nke ndị Taliban na-eweta kemgbe ha lọghachịrị n’ọchịchị afọ anọ gara-aga.

11. 19 Septemba 2025Trump ekwuola na o ‘dị mma’ ịnapụ ụlọọrụ onyoonyo ọbụla ikike ọrụ ha ma ha gbasa ozi ọjọọ maka ya

    Onyeisiala Amerịka bụ Donald Trump atụọla arọ na ọ 'dị mma' ịnapụ ụlọọrụ onyoonyo ọbụla ikike ọrụ ma ha gbasa ozi ọjọọ maka ya.

    Nke a na-abịa dịka nrugide ya mere ka ụlọọrụ ntaakụkọ ABC ji kwụsitụ onye ọrụ ha bụ Jimmy Kimmel na-ahụ maka mgbasa ozi n’abalị tụrụ arọ na onye kwadoro ogbugbu egburu Charlie Kirk na Utah bụ onye otu n’ime ndị nkwado Trump.

    Ụfọdụ ndị mmadụ na-ekwu na nkwụsitụ ọrụ enyere onye ntaakụkọ Jimmy Kimmel bụ atụmatụ Trump iji ibelata nnwere onwe ikwu okwu nke ndị na-akatọ ya.

12. 19 Septemba 2025Amerịka egbochiela okwu UN na-akpọ maka nkwụsị ikwa mgbọ na Gaza

    Dịka ngalaba otu mba ụwa na-ahụ maka nchekwa United Nations Security Council gbakọrọ inwe nzukọ nakwa nkwekọrịta maka ọnọdu ndị mmadu na-akawanye njọ na Gaza, mba Amerịka egbochiela atụmatụ iji nweta ngwọta banyere ndụ ndị mmadụ n’ala n’ihi.

    Mba ndị mejupụtara otu United Nations Security Council mmadụ iri na anọ bịanyere aka na nkwado akwụkwọ mkpebi nke kọwara ọnọdụ dị na Gaza dịka ọdachi ma kpọọ okwu ka Izrel wepụ mmachi ha tinyere n'ibubata ihe enyemaka.

    Onye nọchitere mba Amerịka na ogbakọ ahụ Morgan Ortagus si n’ederede ngalaba nchekwa UN wepụtara agachaghị nke ọma ịkatọ Hamas ma ọ bụ ghọta ikike Izrel ichekwa onwe ya dịka ọ kọwara na nguzogide Amerịka mere n’akwụkwọ ha wepụtara ekwesịghị iju ha anya.

    Onye nnọchianya Palestine na UN Riyad Mansour si na mkpebi Amerịka bụ “ihe ụta nke ukwuu n’afụ ụfụ” dịka ọ na-ekwu na ha egbochiela ngalaba ụlọọrụ UN na-ahụ maka nchekwa irụ ọrụ ha.

13. 19 Septemba 2025Ndị be anyị, unu asaala chi, Ka ụbọchị taa wetara anyị ihe ọma!

    Ndị be anyị, unu asaala chi, ka ụbọchị taa wetara anyị ihe ọma!

    Obiụtọ ka anyị ji anabata gị n'ọgbakọ BBC News Igbo n'ụbọchị taa bụ Fraịde 19 Septemba, 2025.

    Gaa na websaịtị, Facebook, Instagram nakwa Whatsapp Chanelụ anyị ka i nweta akụkọ niile na-akpọtụ n'ụwa.

    N'ụtụtụ a, ọ bụ Marvelous Obomanu na Chinonso Ugorji ka gị na ha ga-anọrị mana Uzoamaka Ewuzie na Michael Ilediagu ga-emecha buru oche n'oge ehihie.

    Biko gaa n'ihu nọnyere anyị.

14. 18 Septemba 2025Macron ga-ewegara ụlọikpe ihe akaebe sayensị gosiri na nwunye ya bụ nwaanyị

    Onyeisiala mba Fransị bụ Emmanuel Macron ekwuola na ya ga-enwegara ụlọikpe akwụkwọ akaebe sayensị gosiri na nwunye ya bụ Brigitte bụ nwaanyị.

    Macron na Brigitte ga-enwegara ụlọikpe akwụkwọ akaebe ahụ maka ikpe ha na nwaanyị a na-akpọ Candace Owen.

    Cheta na ezinaụlọ Macron kpụpụrụ Candace Owen ụlọikpe mgbe ọ gara kwupụta na a mụrụ nwunye Macron bụ Brigitte dịka nwoke.

    Ọkaiwu nke nwunye Macron bụ Tom Clare kwuru na “Brigitte na ahụ okwu ahụ sị na a mụrụ ya dịka nwoke ka ihe mkpasu iwe”.

15. 18 Septemba 2025Trump, Starmer ebinyela aka na nkwekọrịta nkanụzụ kpọọ ya “njikọ na-agaghị enwe nkewa”

    Onyeisiala mba Amerịka bụ Donald Trump na Praịm mịnịsta mba Briten bụ Keir Starmer ebinyela aka na nkwekọrịta gbasara nkanụzụ ma kọwaa ya dịka “njikọ na-agaghị enwe nkewa”.

    Ndị ndu mba abụọ ahụ ka ha binyechara aka na nkwekọrịta ahụ gara zute ndị ji ego achụ ego na Chequers.

    Ha abụọ kwuru na mmekọ mba Briten na Amerịka bụ “mmekọ pụrụiche’ na “nke agaghị enwe nkewa”.

    Dịka ha binyere aka na nkwekọrịta dị icheiche Trump kwuru okwu banyere ịtụisi tarrifu ọ manyere na mbubata na-abata Amerịka ma kwuo na Amerịka enwetela akatamkpo ego n’atụmatụ ahụ.

16. 18 Septemba 2025Ndị uweojii Imo steeti atọhapụla Ngozi Ogbu a tọrọ

    Ndị uweojii n'Imo steeti ekwuola na atọhapụla Ngozi Ogbu, onye bụbu onyeomeiwu nọchitere anya Okigwe.

    A tọhapụrụ ya n'abalị Wednezde 17 Septemba 2025.

    Ndị uweojji kwuru nke a n'ozi ha zipụrụ ndị ụlọọrụ nchekwa ndị ọzọ na-arụkọ iji hụ na e jidere ndị tụrụla Ngozi Ogbu.

    Ndị uweojii kwere ndị n’Imo steeti nkwa na ha na-agba mbọ n'ikwalite udo ma weghachịkwa nchekwa ziriezi n’Imo steeti.

17. 18 Septemba 2025Onyeisiala Trump ezutela Praịm Mịnịsta UK Keir Starmer n'obodo ya

    Onyeisiala Amerịka bụ Donald Trump eruola na obodo Praịm Minista mba Britain bụ Keir Starmer maka nzukọ ha.

    Nke a na-abia dịka Trump zutechara Eze Charles na nwunye ya na Windsor ebe ọ gwara ndị ntaakụkọ na Eze Charles bụ “nwoke ike na eze ukwu”

    Dịka ọ dị ugbu a, na obodo Keir Starmer bụ Chequers, onyeisiala Trump na Starmer na-enyochasi ebe nchekwa Winston Churchill dịka ha na-enwe okwu.

    Ka e mechara, Starmer na Trump ga-esonye na-emume ndị azụmahịa nke Chanselọ UK na-akwado tupu Trump na nwunye ya alọghachi Amerịka.

18. 18 Septemba 2025NECO ekwuola n'aghụghọ ule belatara dịka ha wepụtara mpụtara ule nke afọ 2025

    Ụlọọrụ na ahazi ụle ụmụakwụkwọ sekondịrị NECO sị na aghụghọ ule belatara na ule nke afọ 2025 dịka ha wepụtara mpụtara ule.

    N’ime ọnụọgụgụ ndị dere ule NECO 818, 492 nwetere credit ise dịka 1, 144, 496 nwetere credit ise ma karịa n’ihe ọmụmụ asụsụ Bekee na atụmatụ ngụkọ na mwepụ (Mathematics).

    Ụmụakwụkwọ 1, 367, 210 debanyere aha maka ule nke afo 2025 mana 1,358,339 sonyere dee ule ahụ.

19. 18 Septemba 2025Kedụ ka unu mere, Igbo ndị ọma?

20. 17 Septemba 2025Ụmụaka Gaza 10 na-arịa ọrịa eruteela mba UK inwete ọgwụgwọ

    Ụmụaka na-arịa ọrịa siri ike esila Gaza bata na UK maka nlekọta ahụike ọkachamara nke NHS dịka gọọmenti UK siri kwuo.

    Ụmụntakịrị ahụ si mba Gaza bụ ndị mbụ a kpọbatara na UK maka ọgwụgwọ n’usoro nke atụmatụ gọọmenti na-ahazi.

    Dịka otu ahụike mba ụwa bụ World Health Organization si kwuo, e zipụrụ ụmụaka iri na ndị nleta ha mmadụ iri ise n'ụlọọgwụ.

    Ka ọ dị ugbua, a na-atụ anya na ụmụaka ndị ọzọ ga-erute n'izu ndị na-abịa abịa dịka ọrụ gọọmenti nke ụlọọrụ ofesi, ụlọọrụ na-ahụ maka ụlọ na ngalaba ahụike haziri.