Ndị isi mpaghara Etiti Ọwụwa Anyanwụ na Yurop anabatala atụmatụ udo Gaza nke Trump

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere, Marvelous Obomanu

1. 27 Septemba 2025Gọọmenti Namibia ekwuola ka a kwụsị oriri na ọṅụṅụ n’ebe a na-eli ozu

   Ndị ọchịchị Namibia adọọla aka na ntị nye ndị obodo ha ka ha kwụsị ime oriri na ọṅụṅụ ebe a na-eli ozu.

   Nke a na-abịa mgbe e nwere nnọkọ oriri na ọṅụṅụ n’ebe a na-eli ozu na Gammams bụ isiobodo Windhoek nke kpalitere iwe.

   Otu onye bi na mpaghara Windhoek hụrụ ka a na-eme oriri na ọṅụṅụ si na “ọ bụ ihe ihere” .

   O kwuru na ndị bịara ili onye ha nwụrụ nọ na-aṅụ mmanya n’ihe ndị ọzọ, dịka ha mere ebe a na-eli ozu ka ọ bụrụ ebe a na-ere mmanya.

   Na nkwupụta ndị ọchịchị mere n’ụbọchị Tọzde, ha katọrọ ụdịr,ị omume ahụ ma kwuo na ọ bụ “ịkparị ugwu onye nwụrụ anwụ”.

2. 27 Septemba 2025PENGASSAN agwala ndị otu ya kwụsị izigara ụlọọrụ Dangote mmanụ gaasị

   Otu jikọtara ndị ọrụ mmanụ agbidi bụ ‘Petroleum and Natural Gas Senior Staff Association of Nigeria (PENGASSAN)’ enyela ndị otu ya iwu ka ha kwụsị inye ụlọọrụ ‘Dangote Refinery’ mmanụ gaasị.

   Nke a dị n’akwụkwọ ozi odeakwụkwọ ha bụ Lumumba Okugbawa wepụtara na Fraịde ma boo ụlọọrụ Dangote ebubo na ọ chọrọ ndị ọrụ ya debanyere aha iso n’otu ha bụ PENGASSAN.

   Otu nyere ndị ọrụ niile nọ n’okpuru ya ka ha kwụsị inye ụlọọrụ Dangote mmanụ gaasị ha ga-eji na-esipụta mmanụ ụgbọala.

   Ụfọdụ ụlọọrụ ndị e nyere iwu a gụnyere TotalEnergies, Chevron, Seplat, Shell Nigeria Gas, Oando, and Nigerian Gas Infrastructure Company.

   Ha kwuru na iwu a dị mkpa iji chekwaa ikike dịịrị ndị ọrụ isonye n’otu jikọtara ha na ibe ha.

   Dịka PENGASSAN kwuru na iwu a bụ maka ndị otu ha a chụrụ n’ọrụ, mana ụlọọrụ Dangote adịla na mbụ kwuo na o nweghi igwe mmadụ ọbụla ha chụrụ n’ọrụ kama na ọ bụ naanị ụfọdụ ndị ka o metụtara, na ha mere nke iji chekwaa ụlọọrụ ha ebe a na-esipta mmanụ ụgbọala.

   Ụlọọrụ a kwuru na ihe karịrị mmadụ puku atọ ka nọ n’ọrụ ma kwuo na onye ọbụla nwere ikike isonye n’out ndị ọrụ.

3. 27 Septemba 2025Interpol anwụchiela ọtụtụ mmadụ ji ịntaneti egwu ndị chandum n'Afrịka

   Ndị uweojii mbaụwa bụ Interpol anwụchiela mmadụ ruru narị abụọ na iri isii a na-enyo enyo bụ ndị na-eji ịntanetị eme aghụghọ na mba iri anọ n'Afrịka ma nakọta ọtụtụ akụrụngwa ha ji eme mpụ a.

   Ọrụ a, nke mba Britain kwadoro gbadoro ụkwụ n'etu ndị omemp si eji mgbasaozi ọhanaeze n'ịntanetị anapụ ndị mmadụ ego n'aha ịhụ ha n'anya nakwa iji iyiegwu iwepụta ihe oyonyo mmekọahụ ha n'ọha.

   Ndị ha na-apụrụ ego n'ike ruru mmadụ otu puku na narị anọ na mba Gana, Kenya, Angola nakwa ebe ndị ọzọ.

   Ndị Interpol kwuru na ndị o metụtara tụfuru ego fọrọ ntakịrị ka ọ bụrụ nde dọla abụọ na ụma asaa ($2.8m/£2.1m).

   Dịka onyeisi ngalaba Interpol na-ahụ maka mpụ ịntanetị bụ Neal Jetton gwara BBC na ụfọdụ ndị mpụ a na-emtụta ọfụma bụ ndị okenye.

4. 27 Septemba 2025Elon Musk na Prince Andrew so n'aha ndị a chọpụtara ọhụrụ n'akwụkwọ Epstein

   Onye achụntaego Elon Musk na Prince Andrew esorola n'aha ndị a chọpụtara n'akwụkwọ ndị nzukọ democrats wepụtara gbasara onye omekome mmekọ nwoke na nwanyị nwụrụ anwụ bụ Jeffrey Epstein.

   Akwụkwọ a nke kọmitii na-ahụ maka nlekọta n’ụlọọmeiwu mba Amerịka wepụtara, gosiri na Epstein kpọrọ Elon musk oku n'ebe obibi ya n'ọnwa Disemba afọ 2014.

   N’aka nke ọzọ, ngosipụta ozi gbasara ụgbọelu si New Jersey na-aga Florida n'ọnwa Mee afọ 2000 kpọpụtara aha Prince Andrew ka onye so ndi mere njem ụbọchị ahụ.

   A kpọọla Musk na Prince Andrew maka ikwu okwu gbasara nke a.

   Na mgbakwunye aha Musk na Prince Andrew, akwụkwọ ndị e wepụtara nwekwara aha ndị ọzọ a ma ama nke gụnyere onye achụntaego ịntanetị bụ Peter Thiel na Steve Bannon bụbu onye ndụmọdụ Onyeisiala Donald Trump.

5. 27 Septemba 2025Amerịka akagbuola akwụkwọ visa onyeisiala mba Colombia

   Ngalaba na-ahụ maka inye akwụkwọ visa n'Amerịka akagbuola akwụkwọ visa Onyeisiala Colombia bụ Gustavo Petro maka iso n'otu n'ime ndị na-akwalite mwereonwe Palestine bụ ndị mere ngagharịiwe n'okporoụzọ New York.

   Petro si mpaghara New York nọ n'Amerịka na-aga Bogota n’abalị Fraịde, 26 Sepụtemba, 2025 dịka ndị mgbasaozi Colombia si kwuo tupu ihe a eme.

   Cheta n’izu a, Petro katọrọ omume Donald Trump maka ogbunigwe Amerịka tụrụ ụgbọmmiri a na-enyo enyo bu ọgwụike ma kọwaa na ọ dika omume ahụ bụ “omume ọchịchị aka ike”.

   Minista na-ahụ maka ime obodo na Colombia Armando Benedetti na nkwupụta o mere n'obaozi X ya si na ọ bụ akwụkwọ visa Praịm Minista Mba Izrel Benjamin Netanyahu ka Amerịka kwesịrị ịkagbu.

6. 27 Septemba 2025Ndị be anyị, unu asaala chi

   Obiọma ka anyị ji anabata gị n'ọgbakọ BBC News Igbo n'ụbọchị taa bụ Satọde, 27 Septemba 2025.

   Gaa na websaịtị, Facebook, Instagram nakwa Whatsapp Chanelụ anyị ka i nweta akụkọ niile na-akpọtụ n'ụwa.

   N'ụtụtụ a, ọ bụ Marvelous Obomanu ka gị na ya ga-anọrị, mana Ikechukwu Kalu ga-emecha buru oche n'oge ehihie.

   Biko gaa n'ihu nọnyere anyị.

7. 26 Septemba 2025Trump ekwuola na ya agaghị ekwe ka Netanyahu were West Bank

   Onyeisiala Amerịka bụ Donald Trump ekwuola na ya agaghị ekwe ka Praịm Minista Izrel bụ Benjamin Netanyahu were mpaghara West Bank mba Izrel kpachiri.

   Dịka a na-eche maka ozi Netanyahu ga-agwa ọgbakọ UN General Assembly n’ụbọchị Fraịde, Trump gwara ndị mgbasaozi n’ụlọọrụ Oval Office sị: “Agaghị m ekwe ka Izrel were mpaghara West Bank ... Nke ahụ agaghị eme.”

   Trump, bụ onye ga-ezute Netanyahu n’ụbọchị Mọnde kwukwara na nkwekọrịta gbasara Gaza “na-abịaru nso”.

   Mbaụwa na-akwanye Izrel ọkụ n’ahụ iji kwụsị agha dị na Gaza ma wepụ aka na mpaghara West Bank ha kpachiri.

   Nke a na-abịa dịka ọtụtụ mba ndị Ọdịda Anyanwụ nabatara Palestaịn dịka mba kwụụrụ onwe ya.

8. 26 Septemba 2025Ndị be anyị, unu asaala chi, Ka Eke taa ketere anyị ihe ọma ooo

   Obiụtọ ka anyị ji anabata gị n'ọgbakọ BBC News Igbo n'ụbọchị taa bụ Fraịde Eke, 26 Septemba 2025.

   Gaa na websaịtị, Facebook, Instagram nakwa Whatsapp Chanelụ anyị ka i nweta akụkọ niile na-akpọtụ n'ụwa.

   N'ụtụtụ a, ọ bụ Chinonso Ugorji na Marvelous Obomanu ka gị na ha ga-anọrị, mana Uzoamaka Ewuzie na Michael Ilediagu ga-emecha buru oche n'oge ehihie.

   Biko gaa n'ihu nọnyere anyị.

9. 25 Septemba 2025Ịndịa etinyela iwu mmachibido ngagharị na Ladakh dịka ngagharịiwe ghọrọ ihe ike

   Ndị ọrụ nchekwa nke mba Ịndịa etinyela iwu mmachibido ngagharị na Leh, isi obodo mpaghara Himalaya nke Ladakh, dịka e gbuchara opekatampe mmadụ anọ n’ọgụ dị n'etiti ndị uweojii na ndị ngagharịiwe na-achọ steeti.

   Ọtụtụ ndị merụrụ ahụ ebe a gbara ụlọọrụ nke Bharatiya Janata Party (BJP) na-achị Ịndịa ọkụ n’ọgbaaghara ahụ mere n’ụbọchị Wednezde.

   Ka ọ dị ugbua, gọọmentị boro onye na-akwado Sonam Wangchuk, onye ndu ndị ngagharịiwe ahụ, ebubo ịkpalite ihe ike, bụkwa ebubo nke ọ gọnarịrị.

   Cheta na mpaghara Ladakh nke a maara dịka ọzara ugwu nke nwere ndị Alakụba-Buddha, ka a napụrụ ikike nnwere onwe ya n’afọ 2019 mgbe gọọmentị BJP kewara ya na steeti Ịndịa mbụ nke Jammu na Kashmir na-achị.

10. 25 Septemba 2025Ndị Palestine nọ na West Bank tọrọ atọ ka Izrel mechiri ụzọ ha na Jordan

    Mba Izrel emechiela naanị ụzọ gafere n'etiti West Bank nke Izrel na Jordan gbara agbata obi, na-egbochi ihe karịrị ndị Palestine nde abụọ ịbanye na ịpụ mba ọzọ.

    Ndị na-ahụ maka ọdọụgbọelu nke Izrel, nke na-ahụ maka ịgafe akwa Allenby Bridge, kwuru na a ga-emechi ya ruo mgbe ebighị ebi site n'ụtụtụ Wenezde dịka “usoro iwu ndị ndu ndọrọ ndọrọ ọchịchị" si kọwaa.

    Mana ha akọwaghị ihe kpatara ya.

    Mmechi a emeela ka ọtụtụ ndị Palestine tọọ na West Bank, ndị na-enweghị ike ịga njem ha chọrọ ịga na mba ọzọ. Ndị nọ na mba ofesi enwebeghị ike ịla ụlọ.

    Nke a na-abịa dịka ọ gachara ụbọchị ole na ole otu onye ojiegbe si Jordan gbagburu ndịagha Izrel abụọ n'akụkụ ebe a na-agafe.

11. 25 Septemba 2025Tinubu etinyela atụmatụ agụmakwụkwọ n'efu na kọleji teknụzụ

    Gọọmentị Etiti enyela ịwu ka a malite atụmatụ agụmakwụkwọ na kọleji teknụzụ nile dị na Naijiria n'efu.

    Mịnịsta na-ahụ maka agụmakwụkwọ bụ Maruf Tunji Alausa onye gbara ama n'ụbọchị Tọzde , kwuru na nke a bụ iji nye ohere ka nwata ọbụla nweta ohere agụmakwụkwọ.

    Alausa ,onye kwuru na agụmakwụkwọ n'efu gụnyere ego ụgwọ,akwụkwọ, ụlọ obibi ụmụakwụkwọ , dọrọ ndị ndu ụlọ akwụkwọ aka na ntị ka ha ghara itinye ụgwọ ọbụla n'ụlọakwụkwọ ndị a.

12. 25 Septemba 2025A tụọla Nicolas Sarkozy mkpọrọ afọ ise

    Ọkaikpe Nathalie Gavarino atụọla onye bụbu onyeisiala mba Fransị bụ Nicolas Sarkozy mkpọrọ afọ ise.

    Nke a bụ maka na a chọpụtara na ikpe mara ya n'okwu metụtara ịnara onye ndụ Libịa nwụrụ anwụ bụ Muammar Gaddafi ego iji kwadoo ntuliaka ya n’afọ 2007.

    Onye kpọpụrụ ya n’ụlọikpe sị na Sarkozy hapụrụ ndị otu ya ka ha kpọtụrụ ndị ọrụ Libịa iji nweta nkwado ego maka ntuliaka ya.

    Sarkozy gbara afọ iri asaa bụbu onyeisiala Fransị malite n'afọ 2007 ruo 2012.

    A na-atụ anya na ọ ga-abanye na mkpọrọ na Paris n’ụbọchị na-abịa abịa.

13. 25 Septemba 2025Ebee ka nne na nna ụmụaka na-efu efu na Delta steeti nọ oge a tọọrọ ha? – Ndi uweojii

    Ọnụ na ekwuchitere ndị uweojii Delta steeti bụ Bright Edafe ekwuola okwu gbasara ụmụaka na-efu efu n'obodo Agbarho dị n'okpuru ọchịchị Ughelli North.

    Bright Edafe kwuru na e hiwere kọmitii nnyocha ka ndị nne na nna na-achọ ụmụ ha pụta, mana ọ bụ naanị ụmụaka anọ ka a chọpụtara na-efu efu site n'ọnwa Juun ruo Ọgọst.

    O kwuru na nchọpụta ndị uweojii gosiri na “ụmụaka ndị na-efu efu bụ site na-akpachapụghị anya ndị nne na nna ha”.

    Edafe sị na ndị nne na nna mere mkpesa maka ụmụ ha na-efu efu mana ọnụọgụ ha kwupụtara abụghị eziokwu, n'ihi na “anyị nwetara naanị mkpesa ụmụaka anọ na-efu efu”.

    Ọ jụrụ ajụjụ si “kedụ ebe nne na nna nọ mgbe a tọọrọ ụmụ ha dị afọ abụọ rụọ anọ?”

    Cheta na ụmụnwannyị obodo Agbarho nke okpuru ọchịchị Ughelli North mere ngagharịiwe maka ụmụaka ha na-efu efu kemgbe ọnwa ise, ma boo ndị uweojii ebubo ịsị ka ha buru ụzọ weta ihe ruru otu narị puku naịra tupu ha amalite ime nnyocha ịchọpụta etu ụmụ ha si fuo.

    Mana Bright Edafe kwuru na ebubo ndị ahụ abụghị eziokwu.

    “Ndị nne na nna ụmụ ha na-efu efu ga na-ekwu ihe ọ bụla masịrị ha,” ka Edafe kwuru.

    Dịka ụmụnwaanyị ahụ si kwụọ mgbe ndị ntaakụkọ Arise TV gbara ha ajụjụ ọnụ, ọnụọgụgụ ụmụaka ha na-efụ efu karịrị iri ise.

14. 25 Septemba 2025E zigaala ndị Ọdịda Anyanwụ Afrịka isii e nyere ọsọ n'Amerịka na mba Togo

    E dugaala opekatampe mmadụ isii n'ime iri na otu ndị Ọdịda-Anyanwụ a chụpụrụ na mba Amerịka mba Togo, dịka ndị ọkaiwu ha si kwuo.

    Ndị a na-akwadobu ịgba gọọmentị mba Gana akwụkwọ iji gbochie ịchụla ha ọzọ n'ihi egwu ọnọdụ nchebe ha tupu a chuo ha na Gana.

    Onyeisi ndị ọkaiwu ha bụ Oliver Barker-Vormawor gwara BBC sị, "Anyị na-ekwu n'ezie na mmadụ isii bụ ihe e bugarala Togo, ebe e buhara ndị ọzọ mba ndị m agaghị akpọ aha ugbua."

    Naani mmadụ atọ n'ime ndị ahụ e zigara Togo bụ ndị Togo.

    E kwughị ndị ebe ndị ọzọ bụ.

15. 25 Septemba 2025Izrel atụọla ogbunigwe gburu ọtụtụ mmadụ na Gaza

    Ụlọọgwụ ndị obodo ekwuola na ihe karịrị mmadụ iri asatọ nwụrụ dịka ndịagha Izrel tụrụ ogbunigwe na mpaghara Gaza n’ụbọchị Wenezde 24 Septemba.

    Ụmụnwaanyị na ụmụaka sọ na mmadụ iri abụọ nwụrụ site n'ogbunigwe Izrel tụrụ n’abalị n'ụlọ ezinụlọ ndị a chụpụrụ bi n’akụkụ ahịa Firas, n'etiti Daraj na Gaza.

    Ndịagha Izrel si na ha wakporo ndịagha Hamas abụọ mana ọnụọgụgụ ndị e kwuru nwụrụ abụghị eziokwu n'ozi nke ha nwere.

    Ndịagha Izrel ka na-eme mwakpo megide Hamas n'ebe ha kwuru bụ ebe ikpeazụ ndị Hamas nwere ọtụtụ ndịagha.

16. 25 Septemba 2025Otu ihe gbawara n’Imo steeti egbuola otu nwoke ma merụọ ndị ọzọ ahụ - Ndị uweojii

    Ndị uweojii Imo steeti elebanyela anya n’ihe gbawara n’obodo Obinwanne dị n’okpuru ọchịchị Njaba n’Imo steeti.

    Ọnụ na-ekwuru ndị uweojii Imo steeti bụ Henry Okoye kwuru na ọdachi ahụ mere n’ụbọchị Sọnde 21 Septemba 2025 mgbe o jiri ihe dịka ọkara gaa elekere iri na abụọ nke ụbọchị.

    “Oge anyị nwetara ozi gbasara ọnọdụ ahụ, ndị uweojii nọ na mpaghara Njaba gbapụrụ ọsọ gaa ebe ahụ o mere,” ka Okoye kwuru n’ozi o wepụtara.

    O kwuru na ihe butere mgbawa ahụ bụ otu ihe na-agba agba nke onye nwe ya bụ nwoke aha ya bụ Chinweroke Mmadu si Ebonyi steeti.

    Okoye kọwara na ihe mgbawa ahụ gbara n’oge na-erughị eru ma gbuo Maazị Chinweroke Mmadu.

    “Mmadụ abụọ ndị na-agafe agafe nwetara mmerụahụ, mana e bugara ha n’ụlọọgwụ Santa Maria Hospital, bụ ebe ha nọ ugbua na-enweta onwe ha,” ka ozi ahụ kwuru.

    Ozi ahụ gara n’ihu kwuo na Osote Kọmịshọna ndị uweojii na-ahụ maka ọrụ bụ Hamzat A. Abdulkadir na ndị uweojii si na ngalaba Explosive Ordnance Disposal (EOD) Unit agaruola na mpaghara ahụ ihe gbawara, zachaa ya nke ọma ma kwupụta ya dịka ebe dị mma maka ọha mmadụ iji ya mee ihe.

    Ka ọ dị, nnyocha ndị uweojii merela ugbua kpughere na ọ bụ nwoke ahụ nwụrụ anwụ bu ihe mgbawa ahụ, mana ndị uweojii ka na-agba mbọ ịchọpụta ihe bụ ebumnobi ya.

17. 25 Septemba 2025Ndị be anyị, unu asaala chi, Ka ụbọchị taa maara onye niile mma

    Obiụtọ ka anyị ji anabata gị n'ọgbakọ BBC News Igbo n'ụbọchị taa bụ Tọzde 25 Septemba, 2025.

    Gaa na websaịtị, Facebook, Instagram nakwa Whatsapp Chanelụ anyị ka i nweta akụkọ niile na-akpọtụ n'ụwa.

    N'ụtụtụ a, ọ bụ Chinonso Ugorji na Marvelous Obomanu ka gị na ha ga-anọrị, mana Uzoamaka Ewuzie, Michael Ngene na Michael Ilediagu ga-emecha buru oche n'oge ehihie.

    Biko gaa n'ihu nọnyere anyị.

18. 24 Septemba 2025Otu onye anwụọla n’ime ndị onye ojiegbe gbara egbe n’ụlọọrụ ICE dị na Dallas mba Amerịka

    Otu onye mgbọ tụrụ n’ime ndị onye ojiegbe gbara egbe n’ụlọọrụ "Immigration and Customs Enforcement (ICE)" dị na Dallas, mba Amerịka anwụọla.

    ICE bụ ụlọọrụ na-ahụ maka ndị ọbịa n’Amerịka ma bụrụ ndị ọ bụ ọrụ ha ịmara ndị ji akwụkwọ adịgboroja bata Amerịka nakwa ihe gbasara ibi, ịbata ma ịpụ n’Amerịka dgz.

    Ndị uweojii na Dallas kwuru na ọ bụ eziokwu na onye ojiegbe ahụ gbagburu otu onye ebe mmadụ abụọ ndị ọzọ mgbọ tụrụ na-azọ ndụ ha n’ụlọọgwụ mana onye ojiegbe ahụ nwụọla.

    Ha gara n’ihu kwuo na nnyocha ka na-aga n’ihu ịchọpụta ihe butere ajọ mkpamkpa ahụ.

19. 24 Septemba 2025Agha Yukren agaghị akwụsị maka na Rọshịa ajụla atụmatụ udo – Zelensky

    Onyeisiala mba Yukren bụ Volodymyr Zelensky ekwuola na agha Rọshịa na-ebuso mba ya agaghị akwụsị nsonso maka na mba Rọshịa ajụla atụmatụ udo na nkwụsịtụ agha.

    Zelensky kwuru nke a n’oge ọ na-ekwu okwu n’ọgbakọ otu mba ụwa bụ United Nation.

    N’oge ahụ ka Zevensky gwara ndị Isiala mba dị icheiche etu ha si arụ ụlọ akwụkwọ n’ime ala maka igbochi ogbunigwe mba Rọshịa na-atụ Yukren agharaaghara.

    Zelensky gwara ndị UN na ugbua “mba ọbụla chọrọ udo ga na-arụpụta ngwaagha maka na ọ bụ naanị ngwaagha ga-eme ka ha nwee udo”.

    Ọ gara n’ihu kwuo na “iwu mba uwa adịghị arụ ọrụ". Ọ sị na mgbe o ji arụ ọrụ bụ oge e were ezigbo ọnyị siri ike ga-akwụrụ gị n’azụ. Ọ sị na nke ahu adịghị arụ ọrụ na e nwepụkwa ngwaagha”.

    Ọ gara n’ihu gwa ọgbakọ UN na “enweghị mba nwere nchekwa a ga-atụkwasị obi ma e nwepụ ngwaagha na ndị ọnyị gbara mba ọbụla gburugburu”.

20. 24 Septemba 2025“Unu chọrọ m achọ, ọkwa ya?” - Peter Mutharika

    Peter Mutharika bubụ Onyeisiala mba Malawi nke ụlọikpe wepụrụ n’ọchịchị ka ọ chịchara ihe ruru afọ ise site n’afọ 2014 ruo 2020 gwara ndị mba ahụ sị "Ọ kwa unu chọrọ m achọ, ọkwa ya".

    Peter Mutharika kwuru nke a dịka ntuliaka ịhọpụta Onyeisiala mba ha na-aga n’ihu, ebe a na-atụanya na ọ ga-emeri ma lọghachịtaazụ n’ọchịchị.

    Mmeri Mutharika na-emeri Onyeisiala mba ahụ bụ Lazarus Chakwerana na ntuliaka a bụ ihe gbagwojuru ndị mmadụ anya.

    Mutharika gwara ndị mba ahụ na ha biri ezi ndụ mgbe mbụ ya nọ n’ọkwa ma kwuo na ndụ na-akụnụba mara afọ n’ala kamgbe Chakwera banyere n’ọchịchị.

    N’aka nke ọzọ, ọchịchị Mutharika bụ nwoke dị afọ iri asatọ na ise nwekwara ihe chere ya aka mgba dịka e boro ya ebubo mpụ na nrụrụaka.

    Cheta na nke a bụ ugboro anọ Mutharika na-azọ ọkwa Onyeisiala mba Malawi na-agbenyeghị na ọchọghị ịbanye na ndọrọndọrọ ọchịchị na mbụ.