Ana m ewesara Putin iwe maka mkparịtaụka nkwụsị ọgụ - Onyeisiala Trump

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere

1. 22 Maachị 2025Ọdọụgbọelu Heathrow Airport ga-amalite ọrụ n’uju n’ụbọchị Satọde

   

   Ebe foto si, PA Media

   Njem ụgbọelu ndị nke mbụ amalitela n’ọdọụgbọelu Heathrow Airport dịka ọrụ malitere ka ọ gasịrị otu mkpụrụ ụbọchị ha nwere nsogbu.

   Mana akagbuola opekatampe njem ụgbọelu itoolu ndị a tụrụ anya ifedata n’ụtụtụ a na ya bụ ọdọụgbọelu.

   Puku kwuru puku njem enweghị isi n’ụbọchị Fraịde 21 Maachị 2025 dịka ọkụ gbachara n’ụlọọrụ na-enye ọdọụgbọelu ahụ ọkụ latrik.

   Ka o sinadị, ha nwere olileanya ịrụ ọrụ n’uju taa dịka ụfọdụ ụgbọelu maliterela ifedata ma na-efepụkwa n’abalị Fraịde.

   Ndị uweojii na-ebu agha megide iyi ndụ egwu amalitela ime nnyocha mana ndị uweojii Met Police kwuru na enwebeghị ihe na-arụtụ aka na e mere nrụrụaka ọbụla.

2. 22 Maachị 2025Ọhanaeze ụnụ abọọla chi, Ọfọ anyị taa bụ ndụ mmiri, ndụ azụ. Mmiri atala ma azụ anwụla.

   Anyị ji obi ekele anabata gị n'ọgbakọ BBC News Igbo taa bụ Satọde Eke 22 Maachị 2025.

   Chinonso Ugorji awuchiela iwetere gị akụkọ niile na-akpọtụ n'ala Igbo, na Naịjirịa nakwa n'akụkụ ụwa dị iche iche. Ikechukwu Kalu ga-anọkwa ebe a n'oge ehihie.

   Biko gaa n'ihu sonyere anyị.

3. 21 Maachị 2025Ụlọikpe Kachasị akagbuola ọchụchụ a chụrụ Sam Daddy dịka odeakwụkwọ PDP

   

   Ebe foto si, Senator Samuel Anyanwu/Facebook

   Ụlọikpe Kachasị na Naịjirịa akagbuola ọchụchụ ụlọikpe mkpegharị chụrụ Samuel Anyanwu dịka odeakwụkwọ otu Peoples Democratic Party (PDP).

   Ikpe ahụ nke ndị ọkaikpe mmadụ ise chabiri kwuru na okwu banyere onye bụ odeakwụkwọ pati ahụ bụ nsogbu dịịrị ha n’ime ụlọ.

   Ọkaikpe Jamilu Tukur onye gụpụtara ikpe ahụ kagburu ikpe ahụ nke ụlọikpe mkpegharị kpere n’ọnwa Ọktoba 2024 bụ nke chụpụrụ Anyanwu dịka odeakwụkwọ PDP.

   N’ọnwa gara aga, kọmitii nke Tom Ikimi nọ n’isi ya tụrụ arọ ka a chụpụ Anyanwu site n’otu PDP. O kwuru na Anyanwu jụrụ ịpụta n’ihu kọmitii ahụ iji zara ọnụ ya megide ebubo ndị ntoroọbịa PDP boro ya.

   Ndị a boro Anyanwu ebubo ime ihe ndị dị aṅaa megide PDP nke megidere iwu na-achị pati ahụ.

4. 21 Maachị 2025Netanyahu achụọla onyeisi ọrụ nchekwa mba Izrel n’ọrụ maka e weghị ntụkwasị obi

   

   Ebe foto si, Getty Images

   Praịm mịnịsta mba Izrel bụ Benjamin Netanyahu achụọla onyeisi ọrụ nchekwa na mba ahụ bụ Ronen Bar.

   Netanyahu kwuru na ihe mere ya jiri chọọ ịwepu Ronen Bar n'oche dịka onyeisi ụlọọrụ Shin Bet bụ maka na ọ chọpụtaghị na ndị Hamas na-akwado ịwakpo mba ahụ n’Ọktoba 7, 2023.

   Netanyahu mere ka a mata ebum n’obi ya ịwepu Bar n’ozi o binyere aka n’ụbọchị Sonde garaaga ma na-ekwu na ọ bụ maka “e weghị ntụkwasị obi” n’etiti ya na Bar na-akawanye njọ kwamgbe kwamgbe”.

   Nke a bụ nke mbụ na mba Izrel a na-achụ onyeisi ọrụ nchekwa ụlọọrụ “Shin Bet” n’ọrụ.

   N’akwụkwọ ozi ahụ Netanyahu degara ndị Gọọmenti mgbe ha na-enwe ọgbakọ ka ọ gwara ha na “enweghị ntụkwasị obi n’ebe ya na Ronen Bar nọ na-akawanye njọ n’oge agha mba Izrel na ndị Hamas".

   Netanyahu gwara ha na ya chọrọ ka "Ronen Bar pụọ n’oche n’Epril 20, 2025”.

   Shin Bet bụ ụlọọrụ nchekwa na-arụ ọrụ miri emi na ngaraba nchekwa ma bụrụkwa ụloọrụ nchekwa na-arụ ọrụ nzuzo na ịgba ama.

   Mana Bar kwuru na ọ bụ maka ndọrọndọrọ ọchịchị bụ ihe mere Netanyahu jiri chọọ ịwepụ ya n’oche.

   Ụlọ mgbasaozi Times nke Izrel na-ekwu na Bar kowara na ụlọọrụ Shin Bet na-eme ndị ọrụ Benjamin "nyocha maka ebubo na mba Qata na-eso ekwu ihe na-eme n’ime mba Izrel”.

   Attorney General mba Izrel bụ Gali Baharav-Miara n’ọnwa garaaga nyere iwu ka ndị uweojii na ụlọọrụ Shin Bet mee nyocha n’isi ndị ọrụ Netanyahu maka ị nwe mmekọ ihe gbasara ego n’etiti ha n amba Qatar.

   Mana otu ndọrọndọrọ ọchịchị Netanyahu bụ Likud Patị gọrọ agụgọ kwuo na aka ha dị ọcha n'ebubo a na-ebo ndị otu ha.

5. 21 Maachị 2025Ndịagha mba Sudan ekwuola na ha eweghachịtala isi obodo ha n’aka ndị iro

   

   Ebe foto si, Sudan Tv

   Ndịagha mba Sudan ekwuola na ha eweghachịtala isi obodo mba ha bụ Khartoum n’aka ndịagha ndị iro ha wakporo mpaghara ahu n'oge garaaga.

   Ha sị na e wepụ ụlọ ebe obibi Onyeisiala ha, na ha chụpụkwara ndịagha ndị iro ha n’ụlọọrụ gọọmenti dị icheiche dị na khartoum.

   Ọnụ na-ekwuru ndịagha na mba ahụ bụ Nabil Abdallah kwuru sị “ndịagha anyị emeriela ndịagha ndị iro ma napụ ha akụrụngwa ha ji anụ agha”.

   Nabil Abdallah bụ onye kwuru nke a n’ihe onyonyoo o mere n’ụlọọrụ ndị ntaakụkọ sị na “anyị na-enwe mmeri n’ihu ọgụ niile na mpaghara obodo anyị niile. Anyị ga-ebuso ndịagha ndi iro a agha ruo na anyị achụpụ ha na mba anyị kpamkpam".

6. 21 Maachị 2025A ga-agbachi ọdọụgbọelu Heathrow Airport n’ihi ụkọ ọkụ latrik

   

   Ebe foto si, Getty Images

   A ga-emechi ọdọụgbelu Heathrow Airport n’ụbochị Fraịde n’ihi ụkọ ọkụ latrik nke a tụrụ anya na ihe kpatara ya bụ ọkụ gbara n’ụlọọrụ na-akesara ha ọkụ latrik.

   Ọdọụgbọelu ahụ kachasị enwe ndị njem na mba UK dọrọ aka na ntị na ha ga-akwụsịtụ ọrụ n’ime ụbọchị ndị na-abịa n’ihu ma gwa ndị njem ka ha ghara ime njem “n’agbanyeghị ọnọdụ ọbụla” ruo oge ha malitere ọrụ.

   “Iji hụ na e chekwara ndị njem na ndị ọrụ anyị, enweghị ihe ọzọ anyị maara anyị ga-eme karịa imechi Heathrow ruo mgbe ọ ga-afọdụ otu nkeji ka ọ kụọ elekere iri na abụọ nke ime abalị n’ụbọchị 21 Maachị 2025,” ka ọnụ na-ekwuru ọdọụgbọelu ahụ sịrị.

   “Anyị maara na nke a ga-ewute ndị njem, ma anyị chọkwara ikwe ha nkwa na anyị na-arụsi ọrụ ike iji dozie ya bụ ọnọdụ,” ka ozi ahụ gbakwunyere.

   “Dịka ndị ọrụ mgbanyụọkụ na-elebara ọnọdụ ahụ anya, anyị amatabeghị mgbe e nwere ike iweghachi ọkụ latrik,” ka ọnụ na-ekwuchitere Heathrow kwuru.

   Ọdọụgbọelu ahụ rịọrọ mgbaghara maka ịkwụsịtụ ọrụ ma nye ndị njem ndụmọdụ ka ha kpọtụrụ ụlọọrụ njem ụgbọelu ha maka inwetakwu ozi.

   Heathrow bụ ọdọụgbọelu kachasị buo ibu na mba UK dịka ụgbọelu ruru otu puku na narị atọ (1,300) na-efepụ ma na-efebatakwa na ya bụ ọdọụgbọelu kwa ụbọchị.

7. 21 Maachị 2025Igbo Chukwu gọziri agọzi, ụnụ asaala chi, Ya dịrị onye niile mma ooo

   Obi aṅụrị ka anyị ji anabata gị n'ọgbakọ BBC News Igbo n'ụbọchị taa bụ Fraịde Nkwọ 21 Maachị 2025.

   Chinonso Ugorji na Michael Ilediagu ga-amalite ugbua iwetere gị akụkọ niile na-akpọtụ na n'ala Igbo, na Naịjirịa nakwa n'akụkụ ụwa dị iche iche. Ikechukwu Kalu ga-anọkwa ebe a n'oge ehihie.

   Anyị na-asị gị gaa n'ihu nọnyere anyị taa.

8. 20 Maachị 2025Etu ọkụ si gbuo ndị mmadụ, gbaa unukwu ụgbọala dịka ogbunigwe n’Abuja

   

   Ihe karịrị mmadụ isii wụrụ n’oge ọkụ gbara ọtụtụ ụgbọala n’abalị garaaga n’Abuja bụ isi obodo Naịjirịa.

   Ihe a mere n’ihe dịka elekere asaa n’abalị nke mere ọtụtụ ndị mmadụ ji chere na ọ bụ ndị n’enyi ọha egwu tụrụ ogbunigwe.

   Cheta na ndị Boko Haram tụrụ ogbunigwe na mpaghara ahụ n’afọ 2014 nke gburu mmadụ ọnụ ọgụgụ ha karịrị iri na itoolu.

   

   Dịka ndị ọrụ nchekwa okporoụzọ bụ Federal Road Safety si kwuo, ọ bụ ụgbọala na-ebu simentị Dangote kpara mkpamkpa ahụ n’Abuja.

   Ha sị na ndị VIO na-akwụsị ụgbọala ahụ na-ebu sịmenti Dangote mana okweghị akwụsị.

   Ha sị na o bidoro gbawa ọsọ nke mere o ji na-akụ ụgbọala ndị ọzọ.

   

   Ha kọwara na ọtụtụ ụgbọala ndị ahụ bidoro wuru ọkụ mana ihe dara ụda ka ogbunigwe bụ gaasị ụgbọala Dangote ahụ.

   Sunday Okonkwo bụ onye nwanne ya meruru ahụ na mkpamkpa ahụ gwara BBC na ya hụrụ ozu mmadụ isii.

9. 20 Maachị 2025Saụt Afrịka: mmadụ karịrị 70,000 were mmasị ị ga Amerịka dịka ndị na-agba ọsọ ndụ

   

   Ebe foto si, AFP

   Ọtụtụ ndị ọcha na mba Saụt Afrịka chọrọ i jiri ohere Onyeisiala mba Amerịka bụ Donald Trump nyere ha were gbalaga na mba Amerịka.

   Ihe ruru mmadụ 70,000 chọrọ iji ohere ahụ gaa mba Amerịka dịka ndị na-agba ọsọ ndụ maọbụ ndị a na-akpagbu.

   Ụlọọrụ na-ahụ maka azụmahịa bụ South African Chamber of Commerce dị n’Amerịka (Saccusa) kwuru na igwe mmadụ n’achọ ozi gbasara etu e si edenye aha ha ma rite n'erere ahụ.

   N’ọnwa Febuwarị ka Onyeisiala mba Amerịka bụ Donald Trump nyere iwu ka ndi Afrikanas (ya bụ ndị agbụrụ ha bụ Dutch bụ ndị bịara na mba Saụt Afrịka na Narị afọ nke 17 garaaga (17 Century) ka ha were ike ịbịa Amerịka dịka ndị na-agba ọsọ ndụ maka na ha bụ “ndị a na-akpagbu maọbụ ndị a na-akpara oke agbụrụ”.

   Adịm na mma mba Amerịka na nke Saụk Afrịka na-emebi kemgbe Trump banyere n’ọkwa ọchịchị nke ugboro abụọ.

   Saccusa kwuru na ha enyela ụlọ nnọchịtaanya mba Amerịka dị na Pretoria aha na ndekọ ndị Saụt Afrịka chọrọ ịga Amerịka bụ nke otu onye n’ụlọ ọrụ ndị nnọchitaanya ahụ gwara BBC na ha natara ndekọ ahụ.

10. 20 Maachị 2025Trump atụọla aro ka Amerịka nara ọdọ ọkụ nukle mba Yukren dị n'aka mba Rọshịa

    

    Ebe foto si, Getty Images

    Amerịka ekwuola na otu n’ime nkata Onyeisiala Amerịka bụ Donald Trump na Zelensky kpara bụ ka US were ọdọ ọkụ nukle mba Yukren a na-akpọ Zaporizhzhia bụ nke dị n’aka mba Rọshịa.

    Onye ọnụ n’eru n’okwu n’Amerika bụ Marco Rubio kwuru na “Amerika ị nara ọdọ ọkụ nukle ahụ ga-enyereaka chekwaa ya ma kwadoo ọkụ latrịk nke mba Yukren”.

    Ọdọ ọkụ nukle Zaporizhzhia ahu dị na mba Yukren bu ọdọ ọkụ nukle kacha ndị ọzọ na mpaghara Yurop.

    Mana ndịagha Rọshịa napụrụ mba Yukren ọdọ ọkụ latrịk ahụ n’afọ 2022 mgbe ha wakporo mpaghara Zaporizhzhia.

11. 20 Maachị 2025Ụmụ Igbo unu asaala chi?

    Ka Chi kere taa ketere anyị ihe ọma, ọkachasị ndị na-esonyere anyị n'ọgbakọ BBC News Igbo oge niile.

    Mara na ọ bụ Michael Ilediagu ga-ewetere ụnụ akụkọ ihe na-eme na mba ụwa n'ụtụtụ a, mana Chinonso Ugorji na Ikechukwu Kalu ga-eburu oche n’ehihie.

    Daalụ nụ!

12. 19 Maachị 2025Kongo na Rwanda akpọla oku nkwụsị agha mgbe ha kparịtaụka na Kataa

    

    Ebe foto si, Qatar's Ministry of Foreign Affairs

    Onyeisiala mba DR Kongo bụ Félix Tshisekedi na Onyeisiala Rwanda bụ Paul Kagame akpọọla oku ka akwụsị ịkwa mgbọ n’ọwụwa anyanwụ nke DR Kongo mgbe ha kparịtaụka na mba Kataa.

    Ọ bụ oge mbụ ndị isiala abụọ na-ahụkọrịta onwe ha kemgbe ndịagha nnupụisi Rwanda na-akwado a na-akpọ M23 na-ebuso agha na mpaghara ahụ nke ndị ọchịchị kwuru na e gburu mmadụ puku asaa (7,000) kemgbe Jenụwarị.

    Akụkọ kwuru na o dobeghị anya ma ndị M23 a ga-ekwenye n’oku nkwụsị ịkwa mgbọ dịka ndị nnupụisi jụrụ isonye na mkparịtaụka e mere n’Angola na Tuzde.

    DR Kongo na-ebo Rwanda ebubo na ha na-enyere ndịagha nnupụisi M23 aka site na-izitere ha ndịagha, mana Rwanda ekweteghị ebubo ụlọọrụ UN na mba Amerịka boro ha.

13. 19 Maachị 2025Ndịọrụ UN mmadụ abụọ anwụọla dịka Izrel wakporo Gaza ọzọ

    

    Ebe foto si, Getty Images

    Ụlọọrụ UN ekwuola na e gburu ndịọrụ ha mmadụ abụọ ebe ndị ọzọ merụrụ ahụ mgbe e mebiri ogige ụlọọrụ ha dị na Gaza na Wenezde, mana ndịagha Izrel kwuru na ọ bụghị ha wakporo ụlọọrụ ndị UN dị na Deir al-Balah.

    Akụkọ kwuru na ihe ruru mmadụ 13 nwụrụ dịka mba Izrel siri n’elu wakpoo Gaza ọzọ n’abalị ma kwenkwa iji ike ịlụso ha ọgụ

    Izrel kwuru na ha na-amaliteghachi ọgụ na mpaghara Palestine.

    E gburu ndị nkịtị mmadụ abụọ ebe mmadụ ise ndị ọzọ merụrụ ahụ mgbe mba Izrel ji doronu kụrụ ụlọikwuu dị nso na mpaghara ndị enyemaka mmadụ na-elekọta mmadụ n’al-Mawasi dịka ụlọ mgbasa ozi Palestinian Wafa siri kwuo.

    Ndịagha Izrel kwuru na ha lekwasịrị anya ebe ndịagha Hamas na-akwado ka ha si kwanye mgbọ n’Izrel.

    Ndịagha kwuru na akụkpọrọ ụgbọmmiri ndị Hamas na-ahụ maka ya.

    Cheta na Praịm Mịnịsta mba Rọshịa bụ Benjamin Netanyahu kwuru n’ọgụ ga-amalite n’ike ma kwukwa na ogbunigwe ahụ Izrel tụrụ na Gaza gburu mmadụ karịrị 400 na Tuzde 18 Maachị 2025 ka bụ bido.

    Mwakpo ogbunigwe ahụ mere taat abụghị otu ọ dị na Tuzde, mgbe ndị ọrụ ahụike Hamas kwuru na e gburu ihe karịrị mmadụ 400 - mana ọ na-egosi na ọ nweghị nkwụsị na mwakpo ọhụrụ nke Izrel malitere na Gaza.

    Mwakpo nke Tuzde bụ nke kachasị njọ kemgbe nkwụsị ọgụ na nkwekọrịta ịtọhapụ ndị eji eji malitere na 19 Jenụwarị 2025, dịka Izrel na Hamas ekwenyeghị ka ha ga-esi banye n’agba nke abụọ nke nkwekọrịta nkwụsị ọgụ ahụ.

14. 19 Maachị 2025Rọshịa na Yukren esila n’elu wakpoo mba ha mgbe Putin na Trump kwuchara n’ekweantị

    

    Rọshịa na Yukren esila n’elu wakpoo akụrụngwa mba ha dịka Onyeisiala Vladimir Putin jụrụ atụmatụ mba Amerịka ka ọ kwụsị ịkwa mgbọ na Yukren mkpụrụ abalị iri atọ (30).

    Onyeisiala mba Yukren bụ Volodymyr Zelensky kwuru na Rọshịa lekwasịrị anya imebi "ihe akụrụngwa obodo" n'otu abalị nke gụnyere ụlọọgwụ abụọ dị na Sumy.

    Cheta na Onyeisiala Putin nabatara oku Onyeisiala mba Amerịka bụ Donald Trump kpọrọ ka Rọshịa kwụsị mwakpo ọ na-eme n'akụrụngwa ikike ọkụ Yukren mkpụrụ ụbọchị iri atọ, mana o kweghị ka akwụsị ịkwa mgbọ n'uju na Yukren.

    Onye nnọchiteanya Onyeisiala Trump na mpaghara Etiti ọwụwa anyanwụ ụwa ‘Middle East’ bụ Steve Witkoff kwuru na mkparịtaụka mba Amerịka banyere agha Yukren ga-aga n’ihu n’ụbọchị Sọnde n’isi obodo Jeddah dị na Saudi Arabia.

    Onyeisiala Putin na Onyeisiala Trump nkwekọrịtakwara oge ha kpọrọ oku ahụ na mba Rọshịa na Yukren ga-agbanwe ndị mkpọrọ mmadụ otu narị na iri asaa na ise (175) site n’akụkụ onye ọ bụla taa.

    Onyeisi iwu mba ofesi nke otu jikọrọ mba Yurop ‘European Union’ bụ Kaja Kalas, kwuru na Rọshịa achọghị ikwenye na mkparịtaụka maka ịkwụsị agha na-aga n'ihu na Yukren.

    Ọ gwara ndị ntaakụkọ na Rọshịa na-atụ anya ka Yukren hapụ nchekwa ya.

    

    Ebe foto si, AFP

    Mana Mịnịsta na-ahụ maka nchekwa na mba Jamini bụ Boris Pistorius kwuru na nkwekọrịta Onyeisiala Putin ịkwusi mwakpo a na-ebuso akụrụngwa ọkụ Yukren enweghị uru ọbụla ọ bara.

    Pistorius gwara onye mgbasa ozi German ZDF na,"Mwakpo akụrụngwa ndị nkịtị n'abalị mbụ mgbe oku ekwentị gosiri na nnukwu oku a akwụsịbeghị ihe ọbụla."

15. 19 Maachị 2025Putin anabatala oku ịkwụsị iwakpo akụrụngwa ikike ọkụ mba Yukren

    

    Ebe foto si, Getty Images

    Onyeisiala mba Rọshịa bụ Vladimir Putin anabatala oku Onyeisiala mba Amerịka bụ Donald Trump na-akpọ ka Rọshịa kwụsị mwakpo ọ na-eme n'akụrụngwa ikike ọkụ Yukren, mana o kweghị nkwụsị ịkwa mgbọ n'uju na Yukren.

    Onyeisiala mba Rọshịa ekwetaghị ibinye aka n’akụkwọ nkwekọrịta nkwụsị agha otu ọnwa nke bụ atụmatụ ndị nke Onyeisiala Trump wepụtara mgbe ha nwere nzukọ na Saudi Arabia.

    Onyeisiala Putin kwuru na nkwụsị ịkwa mgbọ n’uju ga-eme ma ọ bụrụ na enyemaka ndịagha mba ọzọ na ikekọrịta ozi ọgụgụ isi na Yukren bịara na njedebe.

    Mana ndị Yurop na-akwado Yukren anabataghị ya bụ ọnọdụ Onyeisiala Putin wepụtara.

    Onye nnọchiteanya Onyeisiala Trump na mpaghara Etiti ọwụwa anyanwụ ụwa ‘Middle East’ bụ Steve Witkoff kwuru na mkparịtaụka mba Amerịka banyere agha Yukren ga-aga n’ihu n’ụbọchị Sọnde isi obodo Jeddah dị na Saudi Arabia.

    N'ime agha afọ atọ ahụ, mba Rọshịa na-eweghachite okeala na mpaghara Kursk nke ndị Yukren weghaara ọnwa isii gara aga.

    Mgbe ndị nnọchianya mba Amerịka zutere ndị ogbo ha si Yukren na Jeddah na Tuzde gara aga, ha mere ka Yukren kwenye n'atụmatụ ha maka nkwụsị agha ụbọchị iri atọ (30) "ozugbo" n'ofe ala, ikuku na oke osimiri.

16. 19 Maachị 2025Igbo ndị ọma, unu abọọla chi?

    Anyị na-asị nọọ dịka unu na-esonyere anyị n'ọgbakọ BBC News Igbo taa.

    Ọ bụ Uzoamaka Ewuzie na Michael Ilediagu ga-ewetere ụnụ akụkọ ihe na-eme na mba ụwa niile mana Chinonso Ugorji ga-emechaa sonyere anyị n'oge ehihie.

    Ka ụbọchị taa mịtara anyị niile ezi mkpụrụ.

    Ka udo chịa!

17. 18 Maachị 2025Gọvanọ Nwifuru akwụsịla ndị kọmịshọna atọ ọrụ n’Ebonyi steeti

    

    Aka na-achi Ebonyi steeti bụ Francis Nwifuru akwụsịla ndị kọmịshọna atọ ọrụ maka abịaghị nzukọ.

    Ọ bụ kọmịshọna na-ahụ maka mgbasaozi na nduziuche ọhanaeze n’Ebonyi steeti bụ Jude Okpor kpughere nke a oge ọ na-agwa ndị ntaakụkọ okwu na ngwụcha nzukọ nke otu kansul na-achị steeti ahụ.

    Dịka Okpor siri kwuo, a kwụsịtụrụ ndị kọmịshọna ahụ ọrụ ruo otu ọnwa n’ihi na ha agaghị nzukọ otu kansul na-achị Ebonyi steeti haziri n’ụbọchị Mọnde 16 Maachị 2025.

    Kọmịshọna ndị ọnọdụ ahụ metụtara gụnyere Solomon Azi na-ahụ maka enyemaka na ụlọọrụ ndị na-agbata ọsọ enyemaka, Victor Chukwu na-ahụ maka gburugburu na Ikeuwa Omebe na-ahụ maka mmepe ime obodo.

    Okpor sịrị na Gọvanọ Nwifuru dọrọ aka na ntị megide agwa ejighị ọrụ kpọrọ ihe nke e ji mara ụfọdụ ndị ọrụ obodo.

    Ọ gakwara n’ihu kwuo na Nwifuru nyere ntuziaka ka a napụ kọmịshọna ndị ahụ a kwụsịtụrụ ọrụ ikikere na ngwongwo niile e nyere ha ruo mgbe ntaramaahụhụ ha ga-akụrụ ọnụ.

18. 18 Maachị 2025A ga-enwe ụkọ ọgwụ HIV na Naịjirịa oge na-adịghị anya - WHO

    

    Ebe foto si, BBC, Reuters

    Ụlọọrụ ahụike mbaụwa bụ World Health Organization (WHO) nọọrọ n’ụbọchị Mọnde 17 Maachị 2025 kwuputa Naịjirịa dịka otu n’ime mba asatọ ndị ga-anọ n’ụkọ ọgwụ e ji agwọ HIV n’ime oge na-adịghị anya.

    Ọnọdụ a na-abịa dịka mkpebi ọchịchị Trump nwere ịkwụsị enyemaka na mba ndị ọzọ kụnyere ụkwụ na nkesa ọgwụ HIV na mba ndị ahụ.

    Ụlọmgbasaozi Reuters sị na nnukwu onyeisi ụlọọrụ WHO bụ Tedros Ghebreyesus kwuru na ọgwụ e ji agwọ HIV nwereike ịkọ na Naịjirịa, Haiti, Kenya, Lesoto, Saụt Sụdan, Bọkịna Faso, Mali na Yukren n’ime ọnwa ole na ole na-abịa n’ihu.

    “Ịkụsasị ihe omume dị iche iche a haziri maka HIV nwereike ime ka ọganịihu e nwetara kemgbe afọ iri abụọ laa n’iyi,” ka a sị Ghebreyesus kwuru n’otu ọgbakọ ya na ndị ntaakụkọ nwere.

    Ọ gbakwunyere na ọnọdụ a nwereike ime ka ndị ọhụrụ karịrị nde iri (10m) bute nje HIV ma mekwaa ka mmadụ ruru nde atọ (3m) nwụọ n’ihi nje HIV.

    Nkwụsịtụ enyemaka mba ndị ọzọ nke mba Amerịka tinyere n’ọrụ site n’aka onyeisiala ha bụ Donald Trump emetụtala mbọ a na-agba ibu agha megide HIV, ọrịa nkwarụ ụmụaka bụ polio, ọrịa ịba na ụkwaranta.

19. 18 Maachị 2025Ndị nọọsụ amalitela ngagharịiwe n'Ebonyi steeti maka onye nọọsụ etiri ihe

    

    Ebe foto si, Chibueze Nwegede

    Ndị nọọsụ amalitela ngagharịiwe n'isi obodo Abakaliki dị n’Ebonyi dịka otu onye ikwu onye ọrịa tiri nọọsụ ihe n’ụbọchị Mọnde 17 Maachị 2025, nwere wepụ eze ya.

    Ihe ọjọọ a, mere n’ụlọọgwụ Federal Teaching Hospital dị n’okporoụzọ gara Abakaliki na Enugwu.

    Otu onye nọọsụ achọghị ka akpọ aha ya, gwara ndị ntaakụkọ na ọ bụ maka etu ndị ikwu ndị ọrịa si emeso ndị nọọsụ omume mere ha ji eme ngagharịiwe ahụ.

    

    Ebe foto si, Chibueze Nwegede

    O kwuru na obi adịghị ndị nọọsụ mma maka etu onye ikwu onye ọrịa siri pịa nọọsụ ihe ma wepụ eze ya.

    E nwebeghị ihe ndị ọrụ gọọmentị kwuru banyere ihe a mere yana ngagharịiwe ndị nọọsụ na-eme.

    Onye ntaakụkọ anyị enwebeghị ike ịgba onye ikwu onye ọrịa ahụ a sị na ọ pịara nọọsụ ihe, ajụjụ ọnụ.

    

    Ebe foto si, Chibueze Nwegede

20. 18 Maachị 2025King Charles na-aga njem nleta n’Ịtali agbanyeghị ọria Popu Francis

    

    Ebe foto si, Getty Images

    Onye eze na-achị Breten bụ King Charles III na nwunye bụ Queen Camilla na-aga n’ihu ime njem nleta na mba Ịtali ya na Vatican, ebe e kwuru na ya na Popu Francis ga-enwe nzukọ.

    Popu na-arịa ọrịa mana obi ọchịchị King Charles a na-akpọ ‘Buckingham Palace’ kwuru na njem Onyeeze ahụ ga-amalite na Mọnde 7 ruo Tọzde 10 Eprel 2025 ebe ọ ga-enwe ọtụtụ ihe ọ ga-eme na Rome na Ravenna.

    Onyeeze ahụ zigara Popu akwụkwọ ozi mgbe ọ na-arịa ọrịa mana foto Vatican wepụtara n’izu gara aga gosiri na Popu ahu dị afọ iri asatọ na asatọ na-agbake obere obere.

    Nleta ahụ ga-ahụ njikọ ihe atụ nke dị n'etiti Chọọchị Roman Katọliki na Chọọchị England, nke King Charles bụ Gọvanọ Kasị elu.

    N’ime nzukọ ya na Popu, Onyeeze ahụ ga-aga ụka mbụ ya n’ebe nchụaja ‘Sistine Chapel’ tupuu ọ gaa nleta na Papal Basilica dị na Saint Paul.

    Ndị eze Breten gara aga nke malitere n’oge ọchịchị Anglo-Saxon na-enye chọọchị ahụ ihe enyemaka na ego nkwado, nke a mere eji ahụta nleta King Charles dịka ihe ịrịba ama nke ime udo ga-enweta ma kpokọta ihe ndị a mere oge mbụ.

    Njem ahụ na Rome dabara n’oge ncheta afọ iri abụọ nke onyeeze ahụ na nwunye lụrụ di na nwunye.