Yukren, Amerịka bịnyere aka na nkwekọrịta akụ na ụba sitere n'okike maka ịkwụsị mwakpo Rọshịa

Mkpuchi Na Eme Ozugbo

Uzoamaka Ewuzie, Ikechukwu Kalu, Michael Ngene, Chinonso Ugorji, Michael Ilediagu, Adline Okere

1. 27 Eprel 2025Mmadụ 28 anwụọla ebe ọtụtụ narị merụrụ ahụ maka ihe tiwara n’ọdụ ụgbọmmiri Iran

   Ndị ọchịchị kwuru na ihe ruru mmadụ iri abụọ na asatọ nwụrụ ebe narị asatọ (800) ndị ọzọ merụrụ ahụ mgbe ihe tiwara n’otu ọdụ ụgbọmmiri Iran.

   Ihe ntiwa ahụ mere na Shahid Rajaee bụ nnukwu ọdụ ụgbọmmiri mba ahụ nke dị n’akụkụ obodo ndịda Bandar Abbas n’ụtụtụ Satọde 26 Eprel 2025.

   Ọ gbapụrụ windo na elu ụlọ ndị dị nso ma bibie ọtụtụ ụgbọala.

   Ndị bi nso ebe ahụ kwuru na ihe ntiwa ahụ metụtara ebe ruru kilomita 50 (kilomita 31).

   Ụlọọrụ mgbasa ozi steeti na-akọ na e nwere mmadụ isii amabeghị maka ha.

   Ihe onyonyo ndị BBC nyochara na-egosi ọkụ na-esiwanye ike tupu nnukwu ihe ntiwa ahụ eme. O gosikwara ebe ndị mmadụ na-agbanarị ihe ntiwa ahụ, ya na ndị ọzọ merụrụ ahụ dina n'okporoụzọ dịka anwụrụ ọkụ gbara ha gburugburu.

   Otu onye gwara Iranian TV na anwụrụ ọkụ, uzuzu na ntụ jupụtara na ụlọ nkwakọba ihe ahụ ma kwuo na ya amazighị maọbụ ya gara n’okpuru tebụl ka ọ bụ ihe ntiwa ahụ tụpụrụ ya ebe ahụ.

   Ihe onyonyo ikuku gosiri opekata mpe ebe atọ na-agba ọkụ dịka mịnịsta na-ahụ maka nchekwa obodo n’Iran kwuru na ọkụ a na-agbasa site n'otu akpa gaa na nke ọzọ.

   E nyela ụlọakwụkwọ na ụlọọrụ nọ na mpaghara ahụ iwu ka ha mechie n’ụbọchị Sọnde 27 Eprel 2025.

2. 27 Eprel 2025E wepụtala foto mbụ ili Popu Francis

   E wepụtala ihe onyonyo mbụ nke ili Popu Francis n’ụlọụka Santa Maria Maggiore dị na Rom.

   Foto ahụ na-egosi otu ifuru na-acha ọcha ka ọ tọgbọ n'elu ili nkume nke nwere aha eji maara ya n'oge Pontificate ya, n'okpuru obe nke otu ọkụ na-enwu.

   E lili Popu ahụ nwụrụ anwụ n’ụlọụka – otu n'ime nnukwu basịlịka anọ dị n'isi obodo Italy, na nke ọ na-aga eleta mgbe niile n'oge ya dịka Kadịnal na pontiff - na emume nzuzo na-esochi olili ọha ya na Vatịkan na Satọde.

   Ndị na-eru uju kwụ n'ahịrị n'azụ ụka n'isi ụtụtụ Sọnde ka ha sonye na ndị mbụ na-asọpụrụ Popu Francis, onye nwụrụ afọ 88 na Mọnde.

   Popu Francis nwere mmasị nke ukwuu nye Virgin Mary, na Santa Maria Maggiore bụ ụka mbụ e nyefere ya mgbe e wuru ya na narị afọ nke anọ.

3. 27 Eprel 2025Ọtụtụ nwụrụ mgbe ụgbọala kwọbatara n'emume okporoụzọ na Vancouver - Ndị uweojii Kanada

   Ndị uweojii ekwuola na ọtụtụ mmadụ nwụrụ ebe ọtụtụ merụrụ ahụ mgbe otu nwoke kwọbatara ụgbọala ebe igwe mmadụ na-eme emume okporoụzọ na Vancouver nke Kanada.

   Onyeisi ndị uweojii Steve Rai kwuru na ndị uweojii ejidela otu nwoke ndị afọ iri atọ (30) si obodo British Columbia.

   E kwuru na ọ bụ ndị Philippine na-eme emume ụbọchị Lapu Lapu mgbe ihe mberede ahụ mere oge ọ kụrụ elekere asatọ nke obodo ahụ.

   Ndị uweojii kwukwara na ha amalitela ime nnyocha ma na-arịọ onye ọ bụla nwere ihe ọ ma banyere ihe mberede ahụ ka ọ kpọtụrụ ha.

   Praịm Mịnịsta mba Kanada Mark Carney kwuru na ihe mberede ahụ wutere ya nke ukwuu – dịka ndị ndu pati Conservative na NDP kwupụtara nwute banyere ihe mberede ahụ.

   Ndị uweojii kwuru na ha amaghị ma o nwere ihe jikọrọ ihe mberede ahụ na ntuliaka ọchịchị etiti n’abịa abịa.

4. 27 Eprel 2025Igbo ndị ọma, ụtụtụ ọma nu?

   Anyị na-asị unu abịala n'ọgbakọ BBC News Igbo taa bụ Sọnde 27 Eprel, 2025.

   Ọ bụ Uzoamaka Ewuzie ga-ewetara unu akụkọ ihe na-eme na mba ụwa n'ụtụtụ a mana Michael Ngene ga-esonyere anyị n'oge ehihie.

   Ya gazie.

5. 26 Eprel 2025Mmadụ 500 emerụọla ahụ ebe ndị ọzọ nwụrụ oge ihe tiwara n’Ịran

   Opekatampe mmadụ anọ anwụọla ebe narị ise (500) ndị ọzọ merụrụ ahụ oge ihe tiwara n’obodo Bandar Abbas dị na ndịda Ịran.

   Dịka ndị mgbasaozi mba ahụ siri kwuo, ihe ahụ tiwara n’ọdọụgbọmmiri Shahid Rajaee n’ụtụtụ Satọde 26 Eprel 2025 ma gbakasịa mpio ụlọọrụ ndị nọ ebe ahụ ma meekwa ka elu otu ụlọ daa.

   Onyonyoo e setere n’ihe ọdachi ahụ gosiri ka ndị mmadụ na-eri mbọmbọ oge ahụ ya bụ ihe tiwara ebe ndị merụrụ ahụ tọgbọrọ n’okporoụzọ.

   E nwetakwala ozi gbasara ndị tọrọ n’ime ala oge ibe ụlọ dakwasara ha.

   Ọkụ ka na-agba na mpaghara ahụ dịka foto na-egosi ka nnukwu anwụrụ ojii si n’ọdọụgbọmmiri ahụ na-apụta.

   Ndị ọnụ na-eru n’okwu gwara BBC na ndị ọrụ gbatagbata agbapụla ka ha gaa napụta ma bugaa ndị merụrụ ahụ ụlọọgwụ ndị nọ nso.

6. 26 Eprel 2025Onyeisiala Namibịa ekwupụtala agụmaakwụkwọ n’efu na mahadum

   Onyeisiala Namibịa ọhụrụ bụ Netumbo Nandi-Ndaitwah ekwupụtala na a ga-ewezuga ụgwọ akwụkwọ mahadum malite n’afọ 2026.

   Nandi-Ndaitwah bụ onyeisiala nwaanyị mbụ na mba Namibịa kwupụtara nke a oge ọ na-agbasara ụmụafọ mba ahụ ozi nke mbụ ya n’abalị Tọzde 24 Eprel 2025.

   Oge ọ na-agwa ndị omeiwu okwu, onyeisiala ahụ sịrị na ụmụakwụkwọ agaghị akwụ ụgwọ ndebanyeaha maọbụ ụgwọ akwụkwọ na mahadum niile gọọmenti nwe nakwa na kọleji nkanụụzụ.

   Ka o sinadị, o kwuru na a gaghị agbakwunye ego gbapụtara ihe iji kwado mahadum ndị ahụ, bụ nke mere ụfọdụ mmadụ ji enwe obi abụọ ma atụmatụ ahụ ọ ga-ekwe omume.

   Nandi-Ndaitwah kwuru na agụmaakwụkwọ n’efu n’ogogo mahadum bụ nke a ga-etinye na nkeji na nkeji.

   Ọ sịrị na ka ọ dị ugbua, “naanị ihe a tụrụ anya n’aka ezinaụlọ dị iche iche na ụmụakwụkwọ ga-abụ maka ụlọ obibi ha nakwa ụgwọ ndị ọzọ metụtara ya”.

   O kwuru na ego a ga-eji kwado atụmatụ ahụ ga-esite n’ego enyemaka e nyerela ụfọdụ mahadum ndị gọọmenti nwe tinyere ego e wepụtara maka iji kwado ụmụakwụkwọ.

   Cheta na agụmaakwụkwọ Praịmarị na nke sekọndịrị bụcha n’efu n’ụlọakwụkwọ gọọmenti niile dị na Namibịa.

7. 26 Eprel 2025Mba DR Kongo na Rụwanda aṅụọla iyi na ha ga-erube isi na nkwekọrịta udo

   Mba Rụwanda na Democratic Republic of Congo ekwekọrịtala irubeisi na nkwụrụnankeonwe ha ma kwuo na ha ga-ewepụta ndekọ maka nkwekọrịta udo n’ụbọchị 2 Mee 2025.

   Ọ bụ ndị Minista na-ahụ maka ihe na-eme na mba ndị ọzọ nke mba abụọ ahụ binyere aka na ya bụ nkwekọrịta na Washington ebe odeakwụkwọ mba Amerịka bụ Marco Rubio nọkwa na mmemme ahụ a haziri n’ụbọchị Fraịde.

   Puku kwuru puku mmadụ agbapụla n’ụlọ ha na nso nso a dịka ndịagha nnupuisi M23 nke Rụwanda na-akwado kpachiri mpaghara juputara n'akụ dị iche iche n’ọwụwa anyanwụ mba DR Kongo.

   Oge a napụrụ ha ikike ilekọta mpaghara ahụ, gọọmenti dị na Kinshasa gbakwuuru mba Amerịka maka enyemaka.

   Ha kwuru na ha ga-enye Amerịka ohere igwuputa akụ ndị ahụ dịka ihe mgbanwerịta maka enyemaka ha.

   Mmekọrịta dị n’etiti DR Kongo na Rụwanda abụrụla nke esichaghị ike, bụ nke mere e jiri hụta ọgbakọ ahụ ha nwere na Washington na nkwa ha kwere idozi esemokwu ha site na mkparịtaụka dịka nke na-egosipụta ọganihu.

   N’agbanyeghị nkwekọrịta ahụ, akụkọ kwuru na a gara n’ihu na-ebu agha na mpagha North Kivu n’ụbọchị Fraịde.

   Na mmalite izuụka a, DR Kongo na ndịagha M23 kwuru na ha dị njikere ịnabata udo ma gosi olileanya na ha ga-enwe nkwekọrịta maka nkwụsị ịkwa mgbọ ga-adịgide adịgide.

8. 26 Eprel 2025Ndị be anyị unu abọọla chi?

   Anyị na-anabata gị n'ọgbakọ BBC News Igbo taa bụ Satọde Eke 26 Eprel, 2025.

   Ọ bụ Michael Ngene ga-ewetara gị akụkọ gbara ọkpụrụkpụ si mbaụwa n'ụtụtụ a mana Chinonso Ugorji ga-abata n'ọgbọ oge ehihie.

   Udo dịrị gị.

9. 25 Eprel 2025Ụlọikpe akwadola ka a nwụchie ma jichie mmadụ isii na-akwalite CBEX

   Ọkaikpe Emeka Nwite nke Ụlọikpe Ukwu Etiti dị n’Abuja anabatala arịrịọ ụlọọrụ na-ebu agha megide mpụ na nrụrụaka ego na Naịjirịa bụ EFCC ịnwụchi ma jichie mmadụ isii na-akwalite atụmatụ CBEX.

   Ọkaikpe Nwite nabatara arịrịọ ahụ n’ihi ebubo e boro CBEX igwu ọtụtụ ndị Naịjirịa chandum nke ọnụego ya karịrị otu ijeri dọla ($1bn).

   Ọnọdụ a sochiri akwụkwọ Ọkaiwu na-ekwuchitere EFCC bụ Fadila Yusuf tinyere n’ụlọikpe ahụ n’ụbọchị 23 Eprel 2025.

   Mmadụ isii a kpọrọ aha n’okwu ahụ gụnyere Adefowora Olanipekun, Adefowora Oluwanisola, Emmanuel Uko, Seyi Oloyede, Avwerosuo Otorudo na Chukwuebuka Ehirim.

10. 25 Eprel 2025Oke agụụ: ndị nkuzi, NLC ebidola ngagharịiwe maka ụgwọọnwa opekatampe ₦70,000 n’Abuja

    Taa bụ abalị abụọ ndị nkuzi n’ụlọ akwụkwọ praịmarị na ndị ọrụ na gọọmenti okpuru ọchịchị n’isi obodo Naịjirịa bidoro ngagharịiwe maka ụgwọọnwa opekatampe ₦70,000 na oke agụụ.

    Otu jịkọrọ ndị nkuzi na Naịjirịa bụ Nigeria Union of Teachers (NUT) nakwa otu jịkọrọ ndị ọrụ na gọọmenti okpuru ọchịchị bụ Nigeria Union of Local Government Employees (NULGE) jikọrọ aka ọnụ mee ngagharịiwe n'abalị garaaga tupuu ha agaa kpochie ụlọọrụ Federal Capital Territory Administration (FCTA).

    N’akwụkwọ ha jiri depụta iwe ha ka ha nọ na-arịọ sị "kwụọ anyị ụgwọọnwa opekatampe nke N70,000".

    "Si mba na nkwekọrịta ndị a naghị emezu, ma nye anyị ihe rụrụ anyị dịka iwu si kwuo" Dgz.

    Cheta na minista n’ahu maka Abuja bụ Nyesom Wike kwere nkwa na ya ga-akwụ ndị ọrụ ụgwọọnwa opekatampe N70,000 nakwa ego ndị ọzọ e ji ha mana o mebeghị ihe ọ kwere ha na nkwa.

    Ndị na-eme ngagharịiwe ahụ na-arịọ ka Mịnịsta Wike lebanye anya na nsogbu ndị ọrụ.

11. 25 Eprel 2025Yukren nwereike inye mba Rọshịa ala ka udo dị - Vitali Klitschko

    Meyọ na-achị Kyiv bụ Vitali Klitschko agwala BBC na mba Yukren nwereike inye mba Rọshịa ala maka udo.

    Vitali Klitschko gwara BBC nke a dịka Onyeisiala mba Amerịka na-amanye ha ka ha kweta nwere ala nye ndị Rọshịa ka udo dị.

    “Otu n’ime ihe nwereike ime bụ na anyị ga-enwepụ aka n’ala anyị. Ọbụghị ihe ka mma. Mana maka udo, udo nchereoge, o nwereike ọ bụrụ ihe ga-enweta udo, mana ọ gaghị adịgịde”.

    Vitali sị na “mba Yukren agaghị anabata ọnọdụ ga-eme ka Rọshịa bụrụ ndị na-achị ha dịka ndị a dọorọ n’agha”.

    Ọ kwuru nke a na nwantiti oge mba Rọshịa tụchara ogbunigwe gburu mmadụ iri abụọ ma meruo ọtụtụ ndị mmadụ ruru 80 ahụ na mpaghara Kyiv.

12. 25 Eprel 2025Onye nnọchiteanya Trump na Onyeisiala Putin ga-enwe mkparịtaụka dịka Trump katọrọ ogbunigwe Rọshịa tụrụ na Kyiv

    Onye nnọchiteanya Onyeisiala Donald Trump na-achị Amerka bụ Steve Witkoff na onyeisiala Rọshịa bụ Vladimir Putin ga-enwe mkparịtaụka banyere ogbunigwe ahụ mba Rọshịa tụrụ na Kyiv, Yukren nke Onyeisiala Trump katọrọ.

    Onyeisiala Trump nọrọ ụbọchị kwuo na obi adịghị ya mma banyere mwakpoa ahụ Rọshịa wakporo Yukren ma kwuo na ya na-agba mbọ inweta udo n’etiti mba abụọ ahụ nọ n’agha kemgbe.

    N’aka nke ọzọ Praịm Mịnịsta UK bụ Keir Starmer kwuru na ọ dị mkpa ka Yukren mapụta etu a ga-esi nweta udo ma kwụsị agha ahụ.

    Onyeisi Kyiv bụ Vitali Klitschiko kwuru na ha agahịenyefe ala ha ọbụla iji nweta udo n’etiti ha na mba Rọshịa.

13. 25 Eprel 2025Utụtụ ọma ndị be anyị

    Anyị ji obi aṅụrị anabata gị n'ọgbakọ BBC News Igbo taa bụ Fraịde Afọ 25 Eprel, 2025.

    Anyị na-asị ka ihe ọma mere gị na ezinaụlọ gị taa.

    Michael Ngene na Michael Ilediagu bụ ndị na-ewetara gị akụkọ si mbaụwa n'ụtụtụ a.

    Ndewo.

14. 24 Eprel 2025A kagbuola ụfọdụ njem ụgbọelu dịka ndị ọrụ NiMet gbara abụbụọrụ

    Ụfọdụ ụlọọrụ njem ụgbọelu ndị e nwere na Naịjirịa akagbuola njem ha n’ihi abụbụọrụ ndị ọrụ NiMet bagidere.

    Ụlọọrụ Nigeria Meteorological Agency (Nimet) bụ ha na-ahụ maka iwepụta ozi gbasara ọnọdụ ihu eluigwe na Naịjirịa.

    Akụkọ kwuru na ndị ọrụ NiMet gbara abụbụọrụ a maghị mgbe ọ ga-akwụsị n’ụbọchị Wenezde 23 Eprel 2025 iji nye mkpesa maka ejighị okwu ọdịmma ha kpọrọ ihe dị oke mkpa.

    Ka ọ dị ugbua, ha akwụsịla ọrụ n’ọdọụgbọelu niile e nwere na Naịjirịa dịka nke a metụtara ụfọdụ ndị njem na ụlọọrụ njem ụgbọelu dị iche iche.

15. 24 Eprel 2025Ndị uweojii anwụchiela ụmụnwaanyị abụọ n’Imo steeti maka ịtọrọ nwata nwoke

    Ndị uweojii Imo steeti anwụchiela ụmụnwaanyị abụọ a na-enyo enyo na ha bụ ndị ntọrị ma napụta nwata nwoke gbara afọ anọ.

    Ọnụ na-ekwuru ndị uweojii Imo steeti bụ Henry Okoye kwupụtara nke a n’ozi ọ wepụtara n’ụbọchị Tọzde 24 Eprel 2025.

    Ọ sịrị na oge ha na-arụ ọrụ dabere n’ozi bara uru ha nwetara, ngalaba ndị uweojii Scorpion Unit nwụchiri mmadụ abụọ ahụ a na-enyo enyo bụ Joy Ugwu si Idah dị na Kogi steeti na Rosella Michael si Zamba dị n’Abuja.

    Dịka Okoye siri kwuo, a nwụchiri mmadụ abụọ ahụ n’Owere n’ụbọchị 14 Eprel 2025 mgbe ọ kụrụ ihe dịka elekere isii nke mgbede.

    Ọ kọwara na nnyocha ha mere kpughere na nwata ahụ aha ya bụ Jaffa Umar na-asụ asụsụ Awụsa nke ọma.

    Ha chọpụtakwara na ụmụnwaanyị abụọ ahụ tọọrọ ya bụ nwata oge ọ na-ebugharị akwụkwọ nri n’Abuja ma kpọgaa ya Owere, bụ ebe ha na-akpa nkata ire ya n’ọnụego nde naịra abụọ na ụma asaa (2.7m) tupu ndị uweojii anwụchie ha.

    Okoye kọwara na onye nke atọ a na-enyo enyo e kwenyere na ọ bụ nọọsụ riri mbọmbọ.

    Ka ọ dị ugbua, e nyefeela nwata ahụ n’aka ezinaụlọ ya site na mgbakọaka ụlọọrụ ndị uweojii Imo steeti na isi ụlọọrụ ndị uweojii Zone 7 dị n’Abuja ma nyefee ndị ahụ a na-enyo enyo n’aka ngalaba ndị uweojii na-ahụ maka ndị omekome bụ Zonal Criminal Investigation Department (ZCID) dị n’Abuja maka ime nnyocha miri emi.

16. 24 Eprel 2025DR Kongo na ndịagha nnupuisi M23 enweela nkwekọrịta ịkwụsị ịkwa mgbọ

    Mba DR Kongo na ndịagha nnupuisi mba Rụwanda na-akwado bụ M23 enweela nkwekọrịta ịkwụsị ịkwa mgbọ na mpaghara ọwụwa anyanwụ mba ahụ ruo mgbe mkparịtaụka udo nke mba Qatar nọ n’isi ya kụụrụ ọnụ.

    Nke a bụ nkwekọrịta udo a na-enwe na nso nso a kemgbe ndịagha nnupuisi ahụ mụbanyere mwakpo ha na-eme na mpaghara ọwụwa anyanwụ mba DR Kongo.

    Ndị ọchịchị kwuru na e gbuola mmadụ ruru puku asaa (7,000) site na mwakpo ahụ kemgbe ọnwa Jenụwarị.

    N’ụbọchị Wenezde 23 Eprel 2025 ka mba DR Kongo na ndịagha nnupuisi M23 jikọtara aka kwuputa na ha ga-agba mbọ maka udo.

    Ọnọdụ ahụ sochiri mkparịtaụka gaferela otu izuụka bụ nke ha kọwara dịka “nke kwesịrị ntụkwasịobi nakwa nke kwụ n’eziokwu”.

    N’ọnwa gara aga, Onyeisiala Kongo bụ Félix Tshisekedi na onye otu ya nke mba Rụwanda bụ Paul Kagame kwuputakwara njikere ha dị maka nkwụsị ịkwa mgbọ “na-agaghị enwe ọnọdụ ọbụla” na nzụkọ ịtụnanya ha nwere na Doha.

17. 24 Eprel 2025Zelensky akwụsịtụla njem ya na Saụt Afrịka dịka Rọshịa tụrụ Yukren nnukwu ogbunigwe

    Onyeisiala mba Yukren bụ Volodymyr Zelensky akwụsịtụla njem ọ na-eme na mba Saụt Afrịka ka ndị mba Rọshịa tụchara Yukren nnukwu ogbunigwe.

    Zelensky bụ onye gara njem nleta na mba Saụt Afrịka nakwa Onyeisiala mba Saụt Afrịka bụ Cyril Ramaphosa gwara ndị ntaakụkọ okwu.

    Ramaphosa kwuru na ya na Onyeisiala mba Amerịka bụ Donald Trump nakwa Onyeisiala mba Rọshịa bụ Putin kpara nkata

    Ramaphosa sị na “ndị ndu obodo abụọ ahụ nwere nkwenye na agha dị na Yukren ga-akwụsị”.

    N’oge Zelensky na-ekwu okwu ka ọ sịrị na “ogbunigwe mba Rọshịa tụrụ na Yukren bụ ihe nwute”

    Ọ gara n’ihu kọwa ihe mere na ọgbakọ mba Yukren, US, UK na otu jikọrọ mba Yurop mere n’abalị garage na London bụ nke ọ kọwara dịka “nkata siri ike”.

    Zelensky sị na "o doro m anya na Rọshịa na-atụanya ka e nwe nnukwu nnsogbu pụtara na ya. Inwe na-enwe ha maka ndị niile na-enye Yukren . E nwepụ ndị nkwadọ anyị agha Yukren ga-adịrị ha mfe”.

18. 24 Eprel 2025Chaịna ajụla ịzụ ụgbọelu Boeing a rụpụtara na mba Amerịka

    Maka esemokwu azụmahia dị n'etiti mba US na Chaịna ndị Chaịna ekwuola na ha agaghị azụ ụgbọelu Boeing a na-arụpụta n’Amerịka.

    Onyeisioche ụlọ ọru Boeing bụ Kelly Ortberg bụ ụlọọrụ na-arụpụta ma na-ere ụgbọelu kwuru na Chaịna enwechitala ụgbọelu abụọ ha chọrọ ịzụ na mbụ maka tarifu US manyere n’ahịa si Chaịna.

    Ortberg kwuru na ha kwesiri iziga ụgbọelu ruru iri ise na mba Chaịna mana ndị chọrọ ịzụ ya gbanwere obi sị na ha achọghịzị.

    Cheta na Onyeisiala mba US bụ Donald Trump tinyere tarifu 145% na mbubata ọbula si Chaịna abata n'Amerịka, nke a mere mba Chaịna jiri tinye 125% nke ha na ngwa-ahịa si US abata n'ime Chaịna.

19. 24 Eprel 2025Ndeewo ụmụ Igbo anyị ji eme ọnụ

    Anyị na-ekele unu maka isonyere anyị n'ọgbakọ BBC News Igbo taa bụ Tọzde 24 Eprel, 2025.

    Mara na ọ bụ Michael Ilediagu ga na-ewetere unu akụkọ ihe na-eme n’ala Igbo, Naịjirịa, Afrịka na ụwa niile.

    Chinonso Ugorji ga-ewere oche n’oge ehihe.

20. 23 Eprel 2025Mmadụ itoolu anwụọla oge Rọshịa wakporo ụgbọala bọọsụ na Yukren

    E gbuola mmadụ itoolu ma merụọ mmadụ karịrị iri anọ (40) ahụ oge ogbunigwe mba Rọshịa tụtara ahịrị ụgbọala bu ndị ọrụ n’ọwụwa anyanwụ Yukren.

    Ọ bụ n’ụtụtụ ụbọchị Wenezde ka e mere mwakpo ahụ n’etiti obodo Marhanets dị na mpaghara Dnipropetrovsk.

    Onyeisiala Yukren bụ Volodymyr Zelensky kpọrọ ya “ajọ mwakpo nakwa mpụ agha kpụ ọkụ n’ọnụ nke a maara ụma mesoo ụmụ mmadụ nkịtị”.

    O kwuru na ọtụtụ n’ime ndị merụrụ ahụ bụ ụmụnwaanyị na-arụ n’ụlọọrụ ebe a na-egwuputa akụ ndị chi nyere.

    Mwakpo ahụ bịara dịka nnukwu ndị ọrụ Trump pụrụ na mkparịtaụka e nwere na Lọndọn n’etiti mba UK, mba ndị ọzọ so n’otu European Union na mba Yukren, nke ebumnobi ya bụ inwe nkwekọrịta maka nkwụsị ịkwa mgbọ.

    Odeakwụkwọ mba Amerịka bụ Marco Rubio na onye nnọchiteanya Amerịka pụrụiche bụ Steve Witkoff kwesịrị ịga ọgbakọ ahụ mana e mechara kwuputa na ha ewezugala onwe ha.

    Onye nnọchiteanya Trump na mba Yukren bụ Gen Keith Kellogg nọchiri anya ha.