You’re viewing a text-only version of this website that uses less data. View the main version of the website including all images and videos.
Ndịagha Naịjirịa ekwupụtala na mmadụ iri abụọ na isii ebutela nje covid-19 n’ime mmadụ narị anọ na iri na asaa ha mere nnyocha.
Akụkọ si mba India apụta na-akọwa na ihe karịrị mmadụ puku iri asatọ anwụọla site n'ọrịa coronavirus.
Nke a ga-eme na mba India bụ mba atọ n'ụwa niile ebe ọrịa kachasị gbuo ndị mmadụ ugbua n'azụ mba Amerịka nakwa Brazil
N'otu aka ahụ ndị butere ọrịa jisike eru nde ise ebe ndị ọkachamara na-ekwu na ọnụọgụgụ a abụghị nke ezigbo ya n'ihi na ọ bụghị mmadụ niile ka a na-enyocha.
Gọọmentị mba UAE enyela ikike gbatagbata ka ekesaa ndị ọrụ ahụike ọgwụ mgbochi coronavirus.
Nyocha nke ugboro atọ n'ọgwụ mgbochi ahụ malietre n'ọnwa Julai mana emechabeghi ya rue ugbua.
"Ndị ga-enweta ọgwụ a ga-abụ ndị ọrụ ahụike anyị bu ndị ọrịa kachasị nweike ịfee" ka ha kọwara n'akara Twitter ha.
Ọnụọgụgụ nke NCDC wepụtara gosiri na ọ bụ mmadụ 132 butere coronavirus na Naịjirịa dịka emechara nyocha.
Legọs ka bụ steeti ebe ọrịa a kachasị dị etu ọnụọgụgụ gosiri.
O gosikwara na ọ bụ naanị otu onye nwụrụ n'ime otu ụbọchị kemgbe abalị abụọ gara aga.
Unu abọọla n'ụbọchị taa? Biko buru oche gị bịa sonyere anyị maka akụkọ banyere coronavirus.
Ka chi foonu Ụmụ Igbo.
Nọnyekwara anyị echi maka akụkọ ndị ga-amasị gị ịkọ.
Na mba Saụt Afrịka, ihe karịrị ndị na-ebu ozu puku atọ abanyela abụbụọrụ n’ihi akwụghị ha ezigbo ụgwọ nakwa ọnọdụ ha ji arụ ọrụ.
N’ihi nke a, ha ajụla isi n’ụlọ nakwa n’ụlọọgwụ buru ozu, dịka ha na-akpọku gọọmentị ka e nye ha ego iti aka n’obi maka mkpamkpa covid-19 na-akpa.
Ngalaba na-ahụ maka ahụike mbaụwa bụ World Health Organization (WHO) akpọọla oku ka mba ndị dị n’ụwa tụpụta atụmatụ ga-anọte aka maka nchekwa ahụike na mba ha.
Tederos Gebreyesus bụ onyeisi ngalaba a kwuru na Covid-19 agaghị abụ ọrịa ikpeazụ ga-etinye ụwa na gbagharịa etu a, ma kwuo na mbaụwa kwesịrị ike nkwụcha maka ụdịrị ọrịa n’ọdịnihu.
Mba Izrel na-akwado ịmachi obodo ha nke ugboro atọ iji belata mfesa ọrịa coronavirus.
Ha mere mkpebia a dịka ihe ruru puku anọ na-ebute ọrịa ahụ na mba ha kwa ụbọchị dịka Praịm Minista ha bụ Benjamin Netanyahu si kwuo.
Mmachi obodo ahụ ga-ebido n'ụbọchị Fraịde izu a ma norue izu atọ.
Iri asaa na itoolu bụ ọnụọgụgụ ndị buterela ọrịa coronavirus na Naịjirịa ụnyaahụ dịka ngalaba Nigeria Centre for Disease Controlsi kwuo.
Nke a ga-eme ya ọnụọgụgụ kachasị dị ala edekọrọ na Naịjirịa kemgbe ọnwa ole na ole gara aga.
N'agbanyeghị nke a, ihe karịrị mmadụ otu puku anwụọla site n'ọrịa a.
Gbado anya ebe a maka akụkọ dị mkpa metụtara coronavirus na mpaghara ụwa niile.
Kedụ ekpere ịnwere onwe gị n'izu a? Ọ ga-abịa na mmezu
Ndewonu
Izu ọhụrụ a ga-amịtara gị mkpụrụ ọma, Isee!
Ka chi foo.
A chọtara ọrịa coronavirus n’ahụ mmadụ puku iri na ụma ọhụrụ na mba Frans n’ụbọchị Satọde.
Nke a na-abịa dịka ndị ọrụ ahụike na-adọ ndị mmadụ aka na ntị ka ha jiri nwayọ na-agbakọ n’ihi na ọrịa a ka na-akpa mkpamkpa.
Gọọmentị Legọs steeti ekwuola na ọ bụ naanị ndị nọ na klaasị JSS3 na SS2 ka a ga-ekwe laghachị gaa mepee akwụkwọ n'ụbọchị 21 nke Septemba.
Folashade Adefisayo bụ Kọmishọna Agụmakwụkwọ nke steeti ahụ, kwuputere nke a site n'ọnụ na-ekwuchitere ya bụ Kayode Abayomi, onyeisi ngalaba na-ahụ maka mmekọrịta ministrị agụmakwụkwọ na ndị mmadụ.
Ha kwuru na Legọs ga-eji nwayọ nwayọ na-emepe ụlọakwụkwọ ọkachasị maka nke afọ 2020/2021, dịka a na-agba mbọ ịhụ na ha mezuru ihe niile iwu nchekwa Covid-19 kwuru.
Ọ gara n'ihu kwuo "Ndị nọ na JSS3 ugbua na ndị SS2 ga-amalite akwụkwọ n'ụbọchị Mọnde bụ 21 nke ọnwa Septemba 2020.
"Mmepe a ga-enye ndị Jss3 ohere ikwado maka ule "Basic Education Certificate Examination" nke Lagos State Examination Board (LSEB) na-ahazi, bụ nke a ga-ele site n'ụbọchị isii ruo ụbọchị 12 nke ọnwa Ọktoba.
"Ọ ga-enyerekwa ndị nọ SS2 ugbua aka ikwado ọfụma maka ịbanye SS3. A ka ga-akpọpụta oge a ga-ele ule maka ịbanye na Model Kọleji nke Legọs steeti n'oge adịghị anya."
Otu narị na iri isii bụ ọnụọgụgụ ndị a chọpụtara nje coronavirus n’ahụ ha n’ụbọchị satọde, dịka ngalaba National Centre for Disease Control si gụpụta.
Na mpaghara ọwụwa anyanwụ, naanị otu onye butere ọrịa a n'Abia steeti mana mmadụ iri atọ butere ya bụ ọrịa na Legọsị.
Lee ka ha si depụta ya:
Anyị amalitela iwetere ụnụ akụkọ niile gbara ọkpụrụkpụ maka coronavirus.
Chee aka ghọrọ ya!
I mere nke ọma wee nọnyere anyị taa.
Ka ebumnobi gị niile mezuoro gị dịka ị si chọọ, Iseee!
Ka chi foo!
AstraZeneca na Mahadum Oxford ga-amalite ịchọ ọgwụ mgbochi Covid-19 ọzọ n'agbanyeghi na a kwụsịburu ya ka ahụ otu onye na-arịa ya bụ ọrịa na mba Briten anabataghị ya.
N'ụbọchị Tuzde gara aga, AstraZeneca kwuburu na ha ga-akwụsịtụ ịchọ ọgwụ mgbochi a, ka ha nwee ike ime nchọpụta mara ma ọ bụ ọgwụ mgbochi ahụ metụtara onye ahụ e nyere ya.
Mana n'ụbọchị Satọdee, mahadum ahụ kwuru na a gwala ha gaa n'iwu mara ma ya bụ ọgwụ mgbochi ọ ga-enwe isi.
Matt Hancock bụ onye na-ahụ maka ahụike mba Briten nabatara ozi na a ga-amalitekwa ịchọ ọgwụ mgbochi a.
O kwuru sị "Nkwụsịtụ a gosiri na nchekwa dị anyị oke mkpa. Anyị ga-akwado ndị ọkammụta sayensị anyị iji hụ na ha chọtara ọgwụ mgbochi na-arụ ọrụ ọfụma, n'oge adịghị anya.
Mahadum ahụ na onwe ha kwuru na ọ bụ ihe a tụwara anya na ụfọdụ ndị a ga-anwa ọgwụ mgbochi a n'ahụ ha agaghị anabata ya, ọkachasị n'ụdịrị nwale dịka nke a.
Adaeze Lenore bụ onye ga-erite oche eze mba Spen ma nne na nna ya anọghịzị, abanyela na nnọsapụ dịka otu nwata akwụkwọ ibe ya butere ọrịa coronavirus, dịka ezinaụlọ ya si kwuo.
A ga-enyocha nwatakịrị ahụ dị afọ 14 bụ nwa Eze Felipe na-achị Spen, dịka e nyochara ụmụakwụkwọ ibe ya, n'ụlọakwụkwọ ha bụ Santa María de los Rosales dị n'obodo Madrid.
Ezinaụlọ eze kwuru na Eze Felipe na Ezenwaanyị Letizia ga na-arụ ọrụ ha, n'agbanyeghi na Spen na-agba mbọ ibuso coronavirus agha.
Mara na ihe ruru ụmụakwụkwọ nde asatọ laghachịrị akwụkwọ na mba ahụ n'izu gara aga, mana ụfọdụ ụlọakwụkwọ emechiela ọzọ dịka a chọtara ọrịa coronavirus n'ahụ ụfọdụ ụmụakwụkwọ.
A chọtara coronavirus n'ahụ mmadụ 4,708 ọhụrụ n'ụbọchị Fraịde, nke butere ngụkọta mmadụ ole buterela ọrịa a na mba ahụ ruo 566,326, nke bụ ọnụọgụgụ kacha na mpaghara Yurop.
N'otu aka ahụ, ọ taala isi mmadụ 29,747 na mba ahụ.
Anyi ji ekele na-asị unu emeela maka isonye anyị taa.