Muhimman abubuwan da ke faruwa a duniyar wasanni 17-23, 2025

Rahoto kai-tsaye

Mohammed Abdu

1. 20 Mayu 2025Ko Man United za ta lashe Europa League?, Wasan karshe a Europa League

   

   Asalin hoton, Getty Images

   Za a buga wasan karshe a Europa League ranar Laraba tsakanin Tottenham da Manchester United.

   Duk wadda ta yi nasara za ta wakilci Ingila a Champions League a kaka mai zuwa.

   Wannan shi ne karo na huɗu da za su kece raini a bana:

   Kakar 2024/2025

   Premier League ranar Lahadi 16 ga watan Fabrairun 2025

   • Tottenham 1 - 0 Man Utd

   English League Cup ranar Alhamis 19 ga watan Disambar 2024

   • Tottenham 4 - 3 Man Utd

   Premier League ranar Lahadi 29 ga watan Satumbar 2024

   • Man Utd 0 - 3 Tottenham

   Ƙungiyoyin ba sa kokari a kakar nan a Premier League, inda United take ta 16 da maki 39 da tazarar maki ɗaya tsakani da Tottenham ta 17.

2. 19 Mayu 2025Mount na fatan Man United za ta lashe Europa League

   

   Asalin hoton, Getty Images

   Mason Mount ya ce ya kagu ya taimakawa Manchester United ta lashe Europa League a bana, bayan da ta kasa yin abin kirki a Premier League.

   Mai shekara 26 yana cikin kashin bayan yan wasan da Erik Ten Hag ya yi amfani da su, wanda ya buga karawa 25, sai dai dan wasan ya ci karo da koma baya, sakamakon raunin da yake ta jinya tun bayan da ya koma Old Trafford dga Chelsea a Yulin 2023.

   Mount ya buga wasa bakwai karkashin Ruben Amorim daga baya ya ji rauni a lokacin wasan hamayya da Manchester City cikin watan Disamba.

   Bayan da ya koma taka leda a cikin watan Afirilu, yana fatan United za ta doke Tottenham ta kuma lashe Europa League, domin ta buga Champions League a badi.

3. 19 Mayu 2025Fearnley ya zama na farko da ya ci wasa a Geneva Open, Ƙwallon tennis

   Wanda yake na biyu a kwallon tennis a Burtaniya, Jacob Fearnley, wanda ke ta shirye-shiryen ganin ya taka rawar gani a French Open ya doke Dusan Lajovic ya kuma kai zagaye na biyu a Geneva Open.

   Mai shekara 23 ya doke Lajovic, wanda aka yi wa alfarmar shiga gasar da cin 6-4 6-1 - kenan Feranley ya zama dan Burtaniya na farko da ya ci wasa a tarihin gasar.

4. 19 Mayu 2025Ina burin Everton ta yi abin kirki a sabon filin mu - Moyes, Everton

   

   Asalin hoton, Getty Images

   Kociyan Everton, David Moyes ya ce yana ɗauke da buri da zarar sun shiga sabon filin wasa na Bramley-Moore Dock, ta yadda kungiyar za ta haskaka a kakar baɗi.

   Duk runtsi Everton ba za ta kare a gurbi na kasan mataki na 14 ba koda Newcastle ta doke ta a wasan karshe a Premier League ranar Lahadi.

   Kaka uku baya a jere Everton ta yi ta fuskantar barazanar faɗuwa daga babbar gasar tamaula ta Ingila, sai dai a karshen mako ta doke Southampton 2-0 a karawar karshe da ta yi a Goodison Park.

   A karkashin Moyes, Everton ta haɗa maki 22 daga wasa 19 da ya ja ragama tun bayan da ya maye gurbin Sean Dyche a cikin watan Janairu.

5. 19 Mayu 2025Varane ya goyi bayan Brazil da ta bai wa Ancelotti aikin koci, Real Madrid

   

   Asalin hoton, Getty Images

   Tsohon ɗan wasan tawagar Faransa, wanda ya lashe kofin duniya, Raphael Varane ya goyi da bayan kociyan, Real Madrid Carlo Ancelotti da ya karbi aikin horar da tawagar Brazil.

   A makon jiya aka sanar da naɗa Ancelotti kociyan tawagar Brazil, wanda zai fara aiki daga ranar 26 ga watan Mayu zuwa karshen gasar kofin duniya da za a yi Amurka da Cnada da kuma Mexico a 2026.

   Dan kasar Italiya, mai Champions League biyar zai fara aiki a watan Yuni a wasannin neman shiga gasar kofin duniya daga shiyyar Kudacin Amurka.

   Varane ya ce Ancelotti zai saita yan wasan Brazil, waɗan da za su iya taka rawar gani a gasar da ke gabansu.

6. 19 Mayu 2025Cunha zai ci gaba da taka leda a Wolves - Pereira, Wolverhampton

   

   Asalin hoton, Getty Images

   Vitor Pereira ya ce Matheus Cunha zai ci gaba da taka leda a Wolverhampton, bayan rade-radin da ake cewar manchester United za ta ɗauki ɗan wasan.

   Mai shekara 25, an yi ta alakanta shi da zai bar Molinuex da zarar an kammala kakar bana, kuma Old Trafford ɗan wasan Brazil ɗin zai koma da taka leda.

   Wolves ta zauna cikin ƴan karshen teburi a bana, wadda a watan nan ta tabbatar za ta ci gaba da buga Premier League a baɗi, kuma Cunha ya taka rawar gani a ƙungiyar.

   Ɗan wasan tawagar Brazil ya ci ƙwallo 15 da bayar da shida aka zura a raga.

   Wasu rahotanni a ranar Litinin na cewa Cunha ya kusan komawa Manchester United.

7. 19 Mayu 2025Farioli ya bar aikin horar da Ajax kaka ɗaya da ya karɓi aikin, Netherlands

   

   Asalin hoton, Getty Images

   Mai horar da tamaula, Francesco Farioli ya bar Ajax, bayan kammala kakar bana, sakamakon da ƙungiyar ta kasa lashe Eredivisie wato babban kofin tamaula na Nethrlands.

   Ajax ce kan gaba a teburi da tazarar maki tara lokacin da saura wasa bakwai-bakwai a kammala kakar nan, amma sai ga shi ranar Lahadi ta kare a mataki na biyu da tazarar maki ɗaya tsakani da PSV Eindhoven, wadda ta ɗauki kofin.

   Farioli, mai shekara 36 dan kasar Italiya ya bar Ajax kaka ɗaya da ya ja ragama, bayan da aka ɗauke shi kan yarjejeniyar kaka uku a bara.

8. 19 Mayu 2025Inter da Napoli za su buga wasanninsu na karshe a Serie A ranar Juma'a, Serie A

   Inter Milan da Napoli za su buga wasansu na karshe a Serie A ranar Juma'a maimakon Lahadi, kamar yadda mahukunta suka sanar ranar Litinin.

   Napoli za ta kece raini da Cagliari a ranar, yayin da Inter za ta je gidan Como.

   Napoli, wadda Antonio Conte ke jan ragama tana ta ɗaya a kan teburin Serie A da maki 79 da tazarar maki ɗaya tsakani da Inter mai riƙe da kofin bara.

   Idan ƙungiyoyin suka kare kakar nan da maki iri ɗaya, za a ware musu ranar da za su kece raini a tsakaninsu, domin fitar da wadda za ta lashe kofin bana.

   Watakila a saka musu ranar 26 ga watan Mayu, hakan zai bai wa Inter Milan damar buga karawar karshe a Champions League da za ta yi da Paris St Germain ranar 31 ga watan Mayu a Allianz Arena.

   Za a bug saura wasa shida ranar Lahadi, domin tantnce waɗan da za su je Champions League da waɗan da zasu bar Serie A.

   .

9. 19 Mayu 2025Waɗan ne sauran gurbi ake rububi a gasar zakarun Turai a baɗi?, Premier League

   

   Asalin hoton, Getty Images

   Brentford da Brighton da Fulham da kuma Bournemouth, wata daga ciki na fatan samun gurbin zakarun Turai a baɗi, domin wakiltar Ingila.

10. 19 Mayu 2025Kylian Mbappe ne kan gaba a cin ƙwallaye a La Liga, Real Madrid

    

    Asalin hoton, Getty Images

    • K. Mbappé R. Madrid 29
    • R. Lewandowski Barcelona 25
    • A. Budimir Osasuna 21
    • A. Pérez Villarreal 19
    • Raphinha Barcelona 18
    • A. Sørloth Atletico 17
    • J. Alvarez Atletico 17
    • O. Sancet A. Club 15
    • K. García D. Alaves 13
    • V. Júnior R. Madrid 11

11. 19 Mayu 2025Dogon Reza Bunza ya buge Mai karfin Ramadan, Damben Gargajiya

    

    An tashi ba kare bin damo tsakanin Shagon Biyun Samaila da Shagon Babba a sakamakon wasannin damben gargajiya da aka yi a gidan wasa da ke Ado Bayero Square a Kano, Nigeria ranar Lahadi.

    An tashi canjaras tsakanin Junior Ramadan da Dan Alin bata isarka da na Shagon Mada da Roget

    Shi kuwa Dogon Reza Bunza ya buge Mai karfin Ramadan

12. 19 Mayu 2025Real Madrid za ta kara da Sociedad ranar Asabar maimakon Lahadi, Gasar La Liga

    

    Asalin hoton, Getty Images

    Mahukuntan gasar La Liga sun sanar cewar Real Madrid za ta buga wasan karshe a kakar bana ranar Asabar maimakon Lahadi kamar yadda aka tsara tun farko.

    Kenan Real za ta karbi bakuncin Real Sociedad a Santiago Bernabeu ranar Asabar 24 ga watan Mayu.

    Real Madrid tana mataki na biyu a teburin La Liga da tazarar maki huɗu tsakani da Barcelona, wadda ta lashe La Liga na kakar nan na 28 jimilla..

13. 19 Mayu 2025Dalilin da ƙungiya shida daga Ingila za ta buga Champions League a baɗi, Premier League

    

    Asalin hoton, Getty Images

    Ranar Laraba za a buga wasan karshe a Europa League tsakanin Tottenham da Manchester United.

    Duk wadda ta yi nasara za ta buga babbar gasar zakarun Turai a baɗi, kenan ƙungiya shida ce za ta wakilci Ingila a Champions League.

    Tun farko Ingila ta samu karin tikiti ɗaya sakamakon kokarin da ƙungiyoyinta suka yi a bana a wasannin zakarun Turai, hakan ya sa ta samu karin gurbi daga huɗun da suke zuwa Champions League.

14. 19 Mayu 2025Jamie Vardy ya yi ban kwana da Leicester City, Leicester City

    

    Asalin hoton, Getty Images

    Jamie Vardy ya kammala rufe tarihinsa na taka leda a Leicester City da cin kwallo na 200 a wasa na 500, bayan da suka doke Ipswich Town 2-0 a wasan mako na 37 a Premier League ranar Lahadi - shi ne ya fara cin kwallon farko.

    Mai shekara 38 ya yi ban kwana da magoya bayan kungiyar King Power, bayan kaka 13, tun bayan da ya fara taka mata leda daga Fleetwood.

    Vardy ya ja ragamar Leicester wadda kaɗan ya rage ta fadi a 2015 a babbar gasar tamaula ta Ingila.

    Daga nan kungiyar ta ɗauki Premier League a wani abu kamar na almara da cin FA Cup a 2021.

    Haka kuma ya bayar da gudunmuwar da Leicester ta koma buga babbar gasar tamaula ta Ingila a banai, sai dai za ta koma buga Championship a kaka mai zuwa tare da Ipswich da kuma Southampton.

15. 19 Mayu 2025Real ta doke Sevilla, Villareal ta je ta ci Barcelona a La Liga, Spanish La Liga

    

    Asalin hoton, Getty Images

    Barcelona, wadda ta lashe La Liga na bana na 28 jimilla ta yi rashin nasara a gida da ci 2-3 a hannun Villareal a wasan mako na 37 a babbar gasar tamaula ta Sifaniya ranar Lahadi.

    Ita kuwa Real Madrid wadda take ta biyun teburi, zuwa ta yi ta ci Sevilla 2-0, Atletico Madrid ta lallasa Real Betis 4-1.

    Ranar Lahadi za a kammala wasannin bana a La Liga, inda Barcelona, wadda ta ci kofi uku a Sipaniya a kakar nan, za ta je gidan Athletic Bilbao a ranar ce Real za ta karkare da Sociedad a gida.

16. 19 Mayu 2025Ƴan wasan da ake alakantawa da Arsenal za ta ɗauka, Arsenal

    

    Asalin hoton, Getty Images

    Da zarar an kammala kakar nan za a fara batun sayo sabbin ƴan wasa don kara karfin ƙungiya, Arsenal tana daga cikin waɗan da ake sa ran za ta yi cefane - amma gurbin masu cin ƙwallaye ta fi bukata, kamar yadda ta yi karan cinsu a kakar nan.

    To sai dai ana ta alakanta wasu ƴan wasan da Arsenal tun kan a buɗe kasuwar cinikin ƴan ƙwallo:

    • Liam Delap (Ipswich Town)
    • Alexander Isak (Newcastle United)
    • Benjamin Sesko (RB Leipzig)
    • Viktor Gyokeres (Sporting Lisbon)
    • Jamie Gittens (Borussia Dortmund)
    • Nico Williams (Athletic Club)

17. 19 Mayu 2025Arsenal ta samu gurbin Champions League, Premier League

    

    Asalin hoton, Getty Images

    Arsenal za ta buga Champions League a kaka mai zuwa, sakamakon da ta yi nasara a kan Newcastle United 1-0 ranar Lahadi a Emirates - karo na uku tana karewa a mataki na biyu a teburin Premier League.

    Bayan da Gunners ta yi kaka shida ba tare da buga gasar Champions League ba, yanzu Arsenal za ta kara a gasar ta zakarun Turai karo na uku a jere.

    An fitar da Arsenal a zagayen daf da karshe a hannun Paris St Germain a kakar nan.

18. 19 Mayu 2025Waɗan ne ƙungiyoyi ne suka samu gurbin gasar zakarun Turai?, Premier League

    

    Asalin hoton, Getty Images

    Gurbin Champions League: Liverpool da Arsenal da duk wadda ta lashe Europa League tsakanin Manchester United ko Tottenham..

    Daga nan akwai saura gurbi uku da za su wakilci Ingila a Champions League a kaka mai zuwa.

    Gurbin Europa League: Crystal Palace wadda ta ɗauki FA Cup da duk wadda ta yi ta shida a teburin Premier League.

    Gurbin Conference League: Newcastle wadda ta lashe EFL Cup idan ta kare a wajen ƴan shidan farko.

    Tikitin Newcastle za a mika shi ga wadda ta kare a matsayi na bakwai a teburin Premier da zarar Newcastle ta kammala a cikin ƴan shidan farko.

19. 19 Mayu 2025Gurbin neman shiga gasar zakarun Turai a Ingila, Premier League

    

    Asalin hoton, Getty Images

    Duk ƙungiyar da ta kare daga gurbi na uku zuwa na biyar a teburin Premier League za ta haɗu da Liverpool da Arsenal daga biyar da za su wakilci Ingila a Champions League a baɗi..

    Wadda ta kare a mataki na shida za ta je buga Europa League.

    Ko yaya matsayin ƙungiyar da ta kare a matsayi na bakwai da na takwas a teburin Premier League?

    Newcastle United, wadda ta lashe Carabao Cup, tana da tikitin Conference League.

    Sai dai idan ƙungiyar St James Park ta kammala kakar nan a cikin ƴan shidan farko, kenan wadda ta kare a mataki na bakwai za ta kara a Conference League.

    Kenan da akwai damar wadda ta kammala a mataki na takwas ta fafata a Conference League.

    Hakan zai faru ne idan Chelsea ta kammala a mataki na bakwai, sannan ta lashe Conference League da za ta kara da Real Betis ranar Laraba 28 ga watan Mayu.

    Idan Chelsea ta ɗauki Conference League, sannan ta kare a mataki na shida - Ingila za ta samu wakilai uku a Europa League da ya haɗa da wadda ta ɗauki FA Cup, Crystal Palace da wadda ta yi ta shida a teburin Premier League.

20. 19 Mayu 2025Jerin wasannin da suka rage a Premier League, Premier League

    Ranar Litinin, 19 ga watan Mayu

    • Brighton da Liverpool

    Ranar Talata, 20 ga wwatan Mayu

    • Crystal Palace da Wolves
    • Manchester City da Bournemouth

    Ranar Lahadi, 25 ga watan May

    • Bournemouth da Leicester City
    • Fulham da Manchester City
    • Ipswich da West Ham
    • Liverpool da Crystal Palace
    • Manchester United da Aston Villa
    • Newcastle United da Everton
    • Nottingham Forest da Chelsea
    • Southampton da Arsenal
    • Tottenham da Brighton
    • Wolves da Brentford