Labaran wasannin BBC Hausa daga 26 ga Afirilu zuwa 1 ga watan Mayun 2026

Rahoto kai-tsaye

Mohammed Abdu da Haruna Kakangi

1. 27 Aprilu 2026Me kuke son sani kan wasan Man United da Brentford?, Premier League

   

   Asalin hoton, Getty Images

   Manchester United za ta karɓi bakuncin Brentford a wasan mako na na 34 a Premier League da za su fafata a Old Trafford ranar Litinin.

   A wasan farko a bana ranar 27 ga watan Satumba, Brebtford ce ta yi nasara 3-1 a gidanta.

   Ga abinda ya kamata ku sani kafin wasan:

   • Manchester United ta yi rashin nasara a wasa biyu na baya a lik a hannun Brentford, fiye da yadda ta yi nasara a kanta a wasa 11 da suka wuce (United ta ci takwas da canjaras biyu aka doke ta ɗaya daga ciki.
   • Brentford na neman ta doke Manchester United gida da waje a kakar guda (league double) karo na biyu a tarihi. Na farko shi ne a 1936-37, lokacin da Manchester United ta faɗai daga babbar gasar lik.
   • Wannan shi ne wasa na shida da Manchester United za ta yi a ranar Litinin a wannan kakar ta Premier League. Wannan shi ne mafi yawa tun kakar 1995-96 (shima shida), yayin da mafi yawansu shi ne bakwai a kakar 1992-93.
   • Tun bayan da ta sha kashi 1-0 a hannun Everton a watan Nuwamba, Manchester United ta zura ƙwallo a wasa 21 a jere a Premier League. Wannan shi ne mafi tsawo da ta yi a jere bayan ritayar Alex Ferguson (lokacin da suka zura ƙwalo a wasa 23 a jere tsakanin Nuwamba 2012 zuwa Afrilu 2013).
   • Brentford ta yi canjaras a wasa biyar a jere a Premier League. Ƙungiyar ƙarshe da ta yi irin haka ita ce Manchester City wadda ta yi bakwai a jere a 2009.
   • Manchester United ta sha kashi 2-1 a hannun Leeds United a wasan gida a makon jiya ranar Litinin, amma ba ta yi rashin nasara a gida sau biyu a jere ba tun Mayu 2025.
   • Bruno Fernandes ya bayar da ƙwallo a zura a raga sau 18 a wannan kakar. Mutane uku ne kawai suka fice wannan bajintar da ya haɗa da Thierry Henry (20 a 2002-03), Kevin De Bruyne (20 a 2019-20), da Mesut Özil (19 a 2015-16).

2. 26 Aprilu 2026FA Cup: Chelsea ta kai wasan karshe kwana hudu da korar koci, The FA Cup

   

   Asalin hoton, Getty Images

   Enzo Fernandez ne ya ci ƙwallon da Chelsea ta kai wasan karshe a FA Cup, bayan doke Leeds United 1-0 a Wembley ranar Lahadi.

   Ƙungiyar Stamford Bridge ta samu wannan damar kwana huɗu tsakani da korar kociya, Liam Rosenior, saboda kasa samun nasarorin da ake bukata.

   Chelsea, wadda ke fama da koma baya ta yi wannan namijin kokarin karkashin kociyan riƙon kwarya, Calum McFarlane da zai yi aiki zuwa karshen kakar bana.

   Leeds ta sa ran za ta yi wani abun, ganin wasa na uku da ta fuskanci Chelsea da yin nasara 3-1 cikin watan Disamba a Elland Road da yin 2-2 a karawa ta biyu a Stamford Bridge a Premier League a bana.

   Yanzu dai Chelsea za ta sake komawa Wembley ranar 16 ga watan Mayu, domin buga wasan karshe da Manchester City, wadda ta yi waje da Southampton 2-1 ranar Asabar.

   Karon farko da Chelsea ta kai zagayen karshe a FA Cup tun bayan rashin nasara a hannun Liverpool a 2022.

3. 26 Aprilu 2026Sesco na fatan lashe kofuna a Manchester United, Manchester United

   

   Asalin hoton, Getty Images

   Dan wasan Manchester United, Benjamin Sesko, yana fatan kaka baɗi zai bayar da gudunmuwar da za su lashe kofuna da yawa.

   United na dab da samun tikitin shiga Champions League, bayan ta ta koma kan ganiya karkashin jagorancin Michael Carrick.

   Kocin rikon kwarya Carrick ya jagoranci nasarori takwas cikin wasa 12 a Premier League tun bayan karɓar ragamar aiki a watan Janairu daga hannun Ruben Amorim.

   Ƙungiyar Old Trafford na fatan taka rawar gani a wasan Premier League da za ta karɓi bakuncin Brentford ranar Ltinin.

   Sesko ya zura ƙwallo 10 tun bayan dawowarsa United daga RB Leipzig a bara.

   Harry Maguire na dab da komawa taka leda a United a wasan da za su fafata da Brentford bayan ya gama hukuncin dakatarwa na wasa biyu. Amma Lisandro Martinez har yanzu yana zaman dakatarwa, yayin da ake ci gaba da auna koshin lafiyar Leny Yoro.

4. 26 Aprilu 2026, Daga jaridu

   

   Asalin hoton, Getty Images

   Dan wasan Sweden Lucas Bergvall, mai shekara 20, zai yi watsi da tayin da Chelsea da Aston Villa su ka yi masa don ya ci gaba da taka leda a Tottenham idan suka samu nasarar tsallake komawa gasar firmiya. (Football Insider), external

   Arsenal na sha'awar Endrick, wanda aka ba da shi aro ga Lyon, kuma ana ganin za ta yi kokarin siyan dan wasan dan kasar Brazil mai shekara 19 a wannan bazara idan ya cimma duk bukatun Real Madrid. (Caught Offside), external

   Dan wasan Manchester City da Portugal Bernardo Silva, mai shekara 31, ba shi da anniyar komawa wata kungiyar firimiya a wannan bazara duk da cewa ya na son ya ci gaba da buga tamaula a turai. (Football Insider), external

   Coventry na shirin kashe Fam miliyan 200 don inganta yan wasanta a gasar Premier, kuma hankalinta na kan dan wasan Aston Villa da Sfaniya Pau Torres, mai shekara 29, da kuma dan wasan Tottenham da Ingila, Conor Gallagher, mai shekara 26.(Fichajes - in Spanish), external

   AC Milan a shirye take ta bar dan wasan Portugal Rafael Leao, mai shekara 26, ya bar kungiyar a kakar wasa ta bana ya yin da Manchester United da Barcelona ke zawarcinsa, amma za ta bukaci a biyata Yuro miliyan 60 (Calciomercato - in Italian), external

5. 26 Aprilu 2026Ko Ronaldo zai iya lashe manyan kofuna biyu a bana?, Cristiano Ronaldo

   

   Asalin hoton, Getty Images

   A ranar 23 ga watan Afrilu ne ƙungiyar Al-Nassr ta lallasa ƙungiyar Al-Ahli ta Qatar da ci biyar da ɗaya a wasan gab da ƙarshe na gasa ta biyu ta zakarun Asia da ake kira AFC Champions League 2 ko kuma ACL2 ta bana.

   Bayan lallasa Al-Ahli a filin wasa na Zabeel Stadium da ke Dubai a Haɗaɗɗiyar Daular Larabawa, yanzu Ronaldo zai fafata ne da ƙungiyar Gamba Osaka ta ƙasar Japan a wasan ƙarshe.

   Za a buga wasan na ƙarshe na a ranar 17 ga watan Mayu, wanda idan Al-Nassr ta samu nasara, kofin zai zama ɗoriya a kan kofunan nahiya da Cristiano ya lashe a baya.

   Bayan wannan kofin na nahiya, yanzu haka Al-Nassr ta yi ɗare-ɗare a saman teburin gasar cin kofin Saudiya.

   Za ku iya ci gaba da karanta labarin ta nan

6. 26 Aprilu 2026Arsenal za ta ci gaba da kalubalantar lashe Premier - Rice, Premier League

   

   Asalin hoton, Getty Images

   Declan Rice ya jaddada cewa Arsenal FC a shirye take ta ci gaba da kalubalantar lashe kofin Premier League har zuwa karshen kakar nan, bayan da Gunners ta koma kan teburi babbar gasar tamaula ta Ingila.

   Arsenal ta samu wannan damar bayan cin Newcastle 1-0 ranar Asabar a Emirates a wasan mako na 34, kuma Eberechi Eze ne ya ci ƙwallon.

   Hakan ya kawo karshen kwana uku da City ta yi a kan teburin Premier League, tun bayan da ta karɓa a hannun Arsenal.

   Yanzu haka Arsenal tana da maki 73 da tazarar uku tsakani da City ta biyu mai 70 da kwantan wasa ɗaya, bayan da ta kai karawar karshe a FA Cup, sakamakon doke Southampton 2-1 ranar Asabar a Wembley.

   Watakila Arsenal ta kara yawan tazara tsakanin da City, bayan da za ta buga wasan hamayya da Fulham a Emirates a makon gobe.

   Ita kuwa City karkashin Pep Guardiola za ta fafata da Everton ranar Litinin 4 ga watan Mayu.

   Sauran wasannin da yake gaban Arsenal ya haɗa da fuskantar West Ham United da Burnley da kuma Crystal Palace yayin da take ta ƙoƙarin lashe kofin Premier League na farko cikin shekaru 22.

   Kafin wasan da Arsenal za ta karɓi bakuncin Fulham a Premier, za ta fara zuwa Atletico Madrid, domin buga wasan farko zagayen daf da karshe a Champions League ranar Laraba.

   Gunners ta taɓa buga wasan karshe a gasar zakarun Turai a 2006, amma ba ta taɓa lashe kofin ba a tarihinta.

   A gefe guda, Arsenal na jiran jin halin koshin lafiyar Eze kafin su je Sfaniya, bayan raunin da ya ji a karawa da Newcastle.

   Shi dai Eze na kan ganiya, wanda ya ci ƙwallo 11 kawo yanzu.

7. 26 Aprilu 2026, Daga Jaridu

   

   Asalin hoton, Others

   Arsenal ta fara tattaunawa da dan wasan Sporting, Maxi Araujo, mai shekara 26, amma ta na fuskantar hamayya daga Manchester City da Manchester United (Record - in Portuguese and subscription required), external

   Watakila Manchester United ta amincewa 'yan wasa 13 barin Old Trafford a wannan bazarar yayin da INEOS ke shirin sake fasalin 'yan wasan kungiyar (Express), external

   United ta saka dan wasan Atalanta da Brazil, Ederson, mai shekara 26, a cikin jerin sunnayem 'yan wasa da ta ke so. (Talksport), external

   Dan wasan Netherlands Tijjani Reijnders, mai shekara 27, na jan hankalin kungiyoyin firimiya lig da kuma na turai bayan kakar wasannin ta farko da be ji dadinta a Manchester City ba . (Calciomercato - in Italian), external

   Liverpool ta amince ta biya Yuro miliyan 60 domin siyan dan wasan Morocco Abde Ezzalzouli, mai shekara 24, daga Real Betis.(Fichajes - in Spanish), external

8. 26 Aprilu 2026Coventry ta yi bikin lashe Championship da cin Wrexham, Championship

   

   Asalin hoton, Rex Features

   Coventry ta yi bikin lashe gasar Championship da yin nasara 3-1, hakan ya sa burin Wrexham na samun shiga wasan cike gurbin ya zama ba tabbas.

   Tun a ranar Talata, Coventry karkashin Frank Lampard ta samu lashe Champions League tun kafin karawa da Wrexham.

   Brandon Thomas-Asante ne ya fara cin ƙwallo a minti na 19 a CBS Arena, amma Ollie Rathbone ya farkewa Wrexham wadda ke matsayi na shida a teburi.

   Wrexham ta yi fatan a tashi 1-1, amma minti 10 kafin a tashi Victor Torp ya kara na biyu a bugun tazara, sai kuma Ephron Mason-Clark ya ci wa Coventry na uku a minti na huɗu na ƙarin lokaci.

9. 26 Aprilu 2026Yaya batun kwantiragin Rashford a Barcelona?, Barcelona

   

   Asalin hoton, Getty Images

   Akwai wani lokaci a fannin sauya ƙungiya daga wani ɗan wasan ba labari ne da wasu ke rubutawa.

   Wani lokaci hakan na faruwa a lokacin da ɗan wasa ke teburin cin abinci ko yana cikin duba waya, musamman da dare, sai kawai ɗan wasa ya ji kiran waya daga wani wajen da bai yi tsammani ba.

   Wasu lokutan wakilan ƴan wasa ne ke kammala ciniki tare da amincewar ɗan ƙwallo daga a tak ga kulla yarjejeni ta komawa wata ƙungiyar watakila a aro ko kuma tafiya dindindin.

   Ga Marcus Rashford, hakan yana faruwa sau da yawa a kwanan nan.

   Akwai labarai da ke cewa FC Barcelona ba sa son tsawaita yarjejeniya da Manchester United da cewar watakila ya koma buga Premier League.

   Wasu na mamakin yadda ɗan ƙwallon tawagar Ingila ya taka rawar gani a Barcelona, amma za ta bari ya koma United a baɗi.

   Rashford ya koma Barcelona a bara, bayan da abubuwa suka lalace masa duk da ya je wasannin aro a Aston Villa.

   Kawo yanzu Rashford ya ci ƙwallo 12 a Barcelona a kakar nan, wadda take daf da lashe kofin bana kuma na biyu a jere.

   Shin ko Carrick zai yi amfani da Rashford kuwa a United.

10. 26 Aprilu 2026Barkanmu da shiga fagen labarin wasanni

    Jama'a barkanmu da kasancewa a cikin shirin labarin wasanni da za mu ke sanar da ku wainar da ake toyawa daga wannan ranar zuwa Asabar 18 ga watan Afirilu.

    Sunana Mohammed Abdu za ku iya tafka muhawara a BBC Hausa Facebook ko kuma ku bibiyi labaran da muke wallafawa a BBC Hausa WhatsApp.