Zaben Amurka: Ƴan asalin Najeriya da suka lashe kujerun majalisa a Amurka
Asalin hoton, Ether Agbaje and Oye Owolewa
Hukumar da ke kula da ƴan Najeriya mazauna ƙasashen waje ta taya wasu ƴan asalin ƙasar da suka yi nasarar lashe kujerun majalisa a zaɓen Amurka.
Oye Owolewa ya kasance ɗan asalin Najeriya na farko da aka zaɓa a majalisar Amurka domin wakilar Washington.
Mista Owolewa ya lashe kujerar majalisar wakilai ƙarkashin jam'iyyar Democrats.
Haka ma Esther Agbaje ƴar Democrats ta samu kujerar majalisa a jihar Minnesota.
Shugaban hukumar kula da ƴan Najeriya mazauna ƙasashen waje Abike Dabiri-Erewa, ta wallafa sakon taya murna ga ƴan asalin Najeriyar kan nasarar da suka samu a zaɓen na Amurka.
Wannan labari ne na dauke da bayanai da X suka bayar. Muna neman amincewarku kafin mu dora muka, saboda nuna iya dauke da wasu bayanai da aka iya adanawa. Watakila kana za ka so ka karanta X da tsarin bayanan da za a adana da da tsarin sirri kafin ka amince. Idan kana son ganin wannan bayani ka zabi ‘amince sannan ka ci gaba’.
Karshen labarin da aka sa a X
Ta kuma ce sun kasance wakilai na ƙwarai abin koyi ga matasan Najeriya.
Abubuwa huɗu game da Esther Agbaje
Asalin hoton, Esther Agbaje Campaign
- An haifi Esther Agbaje a Minnesota.
- Iyayenta, John da Bunmi ƴan asalin Najeriya ne da suka haɗu a Amurka a makaranta.
- Ta yi karatun shari'a a makaranta sharia ta Harvard Law school kuma ta ƙware ne a ɓangaren da ya shafi gidaje.
- Ta yi aiki a gwamnati a ma'aikatar harakokin wajen Amurka.
Asalin hoton, Oye Owolewa campaign
Abu huɗu game da Oye Owolewa
- Oye Owolewa ɗan asalin jihar Kwara ne a Najeriya.
- Ya yi digirinsa na uku a jami'an Northeastern Boston
- Ba wannan ne karon farko ba da ya shiga siyasa, ya taba zama kwamishina a kudu maso gabashin Washington a 2018.
- Burinsa a matsayin ɗan majalisa shi ne kawo sauyi a jiharsa.
- Yana son kawo ƙarshen haramta wa baƙi shiga ƙasar.
