Cyngor Môn yn pleidleisio dros gau ysgol leiaf yr ynys
Bydd disgyblion Ysgol Gymuned Carreglefn yn mynychu Ysgol Gymuned Llanfechell wedi gwyliau'r haf
- Cyhoeddwyd
Mae Pwyllgor Gwaith Cyngor Môn wedi pleidleisio'n unfrydol dros gau ysgol gynradd leiaf yr ynys.
Bydd Ysgol Gymuned Carreglefn, ger Amlwch, sydd ag ond naw o ddisgyblion, yn cau yn swyddogol yr haf yma.
Yn ôl y cyngor mae'r gost fesul disgybl yn yr ysgol yn £17,200 - sef yr uchaf yng Nghymru a dros dair gwaith cost gyfartalog disgyblion cynradd y sir, sef £5,240.
Gyda'r disgwyl byddai nifer y disgyblion yn syrthio i bump y flwyddyn nesaf, bydd y disgyblion yn mynychu Ysgol Gymuned Llanfechell - sydd ychydig dros ddwy filltir i ffwrdd - o fis Medi 2024.
Cynghorwyr yn trafod cau ysgol leiaf Ynys Môn
- Cyhoeddwyd9 Chwefror 2024
Ysgol Carreglefn: Cefnogi cau ysgol leiaf Ynys Môn
- Cyhoeddwyd13 Chwefror 2024
Ar hyn o bryd mae holl ddisgyblion Ysgol Carreglefn, sy'n bwydo Ysgol Syr Thomas Jones, Amlwch, yn cael eu haddysgu mewn un dosbarth.
Roedd wyth llythyr o wrthwynebiad wedi eu derbyn, gyda saith o'r rheiny gan ddisgyblion presennol yr ysgol.
Cadw'r adeilad at fudd y gymuned
Clywodd cyfarfod o Bwyllgor Gwaith Cyngor Môn fore Iau fod ymdrechion ar y gweill i gadw'r adeilad ar agor at ddefnydd cymunedol.
Dywedodd is-arweinydd y cyngor, Gary Pritchard: "Mae ein diolch i gymuned yr ysgol am y ffordd barchus y maen nhw wedi ymdrin â'r broses, sydd ddim yn un bleserus."
Diolchodd y Cynghorydd Gary Pritchard aelodau o'r gymuned leol am y ffordd "barchus" y bu iddynt ymdrin â'r broses
Nid oedd Cyngor Cymuned Mechell wedi datgan gwrthwynebiad i gau'r ysgol ond roedd yr aelodau'n awyddus i gydnabod "safonau uchel yr addysg a dderbyniwyd dros 125 mlynedd" a datgan eu diolch i staff yr ysgol, "sydd wedi cynnal yr ysgol o dan amgylchiadau anodd".
"Mae’n bwysig fod pob ymdrech yn cael ei gwneud i gefnogi’r gweithgareddau sy’n cael eu cynnal yn y neuadd gymunedol ac mae’r Cyngor Cymuned yn cynnig ei gefnogaeth i’r pwyllgor rheoli a phobl leol.
"Mae newid demograffeg mewn ardaloedd gwledig yn sefyllfa drist iawn gan fod prinder o deuluoedd ifanc yn yr ardal ac mae’r gymuned lawer iawn tlotach oherwydd hyn."
Mae nifer y disgyblion yng Ngharreglefn wedi gostwng o 42 yn 2012, a 15 yn 2020.
Gan fod Carreglefn â llai na 10 o ddisgyblion mae Cod Trefniadaeth Ysgolion Llywodraeth Cymru yn nodi nad oedd angen i'r awdurdod gynnal ymgynghoriad cyffredinol cyn dilyn y broses ffurfiol i'w chau.