Sara Dafydd
Gohebydd BBC Cymru

Mae’r ras etholiadol ar fin dechrau yn Velodrome Cenedlaethol Geraint Thomas.

Mae’n dawel yma ar hyn o bryd ond dyma un o’r etholaethau prin oedd yn gwirhau pleidleisiau dros nos ac mae staff yn dechrau dychwelyd i ddechrau’r cyfri tua 10:00.

Mae un ffynhonnell o’r gwirio nos wedi dweud bod pethau’n edrych “yn wael iawn” i’r Blaid Lafur yma, sydd o hyd wedi bod yn ardal gyfforddus iddyn nhw. Islwyn oedd sedd cyn-arweinydd y Blaid Lafur yn San Steffan Neil Kinnock.

Un posibiliad yw bod Plaid Cymru a Reform yn ennill tair sedd yr un, gan waredu y Blaid Lafur yn gyfangwbl neu mae yna adroddiadau y gall Jayne Bryant o’r Blaid Lafur ddal gafael ar ei sedd hi.

Gydag arweinydd Reform Dan Thomas yn sefyll yma, mae'n sicr yn sedd mae’r blaid yn llygadu. Does dim sôn o’r gŵr o’r Coed Duon eto yma yn y felodrom. Mae yna suon y bydd Nigel Farage yn gwneud ymddangosiad i ddangos ei gefnogaeth ond heb ei gadarnhau.

Mae Casnewydd Islwyn yn gyfuniad o hen etholaethau Islwyn, Dwyrain Casnewydd a Gorllewin Casnewydd. Dyma’r ail etholaeth fwyaf o ran poblogaeth a 47.8% wedi pleidleisio yn yr etholiad hon, ffigwr sylweddol uwch nag etholiadau’r gorffennol.

Iolo Cheung
Gohebydd BBC Cymru Fyw

Mae’r Swyddog Canlyniadau ar gyfer Pontypridd Cynon Merthyr newydd gyhoeddi fod y broses o wirio’r pleidleisiau ar fin dechrau yma yn y cyfrif yn Aberdâr.

Hon yw’r broses sy’n digwydd cyn i’r pleidleisiau hyd yn oed ddechrau cael eu cyfrif.

Dydyn nhw ddim yn disgwyl i’r broses wirio gael ei chwblhau nes tua 12:30 – gyda disgwyl canlyniad terfynol y pleidleisiau am tua 15:30.

Digon o amser i fynd fan hyn felly!

Etholiad 2026

Ffynhonnell y llun, Peter Byrne/PA

Ffynhonnell y llun, Peter Byrne/PA

Plaid Werdd Cymru

Dyw'r Gwyrddion ddim wedi ennill sedd ym Mae Caerdydd ers datganoli ac fe fyddai cael y sedd gyntaf yna yn llwyddiant yn ôl ymgeisydd Sir Fynwy Torfaen, Ian Chandler.

"Rydym ni wedi ein calonogi gyda'r arolygon barn, ac mae gweld cyfran y bleidlais ar draws Lloegr yn dangos hynny.

"Pan wnaeth Zack Polanski gymryd yr awenau fel arweinydd fe ddywedodd ein bod yma i ddisodli Llafur, ac mae hynna yn edrych yn addawol mewn sawl rhan o'r DU."

Ffynhonnell y llun, bbc

Etholiad 2026

Mae Sir Gaerfyrddin yn etholaeth Senedd newydd, yn cyfuno rhannau o hen seddi Gorllewin Caerfyrddin a De Sir Benfro, Dwyrain Caerfyrddin a Dinefwr, a Llanelli.

Ffeithiau allweddol

• Poblogaeth: 190,800
• Amcangyfrif siaradwyr Cymraeg: 40%
• Economi: Amaeth, twristiaeth, cynhyrchu nwyddau, Bwrdd Iechyd Hywel Dda, Coleg Sir Gâr

Ffynhonnell y llun, Getty Images

Mae peilonau trydan Dyffryn Tywi ac ailstrwythuro gwasanaethau Hywel Dda yn rhai o'r pynciau mwyaf llosg yn yr etholaeth hon.

Mae'r sedd yn cynnwys ardaloedd yr hen byllau glo, cymunedau cefn gwlad, a threfi fel Caerfyrddin a Llanelli.

Mae dau o Blaid Cymru yn ceisio cadw eu seddi sef Cefin Campbell sydd ar frig y rhestr ac Adam Price sy'n drydydd. Cafodd Cefin Campbell ei ethol yn AS rhanbarthol yn 2021 ac fe etholwyd Adam Price, a oedd yn arwain Plaid Cymru rhwng 2018 a 2023, i gynrychioli Caerfyrddin a Dinefwr yn 2016.

Mae canllaw i'r 16 etholaeth newydd ar gyfer etholiad y Senedd i'w weld yma.

Etholiad 2026

Mae 110 o bobl yn y ganolfan hamdden newydd - Pentre Awel - yn Llanelli er mwyn cyfri pleidleisiau etholaeth Sir Gaerfyrddin.

Yr awgrym yw bydd y canlyniad yn cael ei gyhoeddi tua 14:00 heddiw.

Mae'n mynd i fod yn un diddorol, eglurodd Garry Owen.

"Os ydych chi'n credu'r arolygon barn, mae 'na sôn y gallai Plaid Cymru, ar ddiwrnod da, gipio tair sedd, y gallai Reform, ar ddiwrnod da, gipio tair sedd. Byddai hynny'n ergyd enfawr i'r Blaid Lafur yn yr ardal hon."

Ffynhonnell y llun, Getty Images

Fe wnaeth y blychau pleidleisio gau am 22:00 neithiwr ac mae'r cyfrif wedi dechrau bore 'ma.

Gan bod trefn newydd o bleidleisio eleni - dull D'Hondt - mae'n fwy anodd darogan pryd fydd y canlyniadau cyntaf yn cael eu cyhoeddi ond mae disgwyl iddynt ddod i law yn ystod y prynhawn.

Mae 16 etholaeth - oll yn dewis chwech o aelodau i'w cynrychioli.

Dros Frecwast
BBC Radio Cymru

Dywedodd Robert Thomas o blaid Reform UK bod y canlyniadau yn etholiadau Lloegr yn "addawol" ar hyn o bryd.

Yn siarad ar raglen Dros Frecwast, soniodd am rai o flaenoriaethau etholwyr yn ystod yr ymgyrch.

"Mae pobl yn grac. Safon gwasanaethau cyhoeddus - 'da ni wedi clywed straeon harrowing am bobl yn marw ar y rhestrau aros, yn dioddef yn cael corridor care ac yn y blaen," meddai.

"Mae cost of living ac immigration wastad yn dod i fyny ar garreg y drws hefyd."

Dywedodd bod Reform UK yn cynnig "newid" a bydd rheolwyr y GIG yn cael eu dal yn atebol os ydyn nhw yn methu yn eu swydd.

"'Di'r sefyllfa ar hyn o bryd ddim yn dderbyniol," meddai.

Ychwanegodd ei fod yn "rhy gynnar yn y dydd" i drafod pa bleidiau fydd Reform UK yn fodlon ffurfio clymblaid gyda nhw.

Richard Wyn Jones
Athro Gwleidyddiaeth Cymru

Ar raglen Dros Frecwast dywedodd yr arbenigwr gwleidyddol yr Athro Richard Wyn Jones: “Mae’n bosib iawn bod ni’n mynd i weld rhywbeth nad ydan ni erioed wedi gweld ym mywyd unrhyw sy’n gwrando ar y rhaglen hon - sef Llafur yn colli gafael yng Nghymru.

“Mae’r hyn sy’n digwydd yn Lloegr yn ddiddorol, mae’r hyn sy’n digwydd yn yr Alban yn ddiddorol, ond dwi’n ymddiheuro i neb am feddwl bod y stori fwya' yma yng Nghymru heddiw.”

Ffynhonnell y llun, PA Media

Wrth siarad gyda'r wasg mae Prif Weinidog y DU, Keir Starmer, yn dweud ei fod yn cymryd y "cyfrifoldeb" am ganlyniadau etholiadau cynghorau yn Lloegr.

"Maen nhw yn [ganlyniadau] anodd, a does dim modd osgoi hynny," meddai.

Dywedodd bod y blaid wedi "colli cynrychiolwyr gwych ar draws y wlad... mae hynny yn brifo, ac fe ddylai frifo, a dwi'n cymryd y cyfrifoldeb".

Fe ychwanegodd: "Dyw diwrnodau fel hyn ddim yn gwanhau fy awch i gyflawni'r newid dwi wedi ei addo."

Dros Frecwast
BBC Radio Cymru

Mae ymgeisydd Plaid Cymru yn etholaeth Caerdydd Ffynnon Taf, y cyn-ddarlithydd gwleidyddiaeth Dr Dafydd Trystan Davies, wedi dweud y byddai wrth ei fodd yn dysgu myfyrwyr am etholiad 2026 gan ei fod mor ddifyr.

Ond wrth siarad ar Dros Frecwast dywedodd nad oedd yn sicr eto os mai Plaid Cymru neu Reform fyddai’n fuddugol - ond ei bod yn glir bod newid sylweddol ar y ffordd.

“Mae Llafur wedi ennill pob etholaeth yma ers 1923... ac felly mae hynny’n ddaeargryn yn ei hun - mae e’n newid gwleidyddiaeth Cymru, mae’n newid y tirlun gwleidyddol," meddai.

“Ro’n i’n arfer dysgu am etholiadau yn y brifysgol i fyfyrwyr - fyddwn i wrth fy modd yn dysgu pobl am etholiadau heddiw.

“Ydy Plaid Cymru yn hyderus? Dwi ddim yn credu bod unrhyw un yn gwybod ar y pwynt hwn ai Reform neu Plaid Cymru fydd yn ennill yr etholiad hwn.

“Dyna’r dewis fu o’r cychwyn cynta’, dyna’r dewis sydd nawr a dyna’r dewis erbyn diwedd y dydd heddiw fydd wedi dod yn gliriach."

Etholiad 2026

Mae Blaenau Gwent Caerffili Rhymni yn etholaeth Senedd newydd, yn cyfuno rhannau o hen seddi Islwyn, Blaenau Gwent, Merthyr Tudful a Rhymni, a Chaerffili.

Ffeithiau allweddol

• Poblogaeth: 192,579
• Amcangyfrif siaradwyr Cymraeg: 10%
• Economi: Cynhyrchu, manwerthu, twristiaeth, Bwrdd Iechyd Aneurin Bevan, Coleg y Cymoedd

Ffynhonnell y llun, Getty Images

Costau byw, iechyd a thrafnidiaeth yw'r prif bynciau - yma mae'r gyfradd uchaf yng Nghymru o salwch hirdymor.

Mae tri o ASau chweched tymor y Senedd yn sefyll sef Alun Davies sydd wedi bod yn AS Llafur Blaenau Gwent ers 2011 a chyn hynny yn aelod rhanbarthol, Delyth Jewell sydd wedi bod yn AS Plaid Cymru ers 2019 a hi hefyd yw dirprwy arweinydd y blaid a Lindsay Whittle a ddaeth yn AS Plaid Cymru Caerffili yn 2025 wedi'r isetholiad.

Mae Alun Davies ar frig rhestr Llafur, Delyth Jewell ar frig rhestr Plaid Cymru a Lindsay Whittle yn ail.

Mae canllaw i'r 16 etholaeth newydd ar gyfer etholiad y Senedd i'w weld yma.

Etholiad 2026

Canolfan Hamdden Caerffili yw lleoliad y cyfri ar gyfer etholaeth Blaenau Gwent Caerffili Rhymni.

Mae’r neuadd wedi’i gosod yn barod, ond neb wedi cyrraedd eto.

Cafodd y papurau pleidleisio eu gwirhau dros nos - roedd staff y cyngor yn y neuadd tan 02:30 yn gwneud hynny.

Mae disgwyl i'r cyfri ddechrau am 10:00.

Dywedodd cyn-Brif Weinidog Cymru, Carwyn Jones, bod angen i bleidiau ddangos i bobl bod ganddyn nhw bolisïau da er mwyn cael "yr hawl i lywodraethu".

Ychwanegodd ei bod "yn amlwg" nad oedd Llafur wedi llwyddo gyda hynny y tro hwn, a bod Plaid Cymru wedi bod yn "effeithiol ynglŷn â dweud os ydych chi'n pleidleisio Plaid allwch chi stopio Reform."

Ar BBC Radio 5 Live dywedodd Carwyn Jones bod Llafur wedi rhoi eu hunain mewn sefyllfa lle nad ydyn nhw bellach "yn cael eu gweld fel plaid pobl sydd yn gweithio".

"Mae angen i ni fod yn fwy radical, mae angen i ni fod yn fwy hyderus yn y negeseuon ni'n eu cyflwyno. "

“Mae cael pleidleisio am y tro cyntaf yn eitha cyffrous, a dweud y gwir," meddai Sami Sullivan sy'n fyfyriwr newyddiaduraeth ym Mhrifysgol Caerdydd

“Wrth astudio newyddiaduraeth ac edrych ymlaen at yr etholiad ers misoedd, mae’n teimlo fel bod y cyfle o’r diwedd wedi cyrraedd.

“Chi wedi gweld eich rhieni’n pleidleisio dros y blynyddoedd, ac yna’n sydyn mae’r profiad yna’n dod i chi’ch hun.

“Gawn ni weld os bydd fy mhleidlais i wedi cyfrif yn y canlyniad!”

Dros Frecwast
BBC Radio Cymru

Yn ôl y sylwebydd gwleidyddol Dafydd Rees mae’n ymddangos bod canlyniadau etholiadau Lloegr yn rhai arwyddocaol iawn wrth i'r canlyniadau cyntaf ddangos bod Reform UK wedi ennill nifer sylweddol o seddi cynghorau lleol.

Meddai ar raglen Dros Frecwast: "Maen nhw'n ganlyniadau tyngedfennol ac efallai hanesyddol.

"Yn hwyrach ymlaen heddiw efo beth fydd yn digwydd yng Nghymru - honno yw’r brif stori ond yn Lloegr, falle dyw’r darlun ddim yn gyflawn ond mae'r neges yn glir bod Reform wedi cael buddugoliaeth ledled Lloegr, ac yn arbennig yn y gogledd orllewin.”

Ychwanegodd bod pleidleisio a phatrwm gwleidyddiaeth yn newid ac yn yn symud i ffwrdd o system gyda dwy brif blaid.

"Mae gwleidyddiaeth y wlad yma nawr yn edrych yn fwy tebyg i wleidyddiaeth yr Almaen, neu Ffrainc neu Sbaen ble mae 'na bleidiau gwahanol ar gael.

"A beth sydd yn digwydd nawr yw bod rhaid i'r bleidlais fod yn un dactegol.”

Wrth i ni ganolbwyntio ar etholiad y Senedd yng Nghymru roedd yna etholiadau eraill ddydd Iau - yn Yr Alban roedd etholiad Senedd ac roedd etholiad cynghorau lleol mewn sawl ardal yn Lloegr.

Doedd yna ddim cyfrif dros nos yn Yr Alban chwaith - mae disgwyl y bydd enwau'r 129 ASau yn dechrau cael eu cyhoeddi yn ystod yr oriau nesaf.

Yno roedd 440 o ymgeiswyr yn sefyll o 29 plaid gwahanol.

Mae'r drefn bleidleisio yn Yr Alban wedi aros yr un fath gydag etholwyr yn cael dwy bleidlais - un ar gyfer ymgeisydd ac un arall ar gyfer plaid er mwyn dewis aelodau rhanbarthol.

Ffynhonnell y llun, PA Media

Huw Lewis
Sylwebydd gwleidyddol

Os bydd y canlyniadau’n adlewyrchu’r hyn a welwyd yn yr arolygon barn, gallai hwn fod yr etholiad gorau erioed i Blaid Cymru.

Serch hynny, bydd faint o ddathlu fydd ymhlith aelodau’r blaid yn dibynnu ar sawl ffactor.

Y prif nod, heb os, fydd gorffen fel y blaid fwyaf ac ennill y gyfran uchaf o’r bleidlais - gan wthio Reform i’r ail safle.

I Rhun ap Iorwerth, y canlyniad delfrydol fyddai ennill digon o seddi i wneud llywodraeth leiafrifol yn opsiwn realistig. Byddai hynny’n galluogi Plaid Cymru i lywodraethu ar ei phen ei hun, gan ddibynnu ar gefnogaeth achlysurol pleidiau eraill fel y Gwyrddion neu Lafur, heb orfod ffurfio clymblaid ffurfiol.

Ffynhonnell y llun, PA Media

Ond mae’n debygol y byddai angen i’r blaid ennill yn agos at 40 sedd cyn y byddai hynny’n bosib.

Byddai gorffen y tu ôl i Reform yn ergyd sylweddol.

O dan y fath amgylchiadau, byddai dal yn bosib i Blaid Cymru geisio arwain llywodraeth am y tro cyntaf yn ei hanes trwy gydweithio â phleidiau eraill ar y chwith.

Fodd bynnag, byddai arwain llywodraeth o’r fath yn heriol dros ben.

Yn un peth, byddai’n llai o awdurdod i Blaid Cymru bwyso am gonsesiynau gan Lywodraeth y Deyrnas Unedig.

Un groes oedd etholwyr yn ei roi ar y papur pleidleisio eleni.

Wrth gyfri'r pleidleisiau heddiw ar gyfer 16 etholaeth mae system D'Hondt yn cael ei defnyddio.

Sage Todz a Bitesize sy'n egluro mwy am y drefn newydd.

Mae tair etholaeth yn y de eisoes wedi gwirhau (verify) y pleidleisiau a bellach mae pob etholaeth yn gwneud hynny.

Y cyfri felly wedi dechrau o ddifri.

Mae disgwyl y canlyniadau cyntaf ddechrau'r prynhawn ond mae trefn eleni yn gwbl newydd.