Seiont Manor: Gwrthod cais i ailddatblygu gwesty moethus

Mae cynghorwyr yng Ngwynedd wedi gwrthod cefnogi cais i ailddatblygu gwesty moethus sydd wedi bod ar gau am bedair blynedd.

Roedd swyddogion cynllunio Cyngor Gwynedd wedi argymell caniatáu'r cais i ehangu safle gwesty'r Seiont Manor yn Llanrug, ger Caernarfon.

Roedd y cynlluniau'n cynnwys adeiladu 28 ystafell wely ychwanegol, fyddai wedi golygu cyfanswm o 61 o ystafelloedd gwely i westeion.

Roedd bwriad hefyd i adeiladu 39 o gabannau gwyliau a gwella'r cyfleusterau i westeion, gan gynnwys cyrtiau tenis, bloc llety staff, llefydd parcio ychwanegol ac ystafell biomas.

Roedd y cynllun wedi denu gwrthwynebiad yn lleol, gyda Chyngor Cymuned Llanrug a Chwm y Glo wedi mynegi pryder dros faint y cynllun a'r cynnydd tebygol mewn traffig.

Gan fynd yn erbyn argymhelliad y swyddogion, barn y pwyllgor oedd i wrthod y cais o 12 pleidlais i un.

Roedd cau'r gwesty yn 2020 yn ergyd i economi'r ardal, wrth i tua 35 o bobl golli ei gwaith.

Barn swyddogion cynllunio Gwynedd oedd byddai'r datblygiad yn cynnig "twristiaeth o safon" gan "gefnogi economi'r ardal", ac yn cael "effaith llesol cyffredinol ar y Gymraeg".

Ond dadl yr aelodau lleol oedd bod y cynlluniau'n "rhy fawr".

Dywedodd y Cynghorydd Beca Brown, fod Llanrug yn "gymuned sy'n falch iawn o'i busnesau lleol" a bod "nifer o feysydd carafanau yno eisoes, yn eiddo i bobl leol sydd wedi gweithio'n galed".

Mynegodd bryderon y byddai'r datblygiad - yn enwedig y 39 caban gwyliau - yn "tanseilio swyddi pobl leol sy'n byw yma drwy'r flwyddyn".

Gan ychwanegu nad oedd hi "wedi dod ar draws unrhyw un sydd o blaid", pwysleisiodd y byddai cefnogaeth i ddatblygiad o faint tebyg i Seiont Manor fel ag yr oedd.

Dywedodd y Cynghorydd Berwyn Parry Jones "nad oedd y raddfa yn briodol" a bod y cais fel ag yr oedd "yn groes i rai o bolisïau'r cyngor".

Ar ran y datblygwyr, Caernarfon Properties Ltd, dywedodd yr asiant cynllunio Rhys Davies o Cadnant Planning bod rhai elfennau o'r cais wedi eu diwygio ers eu cyflwyno yn 2021 er mwyn ei wneud yn dderbyniol.

Pwysleisiodd na fyddai datblygu Seiont Manor ar y raddfa gynt yn hyfyw, gan ychwanegu y byddai'n creu "o leiaf" 20 a hyd at 30 o swyddi llawn amser, a'i bod yn "bwysig i'r economi leol i'w gefnogi".

Ond gwrthwynebu oedd mwyafrif llethol aelodau'r pwyllgor, gyda'r Cynghorydd Elin Hywel yn cynnig gwrthod ar sail "gormodedd" nifer y cabanau a'r effaith ar y tirwedd, yn ogystal â graddfa'r datblygiad i ddyblu nifer yr ystafelloedd ac adeiladau allanol eraill.

Ychwanegodd "nad yw'n enghraifft o dwristiaeth gynaliadwy" a'i fod yn "or-ddatblygiad".

"Byddai 39 caban a gwesty 60 stafell yn cael effaith ar yr ardal wledig o gwmpas ac yn newid yr ymdeimlad yn lleol," meddai, wrth i'w chynnig ddenu cefnogaeth bron yn unfrydol.