ဗန်းမောက်မြို့နယ်ထွေအုပ်ရုံးကို ဒေသကာကွယ်ရေးတပ်တွေဝင်တိုက်, အုပ်ချုပ်ရေးမှူးအဖွဲ့ဝင်ဗိုလ်မှူးတစ်ဦးသေဆုံး
စစ်ကိုင်းတိုင်း၊ ဗန်းမောက်မြို့နယ်မှာရှိတဲ့ မြို့နယ်အထွေထွေအုပ်ချုပ်ရေးမှူးရုံးကို ဒီကနေ့ သြဂုတ်လ ၁၂ ရက်နေ့ က ဗန်းမောက်မြို့နယ် PDF နဲ့ ပကဖအဖွဲ့ဝင်တွေဝင်ရောက်တိုက်ခိုက်ခဲ့တဲ့ဖြစ်စဥ်ဖြစ်ခဲ့ပြီး အပြန်အလှန်ပစ်ခတ်မှုတွေရှိခဲ့တယ်လို့ ဒေသခံတွေကပြောကြပါတယ်။
ဒီတိုက်ခိုက်မှုမှာ မြို့နယ်စီမံအုပ်ချုပ်ရေးအဖွဲ့ဝင်တစ်ဦးဖြစ်တဲ့ ဗိုလ်မှူးကျော်မင်းဟန်ဟာ ပစ်ခတ်ခံရပြီးနေရာမှာတင် သေဆုံးခဲ့ကာ ဗန်းမောက် PDF အဖွဲ့ဝင်တစ်ဦးလည်း တင်ပါးနဲ့ ဖနောင့်မှာကျည်ထိမှန်ဒဏ်ရာရခဲ့တယ်လို့ ဗန်းမောက် ဒေသကာကွယ်ရေးတပ်တစ်ခုဖြစ်တဲ့ Banmauk Revolution - BRက ဒီကနေ့မှာပဲ သတင်းထုတ်ပြန်ပါတယ်။
ဗန်းမောက်မြို့နယ်မြို့နယ် စီမံအုပ်ချုပ်ရေးအဖွဲ့ဝင် ဗိုလ်မှူး ကျော်မင်းဟန် သေဆုံးတယ်ဆိုတဲ့ သတင်းနဲ့ပတ်သက်ပြီး ဘီဘီစီအနေနဲ့လည်း သီးခြားအတည်ပြုနိုင်ဖို့ကြိုးစားနေပါတယ်။ ဒီပစ်ခတ်မှုအပြီးမှာ ဗန်းမောက်မြို့နယ်တွင်းက အောင်သာကုန်းတံတားမှာလည်း ဆက်ပြီးပစ်ခတ်သံတွေကြားနေရတယ်လို့ဒေသခံတွေကပြောပါတယ်။
ဗန်းမောက်မြို့ပေါ်က ဒီပစ်ခတ်မှုအတွင်းမှာ တားမြစ်ထားတဲ့ကြားက အမျိုးသမီးတစ်ဦးဖြတ်သန်းသွားလာမှုကြောင့် ဆက်လုပ်မယ့် စစ်ဆင်ရေးတွေကိုလည်း သေနတ်ပစ်ဖောက်ပြီး ဖျက်သိမ်းခဲ့ရတယ်လို့ Banmauk Revolution - BR အဖွဲ့ရဲ့ ဒီကနေ့ထုတ်ပြန်ချက်မှာဖော်ပြထားပါတယ်။ ဒေသခံတွေအနေနဲ့ ဗန်းမောက်ဒေသကာကွယ်ရေးတပ်တွေက ထုတ်ပြန်ချက်တွေနဲ့ တားမြစ်ချက်တွေကို လိုက်နာကြဖို့လည်း ထုတ်ပြန်ချက်ကဆိုပါတယ်။
ဗန်းမောက်မြို့နယ်အနီးက ကျေးရွာတွေမှာလည်း ပြီးခဲ့တဲ့အခု သြဂုတ်လထဲမှာ စစ်ကောင်စီနဲ့ ကေအိုင်အေ၊ ဗန်းမောက်ဒေသကာကွယ်ရေးပူးပေါင်းတပ်တွေကြား တိုက်ပွဲတွေ ဆက်ဖြစ်နေတယ်လို့လည်း ဗန်းမောက်ဒေသကာကွယ်ရေးတပ်တွေကထုတ်ပြန်ထားပါတယ်။