ပင်လည်ဘူးမြို့က ပစ်ခတ်မှု တစ်ဦးသေဆုံး၊ ၆ ဦးထက်မနည်းဒဏ်ရာရ
စစ်ကိုင်းတိုင်း၊ ကောလင်းခရိုင်ထဲက ပင်လည်ဘူးမြို့မှာ ဆန္ဒပြလူထုကို စစ်ကောင်စီတပ်တွေက ဒီနေ့ ဧပြီလ ၅ ရက် မနက် ၁၁ နာရီခန့်မှာ ပစ်ခတ်ဖြိုခွင်းလို့ အမျိုးသားတစ်ဦး ရင်ဘတ်ကျည်မှန်ပြီး သေဆုံးခဲ့တယ်လို့ မြို့ခံတွေက ပြောပါတယ်။
ဒီပစ်ခတ်မှုမှာ ဒဏ်ရာရသူ ၆ ဦးရှိပြီး အားလုံးကို ပင်လယ်ဘူးဆေးရုံကို ပို့ထားရတယ်လို့ သိရပါတယ်။ လက်ရှိမှာ အဲဒီဒဏ်ရာရသူတွေထဲက ၂ ဦးကို ဆရာ၀န်က မန္တလေးကို လွှဲနေလို့ ပို့ဆောင်ရေးပြင်ဆင်နေပြီလို့လည်း သိရပါတယ်။
ပစ်ခတ်မှုဟာ အထက ၁ မြို့မကျောင်းအနီးမှာဖြစ်ခဲ့တာပါ။
''ဒီနေ့မနက် မြို့မ ကျောင်းမှာ မွမ်းမံသင်တန်းတက်နေတဲ့ဆရာ၊ ဆရာမတွေကို အပြင်ကနေ ဆန္ဒပြကြတာပေါ့။ အဲဒီမှာ ပစ်ခတ်ခံရတာ။ ပစ်တဲ့နေရာနဲ့ ဆေးရုံနဲ့ မဝေးတော့ ဒဏ်ရာရသူတွေကို ဒီလိုပဲ ဆွဲခေါ်ယူရတာ။ ဆေးရုံနဲ့ ရဲစခန်းကလည်း တစ်ဝန်းပဲခြားတာ။ ခုတော့ လုံခြုံရေးအခြေအနေကြောင့် မန်းလေးပို့မယ့်လူနာကို ဘယ်လိုပို့မလဲ လုပ်နေကြပြီ'' မြို့ခံတစ်ဦးကပြောပါတယ်။
မနက်က ဆန္ဒပြပွဲဖြိုခွင်းခံရချိန်မှာ ဖမ်းဆီးခံရသူ ၂ ဦးထက်နည်းရှိပြီး သူတို့ကို ရဲကားနဲ့ အကျဉ်းထောင်ရှိတဲ့ ကသာကို ခေါ်သွား တယ်လို့လည်း မြို့ခံတွေကပြောပါတယ်။
လက်ရှိ ဖြတ်တောက်ခံထားရတဲ့ အင်တာနက်ပြတ်တောက်မှုကြောင့် ပင်လည်ဘူးမြို့မှာ သတင်းစီးဆင်းမှုအားနည်းနေတယ်လို့ မြို့ခံတွေက ပြောပါတယ်။
ဓာတ်ပုံ ရင်းမြစ်, ပင်လယ်ဘူးမြို့
