နာမည်ကြီး အလှအပရေးရာဘလော့ဂါ ဝင်းမင်းသန်း မနေ့ ဧပြီ ၆ ရက် ညပိုင်းက တောင်ကြီးမြို့က ဟိုတယ်တစ်ခုမှာ ဖမ်းဆီးခံခဲ့ရတာနဲ့ပတ်သက်လို့ ဟိုတယ်ဘက်က ရှင်းလင်းချက်ထုတ်ပြန်လာပါတယ်။
ဝင်းမင်းသန်းကို နိုင်ငံတော်အကြည်ညိုပျက်စေမှု ပုဒ်မ ၅၀၅ က နဲ့ စစ်ကောင်စီက တရားစွဲပြီးဝရမ်းထုတ်ပြန်ကြောင်း မနေ့ညနေပိုင်းက မြန်မာ့အသံနဲ့ မြဝတီတို့ကကြေညာခဲ့အပြီး နာရီပိုင်းအကြာ ည ၈ နာရီမှာ တောင်ကြီးက BH ဟိုတယ်မှာ ဖမ်းဆီးခံခဲ့ရတာပါ။
ဒါကြောင့် ဟိုတယ်ကို ဝေဖန်ပြစ်တင်ပြောဆိုတာတွေလူမှုကွန်ရက်မှာ ကျယ်လောင်ခဲ့ပါတယ်။
ဒါနဲ့ပတ်သက်လို့ အဲဒီဟိုတယ်က သူတို့လူမှုကွန်ရက်ကနေ ခုလို ပြန်လည်ရှင်းလင်းခဲ့ပါတယ်။
ဟိုတယ်အနေနဲ့ ဧည့်သည်ရဲ့ လုံခြုံရေးကိုအလေးထားပြီး ဝန်ထမ်းတွေကလည်း ဧည့်သည်ရဲ့ ကိုယ်ရေးကိုယ်တာ လုံခြုံမှုကိုအလေးထားကာကွယ်ကြောင်း၊ မဝင်းမင်းသန်းကို လာရောက်ဖမ်းဆီးမယ်ဆိုတာကို ကြိုမသိခဲ့ဘဲ ရဲတွေရောက်လာမှ ဖမ်းဝရမ်းထုတ်ထားသူဖြစ်ကြောင်း သိရတယ်လို့ ရေးသားထားပါတယ်။
ည ၈ နာရီမထိုးခင်မှာ ရဲနဲ့ စစ်သား အယောက် ၃၀ လောက် ရုတ်တရက် ဟိုတယ်ကိုရောက်လာပြီး ပိတ်ဆို့လိုက်ကာ ဝန်ထမ်းတွေကို စုပြီး ဒူးထောက်ထိုင်ခိုင်းကြောင်း၊ ဖုန်းတွေကိုလည်းသိမ်းထားကြောင်းနဲ့ ဧည့်သည်နာမည်နဲ့ အခန်းနံပါတ်ကိုမေးကာ အခန်းကိုလိုက်ပြခိုင်းပြီးနောက် မဝင်းမင်းသန်းကို ဖမ်းဆီးသွားတာဖြစ်ကြောင်း ရေးသားထားပါတယ်။
ဧည်သည့်ကို ဘယ်လိုမှမကာကွယ်ပေးနိုင်တဲ့အပေါ်လည်း စိတ်မကောင်းဖြစ်ရကြောင်း ဝမ်းနည်းစွာအသိပေးလိုကြောင်းလည်း ဆိုပါတယ်။
ဝန်ထမ်းတွေ CDM မှာပါဝင်ဖို့ လှုံ့ဆော်နေတာအပါအဝင် နိုင်ငံကိုမတည်ငြိမ်အောင် လူမှုကွန်ရက်သုံးပြီး ဆူပူလှုံ့ဆော်နေတယ်ဆိုတဲ့အကြောင်းပြချက်နဲ့ စစ်ကောင်စီက စာပေ၊ ဂီတ၊ ရုပ်ရှင်နဲ့ social influencers တွေ၊ သတင်းမီဒီယာက ပုဂ္ဂိုလ်တွေအပါအဝင် ထင်ရှားကျော်ကြားသူတွေ အယောက် ၁၀၀ ကျော်ကို ပုဒ်မ ၅၀၅ က နဲ့ တရားစွဲပြီး ဖမ်းဝရမ်းထုတ်ထားပါတယ်။
အဲဒီထဲက သရုပ်ဆောင်လူမင်း၊ ရဲတိုက်နဲ့ ဘလော့ဂါ ဝင်းမင်းသန်းတို့ ဖမ်းဆီးခံထားရပြီး သတင်းအယ်ဒီတာ ကိုဇင်သော်နိုင်လည်း ဖမ်းဆီးခံထားရပါတယ်။
လူရွှင်တော် ဇာဂနာကတော့ အဲဒီလိုဝရမ်းထုတ်ထားတဲ့စာရင်းမှာမပါပေမယ့် မနေ့ မနက်ပိုင်းမှာ ဖမ်းဆီးခံထားရပြီးဘာကြောင့်ဖမ်းထားတယ်ဆိုတာတော့ မသိရသေးပါဘူး။
ဓာတ်ပုံ ရင်းမြစ်, Social Media
