Tiraamp kan namni Chaarlii Kiirk ajjeesse du'aan akka adabamu gaafatan adabbii kanarratti ejjannoo attamii qabu?

Haguuggii Tamsaasa Kallattii

1. 10 Fuulbaana 2025Ministeerri Ittisaa Raashiyaa Poolaandirratti haleellaa raawwachuuf hin karoorfamne jedhan

   Ministeerri ittisa Raashiyaa haleellaa halkan darbe lixa Yukireen irratti raawwatameen erga Waarsaawu dirooniiwwan Raashiyaa 19 naannoo qilleensaa ishee seenuu ibsiteen booda, Poolaand keessatti bakka kamiyyuu haleeluuf karoora akka hin qabne ibse.

   Haleellaa Yukireen irratti raawwatamu ilaalchisee odeeffannoo guyyaa guyyaan baasan keessatti: "Meeshaalee dachee Poolaandi keessa jiran kamiyyuu irratti xiyyeeffachuuf yaadamee hin turre" jedhan.

   "Dirooniiwwan fageenya dheeraa balali'an UAV haleellaa [Yukireen irratti] fayyadaman kan km 700 [maayilii 435] hin caalledha.

   "Kanas ta'e sana dhimma kanarratti ministeera ittisa Poolaandi waliin marii gaggeessuuf qophiidha."

2. 10 Fuulbaana 2025Israa'el yeroo hunda sarara US'n hin sochootu jedhu UN'tti ambaasaaddarri Israa'el

   Dhaabbata Biyyoota Gamtoomanitti ambaasaaddarri Israa'el, Daani Daanoon, ''yeroo hunda dantaa Ameerikaatiif hin sochoonu'' jedhan erga pirezidanti Doonaald Tiraamp Israa'el haleellaa qilleensaa Doohaa irratti raawwachuushee ''hin gammanne'' jetteen boodadha.

   Daanoon ganama har'aa buufata raadiyoo Israa'el tokko waliin turtii taasisaniin, Ameerikaafi Israa'el qindoomina kan qaban yoo ta'u, ''yeroo tokko tokko garuu murtoo murteessinee booda Ameerikaa beeksisna'' jedhan.

   Haala duubee ibsuudhaaf, Tiraamp haleellaa kana akka beeksisan kan dubbatan yoo ta'u, ergamaan addaa isaanii dhimmicha Kataar beeksisaniiru garuu ''baayyee barfatee ture'' jedhan.

   Daanoon ergaan Israa'el baay'ee ifa ta'uu dubbachuun, "nuti faallaa Kaataar miti, akkasumas kan biyyoota Arabaa kamiyyuu miti" jedhan.

3. 10 Fuulbaana 2025NATO: 'Guutummaatti kan of eeggannoo hin qabnedha'

   Raashiyaan naannoo qilleensaa Poolaand cabsuunshee itti yaaduudhaan ykn dhiisuu isaa osoo hin hin taane ''amala of eeggannoo hin qabneedha'' jedhu barreessaan olaanaa NATO Maark Ruut.

   Ruut ibsa kennaniin, michoonni NATO hundi Poolaandi waliin tumsa guutuu akka qaban ibsaniiru. Itti dabaluunis, gamaaggamni guutuun itti fufee jira jedhan.

   Diroonota Raashiyaa kuffisuu keessatti michoonni NATO hedduun, Ruut, Nezarlaand, Xaaliyaanii, Poolaandii fi Jarman dabalatee hirmaataniiru jedhan.

4. 10 Fuulbaana 2025Kaataar haleellaa Israa'el haloo bahuuf 'mirga akka qabdu' himte

   Kaataar MM Israa'el Beenjaamiin Neetaanyahuu seera idil-addunyaa cabsuu isaaf itti gaafatamuu qaba jechuun garee seeraa dhimma kana hordofuuf ajaja kennuu ibsite.

   MM Kaataar haleellicha ''yakka shororkeessummaa biyya irratti MM Israa'el Beenjaamin Neentanyahun raawwatamedha'' jedhe.

   Akkasumas haleellichi ''walabummaa biyyaa kan sarbedha'' jedhan.

   ''Mootummaan Kaataar haleellaa Israa'el kanaaf deebii kennuuf mirga qaba. Haleellaa nageenyaa fi tasgabbii naannichaa balaa irra buusu dura ni dhaabbanna,'' jedha ibsi Kaataar baaste.

   ''Deebii kennuuf tarkaanfiiwwan barbaachisoo hunduu ni fudhatamu'' jette Kaataar.

   Kaataar gochaa akkasii ittisuu fi akka hin babal'anne gochuuf imaammata hordofuu qabdu ilaalaa akka jirtu ibsite.

5. 10 Fuulbaana 2025Poolaand erga Waraana Addunyaa Lammaffaatii as walitti bu'iinsatti dhihoo ta'u MM dubbatan

   Poolaandi erga Waraana Addunyaa Lammaffaa xumurameen booda amma walitti bu’iinsa banaatti dhihoo ta’uu ishee Ministirri Mummee biyyattii dubbatan.

   Doonaald Taask, ''Poolaandiin erga Waraana Addunyaa Lammaffaa booda yeroo kamiyyuu caalaa waldhabdee waraana banaatti dhihoo jirti'' jedhan.

   ''Sababa itti qabannu hin qabnu qarqara waraanaa irratti argamna. Garuu ammoo, sararri qaxxaamuree jira. Kan kanaan duraa caalaa balaafamaa ta'unsaa wal hin madaalchiifamu,'' jechuun paarlaamaatti himan ministirri mummee Poolaandi.

   "Haalli kunis Waraana Addunyaa Lammaffaatiin booda waldhabdee banaa nutti dhiyeessaa jira".

6. 10 Fuulbaana 2025Amma nu gahe, Diroonii Raashiyaa 24 ta'antu daangaa qilleensaa Poolaand gale- Zeeleniskii

   Pirezidaantiin Yuukireen Volodmir Zeeleniskiin diroononni Raashiyaa daangaa qilleensa Poolaand kan galan garii kana tahuu himan.

   Pirezidantichi fuula X irratti akka barreessetti, ''dirooniin lama halkan daangaa qilleensa Poolaand galan daangaa qilleensaa Beelaarus fayyadamuunidha.

   ''Lakkoofsi isaanii isa duraan ibsameen ol tahuu mala,'' jedhe Zeeleniskiin.

   MM Poolaand Doonaald Taask, humni waraanaa Poolaandi lakkoofsa diroonii qilleensa isaanii galanii 19 ta'u jedhan.

   Diroononni kunneen Yuukireenii fi Poolaand keessaa bakkatti karoorfame dhqabaa ture jedhan.

   Moskoon haga ammaa deebii hin laanne. Diroonii Raashiyaa darzana lama tahantu daangaa Poolaandi gale.

   Yuukireenis haala kana adda baasuuf akka hojjechaa jirt ibsite.

   MM Poolaand wal gahii paarlaamaa irratti keewwanni NATO 4 akka hojiirra ooluuf gaafachuuf akak jedhan himan.

   Keewwata kana jalatti miseensonni NATO akka miseensi isaanii biraa tuqamte kaasuun qophii barbaachisaa akka godhan eeyyama.

7. 10 Fuulbaana 2025Haleellaan Kaataar irratti raaqwwatame 'gocha of ittisuuti' jedhan ministirri mummee Israa'el duraanii

   Haleellaan Israa'el Dohaatti raawwatte ''gocha of ittisuuti'' jedhan Ministirri Mummee Israa'el duraanii Naaftaali Beeneet.

   Haleellaan kun kan irratti xiyyeeffate ''arkiteektota shororkeessummaa'' kanneen ''biyyoo Israa'el irratti haleellaa gaggeessuu itti fufan'' ta'uu 'BBC Newsnight'tti himan.

   Kunis dhukaasa gaafa Wiixataa atobisii irratti Yerusaalam keessatti raawwatamuun lubbuu namootaa galaafate kaasuudhaan.

   "Hamaas sanaaf itti gaafatamummaa fudhateera, kanaaf ummata keenya ittisuu qabna," jedha.

   Haleellaan kun namoota butamanii ammallee Gaazaa keessatti Hamaasiin qabaman irratti dhiibbaa qabaachuu maluu irratti yaaddoo yoo qabaatan gaafatamanii, Beeneet: "Yoo nuti tarkaanfii hin fudhanne ni du'u" jedhan.

   Beeneet itti dabaluudhaan: "Hamaas hanga daangaa keenya irratti mootummaa shororkeessummaa ta'ee hafeetti namoota butaman gadhiisuu hin barbaadu."

   Beeneet mootummaa Ministira Mummee Israa'el ammaa, Beeniyaamin Netaaniyaahuu irratti dhimma biyya keessaa irratti qeequmsa ''cimaa'' qaba jechuun, hogganaan duraanii kun ammoo, ''lola Israa'el ofirraa ittisuuf taasifnu sadarkaa idil-addunyaa kana nan deeggara'' jedhan.

8. 10 Fuulbaana 2025Erga Qataar rukutamtee dippiloomaasiin badeera jedhe Boowin

   Gabaasaan BBC Jeremii Boowin waggaa har'aa hoogganaa Hamaas akkasumas garee hidhattootaa kana bakka bu'uun kan mari'atan Kaliil al-Hayya magaalaa Dohaa keessatti dubbisee ture.

   Mana qondaala kanaa gamoo Israa'el Kibxata kaleessaa waaree booda haleelte keessatti argamutti argee dubbise.

   Erga waraanni Gaazaa eegalee qondaalli Hamaas bakka bu'uun jaarsummaa taa'aa jiran nama kana.

   Karaa Qataar fi Masirii ergaawwan hedduu Israa'el fi Ameerikaaf ergaa akkasumas fudhataa ture.

   Battala waliigalteen dhukaasa dhaabuu milkaa'uutti dhihaatee turetti al-Hayaa fi namoonni Israa'el irratti xiyyeeffattee haleellaa raawwatte kunneen jila Israa'el fi Ameerikaa irraa baayyee fagaatanii hin turre.

   Odeessa kanarratti dabalataan dubbiifachuu yoo barbaaddan karaa kanaan seenaa.

9. 10 Fuulbaana 2025"Duudhaan haa kabajamu jenne malee Irreecha hin dhufiinaa hin jenne"

   Waldaan Walgargaarsaafi Misooma Maccaafi Tuulamaa mata duree "Safuu walii haa qabaannu'' jedhuun ibsi tibbana dhimma irreechaa irratti baase ijoo dubbii ta'eera.

   Waldichi ibsa baase kanaan 'Waggoota lamaan darban hordoftoonni amantii biroo bakka irreeffannaa erga seenaniin booda akka amantaa isaaniitti Qaddasuun, Zammaruu fi manzumaa dhageessisaa turani' jedhe.

   Gochi kuni aadaa Irreecha Waaqeffaannaa waliin kan walfaallessu akka ta'es ibse.

   Ta'ulleen Hordoftoonni amantii adda addaa amantaa ofii akka qabatanitti adeemsa irreechaa irratti warra hirmaatanitti garuu gammachuu qabna jedhe.

   Waldichi ibsa baase kana keessatti 'Akkuma Foolleen beeta maqdasa keessa seenee Goobee hin dhiichifne, akkuma shamarran Oromoo Masjiida seenanii shinooyyee hin sirbine, bakka Irreechi kabajamu hundatti dhimma amantaa ofii keessanii lallabuu, qaddasuu, Zammarruu fi Manzuumaa dhageessisuu akka dhaabdan kabajaan Gaafanna" jedhe. Oduu kanarratti dabalataaf dubbiifachuuf asiin seenaa.

10. 10 Fuulbaana 2025Diinoota Israa'eliif ''bakki itti dhokatan hin jiru'' jedhan ministirri ittisaa

    ''Ministirri Raayyaa Ittisaa Israa'el Kaatz ''harki dheeraan Israa'el bakka hundatti diinashee irratti ni socho'a'' akkasumas ''bakki itti isaan dhokatan hin jiru'' jedhan.

    Haleellaa Hamaas Onkoloolessa 7 Israa'el irratti raawwate eeruudhaan, Kaatz barreeffama toora X irratti barreessaniin, ''namni Israa'el irratti shororkeessummaa raawwatu hundi ni miidhama'' jedhan.

    Kaatz itti dabaluudhaan, Hamaas waraana kana xumuruuf haal-duree Israa'el yoo hin fudhanne, akkasumas adda durummaan namoota booji'aman hunda gadhiisuufi hidhannoo hiikkachuuf waliin hin gallee "ni balleessu" jedha.

    Gama biraatiin ammoo Manni Maree Nageenyaa Dhaabbata Biyyoota Gamtoomanii haleellaa Israa'el raawwatte ilaalchisuun walga'ii taasisuuf.

    Manni Maree Nageenyaa Dhaabbata Biyyoota Gamtoomanii har'a gara boodaatti walga'ii gaggeessuun bu'aa haleellaa Israa'el hoggantoota Hamaas Kaataar irratti raawwatte irratti ni mari'ata.

    Walgahiin kun sa'aatii biyya keessaa sa'aatii 15:00 (20:00BST) irratti Niiw Yoork keessatti ni gaggeeffama jedhamee eegama.

11. 10 Fuulbaana 2025Duraan Poolaandi Yukireeniin akka waan of eeggannoo cimaa gootuutti ilaalama turte, garuu amma miti

    Taateen kun Poolaandiif qormaata guddaadha.

    Namoonni siyaasaa biyyattii waa'ee balaa Raashiyaa irraa dhufuu fi weerarri guutuu Yukireen irratti raawwatame baay'ee fi sagalee guddaadhaan kan dubbatan yoo ta'u, baasii waraanasheetiif bahus guddifftee turte.

    Waggoota muraasa darban keessa ijoolleen manneen barnootaa Poolaandi keessatti shaakala nageenyaa yoo hojjetan kan mul'atan yoo ta'u, kunis kan bara 2022tti osoo Raashiyaan weerara hin raawwatiin dura manneen Kiiv keessatti mul'ataa ture fakkaata.

    Poolaand Yukireeniin baayyee walitti dhihoo waan taateef namoonni balaa kana cimsanii beeku.

    Yeroo Raashiyaan haleellaan qilleensaa lixa Yukireen irratti xiyyeeffatu, akkuma yeroo kanaatti, Poolaandi balaa kana hordofuuf humna qilleensaashee daangaa irratti yeroo socha'an ifaadha.

    Haata'u malee, kanaan dura omaayyuu rukutuun hin kufisne ture. Kunis waan Yukireen yeroo baayyee waa'eesaa irratti aaruu kaastuufi Poolaandiin baayyee of eeggannoo taasifti jechuun himattuun ture.

    Amma garuu, humni qilleensaa Poolaand dirooniin Raashiyaa daangaa keessa seenuu akka ''gochaa dubbii barbaachaa'' kan ibse yoo ta'u, kunis jecha cimaadha.

    Ministirri Mummee biyyattiis walitti fufiinsaan hogganaa Naatoo waliin wal qunnamaa jiraachu himan.

12. 10 Fuulbaana 2025Haleellaan Israa'el qondaaltoota Hamaasirratti Dohaatti raawwattee balaaleeffannaan addunyaa mudate

    Tarii gabaasi kaleessaa isin jala darbeera yoo ta'e taatee ijoon haleellaa Israa'el kunooti:

    Maaltuu ta'a:

    Israa'el Kibxata waaree booda hoggantoota Hamaas Dohaa, Kaataar keessatti haleellaa irratti raawwatte.

    Miidiyaaleen Israa'el haleellaan kun xiyyaarota waraanaa Israa'el 15 fayyadamuun kan raawwatame yoo ta'u, meeshaa waraanaa 10 bakka tokko irratti dhukaafamuu gabaaseera.

    Namoonni Dohaatti ijaan argan akka jedhanitti, dhohinsa adda addaa hanga saddeet dhaga'aniiru.

    Hamaas miseensonni isaa shan akka ajjeefaman ibse garuu hoggansi isaa olaanaa lubbuun hafe himeera.

    Israa'el, Kaataarii fi Hamaas haleellaa kana ilaalchisee maal jedhan?

    Ministirri Mummee Israa'el Beeniyaamin Netaaniyaahuun, hoggantoota olaanoo Hamaas kanneen haleellaa Onkoloolessa 7 bara 2023 Israa'el irratti raawwatamee, booda waraanaa Gaazaaf ka'umsa ta'e qindeessan irratti xiyyeeffate waan "guutumaa guutuutti sirriidha" jedhan.

    Hamaas haleellaan kun ''yakka fokkisaa, weerara ifa ta'ee fi kan dudhaa fi seera idil-addunyaa hunda ifatti cabsuudha'' jedheera.

    Kaataar gama sheetiin haleellaan kun seera idil-addunyaa ifatti cabsuu, akkasumas namoota Kaataar keessa jiraniif ''balaa hamaa'' ta'uu ibsiteetti.

    Deebiin idil-addunyaa

    Pirezidantiin Ameerikaa Doonaald Tiraamp, ''akkaataan har'a itti raawwatame nutti hin gammanne'' jedhan. Haleellaan kun raawwatamu isaas waraana Ameerikaa irraa kan bare yeroo haleellichi gaggeeffamaa turetti akka ta'e dubbataniiru. Akkasumas Hamaas dhabamsiisuun ''galma maludha'' jedheera.

    Hoggantoonni biyyoota akka UK, Faransaay fi UN haleellaa kana balaaleffataniiru.

13. 10 Fuulbaana 2025Oppireeshinii gaggeeffame keessatti xiyyaarota waraanaa Poolaandiifi Nezerlaanditu hirmaate

    Humni waraanaa Poolaandi oppireeshinii qilleensarraa gaggeeffameef Ajaja Qilleensarraa NATO fi Nezerlaandis galateeffate.

    Nezerlaandis xiyyaara waraanaa F35 bobbaasuudhaan Poolaandiin gargaarteetti. Humni waraanaa Poolaandis galateeffateera.

    Humni Ittisa Qilleensarraa lafarra jiruufi raadaaronni qophii irra turan gara bakka idilee isaaniitti deebi'aniiru jechuun X irratti ibse.

    Humni waraanaa Poolaandi oppireehsinichi xumuramuu ibse. Dirooniin haleelamtee kufte tokko gnada Poolaandi tokko kan daangaa Beelaarus irraa KM 40 fagaattu keessatti argamteetti.

    Dirooniin haleelaman kaanis barbaadamaa jiraachuu humni waraanaa Poolaandi ibseera.

14. 10 Fuulbaana 2025Lagni Abbaay maalif jireenya Masriif hangas murteessaa ta'e?

    Itoophiyaan kaleessa hidha guddicha Afrikaa irraa isa jalqabaa ta'e kan laga Abbay irratti waggota 14 hojjatamaa ture eebbisiftetti.

    Lagni Abbay garreen Itoophiyaa keessaa madduun bishaan laga Naayil harka 85 ta'u gumachuun, Naayil laga Afrikaa keessaa isa dheeraa (6,650 km)fi biyyota 11 keessa qaxxamuru isa taasisa.

    Biyyoota Afrikaa 11 landi kun keessa qaxxaamuru kunneen Burundi, Tanzaaniyaa, Ruwandaa, Keeniya, Ugandaa, Rippablika Demokiraatawa Koongoo, Itoophiyaa, Eritiraa, Sudaan Kibbaa, Sudaani fi Masrii keessa qaxxamuruun hanga galaana Meedatiriyaanitti fulla'a.

    Itoophiyaa Masrii fi Sudaan ammoo biyyoota kaan caalaa kallattiin dhimma laga wal qabatuuf waggootaf takka mari'ataa takka wal himataa turaniiru.

    Keessumaa Masriin hidhi guddaan Itoophiyaan laga Abbaayyaa irratti ijaaraa turte akka dhaabatuuf hanga Dhaabbata Biyyoota Gamtoomanitti himannaa dhiyeessa turte, ammalee dhiyeessaa jirti.

    Bal'ina odeessa kanaa dubbiifachuudhaaf karaa kanaan seenuu dandeessu.

    Masriin hooggansa Hidha Haaromsa Itoophiyaa mormuun UN'tti xalayaa barreessite.

    "Duudhaan haa kabajamu jenne malee Irreecha hin dhufiinaa hin jenne"

15. 10 Fuulbaana 2025Pirezidantiin Poolaandi MM fi qondaaltota biroo waliin walgahii biiroo nageenya biyyaalessaa hoogganuuf

    Pirezidantiin Poolaandi Kaarol Naawrookii yeroo gabaabaa keessatti walgahii Biiroo Nageenya Biyyaalessaa kan kan MM Doonaald Tuuskiis irratti hirmaatu akka gaggeessan ibsan.

    Haala dubbii kennuudhaaf, Naawroki fi Task haala siyaasa biyya keessaa kallattii faallaa ta'een keessaa jiru.

    Injifannoo filannoo Naawrooki dhiheenya kanaa hordofuun, waldhabdee dhimma siyaasaa keessoo fi murtee siyaasaa Waarsaaw irratti rakkoon mudachuu malu yaaddoon dabalaa jira.

    Haata'u malee, doorsisni Raashiyaa amma ''tumsa walitti dhiyeenyaa'' akka gaafatu ganama har'aa ifa godhaniiru.

    "Nageenyi biyya keenyaa dhimma dursi olaanaan kennamuuf keenya waan ta'eef tumsa cimaa barbaada," jedhan pirezidantichi.

16. 10 Fuulbaana 2025Poolaandi 'diroonii' Raashiyaa daangaa qilleensashee gale haleeluu ibsite

    Humni waraanaa Poolaandi meeshaa akka diroonii Raashiyaa irraa daangaa qilleensa biyyattii gale haleeluu ibse.

    Humni waraanaa Poolaandi meeshaalee waraanaa bobbaasuun ''wantoota akka diroonii irra deddeebiin daangaa qilleensa Poolaandi cabsan haleeleera'' jedhe.

    ''Meeshaalee waraanaa fayyadamneerra. Bakkatti meeshaaleen kunneen kufan barbaaduuf oppireeshiniin gaggeeffamaa jira'' jedhe humni waraanichaa.

    Humni waraanaa Poolaandi ''qophaa'ummaa olaanaa'' irra akka taa'u ajajameera.

    Xiyyaaraooni waraanaa ka'uun akka qophii tahan ajajamuu humni waraanichaa himeera.

    ''Xiyyaarri waraanaa Poolaandii fi NATO daangaa qilleensa Poolaandi keessatti oppireehsiniirra jiru. Humni Ittisa Qilleensaa lafa jiruu fi raadaariin qophaa'ummaa guddaa irratti argamu,'' jedhe humni waraanaa Poolaandi.

17. 10 Fuulbaana 2025Poolaandi buufatalee xiyyaaraa gurguddaa biyyattii cufte

    Poolaandi buufata xiyyaaraa isa guddaa biyyattii keessaa magaalaa Waarsootti argamu dabalatee buufataalee xiyyaaraa afur cufuu beeksifte.

    Dirooniin Raashiyaa daangaa qilleensaa Poolaandi seenuu hordofee Poolaandi buufataalee xiyyaaraa ishee cufuun oppireeshinii gaggeessaa jiraachuu himte.

    Buufataaleen xiyyaaraa gurguddoon lamaan Poolaandi Chooppinii fi Buufata Xiyyaaraa Waarsoo Modliin jedhaman cufamaniiru.

    Buufata Xiyyaaraa Rizezów-Jasiyonka jedhamu kan daangaa Yuukireenitti dhiyoo jirus cufameera.

    Xiyyaaronni waraanaa Poolaandii fi NATO qilleensarra ka'uun oppireehsinii gaggeessaa jiru.

    Raashiyaan haleellaa diroonii hedduu naannoolee Yuukireen gara daangaatti dhiyaatnii jiran irratti gaggeessiteetti.

18. 10 Fuulbaana 2025Daangaan qilleensaa Poolaandi 'wantoota akka diroonii' Raashiyaa irraa ergamaniin sarbameera

    Daangaan qilleensaa Poolaandi 'wantoota akka diroonii' Raashiyaa irraa ergamaniin sarbamuu Poolaandi beeksifte.

    Daangaan qilleensaa keenya ''irra deddeebiin sarbameera'' jedhe humni waraanaa Poolaandi.

    Yeroo Raashiyaan Yuukireen irratti haleellaa diroonii gaggeessite daangaan qilleensa biyyattii cabuu himan.

    Ajajaan waraana biyyattii fuula X irratti akka beeksisetti humni waraanaa biyyattii ''wantoota daangaa qilleensaa seenan adda baasuun haleeluuf'' oppireeshinii gaggeessaa jiraachuu hime.

    Oppireeshiniin waraanaa gaggeeffamaa jira jedhe.

19. 10 Fuulbaana 2025Viidiyoo yeroo Israa'el dureewwan Hamaas irratti Dohaatti haleellaa raawwatte

    Yeroo Israa'el dureewwan Hamaas irratti Dohaatti haleellaa raawwatte waan kaameeraa CCTVn waraabame kunooti.

20. 9 Fuulbaana 2025Haleellaa Israa'eliin Kataaritti kan ajjeefaman eenyudha?

    Haleellaa Israa'el guyyaa har'aa Kataaritti raawwatteen Hamaas gareen kiyya marii keessa hirmaatu hin ajjeefamne jedheera.

    Garuu, namoonni jaha du'uu ibseera. Kunneen eenyudha?

    Akka Hamaas jedhetti, kanneen du'an keessaa ijoolleen bakka bu'aa isaa, Kaliil al-Hayyaa, keessa jiru.

    Maqaa isaaniis tarresseera.

    • Humaam Al-Hayyaa - Ilma al-Hayyaa
    • Jihaad Labaad - daarektara waajjira al-Hayyaa
    • Abdullaahii Abdul
    • Mo'aamman Hasuunaa
    • Ahimad Al-Maamluk

    Namni jahaffaa miseensa nageenya Kataaridha jechuun ibseera.