Kan argaa jirtan oduu barreeffamaan qofa marsaritii keenya daataa xiqqaan hojjetudha. Fuula isa guutuu suuraaleefi viidiyoowwan qabate banadhaa.
Gara fuula marsariitii guutuutti na geessi
Filannoo daataa qusatu fayyadamu kanarratti hubannoo dabalataaf
Erga waldhabdeen tibbanaa kun eegalee kaasee Israa'eloonni 10 ol irra miidhaan qaqqabuun yoo himamu, ministeerri fayyaa Iraan ammoo namoonni 224 ajjeeffamu beeksiiseera.
Israa'el erga haleellaa cimaa Iraan irratti raawwatteen booda magaalaa gudduu biyyattii Teehiraan keessatti dhohinsiifi ibiddi guddaan mudachuun gabaafameera.
Mee viidiyoo kana dowwadhaa.
Haleellaa Israa'el iddoowwan niwukilaraa Iraan irratti raawwachuu ilaalchisee tilmaamni waggootaaf naanna'aa kan ture yoo ta'u, guyyoota muraasa darban keessatti garuu haalaan cimee ture. Kamisa darbe miidiyaaleen Ameerikaa haleellaan akkanaa dhihoo ta'uu gabaasan.
Israa'el mariin Ameerikaa fi Iraan gidduutti (Ebla irraa eegalee adeemsifamaa ture) waliigaltee nikulaaraa haaraa Iraan sagantaa nikulaaraa qabaachuu dandeessisuu mala jettee yaaddoo keessa turte. Kanas ammoo Israa'el bifa kamiinuu fudhachuu akka hin dandeenye dubbatteetti.
Waggootaaf sagantaa nikulaaraa Iraan irraa balaa jiraachuu akka danda'au waggootaaf akeekkachiisaa turte. Ministirri Mummee Israa'el Beeniyaamin Netaaniyaahuun walakkeessa bara 1990moota irraa eegalee kana mata duree haasaa taasisaniiru.
Iraan ammoo sagantaa nikulaaraanshee nagaa, kan kaayyoo siiviilii qofaaf ooluu ta'uu cimsitee himuu itti fufuudhaan meeshaa nikulaara oomishuu barbaaduu haaltee jirti.
Haata'u malee, aanga'oonni Lixaa fi Ejjansiin Annisaa Atoomikii Idil-addunyaa (IAEA) kan niikulaara addunyaa to'atu, dhimma kanarratti hin gammadne.
Guyyaa Kamisa darbee IAEAn waggoota 20 keessatti yeroo jalqabaatiif Iraan dirqama niikulaaraa cabsuu ilaalichiisee ibsa baasee ture.
Haleellaan kun yeroo jalqabamu kan dubbatan Netaaniyaahuun, haala madaallii dhiheenya IAEAn taasiseen wal simuun, Iraan meeshaa gahaa, akka yaadaatti, boombiiwwan nikulaaraa sagal oomishtee jirti jedhan.
Itti dabaluunis, Iraan ''dhimma jiraachuuf Israa'eliif baayyee yaaddodha'' jedhan.
Haleellaan kunis marii nikulaaraa marsaa itti aanu kan Dilbata gaggeeffamuu qabu dursee jira.
Dhaabbanni niwukilaraa addunyaa to'atu bakkeen niwukilarri itti gabbiifamu guddaan Iraan keessa jiru haleelamuu mirkaneesseera.
Hogganaan dhaabbata niwukilaraa addunyaa, Ejensiin Annisaa Atoomikaa Idil-addunyaa (IAEA) bakkii Iraan Naatanzitti keessatti itti niikulaaraa gubbiiftu guddichi Jimaata gara ganamaa keessa haleellaa Israa'eliin rukutamuu isaa mirkaneesseera.
Ejensiin barreeffama isaa toora X irratti qoodeen ''haala Iraan keessatti baayyee yaaddessaa ta'e itti dhiyeenyaan hordofaan jira'' jedheera.
Ejensichi sadarkaa raadiyaashiniin iddoo haleellaa sanaa akkasumas to'attoota isaa Iraan keessa jiran ilaalchisee aangawoota Iraan waliin wal qunnamtii akka qabu ibseera.
Dubbi himaan Raayyaa Ittisa Israa'el (IDF) Birgaader Janaraal Effie Defriin, Iraan "tilmaamaan dirooniiwwan UAV gara 100 ta'an Israa'elitti furguggifte" kan jedhan yoo ta'u, isaanis hojii fashaleessuu hojjechaa akka jiran dubbatan.
Aanga'aan kun itti dabaluudhaan, haleellaa halkan edaa Israa'el raawwatteen ammoo hogganaan waraana Iraan, ajajaan Korporeeshinii Eegdota Warraaqsa Islaamaa Iraan (IRGC) fi ajajaan humna yeroo balaa Iraan ajjeefamaniiru.
Akkasumas miidiyaaleen mootummaa Iraanis isaan dura hogganaan Eegdota Warraaqsaa, Hoseen Salaamiin ajjeefamuu isaanii gabaasaniiru.
Akka yaadachiisaatti, Israa'el keessatti labsiin yeroo muddamaa labsameera.
Sababa waldhabdeen Baha Giddu Galeessaa hammaataa dhufeef, keessumaa erga Israa'el Iraan irratti haleellaa raawwattee booda gatiin boba'aa garmalee ol ka'e.
Erga taateen kun dhagahameen booda, kontiraatoonni ittiin boba'aan madaalamu, Brent Crude fi Nymex light sweet, %10n ol dabaleera.
Daldaltoonnis waldhabdeen Iraanii fi Israa'el gidduutti uumamu kun dhiyeessii naannoo boba'aan badhaadhe kana irraa dhufu jeequu danda'a jechuun yaaddoo keessa jiru.
Baasii jikita boba'aa gatii nyaataa supparmaarkeetiiwwan kaasee kan hanga boba'aa konkolaataatti guutamuutti gatii waan hundaa irratti dhiibbaa qaba.
Xiinxaltoonni BBC'tti akka himanitti, amma daldaltoonni boba'aa Iraan guyyoota itti aanan keessatti haaloo ba'uu fi dhiisuu ishee ni hordofu.
Ajajaan Eegduu Warraaqsa Islaamaa Hoseen Salaamii hogganaa olaanaa Iraan haleellaa Israa’eliin ajjeefame ta’uun isaa himamaa jira.
Salaamiin jalqaba bara 1980 yeroo waraanni Iraan fi Iraaq ka'etti Eegdota Warraaqsaatti makame.
Akkuma gulantaa waraanaa keessaatti sadarkaan guddichaa deemeen, US fi michoota isheerratti dubbii cimaa dubbachuudhaan beekama ture.
Bara 2000 irraa eegalee Sagantaa Niwukilaraa fi waraanaa Iraan keessatti hirmaachuusaatiin Mana Maree Nageenyaa Dhaabbata Mootummoota Gamtoomanii fi Ameerikaan qoqqobbiin irra kaa'ameera.
Bara 2024 Iraan yeroo jalqabaaf haleellaa waraanaa kallattiin Israa’el irratti raawwatte, diroonii fi misaa’ela 300 ol bobbaasuun itti gaafatamaa Eegdota Warraaqsaa ture.
Erga dhiyoo as Israa'el waliin waldhabdeen uumame hammaataa waan dhufeef, Salaamiin Kamisa darbe Iraan ''waan dhufuu maluufi haala kamiifuu guutummaatti qophiidha'' jedhe.
“Diinni akkuma Filisxeemota warra kaan isaanirraa ittisu hin qabne goolama Israa’el jala jiran sana Iraan waraanuu nan danda’a jedhee yaada.” "Nuti waraanaan qoramnee, muuxannoo qabna," jechuun dubbate.
Hogganaan Dhaabbata Biyyoota Gamtoomanii (UN) Baha Giddu Galeessaa keessatti ''of qusannaa olaanaan'' akka jiraatuuf gaafachuun, haleellaa Israa'el iddoowwan niwukilaraa Iraan irratti raawwattu balaaleffatan.
Barreessaa olaanaa Dhaabbata Biyyoota Gamtoomanii Antooniyoo Gutareez bakka bu'uun kan dubbatan Dubbi himaansaanii, Guutareez: "yeroo mariin Iraan fi Ameerikaa gidduutti geggeeffamaa jirutti haleellaan Israa'el dhaabbilee niwukilaraa Iraan irratti raawwatamuu yaaddoo addaa qabu" jedhan.
Barreessaan Olaanaan kun ''gama lachuunuu of qusannaa guddaa akka agarsiisan, haarsaa gara waldhabdee cimaa kamuuttuu geessuufi haala naannichi baay'ee rakkisaa ta'e kamuu irraa akka of qusataniif waamicha taasisaniiru," jedhan dubbi himaan kun.
US naannoo Baha Giddu Galeessaa keessa yaaddon nageenyaa jira jechuun Israa'el Iraaniin haleeluu dura dippilomaatota muraasaa fi maatii humnoota waraanaashee achii baastee jirti.
Haleellaan Israa'el raawwatamuu dura tarii yoo raawwatame Iraan ammoo haaloo bahuuf buufataalee waraanafi embasiiwwan US Baha Giddu Galeessaa keessa jiran irratti haleellaa banuu dandeessi yaaddoon jedhu tureera.
Gama biraan ammoo US fi Iraan marii dhimma nikularaa irratti gaggeessaa jiraniin bu'aan barbaachisaan akka hin jirre Tiraamp ibse ture.
Garuu diinummaan biyyoota lamaanii waggoota 50 akkamiin eegale? Biyyoonni lamaan dur michuu garaa turan akkamiin deebi'anii argaa walii jibban? Dudduubeesaa mee haa ilaallu. Odeessa kanarratti dabalataan dubbiisuuf karaa kanaan seenuu dandeessu.
Ministirri Muummee Israa'el Beeniyaamin Netaaniyaahuun haleellaan Israa'el gaggeessite ''handhuura sagantaa gabbisa niwukilaraa Iraan rukute'' jedhan.
Israa’el bakka gabbisa guddaa [niwukilaraa] Iraan magaalaa Nataanz jedhamtu kan magaalaa guddoo Iraan Tehraan irraa gara kibbaatti 225km fagaattu rukutteetti jedhan Netaaniyaahuun.
Ebla bara 2021 keessa Iraan haleellaa saayibarii dhaabbatichaa irratti raawwatteef Israa'el komachaa turte.
Israa'el saayintistoota Iraan ''boombii Iraaniif hojjetan'' irratti xiyyeeffachuushees dubbatan Netaaniyaahuun.
Haleellaan kun ''hanga guyyoota barbaachisuutti itti fufa,'' jedhan Netaaniyaahuun itti dabaluun.
Ministirri Muummee Israa’el Beeniyaamin Netaaniyaahuun lammiileen Israa’el qajeelfama waraanaa akka hordofan dhaamaa jiru. Yeroo dheeraaf bakka dahoo qabu keessa turuu akka danda'anis dubbataniiru.
Netaaniyaahuun haleellaa Iraan irratti gaggeeffame ''baay'ee milkaa'aadha'' jechuunis ibsaniiru. Garuu Israa'el amma haleellaa deebii Iraan irraa dhufuu maluuf jecha labsii yeroo muddamaa keessa jirti.
Jiraattonni "bakka eegumsa qabu keessa turuu" fi "qajeelfama" aanga'ootaa akka hordofan itti himameera.
Hogganaan olaanaa Iraan Ayaatolaa Alii Komeenii akka jedhanitti, haleellaawwan kunneen 'amala hamaa' Israa'el agarsiisa.
Akka Raahitars gabaasetti, haleellaa kanaan Israa'el "hiree hadhaawaa argachuuf jirtu ofiif qopheessite.
Israa'el wiirtuuwwan niwukilaraafi buufatawwan waraanaarratti xiyyeeffachuun Iraan haleelte.
Haleellaa Israa'el kanaan saayinitistoonni niwukilaraa Iraan fi hogganaan Eegduu Warraaqsaa Iraan [Iran Revolutionary Guard] ajjeefamuun gabaafameera.
Israa’el haleellaa Iraan keessatti raawwatte kana wiirtuuwwan niwukilaraarratti xiyyeeffachuun akka ta’e Humni Ittsaa Israa’el (IDF) beeksiseera.Dho’insawwanis magaalaa guddoo Iraan, Tehraan keessatti dhaga’ameera.
Haleellaan kun qaama Opireeshinii Raayizing Laayiwon [Operation Rising Lion] akka ta’e Ministirri Muummee Israa’el Beeniyaamin Netaaniyaahuu dubbataniiru.
Iraan “jiraachuu Israa’eliif” yaaddoodha jedhan MM Netaaniyaahuun itti dabaluun.
Israa'el haleellaan deebii kennuu [haaloo ba’uu] “yeroo dhiyootti” Iraan irraa dhufuu mala yaada jedhuun labsii yeroo muddamaa labsiteetti.
TVn mootummaa Iraan bakkeewwan jireenyaa Tehraan keessa jiran rukutamuufi daa'imman dabalatee namoonni nagaa kanneen ajjeefaman keessaa ta'uu gabaaseera. Haata’u malee, gabaasni kun qama walabarraa hin mirkanoofne
Miidiyaaleen mootummaa Iraanis hogganaan Eegdota Warraaqsaa Hoseen Salamiin haleellaa raawwatameen ajjeefamuu isaanii gabaasaniiru.
Ministirri Dhimma Alaa Yunaayitid Isteets Maarkoo Ruubiyoo haleellaa kana keessatti hirmaannaafi gargaarsi Ameerikaa hin turre jedhan.
Haleellaa kana hordofee yaadni idil-addunyaa irraa kennamaa jiru baayyee yoo ta’u, Awustiraaliyaan dubbiin kun hammachuun ''yaadda’uu'' himteetti.
Daandiin qilleensaa Indiyaa balaa xiyyaaraa har'a qaqqabeen namoota xiyyaarichaan imalaa turan 242 keessaa lubbuun namoota 241 darbuu mirkaneesse.
Daandiin xiyyaarichaa itti dabaluudhaan, lammii Biriteen "lubbuun hafe tokkichi" hospitaalatti yaalamaa akka jiru ibseera.
Xiyyaarrii imaltootaa silaa Indiyaa irraa ka'ee gara UK imaluuf ture ka'ee sakandii muraasaan booda kuffee cacabuun lubbuun namoota kanneen badeera.
Gareen baraartoota lubbuu bakka xiyyaarri kun itti kufee caccabee, Ahmadaabaad hojii baraarsaa xumuruu ministeerri sivil aviyeeshinii Indiyaa ibsan.
Kun viidiyoo lammiin Biriteen, Vishwaashkumaar Raameesh jedhamu bakka balaan xiyyaaraa namoota 204 galaafate itti mudate, Ahmedaabaad irraa lubbuun oolee ka'ee osoo deemaa jiruu agarsiisa.
Akka yaadachiisaatti, Raameesh kanaan dura siree hospitaala isaarraa gaazexeessitoota waliin kan dubbate yoo ta'u, kaardii ittiin xiyyara seene (boarding pass) isaa agarsiiseera.
BBCn ammoo fira isaa UK- Leesteer jiru waliin haasa'eera.
Daawwadhaa!
Namoonni hedduun walitti qabamuudhaan yaadannoo namoota balaa xiyyaaraa qaqqabeetiin miidhamaniif duungoo qabsiisan.
Suuraalee biyya Indiyaatti namoonni magaalota Paatnaa fi Siligurii jedhaman keessatti sirna kadhannaa irratti hirmaatan agarsiisan qoodamaa jirra.
Namoonni kunneen kanneen balaa xiyyaaraa har'aa akkuma balaliidhaaf buufata xiyyaaraa irraa ka'een daqiiqaa muraasa keessatti magaalaa Ahmedaabaad keessatti mudateen miidhamaniif yaadannoof duungoo kan ibsan.
Suuraan namoonni hedduun walitti qabamanii yoo duubgoo ibsa argasiisuu kunooti:
Balaa xiyyaara Ayir Indiyaa yoo xiqqaate lubbuu namoota 200 galaafate keessaa namni tokko lubbuun hafuu hogganaan poolisii tokko dhaabbata oduu Indiyaa tokkoof himan.
Komishinarri Poolisii Ahmedabaad GS Maalik ANItti akka himanitti, balalii Boeing 787-8 gara Landanitti imalurratti teessuma 11A irra kan ture namni lubbuun hafe tokko jira.
Ibsa balalii aanga'oonni qoodan akka agarsiisetti, imalaan teessoo sanarra ture lammii Biriteen Vishwaash Kumaar Raamesh ta'uu ibseera.
Miidiyaaleen Indiyaa hospitaala keessatti Obbo Raamesh waliin dubbachuusaanii ibsuun: "Erga ka'ee sekondii soddoma booda sagalee guddaan dhaga'amuu hordofee xiyyaarichi kufe. Kun hundi battalumatti ta'e" jechuun gabaasan.
Viidiyoon Ahmedaabaad bakka xiyyaarri itti kufee caccabetti namoonniifi hojjetoonni abidda dhaamsan walitti qabamanii agarsiisa.
Cabaan xiyyaara kufees gamoorraa gadi rarra'ee mul'ata.
Akeekkachiisa: Qabiyyeen bareeffama kanaa miira keessan miidhuu danda'a.
Federeeshinii Waldaa Meedikaalaa Indiyaa Guutuu (FAIMA) akka beeksisetti, xiyyaarri daandii qilleensa Indiyaa hospitaala hakiimonni keessa jiraatan irratti kufuu hordofee, barattoonni fayyaa gara 50 hanga 60 ta’an miidamanii yaaliif gara hospitaalaatti geeffamaniiru.
Waldichi akka jedhutti, barattoonni shan ammoo achi buuteen isaanii kan dhabame yoo ta'u, yoo xiqqaate lamaan isaanii ammoo kutaa yaala cimaa (ICU) keessatti yaalamaa jiru.
Akkasumas, firoonni hakiimotaa tokko tokkoos achi buuteen isaanii dhabameera.
Federeeshinii Waldaa Meedikaalaa Indiyaa Guutuu (FAIMA)n akka jedhutti, imaltoonni xiyaarichaan balal'ii turan irra caalaan isaanii erga du'anii booda gara hospitaalaatti geeffaman.
Ogeeyyiin fayyaa torbaan sadii oliif hidhaarra turan Waxabajjii 11 galgala Ministeera Fayyaa waliin erga mari'atanii booda akka hiikaman, Manneen Murtii Federaalaa Kamittuu gorsaa seeraa fi abukaatoo kan ta'an Jambar Abdoo BBC'tti himan.
Haati daa'ima ganna tokkoofi ji'a jahaa irraa kan hidhamte Dr. Maahilet Guushis har'a hiikamuu miseensi maatii BBC'f mirkaneessaniiru.
Sochii ogeeyyiin fayyaa taasisaa turaniin hordofee kutaalee biyyattii gara garaa keessatti Pirezidantii Waldaa Ogogeeyyii Fayyaa Itoophiyaa dabalatee ogeeyyiin hedduun hidhamaa turaniiru.
Naannolee akka Amaaraa fi Oromiyaa keessatti ogeeyyiin fayyaa hidhaman kan gadhiifaman yoo ta'u, ogeeyyiin Finfinneetti hidhaman ammoo "jeequmsaaf hokkora" kaasuun shakkaman jedhirratti ammoo poolisiin qorannaa taasisaa turuun kan yaadatamudha.
Ogeeyyiin fayyaa himanni irratti hin banamne garuu ammoo qorannaarra turan kan beellamaan dhaddachatti dhiyaachaa turuu kaasuun, mirgi wabii isaanii akka eegamuuf gaafachaa turuu dubbatu.
Odeessa kanarratti dabalataan dubbiifachuuf asiin seenuu dandeessu.
Viidiyoon kun Xiyyaarri Indiyaa caccabe osoo hin kufiin duraafi booda kan agarsiisudha.
Akeekkachiisa: Viidiyoon gabaabaa kun kan nama rifaasisudha.
Daawwadhaa!