BBC News, Afaan Oromoo
Qabiyyeetti darbi

Kan argaa jirtan oduu barreeffamaan qofa marsaritii keenya daataa xiqqaan hojjetudha. Fuula isa guutuu suuraaleefi viidiyoowwan qabate banadhaa.

Gara fuula marsariitii guutuutti na geessi

Filannoo daataa qusatu fayyadamu kanarratti hubannoo dabalataaf

Biyyoonni lamaan wal haleeluu yeroo itti fufanitti, Israa'el samii Tehraan guutummaatti to'achuu ibsite

Erga waldhabdeen tibbanaa kun eegalee kaasee Israa'eloonni 10 ol irra miidhaan qaqqabuun yoo himamu, ministeerri fayyaa Iraan ammoo namoonni 224 ajjeeffamu beeksiiseera.

Guduunfaa

  • BBC Afaan Oromoo WhatsApp akkasumas Facebook irratti hordofaa
  • Akkasumas dhihoo YouTube eegalle - ammuma 'subscribe' tolchaa
  • Israa'el moo Iraanitu lola adeemaa jiruun buufate?
  • Israa'el fi Iraan waliigalteerra gahuu beeksisan, garuu dhukaasni jira
  • 'Israa'eliifi Iraan waraana kana qixxee yaada waraana kana dhaabuu qabu - Tiraamp
  • Labsii dhukaasa dhaabuu ni kabajna yoo Israa'el cabsite malee - pireezidantii Iraan

Haguuggii Tamsaasa Kallattii

  1. 'Ammaan tana Humni Qilleensaa Iraan haleeluu itti fufeera'- Waraana Israa'el

    Dubbi himaa olaanaa Raayyaa Ittisa Israa'el (IDF) Effie Deefriin irraa odeeffannoo haaraa argachaa jirra.

    Innis, "sa'aatii kanattillee balaliistonni humna qilleensaa naannoolee Iraan adda addaa irratti haleellaa walitti fufaa raawwachuu itti fufaniiru" jedhan.

    "Haleellaa walduraa duubaan gara sa'aatii 40'f osoo hin dhaabbannee fi eddoowwan xiyyeeffannaa 150 ol irratti raawwatamaa jira. Xiyyeeffannaan haleellaa sa'aatii 24 darban keessatti raawwatame," jechuun dabaluun himan.

    Deefriin ibsa Televijiinii irratti kenneen, Israa'el bakka lafa jalaa lixa Iraan keessaa kanneen ''misaa'ela lafa irraa gara lafaatti fi misaa'ela kiruuzii furguggisuufi kuusuudhaaf itti fayyadamtu'' irratti kan xiyyeeffatameedha jedha.

    "Iddoo kunneen irratti haleellaan kan raawwatame yoo ta'u, qondaaltoonni olaanoo yeroo darbe daawwatanis dhabamsiifamaniiru," jedha.

    Deefriin itti dabaluudhaan, misaa'eloonni achitti kuufaman silaa ''lammiilee Israa'el irratt ykn humnoota biyyoota lixaa biroo Baha Giddu Galeessaa keessatti argaman irratti illee kan dhukaafamuuf turaniidha'' jedha.

  2. Hoggantoonni Israa’eliifi Iraan walitti dhaadatan

    Ministirri Muummee Isra’eel Benjamiin Netaaniyaahuu ibsa miidiyaaleef kennaniin kaayyoon isaanii sagantaa niikuleeraa fi misooma baalistiik misaayelii Iraan danquu akka ta’e himan. Kanaanis galma qabatan mikeessuu dubbatan.

    ''Misaayela baalistikii 20,000 akka omishan hin hayyamnuuf'' kan jedhan Netaaniyahuun, wanti humni ittisaa isaanii gochaa jiru san mirkaneessuu akka ta’e dubbatan.

    ''Karaa gara Teehraan geessu tolchineerra. Yeroo dhiyoo keessatti xiyyaarota Israa’el, Humna qilleensaa Israa’el, Paayileetota keenya samii Tehraan irratti argitu.''

    Pirezidantiin Iraan Masuud Pezheekshiyaan gama isaaniin Israa’el haleellaa itti fufti taanaan deebii hamaau eeggataan jedhan.

    Akka miidiyaaleen biyyattii gabaasanitti ''weerara warra tsiyoon ofirraa qolachuuf humni waraanaa Iraan tarkaanfii akkaan hamaa fudhata’’ jedhan.

    Pirezidantichi kana kan jedhan marii bilbilaa Ministira Muummee Paakistan Shebaaz Shariif waliin godhan irratti. Paakistaan michuu Iraan waraana Niikuleeraa qabdudha.

  3. Amma nu gahe, UK’n jeettiiwwan waraanaa dabalataa Gidduugala Bahaatti ergite

    UK’n jeettiiwwan waraanaa dabalataa gara buufataaelee waraanaa Gidduugala Bahaatii qabdutti ergite

    Ministirri Muummee UK Kiir Istaarmar naannichatti deeggarsa barbaachisuuf akka eeggannootti’’ xiyyaaronni waraanaa ergamaa jiru jedhan.

    UK durumaanuu oppireeshinii Shader jedhamuuf jeettiiwwan waraanaa ammayyaa RAF jedhaman naannichaa qabdi.

    UK'n michuu Israa’el ta’uu kan himan Istaarmar dhaamsi isaanii ijoon waraanni kun akka caamu kan jedhu ta’uu himaniiru.

    Ministira Muummee Benjamiin Netaaniyaahuu waliin waa'ee nageenya Israa’el irratti dubbachuu himaniiru. ''Marichi michoota lama gidduutti godhame'' jedhan.

    Sagantaa nikuleeraa Iraan irraa UK gaaffii qabaachuu yeroo dheeraag ibsaa akka turte himuun, mirga Israa’el balaarraa of ittisuuf qabduuf beekamtii akka kennan himaniiru.

    Yoo Iraan Israa’el haleeluu itti fufte UKn gara israa’el gortii gaaffiin jedhu garuu ifatti hin dhiyaanneef.

  4. "Xayyaaronni waraanaa keenya Tehraanirra yeroo garmaaman arguuf jirtu" - Netaaniyaahuu

    Israa'el haleellaa Iraanirratti gaggeessitu ammas itti fuftee jirti. Ministirri Mummee Israa'eel Beeniyaamiin Netaaniyaahuu dabalataan Iraan akeekkachiisaniiru.

    Netaaniyaahun haasaa taasisaniin, kaayyon haleellaa kana waa lama: yaaddoo "nikularaafi misaa'ela bilaastikaati" jechuun Israa'eel kaayyooshee galmaan gahuu himan.

    Iraan misaa'ela 20,000 oomishuuf turte kan jedhan Beeniyaamin Netaaniyaahuu, "kanaaf dandeettii oomishuusaanii mancaasuuf tarkaanfii fudhachuuf murteessine. Waraanni Israa'el (IDF) amma gochaa kan jiru kanaadha.

    Dabaluunis, "Amma daandii gara Tehraan [nu geessu] saaqnee jirra. Yeroo dhiyootti ammoo xayyaarota waraanaa Israa'el...paayileetota keenya qilleensa Tehraan irratti ni argitu" jechuu dubbatan.

  5. Israa'el guyyoota lama keessatti ajajoota waraanaa Iraan 20 ajjeese jette

    Israa'el haleellaa Iraan irratti gaggeessaa jirtuun itti gaafatamaa tika waraanaa Iraan Goolam Reeghaa Merhaabii ajjeesuu beeksifte.

    Humni Waraanaa Israa'el ibsa baasen, itti gaafatamaan tika waraana Iraan kun waggoota darban Israa'eel irratti haleellaan akka gaggeeffamuuf hojii tikaa hojjataa ture.

    Erga haleellaa Iraanirratti bantee guyyoota lama keessatti ajajoota waraanaa Iraan 20 ol ajjeese jette.

    Gama biraan ammoo ittaanaa gaggeessaa oppireeshinii waraana Iraan kan ta'e Jeneraal Mahdii Rabbaanii ajjeefamuu miidiyaalen Iraan gabaasan.

  6. Mariin nikularaa Iraanifi US gidduutti bori gaggeeffamuuf ture haqame

    Dhimma nikulara Iraan irratti mariin USfi Iraan gidduutti Dilbata borii gaggeeffamuuf ture haqame.

    Mariin kun marsaa jahaffaaf Omaanitti aggeeffama jedhamee ture.

    Haa ta'u garuu, Israa'eel Iraanirratti haleellaa gaggeessuu hordofee mariin gaggeeffamuuf ture haqamuu Omaan beeksifte.

    Ministiirri dhimma alaa Omaan Badiir Albusaayidii akka jedhanitti, mariin USfi Iraan Dilbata gaggeeffamuuf beellamni qabame haqamee jira.

    Ta'us dippilomaasifi mariin qofti furmaataa waaraa akka fidu himte Omaan.

    Iraan gamasheen, haleellaa Israa'e gaggeessite booda mariin US waliin gaggeeffamu "gatii hin qabu" jechuun beeksifte.

  7. 'Gaazatti sa'aatii 24 darbe keessatti haleellaa Israa'eliin namoonni 90 du'an'

    Haleellan Israa'el Israa'elifi Iraan kaleessaa kaasee itti fufe waan Gaazatti ta'aa jiru haguugera.

    Israa'el haleellaa Iraanirratti yeroo gaggeessitu Gaazas hin dhiifne.

    Sa'aatii 24 darbe keessatti haleellaa Israa'el Gaazatti gaggeessiteen namoonni 90 du'uu miidiyaan Israa'el kan ta'e Haaretz gabaase.

    Kanneen du'aniin alatti namoonni namoonni 605 madaa'uus gabaase.

    Israa'el Iraanirratti haleellaa banuu hordofee dhimmi waraana Gaazaa xiyyeeffannoo lammaffaa ta'ee kan irraanif xiyyeeffannoo dursaa akka kennitu beeksifte.

  8. Israa'el saayintiistota nikuleeraa Iraan sagal ajjeesuu ibsite

    Ministirri Ittisaa Israa'el saayintiistotaa fi ogeeyyii niikuleeraa Iraan sagal ajjeesuu beeksise. Duraan waraanni Israa'el saayintiistota jaha ajjeesuu ibsee ture.

    Amma garuu lakkoofsaan sagal kan ta'an oppireeshinii isa jalqabaan akka ajjeefaman mirkaneesse.

    Aanga'oonni Israa'el Rooyitarsiif yaada kennaniin, buufataaleen niikuleeraa Esfahaanifi Nataanz akkaan miidhamaniiru jedhan.

    Israa'el haleellaa bante kanaan iddoowwan filataman 150 irratti xiyyeeffachuunis ibsameera.

    Dirooniifi Misaayelootni Iraan irraa furguggifaman hedduun fashaalaa'uus waraanni Israa'el ibseera.

  9. 'Iraan misaa'ela dhukaasuu yoo hin dhaabne, magaalaan Teehraan ni gubatti' - Israa'el

    Iraan ittuma fuftee misaa'el kan dhukaastu yoo ta'e, magaalaan Teehraan "ni gubbatti" jedhan ministiira ittisaa Israa'el kan ta'an Israa'el Kaatz.

    Ministiirri ittisaa kana kan dubbatan qondaalota waraanaa biyyattii wajjin yeroo haala amma jiruu gamaggamanitti.

    "Mootummaan abbaa irree Iraan" jechuun kan ibsan Israa'el Kaatz, lammiileen biyyattii keessumaa jiraattonni magaalaa Teehran gatii guddaa akka kaffalan gochaa jira jedhan.

    Iraan lammillee nagaa Israa'el irratti xiyyeeffatti kan jedhan qondaalli Israa'el kun "Abbaan irree Iraan halleellaa lammiilee nagaa Israa'el irratti gaggeessef," keessumaa jiraattota magaalaa Teehraan haala gatii guddaa isaan kaffalchiisu keessa galchee akka jiru dubbatan.

  10. Iraan buufataalee waraanaa US, UK fi Faransaayi akka haleeltu akeekkachiifte

    Iraan haleellaa haaloo bahuu Israa'eel irratti gaggeessituuf Israa'elirra yoo goran, buufataalee waraanaa US, UKfi Faransaayi Baha Giddu Galeessaa keessa jiran akka haleeltu akeekkachiifte.

    Maddi oduu Rooyitars miidiyaalee Iraan waabeffachuun akka gabaasetti, biyyoonni kunneen sadan Israa'el kan ittisan yoo ta'e, buufatalee waraanafi dooniwwan waraanaa naannoo sana jiru haleeluf akeekkachiifte.

    Gama biraan ammoo haleellaa misaa'elaa Iraan halkan edaa Israa'el irratti gaggeessite rukutanii kuffisaa keessatti humni waraanaashee akka hin hirmaanne UKn beeksifte.

    Bara darbe Iraan yeroo diroonifi misaa'elaan Israa'el haleeltee turte, UKn xayyaarota waraanaa buufata Sayippiras jiran irraa kaasun misaa'elota rukuttee kuffisuun Israa'el gargaaruunshee ni yaadatama.

  11. Itti bahi waraana Israa'el-Iraan maal ta'inna?

    Lolli Israa'eliifi Iraan gidduutti gaggeeffamaa jiru ammaaf isaan lamaan bira hin dabarre. Biyyoonni lamaan tasgabbii akka buusaniif waamichi godhamaa jiru firii yoo dhabe maaltu ta'uuf deema? Lolli kun gara ittuma fufee yoo babal'ate maaltu ta'uuf deema? kan jedhu qabxiilee ijoo sadi mee haa ilaallu.

    Ameerikaan waraana kanatti hirmaachuu malti

    US waakkattu illee haleellaa Israa'el jalqabde kana US dudduuba teessee deeggarteetti jettee amanti Iraan.

    Iraan buufataalee waraanaa US Baha Giddu Galeessaa keessatti argaman haleeluu malti. US buufataalee waraanaa Iraaq, Sooriyaafi biyyoota Galoo Galaanaa keessa qabdi.

    Michuuwwan Iraan Hezbollaafi Hamaas ammatti dadhabanis, milishoonni Iraan deeggartuufi Iraaq fa'aa keessatti argaman buufataalee US kana haleeluu danda'u.

    Biyyoonni Galoo Galaanaa waraana kanatti dabalamuu malu

    Iraan buufataalee waraanafi kaan eegumsa cimaa qaban irraan miidhaa qabatamaa gahuu yoo dadhabde, misaa'elootashee gara biyyoota Galoo Galaanaa diinota koo deeggaru jettee quba itti qabduutti deebisuu dandeessi.

    Biyyoonni garuu buufataalee waraanaa kan US malee kan Israa'el miti kan keessummeessan. Biyyoonni US buufataalee waraanaa keessaa qabdu yoo haleelaman, xayyaaronni waraanaa irra goranii loluun waan hin oolledha.

    Mootummaan Iraan kufee qaawwan uumamuu

    Israa'el haleellaa gaggeessituun Iraan keessatti mootummaan Rippaabilika Islaamaa akka kufu yoo gote maaltu dhalata?

    Netaaniyaahuun kaleessa haasaa isaa keessatti kaayyoo haleellaa kanaa keessaa tokko Iraanitti mootummaan akka jijjiiramu gochuu akka ta'e ergaa uummata Iraanif dabarseera.

    Mootummaa Iraan kuffisuun humnoota naannicha jiran tokko tokko, keessumaa Israa'el gammachiisuu danda'a. Garuu erga mootummaan Iraan kufee qawaa uumamu eenyutu guuta kan jedhus gaaffidha.

  12. Israa'eel humna eeggaataa heddu waamte

    Israa'el humna eeggataa kumaatamaan lakkaa'aman waamte. Biyyattiin humna eeggataa waamuunshee Iraanirratti haleellaa bantee Iraan ammoo haleellaa haaloo bahuu erga gaggeessitee boodadha.

    Miidiyaan Israa'el Haaretz akka gabaasetti, humna eeggataa waamun alattis daangaa Sooriyaafi Liibanoon irrattis eegumsaaf humna bobbaasaa jirti.

    Loltoonni eeggataa ta'an hanga har'a ganamaatti Humna Qilleensaansaa, Tika Waraanaafi kutaalee waraanaa birootti akka gaabasan waamichi godhameeraf.

    Gama biraan ammoo halkan edaa bakkeewwan murteessoo Iraan irratti haleellaa gaggeessuu kan beeksifte Israa'el, duulli haleellaa gaggeessuu akka itti fufu beeksifte.

    Iraanis Israa'elirratti haleellaa gaggeessitu akka itti fuftu ibsite.

  13. Iraan Israa'elirratti haleellaa gaggeessuu ittan fufa jette

    Iraan haleellaa Israa'eel irratti gaggeessitu akka itti fuftu beeksifte.

    Miidiyaan mootummaa biyyattii Fars akka beeksisetti, Iraan Israa'elirratti haleellaa gaggeessuu itti fufti.

    Maddi oduu Iraan kun qondaala mootummaa olaanaa waabeffachuuni, Iraan haleellaa gaggeessitu akka itti fuftu kan gabaase.

    Israa'el qofa osoo hin taane Iraan buufataalee waraanaa US Baha Giddu Galeessaa keessatti argamanis akka haleeltutu himame.

    Israa'elis gamasheen hanga galma barbaaddu geessutti Iraan haleeluu akka hin dhaabne beeksisfte.

    Miidiyaan Israa'el Haaretz akka gaabasetti, humni qilleensaa Israa'el halkan edaa Iraan bakkeewwan garaa garaa haleelaa bule.

  14. Iraan Israa’el irraa hangam fagaatti? Meeshaa akkamiitu wal haleeluuf isaan barbaachisa?

    Israa’el Iraan irraa fageenya kiiloomeetira 2,100 ol irratti argamti. Gulaalaan Barruu Defence Eye jedhamu Tiim Riipileey BBCtti akka himeetti, Iraan Israa’el irratti haleellaa raawwachuudhaaf meeshaan ishee guddaan misaa’ela.

    Kanaafu Iraan sagantaa ijaarsa misaa’elii gaggeessituun biyyoota Baha Jidduugalaatti argaman keessaa guddichaafi dandeettii garaagaraa kan qabu ta’uU himama.

    Ajaja waraanaa jidduugala Ameerikaatti Janaraala kan ta’an Keeneeti Maakeenzii bara 2022tti akka dubbataniitti, Iraan miisaa’eloota dhukaafaman ‘‘3,000 ol’’ qabdi.

    Haala odeeffannoo CSIS Misael Defence Project baaseetti, Israa’elis miisaa’elootaan ofiisheerra darbuu biyyoota hedduutti gargurtee jirti.

    Humna waraananoo walgituu?

  15. Israa'el buufata misaa'elaa osoo haleeluu baatee Iraan misaa'ela 1000 al tokkottu dhukaasuf turte

    Israa'el dursitee buufata misaa'elaa Iraan osoo haleeluu baattee Iraan misaa'eloota 1,000 al tokkotti Israa'elitti dhukaasuf akka ture miidiyaan Israa'el Haaretz gabaase.

    Qondaalonni Iraan New York Times tti himan jechuun Haaretz akka gabaasetti, Iraan silaa misa'eloota 1,000 Israa'elitti dhukaaasun sirna ittisaa Israa'el burjaajessuun miidhaa cimaa geessisuuf ture.

    Qondaalonni Eegdota Warraaqsaa Rippaabilika Islaamaa lama miidiyaa US duubbachuun jechuun akka gabaasetti, Israa'el dursitee haleellaa gaggeessunshee Iraan misaa'elota kana bakka kuusati baastee dhukaastuu irratti fe'uuf rakkisaa godhe.

    Qondaalonni Iraan kun akka jedhanitti, Israa'e tarii haleellaa kan gaggeessitu, marii US waliin gaggeeffamu booda ta'uu mala jedhanii tilmaamun biyyisaanii qajeelfama eegumsaa barbaachisu osoo hin gaggeessin hafan.

  16. Iraanitti haleellaa Israa'eliin namootni ajjeefaman 78, haleellaa Iraaniin ammoo Israa'eloota lama

    Haleellaa Israa'el Jimaata Iraan irratti banteen saayintistoota nikuleeraa jaha fi aanga'oota waraanaa dabalatee namootni ajjeefaman 78 ta'uu Iraan beeksifte.

    Dhaabbata Biyyoota Gamtoomaniitti ergamaan Iraan namoota ajjeefaman kanaan alatti namootni nagaan 320 ta'an madaahaniiru jedhan.

    Haleellaa kana boodammoo Iraan Israa'el irratti haleellaa haaloo bahuu raawwatteetti.

    Haleellaa misaayelaa Jerusaalem, Tel aviiviifi bakka kaanitti raawwatameen dhirriifi dubartiin tokko, walumatti namootni lama ajjeefamuu Israa'el beeksifeetti.

    Lakkoofsi namoot madaahanii ammoo 21 gaheera.

  17. Iraan Ameerikaarratti xiyyeeffannaan balaansaa 'hamaa ta'a'- Qondaala US

    Aanga'aan US McCoy Pitt Israa'el haleellaa raawwachuu dura USf beeksifteetti jedhan. Sababni haleellaa kanaaf Israa'el kennite ''balaarraa of ittisuu'' kan jedhu ta'uus himan.

    ''Yunaayitiid Isteets dursitee waayee haleellaa kanaa beeksifamteetti garuu hirmaannaa waraanaa hin qabdu'' jechuun Mana Maree Nageenyaa UN gubbaatti dubbatan.

    Wanti guddaan dursa kennaniif nageenya lammiilee US fi humnootasaanii naannicha jiran ta'uu himan

    Iraan haaloo bahuuf lammiilee, fi buufatalee Ameerikaarratti xiyyeeffattee jennaan ''balaan Iraanitti dhufu hamaa ta'a'' jedhan.

    Wanti Iraanirraa barbaadan dhimma nikuleeraa irratti waliigaltee raawwachuudha jedhaniiru.

  18. Israa'el haleellaa Iraan irratti raawwattu itti fuftee jirti - Humna Ittisaa Israa'el

    Raayyaan Ittisa Israa'el (IDF) haleellaa qilleensaa Iraan keessatti bakkeewwan irratti xiyyeeffate irratti raawwatamu itti fufee jira jedheera.

    Ibsa gabaabaa waraanichi toora Telegram irratti maxxansee,''[Humni Qilleensaa Israa'el] balaa Iraan keessatti mul'atu maqsuuf haleellaa raawwatu itti fufee jira'' jedheera.

    Barreeffamni kunis waraabbii viidiyoo haleellaa qilleensarraan raawwatame agarsiisu waliin tooricharratti maxxanfame.

    Kunis Israa'el haleellaa jalqabaa buufata waraanaa Iraan irratti raawwachuun erga ajajoota waraanaa Iraan sadii ajjeesuu erga waraanni Israale beeksiiftee sa'aatii 24 ol boodadha.

    Isaan boodas Iraan hanga Samabata ganama Israa'el irratti haleellaa haaloo misaa'elaa banuun ishee ni yaadatama.

  19. Haleellaa haaloo Iraan misaa'elaan Israa'el irratti raawwatteen booda suuraadhaan

    Haleellaa misaa'ela haaloo ba'uumsaaf Iraan naannoo Teel Aviv irratti raawwatte booda miidhaan gamoorra gahe mul'ataa jira.

    Israa'el keessatti erga bari'een booda amma suuraawwan haleellaa haaloo ba'uumsa Iraan halkan darbe raawwatte BBCn argataa jira.

    Suuraaleen kunneenis ganama har'aa magaalaa Rishon LeZion, kan kibba Teel Aviiv dirree qarqara galaanaa giddu galeessaa irratti argamtuu kaafamedha.

  20. Chaayinaan haleellaa Israa'el Iraan irratti raawwatte balaaleffatte

    Chaayinaan Israa'el "walabummaa, nageenyaa fi birmadummaa daangaa Iraan sarbuu" balaaleffatti, jedhan ergamaan Dhaabbata Biyyoota Gamtoomanii Chaayinaa, Fuu Koong walgahii ariifachiisaa Mana Maree Nageenyaa Dhaabbata Biyyoota Gamtoomanii halkan darbe taa'ame irratti.

    Beejiing dhiibbaa hamaa haalli amma jiru marii nikulaaraa Iraan irraan geessisu irratti ''yaaddoo guddaa'' qabdi jechuun itti dabalanii, Israa'el mudama akka hin hammaanne gochuuf tarkaanfii waraanaa hunda hatattamaan akka dhaabdu gaafataniiru.

    Akkasumas Fuun, Iraan ''anniisaa niikulaara haala nagaatiif fayyadamuu akka biyya mallatteessituu Waliigaltee Meeshaa Nikulaarri Hin Babal'isneetti mirgishee guutummaatti kabajamuu qaba'' jedhan.

    Chaayinaan keessumattuu anniisaa fi bu'uuraalee misoomaatiin Teehraaniif michuu ijooti.

    Ji'a Guraandhalaa keessa Chaayinaan itti aanaa ministeera dhimma alaa Iraanii fi Raashiyaa Beejiingitti keessummeessitee, dhimma nikulaaraa Iraan irratti mari'achuun qoqqobbii Iraan irratti kaa'ame akka ka'u gaafatanshee ni yaadatama.