Ҳар куни 100 нафар Россия аскари Украина тарафга таслим бўлишга интиладими? Rossiya Dunyo Yangiliklar

Украина ҳукумати таслим бўлишни истаган душман аскарлари учун ташкил қилинган дастур доирасида кунига 100 нафаргача рус аскари мурожаат қилаётганини маълум қилди.

Алоқадор мавзулар:

"Яшашни истайман" лойиҳасига сентябрда старт берилган.

Ишонч телефонига қўнғироқ қилиш ёки мессенжер орқали маълумотларни йўллаш орқали рус қўшинлари Украина кучларига таслим бўлиши мумкин.

Киев расмийларининг айтишича, уларга 3500дан ортиқ босқинчи кучлардан ва уларнинг оилаларидан мурожаат келиб тушган.

Россия президенти Владимир Путин юз минглаб россиялик эркакларни урушга сафарбар қилганидан ва Херсон озод қилинганидан бери уларнинг сони янада ортган.

Би би сига айрим қўнғироқларнинг аудиоёзувлари тақдим қилинди.

Қоронғу йўлаклардан ҳам кўриниб турибдики, ҳарбий асирлар билан шуғулланадиган штаблар ҳам мамлакатни қамраган блэкаутлардан холи эмас.

Кичик бир офисда Светланани (ҳақиқий исми эмас) учратдик. У кундалик равишда рус аскарлари қўнғироқларига жавоб берадиган оператор.

Улар телефон орқали ёки Telegram ва WhatsApp каби мессенжерлар орқали боғланишади.

Қўшинлар бўш вақт кўпроқ бўладиган ва яшириниб алоқага чиқиш мумкин бўлган вақтларда, тушдан кейин мурожаатлар кўпроқ бўлади.

"Биринчидан, биз асосан эркак кишининг овозини эшитамиз, - дейди у. - Кўпинча бу овозлар қисман умидсиз, қисман чарчаган бўлади, чунки улар ишонч телефонлари қандай ишлашини ёки бу шунчаки тузоқми, аниқ билишмайди.

Баъзида таслим бўлиш учун эмас, балки агар зарур бўлиб қолса, қандай таслим бўлиш ҳақида сўраш учун қўнғироқ қилишади. Ҳар сафар ҳар хил", дейди Светлана.

Светлана бизга нечта рус аскарига ёрдам берганини ва бу қандай бўлганини айтиши мумкин эмас. Аскарлардан қаердаликлари сўралади, сўнг қолган йўриқлар кўрсатилади.

Унинг айтишича, уларнинг барчаси ҳам Кремлнинг Украинани нацистлар бошқараётгани ҳақидаги даъвосига ишонмаса ҳам, баъзида шунчаки провокация қилиб қўнғироқ қилишади.

"Биз бутун мамлакат ҳақида гапира олмаймиз, - дейди у. - Уларнинг кўпчилиги ҳаётидан хавотирда."

Светлана бир гал босиб олинган Қримда яшовчи ва урушга сафарбар қилинган эркакдан қўнғироқ қабул қилгани ҳақида гапирди. У ўз мамлакати ва ўз оиласига қарши урушиши керак бўлиб қолган экан.

Афтидан Москва Россия ҳудудидан бўладиган қўнғироқларга чеклов қўйган. Британия ёки Россия симкарталаридан қилинадиган қўнғироқлар кўпинча узилиб қолади.

"Ўзингизга савол беринг, нима учун урушяпсиз?" дейди "Яшашни истайман" тарғибот видеосидаги овоз Россия аскарларига қарата.

Портлашлаш таъсирчан мусиқа товушига синхронлашади, кўринишидан таслим бўлаётган рус аскарлари тасвирлари кўринади, сўнг иккита телефон рақами намоён бўлади.

Уларга фронтга яқинлашганда оқ байроқ кўтариш ҳам тавсия қилинади.

Бу ахборот урушининг бир қисми, албатта. Украинанинг рус қўшинлари руҳий ҳолатини абгорлаштириш уринишларидан бири.

Светлана ўтирган хона деворига Украина ҳарбий асирлари суратлари ёпиштирилган. Улар ҳамон тирик деб ишонилади. Бу ишонч телефонлари уларни уйларига қайтариш учун Киев кўраётган чоралардан биридир.

Улар таслим бўлгач, рус ҳарбий асирлари кейинчалик украин ҳарбий асирларига алиштирилиши мумкин.

Урушни ўрганиш институтига кўра, Кремл мамлакат ичкарисидаги танқидлар алангасини камайтириш учун уруш асирларини алиштирмоқда.

Икки томонда ҳам минглаб ҳарбий асирлар борлиги айтилади, бироқ аниқ рақамлар йўқ.

"Биз асосан урушишни билмайдиган, биз томонга тўпдан отилгандек улоқтирилган, қисман сафарбар қилинган аскарларга эътибор қаратамиз", дейди дастур раҳбари Виталий Матвьенко.

"Бу лойиҳа ихтиёрий таслим бўлганларнинг ҳаётини кафолатлаш учун йўлга қўйилди."

Кўп сонли душман сафларини сийраклаштириш Украина учун каттароқ душманнинг белини букишда асқатишига умид қилинмоқда.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.