Путин Украинага ҳужумларни кучайтирмоқчи - Ukraina Rossiya yangilik

Россия Мудофаа вазири Сергей Шойгу Президент Владимир Путинга Лисичанск шаҳри тўла ўзларининг назоратига ўтгани ҳақида ҳисобот берганидан кейин Россия раҳбари Украинадаги босқинларни давом эттиришга буйруқ берди.

Россия телевидениеси Президент Путинни намойиш этди, унда у бошқа фронтдаги қўшинларига ҳам "аввалдан тасдиқланган режага мувофиқ" олдиларига қўйилган мақсадларга эришишга чақирди.

Лисичанскнинг босиб олиниши энди бутун Луҳанск вилояти Россиянинг қўлида деганини англатади.

Бундан олдин Луҳанск вилоятининг ҳокими Серҳий Ҳайдай Украина қўшинлари шаҳарни ташлаб чиқишга қарор қилганларини айтди, бундан кўзланган мақсад, худди Северодонецк ёки Мариуполь шаҳарларида бўлганидек, қўлга олиш мақсадида узоқдан артиллерия ҳужумларига тутиб Россия Лисичанскни ҳам вайрон этиши олдини олиш бўлган.

Аскарларимиз янги мустаҳкамланган мавқеъларга ўтишди, деб айтган Би-би-сига Серҳий Ҳайдай.

Шаҳарни, бу билан бутун Луҳанск вилоятини қўлдан бой бериш оғриқли. Лекин биз фақат битта жангни бой бердик, бутун урушни эмас", деб айтган Луҳанск ҳокими.

У Ғарбдан келаётган тобора кўп сондаги замонавий қуроллар билан Россия илдамлаши тўхтатилади, деди.

Лисичанскнинг ташлаб чиқилиши ҳақида гапираркан, Украина Президенти Володимир Зеленский, аскарларимиз ҳаётини асраб қолиш мақсадидада шундай қилдик, деди.

Зеленский Россия қўлидан Луҳанскни қандай қайтариб олмоқчи? - Видео

Аксар ҳарбий экспертлар айтишича, Россия ҳарбийлари катта инсоний ва техник талофатлар эвазига апрель ойида бошланган "Донбассга катта ҳужум"да Луҳанск вилоятининг унча катта бўлмаган ҳудудни қўлга киритолди, холос.

Бундан олдин Украина шарқидаги жангларга Россиянинг икки генерали раҳбарлик қилаётгани ҳақидаги хабарлар тарқалганди.

АҚШдаги Урушни ўрганиш институтига кўра, бу нарса Лисичанскни босиб олиш ва Луҳанск вилоятининг маъмурий чегараларигача чиқишни Президент Путин ўзи учун қанчалар муҳим деб кўраётганининг бир тасдиғидир.

Луҳанск ва Донецк вилоятлари Украинанинг Донбасс минтақаси деб аталади, минтақа кўмир конлари билан танилган.

2014 йили россияпараст бўлгинчи кучлар Россия дастагида ўзларини Украинадан мустақил Луҳанск Халқ республикаси ва Донецк Халқ республикаси деб эълон қилган эдилар.

Украина босқинини бошлашдан олдин Россия ЛХР ва ДХР мустақиллигини тан олиши ҳақидаги фармонни Президент Путин имзолаган эди.

Президент Путин 24 февралда Украинага қарши махсус ҳарбий операция бошлашини эълон қилган, унинг мақсади Украинани "денацификация ва демилитаризация" қилиш эканини айтган.

Президент Путин ва Россия расмийлари саккиз йил давомида "Украина Донбассни бомбалаб келди" ва бу ҳудудда "русийзабонлар геноцид қилинди" деб даъво қилиб келадилар.

Бироқ халқаро ташкилотлар, оммавий ахборот воситалари, шу жумладан, Би-би-си ўрганишлари ҳам бу гапларда асос йўқлигини исботлаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek