Беларус Украина талабини бажармаса нима бўлади?

Украина Президенти Володимир Зеленскийнинг Россия дронларига йўл кўрсатадиган ретрансляторларни Беларус ечиб олсин, акс ҳолда биз қиламиз деган мурожаатига расмий Минскдан ҳозирча жавоб бўлмади.

Украина Президенти Володимир Зеленский айтишича, Беларус Украинанинг Россия дронларига техник кўмак беришни тўхтатиш ва ретрансляторларни бузиб ташлаш талабига жавоб бергани йўқ.

Бу ҳақда Президент Зеленский ТСН телеканалига берган интервюсида айтди.

16 июн куни Беларус Президенти Александр Лукашенко Саудия Арабистонининг Al Arabiya давлат телеканалига интервю берди.

Интервю чоғи Президент Лукашенко ўтмишда Зеленский ҳақида қаттиқ гапиргани учун кечирим сўради.

"Украина билан Россия ўртасидаги уруш Беларус ҳудудига ёйилиб кетишини қабул қилиб бўлмайди, чунки мамлакат ҳарбий жиҳатдан жуда бўш", деб айтган Беларус президенти.

Лукашенконинг ушбу баёнотига муносабат билдирган Украина Президенти Володимир Зеленский унинг урушга аралашмаслик истагига шубҳа билдирди.

"Ортиқча сўз керак эмас. Бугун унинг минораларида ретрансляторлар турипти — Россия ретрансляторлари, Беларусники. Нима фарқи бор? Украинага чегарадош икки вилояти ҳудудида Украина аҳолисига ўт очишни тўғирлайдиган техника турибди. Айнан аҳолига. У буларни йўқотоладими? Урушда иштирок этишни хоҳламайман, дейиш нимага керак? Бу техникаларни йўқотсин, бу техникаларни ўчирсин", деди Президент Зеленский.

Зеленский сўзларига кўра, ретрансляторларни ишдан чиқариш учун Лукашенкога бир ҳафта муҳлат етарли.

"Нега мен бир ҳафта деяпман? Чунки ҳар куни тинч аҳоли ҳалок бўлаяпти, болалар жароҳатланаяпти. Агар у буни қилмаса, биз қиламиз", деди Украина Президенти Зеленский.

Украина Президенти Зеленский айтишича, расмий Киев узоқ вақтдан бери Минскка истиҳборот, хавфсизлик хизматлари ва бошқа каналлар орқали тегишли сигналларни етказган, кўп маротаба Беларусдан Украина шаҳарларига аниқ зарба берадиган дронларни нишон олишига кўмаклашаётган ретрансляторлар фаолиятини тўхтатишни талаб қилган.

Шунингдек Украина раҳбарияти Беларусдан Россия армиясини ёқилғи билан таъминламасликка чақирди.

Беларусдаги иккита нефтни қайта ишлаш заводи Россияга ёқилғи бериши аниқ.

Украина матбуоти Киев сиёсатчилари ва таҳлилчилар билан бирга мабодо Беларус Украина ултиматумини бажармаса, воқеалар қандай ривожланиши мумкинлигини таҳлил қилмоқдалар.

Украинанинг 24 телеканали Россия-Украина уруши фахрийси, истеъфодаги майор Алексей Гетманга ана шу саволни берди.

Ҳарбий таҳлилчи Беларус Президенти Александр Лукашенконинг Украинага нисбатан баёнотлари доим ўзгарувчан бўлиб туришига эътибор қаратишни лозим топди.

Алексей Гетманга кўра, халқаро қонунчилик ва уруш олиб бориш анъаналарига кўра, Украинанинг ўз ҳудудига ҳужум қилаётган ёки ҳужум қилишда ёрдам бераётган ҳарбий нишонларни йўқ қилишга ҳаққи бор.

Ҳатто бу нишонлар тажовузчи деб тан олинмаган мамлакат ҳудудида жойлашган бўлса ҳам, деди уруш ветерани.

Мисол учун, бу мамлакат ҳудудидан Украинага ракета зарбаси берилса, бизнинг ракета учирилган ёки сақланадиган жойга зарба бериш ҳуқуқига эгамиз, дейди Алексей Гетман.

"Шунинг учун агар Беларусда жойлашган радиолокацион станциялар Россия учувчисиз аппаратларини Украина ҳудудига йўналтиришга ёрдамлашса, Киевнинг нафақат бу аппаратларни, балки уларни бошқараётган ускуналарни – радиолокацион станцияларни ҳуқ қилишга ҳаққи бор", деди истеъфодаги майор.

"Ултиматум фурсати ўтганидан кейин нима бўлишини кўрамиз. Негадир менга Украина ортга қайтмайдигандек кўринаяпти. Ишончим комил, бу ретансляторларга нуқтали зарбалар берилади. Уларни яшириб ёки ташқи кўринишини ўзгартириб бўлмайди", деди Алексей Гетман.

Россия-Украина урушидаги сўнгги ривожланишлар:

Президент Зеленский Қрим ярим оролини Россиянинг қуруқлиги билан боғлайдиган Керч кўпригининг икки томонига зарбалар берилганини хабар қилди.

Қрим раҳбарияти автомобил қуйиш шохобчаларида ёқилғи аҳолига сотилишини тақиқлади.

Ёқилғи фақат давлат эҳтиёжидаги автомобилларга берилиши маълум қилинди.

Ҳам Россия, ҳам Украина тун оша дрон ҳужумларини уюштирганликлари хабар қилинди.

Украина ҳарбийлари Россиянинг Воронеж шаҳридаги заводга қанотли ракета билан ҳужум қилганларини хабар қилдилар.

Бу заводда Россиянинг "Искандер", Х-101 қанотли ракеталари, «Панцирь С1» ракета-зенит мажмуалари учун эҳтиёт қисмлар ишлаб чиқарилади.

Донецк вилоятидаги стратегик ўта муҳим Констатинивка шаҳрида Украина қўшинлари учун жуда оғир вазият юзага келгани хабар қилинмоқда.

Констатинивка шаҳри ён-атрофдаги жабҳа чизиқлари учун ҳам қурол-яроғ, озиқ-овқат билан таъминлаш учун муҳим нуқта ҳисобланган.

Украина раҳбарияти Россия ёзга бориб фронтда йирик ҳужумга ўтишга тайёрланаётгани ҳақида йил бошидан буён айтиб келади.

Константивка Донцек шаҳридан 55 километр узоқликда жойлашган, бироқ стратегик муҳим жойлашуви шу вақтгача ҳам Украина қўшинларининг шаҳарни қўлдан чиқазишларига имкон бермаган.

Аммо охирги кунларда бутун шаҳар ҳудуди "кулранг" ҳудудларга айланди, бу дегани бирор тараф ҳам бирор ҳудудни назорат қилмаяпти.

Украина ҳарбийлари яқин орада шаҳар қўлдан бой берилиши мумкинлигини айтмоқдалар.