Россияда илк ҳукм: 9 яшар қизча 2 минг рублга хатна қилинган Rossiya dunyo yangiliklar

Россияда балоғатга етмаган қизларнинг мажбуран хатна қилиниши юзасидан илк суд ҳукми ўқилди. Ҳукм юмшоқ эканликда аллақачон танқидлар остида қолиб кетди. Хабарларга кўра, қизчани отаси зўр билан хатна қилдирган. Полицияга эса, онаси мурожаат қилган. Икковлон ажрашган бўлишган. Бу ишни отасининг талаби билан ўгай онаси қилдирган, деган маълумотлар ҳам бор.

Алоқадор мавзулар:

Суд ҳукми

Хатна қилиш амалиёти 2019 йилнинг июнь ойида Ингушетияда амалга оширилган.

Уни "Айболит" хусусий клиникасининг болалар гинекологи Изань Нальгиев ўтказган.

Гинеколог 2 минг рублга 9 яшар қизчани хатна қилган.

Бу амалиёт анъана сифатида кўрилади.

Гинекологга нисбатан суд ҳукми 28 январь куни чиқарилган.

Магас суди уни қасддан баданга енгил шикаст етказишда айбдор, деб топган.

Уни 30 минг рубль миқдорида жаримага тортган.

Даъво муддати ўтгани сабабли эса, гинекологни бу жазодан ҳам озод этган.

Акс-садолар

Хотин-қизлар жинсий аъзоларини хатна қилиш муаммоси билан шуғулланувчи "Правовая инициатива" лойиҳаси адвокатлари эса, гинекологни оғирроқ моддалар бўйича жавобгарликка тортишни талаб қилишган.

Бу иш учун клиника раҳбарияти ҳам жавоб бериши кераклигини таъкидлаб келишаётганди.

"30 минг рубль жарима - бу боланинг жинсий аъзоси хатна қилиниши учун берилган мутлақ ноўрин ва адолатсиз жазо. Таассуфки, дунёвий судья жарбланувчи адвокатининг жиноят шерикликда содир этилганлиги ва шифокорнинг ҳаракатларини Жиноят Кодексининг оғирроқ моддалари билан таснифлаш зарурлиги ҳақидаги важларига рози бўлмади", - деб айтган лойиҳанинг катта ҳуқуқшуноси Татьяна Саввина.

Унинг сўзларига кўра, хатна қилиш амалиёти ортидан қизчанинг руҳиятида ўзгариш аниқланган бўлса-да, судья бунинг даражасини аниқлаш учун суд-тиббий экспертизасини тайин этишдан бош тортган.

Татьяна Саввинага кўра, "Суд ҳукми қизларни хатна қилиб, мажруҳ қилиш амалиётларининг жазосиз қолаётганига оид Россиядаги умумий манзарани яна бир бор тасдиқлайди".

"Айболит" клиникаси раҳбарияти ва гинеоклоги бунга ўхшаш амалиётни ҳеч қачон ўтказишмагани, жабрдийда болага эса, аҳволига қараб, фақат зарур тиббий ёрдам кўрсатишганини даъво қилишган.

Жиноий иш

Мазкур жиноий иш юзасидан тергов 2020 йилнинг баҳорида тугаган.

Иш жабрдийда қизча онасининг аризаси билан очилган.

Аммо коронавирус боис, суд ортга суриб келинган.

"Правовая инциатива по России" фонди ҳали 2016 йилда мамлакатдаги хатна ҳолатлари борасида ўзининг ҳисоботини эълон қилган.

Унда айтилишича, Шимолий Кавказда бу каби амалиёт ҳануз кенг тарқалган, кўп қилинади.

Асосан тиббий бўлмаган бир шароитда амалга оширилади ва кўп ҳолларда хотин-қизлар руҳиятининг бузилишига сабаб бўлади.

Ҳисобот муаллифнинг Би-би-сига айтишича, маҳаллий аҳоли бу ҳақда чурқ этмасликни афзал билади.

Дунёнинг аксарият давлатларида хотин-қизларнинг хатна қилиниши қонунан тақиқланган.

Аммо, шунда ҳам, жаҳон бўйлаб ҳар йили уч миллионга яқини худди шу каби таҳдид билан рўбарў келади.

Ҳозир Ер юзида 125 миллионга яқин хатна қилинган аёл бор.

Инсон ҳуқуқлари бўйича Европа суди хотин-қизларнинг хатна қилинишини Европа Конвенциясининг 3-моддасига зид келувчи қийноқ, ноинсоний ва шафқатсиз муносабат ўлароқ тан олади.

Бирлашган Миллатлар Ташкилоти ва Жаҳон Соғлиқни сақлаш ташкилоти ҳам худди шундай мавқеъни намоён этиб келади.

Хатна тарафдорлари бу иш аёлларнинг ҳирсини жиловлашга ёрдам беришини иддао қилиб келишади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek