Россия кутилмаган қарорга келди. Расмий Москва ён бердими? Video Rossiya Ukraina Dunyo Yangiliklar

Россия ўзининг ҳарбий-денгиз машқларини Ирландия қирғоқларидан узоқроқда ўтказишга рози бўлди. Бу каби "ён бериш"нинг сабаби маълум эмас. Ирландия бундан аввал "Россияни тўхтатишга қодир эмаслиги"ни даъво қилганди. Британия ва АҚШ Россияга янги санкциялар киритиш ҳаракатида.

Россия келаси ой Украинага ҳужум қиладими? Байден огоҳлантирди

Таҳлил:

Россия ҳали ҳам таҳдидми? - Путин, дунё ва геосиёсат

Алоқадор мавзулар:

Янги машқлар

Россия Ҳарбий-Денгиз Флотининг ростмана отишмали ҳарбий машқлари келаси ҳафтага режаланган.

Уларнинг 3-8 февраль кунлари Ирландиянинг жанубий-ғарбий қирғоқларидан 240 километр узоқликда бўлиб ўтиши кўзда тутилганди.

Хабарларга кўрса, сиёсатчилар ва балиқчиларнинг босими иш берган.

Россия қўмондонлиги ўзининг ҳарбий-денгиз машқларини Ирландия соҳилларидан узоқлаштиришга рози бўлган.

Бу ҳақда шанба куни кечқурун Ирландия Ташқи ишлар вазири расман маълум қилган.

Саймон Ковени Россиянинг ҳарбий мақшлари Ирландиянинг эксклюзив иқтисодий зонасига дахл қилмаслигини билдирган.

Вазирнинг айтишича, ўтган ҳафта россиялик ҳамкасби ва Россия Мудофаа вазирига бу хусусда хат ёзган. Ўзининг мактубига ижобий жавоб олган.

Ирландия Ташқи ишлар вазири Россия томонининг бу қарорини олқишларини ҳам қўшимча қилган.

Илтифот

Россия Ҳарбий-Денгиз Флотининг Атлантика океанининг шимолий-шарқий қисмида ўтказишни режалаган машқлари халқаро ҳуқуққа зид бўлмаган.

Аммо Россиянинг бу режаси Ирландияга хуш келмаган.

Россиянинг Ирландиядаги элчиси Юрий Филатовнинг айтишича, мамлакати илтифот қилган.

Қарор "анъанавий балиқ овлаш ҳудудларида Ирландия кемаларининг балиқчилик фаолиятига тўсқинлик қилмаслик" мақсадида қабул қилинган.

Маҳаллий балиқчилар эса, агар Россиянинг ҳарбий-денгиз машқлари дастлаб режалаштирилган жойда ўтказилса, норозилик намойишлари билан таҳдид қилишган.

Уларни Ирландия балиқни қайта ишлаш ва экспорт қилувчилар уюшмаси ҳам қўллаб-қувватлаб чиққан.

Ирландиянинг Миллий мерос масалалари бўйича вазири Малколм Ноонан эса, бу машқлар кўплаб денгиз ҳайвонлари, жумладан, бир неча турдаги китларга зарар этказиши мумкинлигидан огоҳлантирганди.

Юрий Филатов наздида бу масала "бўрттирилган".

У ҳарбий машқлар билан боғлиқ можарони Россиянинг Европага таҳдиди ҳақидаги ташвиқот кампаниясининг бир қисми, деб атаган.

Ирландия эса, 1930 йилдан буён нейтраллик сиёсатини юритиб келади. НАТОга кирмайди.

Россия Ҳарбий-Денгиз Кучлари ўтган ҳафта январь ва февраль ойларига режалаган машқлари рўйхатини эълон қилган.

Уларнинг Россия қирғоқларидан узоқда, жумладан, Ўрта Ер, Шимолий ва Охота денгизи сувларида, яна Атлантика ва Тинч океанларида ҳам ўтказилиши маълум бўлган.

Ҳарбий-денгиз машқларига 140 дан ортиқ корабль ва таъминотчи кемалар, 60 дан зиёд самолёт ва вертолётлар, 10 мингга яқин ҳарбий хизматчи жалб этилиши айтилган.

Путин ва расмий Кремлнинг режаси нима, деган саволларни пайдо қилаётган бу каби ҳарбий машқлар Россия ва Украина инқирози янада кучайиб бораётган бир пайтга тўғри келган.

Британия эса, Украина атрофида кескинлик авж олган бир пайтда Россияга босимни кучайтириш йўлларини кўриб чиқмоқда.

Даунинг стрит Шарқий Европадаги қўшинлари сонини икки баробарга оширишни режалаштираётир.

Бош вазир Борис Жонсоннинг айтишича, қўшимча кучлар юборилиши "Кремлга аниқ сигнал" бўлади.

Британия Ташқи ишлар вазири эса, Россиянинг Украина бостириб кириши таҳдиди "реал" эканини баён қилган.

Аммо Лиз Трасс британ ҳарбийларининг бирор бир можарога сафарбар этилишлари эҳтимолини юқори, деб баҳоламаган.

"Барча ишни қиламиз"

Британия Ташқи ишлар вазири Путинни "тўхташга ундаш учун қўлларидан келган барча ишни қилишлари"ни айтган.

Лиз Трасс BBC One нинг Sunday Morning телевизион дастурига интервью берган.

Маълум бўлишича, янги иқтисодий санкциялар - бошқа мамлакат томонидан давлат, жисмоний шахслар ёки ташкилотларга нисбатан қўлланиладиган жазолар - Россия молия институтлари, энергетика компаниялари ва "Россия режимини оёқда тутиб турган"ларни нишонга олиши мумкин.

Янги қонунчиликка кўра, санкциялар "Россия ҳукуматига таъсир кўрсатувчи ҳар қандай манфаатларга" қаратилиши эҳтимоли юқори.

Британия Ташқи ишлар вазирлиги ўзининг янада кескин экани айтилаётган янги жазо чораларини бугун, душанба куни парламентда эълон қилиши кутилмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek