Россия: Путинни ‘Кремлдан қувиб чиқармоқчи’ бўлган шомонни даволашади - Rossiya dunyo yangiliklar

Ёқутистон суди қарорига мувофиқ, шомон Александр Габишевни мажбурий даволашади. Суд қарори психиатрия экспертизаси хулосасига асослангани айтилмоқда. Маълум бўлишича, экспертиза уни яна ақлан соғлом, деб топмаган.

Бу ҳақда шомоннинг адвокатига таяниб, "МБХ медиа" хабар бермоқда.

Шомон Росгвардия ходимига куч қўллашда айбланмоқда.

У 2019 йилда тилга тушган.

Путинни "Кремлдан қувиб юбориш" учун Ёқутистондан Москвага қараб пиёда йўлга чиққан.

12 июнь куни эса, Габишев Читадаги норозилик намойишида чиқиш қилган.

Унинг нутқи ижтимоий тармоқларда кенг тарқалган.

Шомон ўз нутқида халқ йиғинларини ташкил қилишни таклиф этган.

Халқ йиғинлари қабул қиладиган қарор қонун кучига эга бўлишини айтган.

"Унутманг, Путин сизлар учун қонун эмас", - деган ёқутистонлик шомон.

Суд ҳукми

Суд ҳукми ҳалича кучга кирмаган, ҳимоя томони шикоят аризаси билан чиқиш ниятида эканини айтган.

Шомонга қарши жиноят иши эса, 28 январдаги воқеалар билан боғлиқ.

Маълум бўлишича, худди ўша куни ҳуқуқ-тартибот ходимлари шомоннинг уйига келишади.

Уни мажбуран Ёқутистондаги руҳий касалликлар бўйича диспансерга олиб бормоқчи бўлишади.

Тергов маълумотларига кўра, бунга республика психоневрология диспансери шифокорининг Ички ишлар вазирлигининг навбатчилик бўлимига қилган шикояти сабаб бўлган.

У Габишев ўзларида режали текширувдан ўтмаганлиги, даволанишдан бош тортгани ва тажовузкорлик кўрсатаётгани ҳақида хабар берган.

Бунинг ортидан, Росгвардия ходимлари шифокор билан бирга шомоннинг уйига етиб келишади, уни эшикни очишга кўндиришга уринишади.

Алал-оқибат эса, эшикни бузиб, уйга киришади.

Терговга кўра, худди шу пайтда шомон Росгвардия ходимини совуқ қурол билан яралайди.

Интерфакс бу қурол ёқутларнинг дастаси ёғоч қиличи бўлганини тахмин этмоқда.

Юриш ва ҳибс

Ёқутистонлик шомон 2019 йилда Путинни "Кремлдан қувиб чиқариб", "халқ ҳокимиятини ўрнатиш" истагида эканини эълон қилади.

Худди шу мақсадда Москвага қараб пиёда йўлга тушади.

Тахминан 8 минг километрлик йўлни икки йилда босиб ўтиши тахмин этилади.

Аммо худди ўша йилнинг кузида шомонга қарши жиноий иш очилади, у экстремизмга ошкора даъват этишда айбланади.

Ўша пайтда Бурятияга етиб қолган шомон қўлга олинади ва яна Ёқутистонга келтирилади.

Давлат экспертизаси Александр Габишевни "ақлан носоғлом", деб топади.

Уни ўтган йилнинг май ойида мажбуран психоневрология диспансерига жойлаштиришади.

Шомоннинг 22 июлгача ўша ерда бўлгани айтилади.

Маълум бўлишича, у шу йилнинг бошида март ойида Москвага қараб яна йўлга чиқиш ниятида эканини айтади.

Аммо бир ҳафтага қолмай, уни яна диспансерга элтишади.

Орада даволанишдан бош тортгани, шифохонага чиқмай қўйгани, шифокори билан ҳам гаплашишдан воз кечгани айтилади.

Шифокори билан алоқасини буткул узганини унинг яқинлари Интерфакс билан суҳбатларида ҳам тасдиқлашади.

2 февраль куни эса, Ёқутистон шаҳар суди диспансернинг шомонни мажбуран касалхонага ётқизиш тўғрисидаги даъвосини қондиради.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek