Россияда кунига 700 дан ошиқ одам ўлмоқда - Rossiya, Putin, O‘zbekiston, dunyo, yangiliklar

Россияда сўнгги уч-тўрт кун ичида коронавирусдан ўлим кўрсаткичлари 700 дан пастга тушмаётир. Бунақаси пандемия тарихида кузатилмагани айтилмоқда. Россияда юз минглаб ўзбекистонликлар ҳам яшаб, меҳнат қилишади.

Энг кўп ўлим ҳоллари пойтахт Москва ва Санкт-Петербургга тўғри келаётир.

Россияда ўтган ой бошидан бошлаб коронавирусга чалиниш кескин ортган.

Масъуллар бунинг сабабини "дельта - ҳиндистонча" штаммга боғлашган.

Ҳозирга келиб кундалик кўрсаткичлар 25 мингга яқинлашган.

Бу гал ҳам пойтахт Москва коронавирус ўчоғига айланган.

Россиянинг иккинчи йирик шаҳри Санкт-Петербургда ҳам аҳволнинг оғир экани айтилган.

Июнь ойи охирига бориб, бу икки шаҳарда кетма-кет антирекорд даражасида ўлим ҳоллари қайд этилган.

Бир кунда жами 200 га яқин одамнинг ҳаётдан кўз юмгани маълум бўлган.

Россия ҳозир дунёнинг коронавирус энг кўп тарқалган бешта давлатидан биттаси бўлиб турибди.

Мамлакатда жами коронавирусга чалинганлар сони 5 миллион 700 мингдан ортган.

141 мингга яқин ўлим ҳолати қайд қилинган.

Мустақил экспертлар, ҳатто шунда ҳам, россиялик масъуллар келтираётган расмий рақамларга ишонқирамай қарашади.

Россия дунёнинг энг кўп сондаги ўзбекистонликлар турли иш, юмуш ва таҳсилда банд давлати бўлади.

Пандемияга қадар уларнинг сони бир неча миллионга нисбат берилган.

Ўзбекистонлик мигрантларнинг энг кўпи эса, айнан Россиянинг икки энг йирик шаҳри - Москва ва Санкт-Петербургда меҳнат қилиб келишган.

Коронавирус билан боғлиқ вазиятнинг кескин ёмонлашиши юз минглаб Ўзбекистон фуқаролари ишлаш учун Россияга қайтиш илинжида ва ҳаракати бўлган бир пайтга тўғри келган.

Россияда коронавируснинг "дельта" штаммини юқтираётган ва ундан вафот этаётганлар орасида Ўзбекистон фуқаролари бор-йўқлиги ҳозирча маълум эмас.

Бу ҳақда бирор бир томоннинг расмий маълумот билан чиққани ҳалича кўрилмаган.

Мавжуд вазият сабаб, орада пойтахт Москва ва Россиянинг бошқа минтақаларида яна карантин чекловларига қайтилган.

Хизмат кўрсатиш соҳасида ишлайдиганларнинг камида 60 фоизи ўзини эмлатиши шарт экани айтилган.

Умумий овқатланиш масканларига келаётганларни фақат эмланган, ковидни ўтказиб бўлган ва ўзини коронавирусга текширтирганлар билан чеклаган.

Масъуллар шу пайтгача вакцинация жараёнининг секин бораётганидан ташвиш билдириб келишган.

Одамларни турли йўллар билан бунга рағбатлантиришгача боришгани кўрилган.

Россия дунёнинг коронавирусга қарши тўртта вакцина яратиб, уларни расман қайддан ўтказган саноқли давлатларидан бири бўлади.

Масъуллар Россиянинг тўлиқ карантинга қайтиш эҳтимолини ҳозирча назардан соқит этишмоқда.

Мамлакат аҳолисининг сони умумий 146 миллион кишини ташкил қилади.

Россияда тарқалаётган коронавирус турлари геномининг таҳлили апрель ойидан буён "дельта"сининг бошқаларини сиқиб чиқараётганини кўрсатган.

Лекин, шунга қарамай, пойтахт Москва масъулларининг шу кунларда карантин чораларини юмшатиш ҳаракатида эканликлари маълум бўлган.

Шаҳар ҳокими бунинг сабабини коронавирус билан боғлиқ вазият барқарорлашиб бораётгани билан изоҳлаган.

Россиянинг ортидан коронавируснинг "дельта" штамми Марказий Осиё давлатлари орасидан фақат Қозоғистонда аниқлангани расман тасдиқланган.

Ўзбекистонда расмийлар бунинг эҳтимоли катта эканини айтишган, аммо ҳалича якуний текширув натижаларини эълон қилишмаган.

Афғонистон эса, ўтган ой коронавируснинг "дельта" штамми аниқланган Ўзбекистонга бевосита чегарадош иккинчи минтақа давлати бўлган.

Аммо 21 июнь куни айнан коронавирус билан боғлиқ кескинлашаётган вазият сабаб, Ўзбекистон Афғонистон билан чегарасини вақтинча ёпган.

Россия ва Қозоғистонда шу пайтгача энг кўп сондаги Ўзбекистон фуқаролари меҳнат муҳожирлигида банд бўлиб келишган.

Ўзбекистон пандемия манзарасида мунтазам ҳаво парвозларини қайта тиклаган ўндан ошиқ давлат орасида эса, Қозоғистон ва Россия ҳам бор.

Ўзбекистон ва Россия ўртасидаги мунтазам авиарейслар бир йиллик танаффус ортидан шу йилнинг 1 апрель куни яна йўлга қўйилган.

Россияда вужудга келаётган сўнгги вазиятнинг Москва ва Тошкент ўртасидаги парвозларга таъсири ҳалича маълум эмас.

Ўзбекистон сўнгги кунларда пневмонияга оид кўрсаткичларни ҳам юрита бошлаган.

8 июль куни Ўзбекистонда 482 кишида коронавирус аниқланган бўлса, пневмония билан боғлиқ кўрсаткичлар 221 тани ташкил этган.

Яна 4 кишининг коронавирус қурбони бўлгани айтилган.

Ўзбекистон жорий пайтда Қозоғистон ва Қирғизистондан кейин Марказий Осиёнинг коронавирус энг кўп тарқалган учта давлатидан биттаси бўлиб турибди.

Қозоғистон ва Қирғизистонда коронавирус кўрсаткичлари пневмония ҳолларини ҳам ўз ичига олади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek