Россия: Ворисингиз ким, президентликдан кетгач, нима қиласиз ва ўзингизни қайси вакцина билан эмлатдингиз – Путин жавоб берди Rossiya Putin yagiliklar

Россия президенти бу йил яна халқи билан "Тўғридан-тўғри мулоқот" қилди.

Ташкилотчилари саралаб берган саволларга жавоб берди.

Мулоқот тўрт соатча давом этди. Жами 68 россияликнинг саволи жавоб топди.

Путинга йўлланган ҳамма саволларнинг сони эса, 2 миллиондан ортиқ бўлгани айтилди.

Россия аҳолиси 146 миллиондан ошади.

Ўтган йил пандемия боис, Путиннинг "Тўғридан-тўғри мулоқот"и бекор қилинган.

Аммо бу йилгиси ҳам мамлакатда ҳиндча штамм боис, коронавирус билан боғлиқ аҳвол кескинлашган бир пайтга тўғри келган.

Илк ярим соат давомида Путин айнан ковид билан боғлиқ саволларга жавоб берган.

Мажбурий вакцинация ҳақидаги фикри ва ўзини қандай вакцина билан эмлатганига оид очиқ қолаётган саволларга ҳам ойдинлик киритгандек бўлган.

Жавобидан маълум бўлишича, Путиннинг шахсан ўзи мажбурий вакцинацияни ёқламайди.

"Аммо қонун губернаторларнинг муайян тоифа учун эмлашни мажбурий қилишга имкон беради".

Худди шу ўринда Совет тажрибасини ёдга олган Россия президенти эпидемияга қарши фақат вакцинация билан курашиш мумкинлигини қайд этиб ўтишни ҳам унутмаган.

Россия президенти "эмлатдим дедимми, демак, эмлатдим", - дея яна бир бор ўзини ҳам коронавирусга қарши эмлатганини ўзи тасдиқлаган.

Путин мулоқот чоғида вакцинацияси билан боғлиқ шу йил март ойидан буён очиқ қолаётган яна бир саволга ойдинлик киритгандек бўлган.

"Бизда Мудофаа вазиридагилар Спутник билан эмланишаяпти. Мен ҳар ҳолда Олий Бош қўмондонман", дея ўзининг ҳам худди шу вакцина билан эмланганига ишора қилган.

Путиннинг 23 март куни ўзини эмлатгани хабар берилган, аммо бунга далолат қилиши мумкин бўлган бирор бир тасвир илова қилинмаган.

Бу эса, орада кечган вақт давомида Россия президенти ростдан ҳам ўзини коронавирусга қарши эмлатганми-йўқми, эмлатган бўлса, айнан қай бир вакцина билан, деган саволларни пайдо қилмай қўймаган.

Кейин Украина ҳақидаги саволга ҳам навбат етган.

Путин Украинанинг амалдаги раҳбарияти "яққол ўзларига дўст" эмаслигини айтган.

Шундан сўнг Россия президентининг мамлакатдаги нарх-наволар, уй-жой, коммунал хизматлари, ижтимоий нафақалар ва иқтисодиёт ҳақидаги саволларга жавоб бергани кўрилган.

Озиқ-овқат маҳсулотларининг қимматлашиб бораётгани сўнгги икки йил ичида аксарият россияликларни ўйлантираётган энг долзарб, шахсан Путиннинг ўзи эътибор қаратган, танқидга тутган муаммолардан бири бўлади.

Мамлакатда нархларнинг кўтарилишини кимдир назорат қиладими? Нима учун Эквадордан келтирилган бананлар Россиянинг ўзидаги мева-сабзавотлардан арзон, деган саволга Путин, "нархлар фақат Россияда эмас, ҳамма жойда ўсиб бораётгани"ни айтиб, жавоб берган.

"Сабаблари кўп экани, давлат бунга баъзан, эҳтимол, яна вақти келиб эътибор бериши"ни айтаркан, "аммо чоралар кўрилаётгани"ни таъкидлаган.

Путин Россиянинг Америка Қўшма Штатлари билан муносабатлари ҳақида саволни ҳам бежавоб қолдирмаган.

Аммо "Тўғридан-тўғри мулоқот" чоғида кўпчиликнинг эътиборини ўзига тортгани Путиннинг сиёсий вориси ким эканию президентликдан кетгач, нима қилиш режасида эканига оид саволлар бўлган.

Кўрилишича, Россия президенти бу саволларнинг барчасига жавоб берган.

Сўз айнан сиёсий вориси ҳақида кетганда, ўзининг масъулияти фақат президентликка даъвогарларга тавсиялар бериш эканини айтган.

"Вақти келиб, ким бунга лойиқ эканини айта олиши"ни таъкидлаган.

Президентликдан кетгач, нима қилмоқчи эканига оид саволга эса, "ишлаб нима қиламан, мазза қилиб печкада ўтираман", - деб жавоб берган.

Россия Конституцияга ўтган йили киритилган сўнгги ўзгартиришлар эса, Путиннинг истаса, 2036 йилгача қудратда қолишига йўл очган.

Ислоҳ этилиб, референдумда расман тасдиқланиши ортидан, Конституциядаги президентлик муддатлари сонини чекловчи бандлар бекор бўлган.

Сўнгги ўзгаришларни назарда тутаркан, айрим таҳлилчилар Россия ички ва ташқи сиёсатда янада агрессив давлатга айланиши мумкинлиги эҳтимоли ҳақида ҳам сўз очишган.

Референдум арафасида эса, Владимир Путин яна бир бор Россия президентлиги учун беллашиш эҳтимолини назардан соқит этмаган.

"Агар, бу Конституцияда ўз ифодасини топса, бу - беллашиш учун бир имконият" эканини айтганди.

Владимир Путин ҳозир шундоқ ҳам Россия тарихидаги энг узоқ қудратда қолаётган, бўлган иккита сиёсатчидан биттаси бўлади.

Расмий Кремлнинг минтақани кўзда тутувчи, таҳлилчилар таъбирида, бугунги Ўзбекистонни ҳам кўз остига олувчи йирик геосиёсий лойиҳаларининг эса, айнан президент Путин бошқарувининг сўнгги йилларида янада кучайиб, жадаллашиб бораётгани кузатилади.

Путиннинг бу каби "империалистик амбициялари" геосиёсий рақибларини ҳушёр торттириб, жиддий хавотирларига сабаб бўлиб келаётган муҳим воқеъликлардан бири экани кўрилади.

Шу йил аввалида АҚШ Давлат котиби, ҳатто, Ўзбекистоннинг мустақиллиги, суверенитети ва жўғрофий яхлитлигини яна бир бор қўллаб-қувватлаш кун тартиби билан мамлакатга сафар қилган.

Бу каби расмий кун тартиби ҳам ўшанда аксарият минтақавий сиёсий экспертларнинг диққат-эътиборларини ўзига тортмай қўймаганди.

Россия дунёнинг энг кўп сондаги Ўзбекистон фуқаролари меҳнат муҳожирлигида банд давлати бўлади.

Йилларки, Ўзбекистон учун энг йирик ташқи меҳнат бозори вазифасини ўтаб келади.

Россия Ўзбекистоннинг стратегик иттифоқчиси, энг йирик ҳарбий-техник ҳамкори бўлади.

Минтақадаги иккита энг катта савдо-иқтисодий шеригидан биттаси саналади.

Алоқадор мавзулар:

Путин яна узоқ ппрезидент бўлмоқчими? Мирзиёев унга омад тилади

Россия: Путин умрбод қолмоқчими? Мирзиёев унга омад тилади Путин яна қанча президент бўлиб қолади?

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek