Пандемия: кўпи кетиб, ози қолди - халқаро дайжест, Rossiya, Navalniy, Putin, O‘zbekiston, dunyo, yangiliklar

ЖССТ пандемия қачон тугашини айтди, АҚШ Россияга қарши янги санкциялар ҳозирламоқда, Путин эса Исроил ва Сурияни қандай яраштиришни ўйлаяпти.

«Аммо йўқ бўлиб кетмайди»

ЖССТ коронавирус пандемияси тугаши муддатини эълон қилди.

Коронавирус пандемияси келгуси йил бошида битади. Жаҳон Cоғликни сақлаш ташкилоти (ЖССТ)нинг Европа бўйича минтақавий бюроси раҳбари Ханс Клюге ушбу тахмин билан чиқиш қилди.

"Энг ёмон сценарий ортда қолди. Биз вирус ҳақида у эндигина тарқалишни бошлаган 2020 йилга нисбатан анча кўпроқ биламиз", — расмийнинг сўзларидан иқтибос келтирди Европа ОАВ лари.

Клюгенинг таъкидлашича, вирус инсоният орасида йўқ бўлиб кетмайди, аммо белгиланган муддатга қадар чекловларга эҳтиёж қолмайди.

Шу билан бирга, бу фақат тахмин эканлигини таъкидлади, чунки ҳеч ким вазиятнинг қандай ривожланишини айта олмайди.

ЖССТ раҳбари Тедрос Адханом Гебрейесус, ўз навбатида, вакциналашни кечиктирмасликка чақирди, чунки мутациялар ва штаммларнинг пайдо бўлиши сабабли мавжуд вакциналар фойдасиз қолиши мумкин.

Дунёда 111 миллиондан зиёд киши коронавирус юқтирган, қарийб 2,5 миллион инсон ҳаётдан кўз юмди.

Энг кўп қурбонлар ва зарарланганлар сони АҚШ, Ҳиндистон ва Бразилияга тўғри келади.

АҚШ янги санкцияларга шай

Оқ уй Россияга қарши янги санкцияларни тайёрламоқда ва келгуси хафталарда эълон қилишни ваъда қилмоқда.

Январь ойи бошида Трамп маъмурияти Кремлга қарши SolarWinds деб номланган кенг кўламли хакерлик ҳужуми ва мухолифатчи сиёсатчи Алексей Навалнийнинг заҳарланиши учун қаттиқ чоралар тўпламини тайёрлади, аммо у сўнгги дақиқада бу ҳужжатни имзолашдан бош тортди.

АҚШнинг янги санкциялари ҳақида яқин хафталардаёқ эълон қилинади, дея маълум қилди Оқ уй матбуот котиби Женифер Псаки сешанба куни журналистлар учун бўлиб ўтган брифингда.

Шу йилнинг январь ойида АҚШ разведка ҳамжамияти вакиллари SolarWinds деб номланган кенг кўламли киберҳужум ортида катта эҳтимол билан Россия ҳукумати турган деган хулосага келишди.

Ҳужум АҚШдаги камида тўққиз федерал агентликни, шу жумладан, мудофаа, савдо, энергетика, ички хавфсизлик ва молия вазирликларини ҳамда 100 дан ортиқ хусусий компанияларни нишонга олди.

Янги санкцияларни эълон қилишнинг яна бир сабаби мухолифатчи Алексей Навалнийни заҳарлашга уриниш ва унга нисбатан чиқарилган суд ҳукми бўлди.

Times: Путин Яқин Шарқда тинчлик ўрнатувчига айланиши мумкинми?

Россия президенти АҚШ учун тузоқ тайёрламоқда, Эроннинг Яқин Шарқдаги иттифоқларини бузишга уринмоқда, деб ёзади Британиянинг Times газетаси муҳаррирлар рукни муаллифи Роджер Бойс.

Қарийб ярим аср давомида Кремль Асад оиласи - аввал Ҳофиз Aсад, сўнгра унинг ўғли Башар билан яқин алоқада бўлган. Бу қон билан муҳрланган муносабатлар ва агар эртага Башар ағдарилса, Владимир Путин унга ёрдам қўлини узатишига ҳеч ким шубҳа қилмайди, деб ҳисоблайди муаллиф.

Бироқ энди фуқаролар уруши ортда қолгандай, Сурия етакчиси ўз позициясини тубдан мустаҳкамлаганида, Владимир Путин Яқин Шарқдаги иштирокини кучайтиришда давом этмоқда.

Буни Россиянинг Суриядаги Хмеймим ҳарбий авиабазаси қанчалик тез кенгайиб бораётгани, шунингдек, яқинда Сурия ва Исроил ўртасида ҳибсга олинганлар алмашинуви, бу ерда Путиннинг воситачи сифатида қатнашганлиги билан кўриш мумкин.

Муаллифнинг фикрича, Путин АҚШнинг минтақадан чиқиб кетиши натижасида юзага келган бўшлиқдан фойдаланиб, Яқин Шарқнинг нуфузли ўйинчиси сифатида ўз ролини кенгайтирмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek