Ўзбекистон: Россиядаги меҳнат муҳожирлари огоҳлантирилди ва Президент Мирзиёев қандай вакцина билан эмланган? – O'zbekiston yangiliklar янгиликлар

Published
Ўқилиш вақти: 3 дақ
  • Президент Мирзиёев тўлиқ эмлангани маълум қилинди;
  • Қашқадарёда ИИБ ходимлари калтаклаши оқибатида фуқаро ҳалок бўлгани иддао этилди;
  • Зоминдаги ўрмон ёнғинлари батамом ўчирилди;
  • Термизда Россия-Ўзбекистон ҳарбийларининг ўқув машғулотларига расман старт берилди;
  • Россиядаги ўзбекистонлик меҳнат муҳожирлари огоҳликка чақирилди;

"Президент эмланган"

Президент Шавкат Мирзиёев мамлакатда мавжуд вакциналардан бири билан тўлиқ эмланган.

Бу ҳақда президент матбуот котиби Шерзод Асадов душанба куни ОАВ вакиллари билан ўтган анъанавий брифинг чоғида маълум қилган.

"Давлатимиз раҳбари масъулиятли фуқаро сифатида вакцинация жараёнига жиддий қараганлар. Демак эмланганлар", маълум қилган Асадов.

Бироқ у президент қайси вакцинани қачон қабул қилганига ойдинлик киритмаган.

"Қайси вакцина билан эмланганликларига келадиган бўлсак, эмланиш вақтида Ўзбекистонда учта вакцина рўйхатдан ўтган эди: ZF-UZ-VAC2001, Спутник V ва AstraZeneca. Мана шу вакциналардан бирининг тўлиқ этапларини олиб бўлганлар", деган президент матбуот котиби.

Ўтган ой давомида президент Мирзиёев мамлакат аҳолисини коронавирус билан боғлиқ жиддий вазиятга бефарқ қарамаслик ва имкон қадар тезроқ эмланишга бир неча бор чақирган эди.

Бироқ шу вақтга қадар президентнинг ўзи вакцина олгани ёки йўқлиги борасида жамоатчиликда юзага келган саволга аниқлик киритилмай келинаётган эди.

Зоминдаги ёнғин ўчирилди

Зомин туманида 1 август куни эрталаб бошланган ўрмон ёнғини батамом ўчирилгани маълум қилинди.

Skip Энг кўп ўқилган and continue reading
Энг кўп ўқилган

End of Энг кўп ўқилган

ФВВ тумандаги "Дуоба" МФЙ "Ўриклисой" аҳоли пункти ҳудудида 80 гектар майдондаги қуруқ ўт ва дарахтлар ёниб кетганини маълум қилган.

Ёнғинни бартараф этишга ФВВ, Мудофаа вазирлиги, ИИВ, Миллий гвардия, Чегара қўшинлари, Давлат ўрмон хўжалиги қўмитасининг 1,500 нафар ходимлари жалб этилган.

Шунингдек, ўндан зиёд ўт ўчириш экипажи, 4 та вертолёт ёнғинга кураш ишларида иштирок этган.

Ёнғин шу куннинг ўзида батамом ўчирилгани, атрофдаги аҳоли пунктларига зарар етмагани, шунингдек, жабрланганлар ва ҳалок бўлганлар йўқлиги хабар қилинган.

ИИБ ходимлари қўлидаги яна бир ўлим?

Қашқадарёнинг Нишон туманида яшовчи 51 яшар фуқаро ИИБ ходимлари томонидан соғлом ҳолда уйидан олиб кетилиб, эртасига уйга ўлик ҳолда қайтарилгани тўғрисида хабар қилинган.

Бош прокуратура ушбу ҳолат юзасидан терговга қадар текширув ишлари бошланганини маълум қилган.

Ойдинлик киритилишича, 25 июль куни чақирув асосида туман ИИБ ҲПБ профилактика инспекторлари томонидан ўз яшаш уйидан маст ҳолда олиб кетилиб, наркология диспансерига ётқизилган эркак 26 июль куни вафот этган.

Daryo.uz нашри билан суҳбатлашган марҳумнинг укаси унинг калтаклаш оқибатида етказилган тан жароҳатлари сабаб вафот этган бўлиши мумкинлигини иддао қилган.

Эркакнинг ўлими ҳолати бўйича вилоят Соғлиқни сақлаш ва Ички ишлар бошқармаларига хизмат текшируви тайинланган.

Бундан аввал Бош прокуратура 10 июль куни Сурхондарёнинг Денов туманида ўхшаш ҳолатда яшаш уйидан маст ҳолда ИИБ ходимлари томонидан олиб кетилган фуқаро профилактика инспектори ёрдамчилари томонидан калтакланиши оқибатида вафот этганини маълум қилган эди.

"Жануб-2021"

2 август куни "Термиз" полигонида "Жануб-2021" Ўзбекистон-Россия қўшма ўқувининг расмий очилиш маросими бўлиб ўтган.

Ўзбекистон Мудофаа вазирлигининг маълум қилишича, ўқув машғулоти 30 июлдан 8 августга қадар давом этади.

Бундан аввал Россия нашрлари россиялик ҳарбий хизматчилар ўзбекистонлик ҳамкасблари билан ҳамкорликда Сурхондарёнинг Афғонистон билан чегара ҳудудида ўқув машғулоти ўтказиш мақсадида йўлга отлангани ҳақида хабар берган эди.

Ушбу хабарларда ўқув машғулоти доирасида қўшма ҳарбий гуруҳлар Марказий Осиё давлатлари худудий яҳлитлигини таъминлаш вазифаларини бажаришлари тўғрисида сўз борган эди.

"Оммавий муштлашувларда қатнашманг!"

Россиядаги ўзбекистонлик меҳнат муҳожирлари оммавий муштлашувларда қатнашмасликдан огоҳликка чақирилди.

Ўзбекистон Ташқи меҳнат миграцияси агентлиги оммавий муштлашувларда қатнашган чет эл фуқаролари Россиядан чиқариб юборилишидан огоҳлантирган.

Агентлик Россия Ички ишлар вазирлиги маълумотларига таяниб, мамлакатдаги меҳнат муҳожирлари ўртасида ёки улар иштирокида низоли вазиятлар сони ошганини хабар қилган.

Ташқи меҳнат миграцияси агентлигининг маълум қилишича, Россияда оммавий муштлашувларда иштирок этгани сабаб ҳибсга олинган хорижлик фуқаролар 15 кунга ҳибсга олинган ва уларнинг мамлакат ҳудудига киришига тақиқ қўйилган.

"Агар ушбу фуқаролар 15 кунлик жазо муддатини ўтагач, мамлакат ҳудудидан мустақил равишда чиқиб кетмаса, улар мажбуран чиқариб юборилади", дейилади агентлик огоҳлантиришида.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek