Британиянинг Ўзбекистондаги собиқ элчиси Крейг Маррей қамалиши мумкин - dunyo yangiliklar

Крейг Маррей Шотландия ҳукумати ва миллий партияси собиқ раҳбарининг суди бўйича юритган блоги сабаб, саккиз ойлик қамоққа ҳукм қилинди. Унга ҳукм юзасидан шикоят аризаси билан чиқиши учун уч ҳафта муҳлат берилди. Крейг Маррей элчилик фаолияти давомида Ўзбекистон ҳукумати ва мамлакатдаги инсон ҳуқуқларига оид вазиятни қаттиқ танқид остига олгани билан танилган.

Алекс Салмонд устидан суд ўтган йилнинг март ойида бўлиб ўтган.

Крейг Маррей суд жараёни ҳақида қатор мақолалар ёзган, уларни интернетга жойлаштирган.

Прокурорлар унинг ёзганлари шикоятчилар кимлигини билдириб қўйиши, бу эса, суд қарорига зид эканидан хавотир билдириб чиқишган.

Иш кўриб чиқилаётган пайтда ҳакам судда иштирок этган аёлларнинг шахси ёки буни очиқлашга олиб келиши мумкин бўлган ҳар қандай маълумотнинг ошкор қилинишини расман тақиқлиб қўйган, буйруқ чиқарган.

Сиртдан ҳукм эълон қилинаркан, леди Дориан Крейг Маррей суднинг аёллар анонимлигини таъминловчи буйруғидан бохабар бўлгани ва улар шахсини очиқлаш эҳтимолидан "завқлангани"ни айтган.

Леди Дорианга кўра, собиқ дипломат атайдан жумбоқли идентификация билан таваккал қилган ва шикоятчилар шахсини очиқлаш "ўта ахлоққа зид бир иш"дир.

У, худди шу ўринда, бу суд ишининг қанчалик шов-шувли бўлгани ва ҳануз ўзига катта эътибор тортиб келаётгани омилини алоҳида урғулаган.

Леди Дорианнинг айтишича, Крейг Маррейнинг қилган ишлари "адолатли судловни қарор топтиришнинг қоқ юрагига берилган зарба бўлган" ва шикоятчиларнинг бўлажак суд ишлари, айниқса, шов-шувлиларига келмасликларининг яққол хавфини пайдо қилган.

Алекс Салмонд аёлларга нисбатан жинсий тегажоқлик айбловлари билан маҳкамага тортилган.

Унга қарши илгари сурилган 13 айбловнинг бирортаси суд жараёнида ўз исботини топмагач, оқланган.

Собиқ дипломат мазкур суд ишининг икки кунини кузатган, кейин бир ой давомида бу ҳақда ўз блогида ёзиб борган.

Маълум бўлишича, унга бу Алекс Салмонднинг устидан шикоят қилган аёлларнинг шахсини очиқлаб қўйиши мумкинлиги айтилган.

Аммо Маррейнинг блогидаги ҳақоратомуз постлар ва твитлари таҳрир қилинмай, шундоқлигича қолган.

Полиция идорасига келиши учун Крейг Маррейга дастлаб 48 соат муҳлат берилган.

Аммо адвокатининг эътирозидан сўнг муҳлат уч ҳафтага узайтирилган, паспортини топшириши лозим бўлса-да, унга ҳукм юзасидан шикоят аризаси билан чиқишига имкон берилган.

Крейг Маррей 2000-йиллар бошларида Буюк Британиянинг Ўзбекистондаги элчиси бўлиб ишлаган.

У 2004 йилда ўз вазифасидан четлатилган.

Крейг Маррей ўзининг элчилик фаолияти давомида Ўзбекистон ҳукумати ва мамлакатдаги инсон ҳуқуқларига оид вазиятни қаттиқ танқид остига олиб келган.

Бу - Британия ва АҚШ ҳукуматларининг уни сиёсатдан четлатиш уринишларига ҳам сабаб бўлганлигини даъво қилган.

Крейг Маррей ўзи мустақил номзод сифатидан беллашган 2005 йилги сайловда ютиб чиққани тақдирда, Ўзбекистондаги инсон ҳуқуқлари билан боғлиқ зўравонликларни парламентга олиб чиқишини ҳам айтган.

Аммо сайловда ўша пайтда Британия Ташқи ишлар вазири бўлган Жек Строуга бироз фарқ билан ютқазиб қўйган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek