Ёҳаннас Дэлл Би-би-си, Лондон

Маррей Ироқ уруши ва қийноқлар ҳақидаги даъволари унга парламентдан жой яратишига ишонганди

Ўтган йил октябрида Британиянинг Ўзбекистондаги элчиси лавозимидан четлатилган Крейг Маррей кеча бўлиб ўтган парламент сайловларида Ташқи Ишлар Вазири Жек Строу билан битта сайлов ҳудудидан номзодини қўйган ва собиқ бошлиғини парламентдан четлатишни ўз олдига мақсад қилиб олганди.

47 ёшли мустақил номзод Крейг Маррей Ўзбекистондаги фаолияти давомида Ўзбекистон ҳукуматини ва мамлакатдаги инсон ҳуқуқларига оид вазиятни қаттиқ танқид остига олиб келган.

Жаноб Маррей, бу -Британия ва АҚШ ҳукуматларининг уни сиёсатдан четлатиш уринишларига ҳам сабаб бўлганлигини айтганди.

Блакберндаги сайлов натижалари эълон қилинган пайтда, тунги соат бирдан ўн беш дақиқа ўтган эди.

Номзодларнинг рўйхати ўқиб эшиттириларкан, Крейг Маррей, ўзининг собиқ раҳбари жорий Ташқи Ишлар вазири Жек Строу билан елкама-елка турганди.

Энг якунида маълум бўлишича, Британиянинг Ўзбекистондаги собиқ элчиси Крейг Маррей, икки минг саксондан ортиқ овозни қўлга киритишга муваффақ бўлади.

Бу унчалик ёмон кўрсаткич бўлмаса ҳам, собиқ раҳбари билан беллашиши учун етарли эмас эди.

Кураш осон кечмаган

Жек Строу жаноблари, озгина фарқ билан ўз ўрнини сақлаб қолишнинг уддасидан чиқади.

Жаноб Маррей эса, ҳаттоки аксил-муҳожирлик кайфиятида бўлган Британия Миллий Партиясидан ҳам ортда қолиб, бешинчи ўринни эгаллайди.

Мен Британия парламентида Ўзбекистон муаммоларини юқорироқ поғонага олиб чиқишга ҳаракат қилардим   Крейг Маррей

Бироқ, Англиянинг шимолий-ғарбидаги Блакберн шаҳарчасида сайлов кампаниясини олиб бориш ҳеч қачон осон иш бўлмаган.

Ўн йилларки, мазкур сайлов ҳудуди лейбористларнинг қўлида бўлиб келган.

Жек Строу бу ерда тер тўкиб ишлайдиган парламент аъзоси сифатида нуфузга эга.

У вазирлик фаолиятидан ортиб, шаҳарга мунтазам равишда келиб турган.

Ҳамда, шаҳар марказида кишилар билан мулоқот олиб борган.

Жаноб Маррей эса, Блакбернга бор-йўғи икки ой бурун келган.

"Мен Ўзбекистондан Блакбернистонга келдим"-деб айтганди Маррей жаноблари британ газеталаридан бири билан суҳбатда.

Ўз компанияси учун қароргоҳларни йўқ ердан ташкил этиб, шошилинчда ёлланган кўнгиллилар билан иш олиб борган.

Шу билан бирга Блакберн аҳолисига жаноб Маррей унча ҳам таниш бўлмаган.

Бироқ, дастурини ёйишда, шаҳар бўйлаб ўзи сотиб олган армиянинг эски ўт учирувчи машинасида айланиб юриб, мамлакат бўйлаб кишиларнинг эътиборини тортишга муваффақ бўлган.

Мағлубиятми ва ё курашнинг бошланиши...

У англатмоқчи бўлган нарса эса оддий эди: яъни, “Жекни ўз вазифасидан бўшат” шиори билан, у кишиларни парламент ва ҳукуматдан ташқарида бўлган ташқи ишлар вазири учун овоз бермасликка чақиради.

Мақсади эса, жаноб Строуни Британиянинг Ироқ урушидаги иштироки учун жазолаш эди.

Маррей ўз кампанияси учун эски ўт ўчирувчи машинани танлаганди

Маррейнинг сайлов олди компаниясида шу жумладан ўзбеклар масаласи ҳам ўрин олганди.

Унинг ҳамон даъво қилишича, Британия ўзбек жосуслик хизматлари етказиб берган жосуслик маълумотларидан фойдаланади.

Жаноб Маррейга кўра, айни маълумотлар қийноқлар йўли билан олинган бўлиши мумкин.

Жек Строу эса, буларнинг барчасини “ҳақиқатдан йироқ”, деб рад этиб келган.

Бироқ, ҳамон бошқа мустақил номзодлар билан солиштирганда, жаноб Маррей қўлга киритган натижалар жуда ҳам ёмон эмас.

Бош Вазир Тони Блейрга қарши ўз номзодини қўйган ва ҳарбий хизматчи бўлган ўғли Ироқда қурбон бўлган бошқа бир мустақил номзод тўрт минг икки юздан ортиқроқ овозни қўлга киритган.

Бошқаларининг натижалари эса, бир неча ўндан ортмаган.

Жаноб Крейг Маррейнинг келаси қадами эса аён: ўз сайлов кампанияси давомида жаноб Маррей, умумий сайловларда ғолиб чиққан тақдирда, Ўзбекистондаги инсон ҳуқуқлари билан боғлиқ зўравонликларни парламентга олиб чиқишини айтганди.

Унинг айтишича, Ўзбекистон халқи ҳануз унинг юрагига яқин. Ҳозир мағлуб бўлган бўлса ҳам, жаноб Маррей, ўзининг ташқи сиёсатга оид ғояларини олдинга суриш учун бошқа йўлларни топишга уриниб кўрса керак.