Янгиланди, Вена: Франция ортидан, Австрияда ҳужум – ҳужум “исломий террорчилар” ишими? - видео, дунё, янгиликлар, O'zbekiston, Fransiya, Turkiya, Islom dini, dunyo, yangiliklar

Вена: Франция ортидан, Австрияда ҳужум - ҳужум "исломий террорчилар" ишими? - Қуролли ҳужумлар ортидан, пойтахт Вена бўйлаб аксилтеррор амалиётлари бошланиб кетган. Қурбонлар бор:

Отишмалар тўрт кишининг умрига зомин бўлган, йигирмадан ортиқ киши яраланган. Улардан етти нафарининг аҳволлари оғир экани айтилмоқда.

Қуролли шахслар кеча, душанба куни кечқурун Вена марказидаги олтита турли сатҳни нишонга олишган.

Австриялик масъуллар ҳодисани "исломий террор" ҳужумига нисбат беришган.

Полиция бир ҳужумчини отиб ўлдирган, камида бир гумондорнинг ортидан тушган.

Австрия Ички ишлар вазири ўлдирилган ҳужумчини "исломий террорчи", деб атаган.

Унинг фақат ёши 20 да экани ва декабр ойида муддатидан илгари қамоқдан озод қилинган шахс бўлгани айтилмоқда.

Маълум қилинишича, бу шахс ўтган йил апрелида урушлар ичидаги Сурияга бориб, ИШИД сафларига қўшилишга урингани учун 22 ойлик қамоқ жазосига ҳукм қилинган.

Аммо ёш маҳкумлар учун кўзда тутилган енгилликлар боис, эрта қамоқдан чиқарилган бўлган.

Тўрт қурбондан икки нафарининг аёл, яна қолган шунчасининг эркак киши экани айтилмоқда.

Улар кекса ёшли аёл ва эркак, бир официант қиз ва эркак йўловчи бўлишган.

Kекса ёшли аёл олган жароҳатларидан ўтган тунда касалхонада вафот этган.

Тўрттовлон ўққа учган пайтларида Вена марказий синагогаси яқинидаги одамлар билан гавжум бар ва ресторaнларда бўлишган.

Аммо ҳужумдан нишон синагога бўлгани ёки йўқлиги маълум эмас.

Австрия Ички ишлар вазири орада матбуот анжумани ҳам берган.

Карл Неҳаммер полиция томонидан ўлдирилган кучли қуролланган шахс ИШИД хайрихоҳларидан бўлганини айтган.

Ички ишлар вазирига кўра, унинг уйи тинтилган ва у ердан видеоматериаллар топилган, мусодара этилган.

Полициянинг твитидан маълум бўлишича, бу шахсда сохта портловчи моддали белбоғ бўлган.

Карл Неҳаммерга кўра, яна камида бир нафар "кучли қуролланган ва хавфли" ҳужумчи очиқда бўлиши мумкин.

Мулозимлардан келтирилаётган иқтибосларда ҳужумчиларнинг сони тўрт нафар экани тахмин этилади.

Ҳужумчиларнинг айнан ким эканликлари ва ҳужумдан мақсадлари аниқ нима бўлгани тафсилотлари ҳозирча маълум эмас.

Ҳужумларга масъулиятни ҳам ҳалича бирор бир гуруҳ ўз зиммасига олиб чиқмаган.

Австрия Ички ишлар вазири одамларни Вена марказидан узоқроқ туриш, уйда ўтиришга ундаган.

Ота-оналарни бугун, сешанба куни болаларини кўчага чиқармасликка чақирган.

Полиция баъзи кўчаларни ўраб олган ва қўшимча мадад кучлари ташланган. Шунингдек, уларга Австрия армияси ҳам ёрдам бераётгани айтилмоқда.

Австрия канцлери буни "жирканч террорчилик ҳужуми", деб атаган.

"Бу ҳужумга бизнинг ҳаёт тарзимиз, демократиямизга бўлган нафрат сабаб бўлган", - деб айтган у.

Австрия канцлерига кўра, ўзлари гувоҳ бўлиб турган бу ҳолат "насронийлар ва мусулмонлар эмас, тамаддун ва варварлик ўртасидаги курашдир".

Ҳужум Австрия ортиб бораётган коронавирус ҳолларини жиловлаш учун бутун мамлакат бўйлаб янги чеклов чораларини жорий этишига саноқли соатлар қолган бир пайтда кузатилган.

Кўпчилик тунги комендантлик соати киришидан аввал кўчада еб-ичиб қолиш истагида бўлган.

Маҳаллий матбуотнинг ёзишича, ҳозир шаҳардаги дўконларнинг 90 фоизи ёпиб қўйилган.

Қатор Европа давлатлари лидерлари, АҚШ президентлигига номзодлар - Трамп ва Байден Венадаги ҳужумларни кескин қоралаб чиқишган.

Жумладан, Британия Бош вазири "даҳшатли ҳужумлардан қаттиқ ларзага тушгани"ни айтган.

Венадан аввал Франция устма-уст ҳужумларнинг нишонига айланган.

Сўнггиси ўтган ҳафта Ниццада юз берган, пичоқ билан қуролланган ҳужумчи уч кишини ўлдирган ва яна бир неча нафарини яралаган.

Ниццадаги ҳужумчининг яқинда Тунисдан Европага келган муҳожир экани айтилганди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek