Коронавирус юқтирган Қорақалпоғистон раҳбари вафот этди - O'zbekiston

Published

Қорақалпоғистон Республикаси Жўқорғи Кенгеси раиси, Ўзбекистон Республикаси Олий Мажлиси Сенати Раисининг ўринбосари Муса Ерниязов 73 ёшида вафот этган.

Бу ҳақда UzA хабар бермоқда.

"Бугун Нукусда таниқли давлат ва жамоат арбоби, Қорақалпоғистон Республикаси Жўқорғи Кенгеси раиси, Ўзбекистон Республикаси Олий Мажлиси Сенати Раисининг ўринбосари Ерниязов Муса Тажетдинович 73 ёшида вафот этди.​", дейилади илк расмий хабарда.

Унда ўлим билан боғлиқ бошқа тафсилот берилмаган.

Аввалроқ Нукусдаги шифохонада даволанаётган арбобнинг вафот этгани ҳақидаги хабар рад этилганди.

Қорақалпоғистон: Манзара қатағон даврларини эслатар эди — журналист орган ходимлари ташрифи ҳақида

25 июль куни бу ҳақдаги хабарни чоп этган Repost нашри кейинроқ хакерлар ҳужумига учраганини айтган.

Хабарни Телеграм каналларига жойлаштирган бир гуруҳ қорақалпоғистонлик журналистлар 25 июль куни ярим тунда ҳуқуқни муҳофаза қилиш органлари томонидан орлиб кетилиб, сўроқ қилинган, уларнинг мобил телефонлари олиб қўйилган.

Skip Энг кўп ўқилган and continue reading
Энг кўп ўқилган

End of Энг кўп ўқилган

Ўзбекистон Бош прокурори ўринбосари Светлана Ортиқова журналистларга муомаласи учун Қорақалпоғистон прокуратураси ходимларига "танбеҳ бергани"ни айтган.

30 июль куни Коронавирусга қарши курашиш штаби Ерниязовнинг аҳволи оғирлиги, у ўпканинг сунъий вентиляцияси аппаратига уланганини маълум қилганди.

Муса Ерниязов 2002 йилдан буён Қорақалпоғистон Республикаси Жўқорғи Кенгесининг раиси - Ўзбекистон Республикаси Олий Мажлиси Сенати раиси ўринбосари лавозимида ишлаб келган.

Қорақалпоғистон раҳбарининг ўлими муносабати билан расмий таъзия эълон қилинганича йўқ.

Муса Ерниязов ҳозиргача Ўзбекистонда коронавирусдан вафот этган энг юқори мартабали мулозимдир. ​​

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek