Россия: Жорий йилда 14 минг ўзбекистонлик Россия паспортини олди

Россия Ички ишлар вазирлиги матбуотга берган маълумотларга кўра, 2019 йилда ўзбекистонликлар Россия паспортини олган хорижликлар бешталигидан ўрин олган.

Бу йил Россия паспортини олганлар сони бир ярим баробарга ошган.

"Известия" рўзномасининг ёзишича, Россия ватандошлигини бу йил энг кўп украиналиклар олишган.

Россия матбуоти: Mигрантлар Москвани клоп - канага тўлдираяпти

Россия: Дума мулозими МДҲ доирасида икки фуқаролик жорий этишни таклиф қилди

Россия ўз паспорти билан империяни тикламоқчими?

Улар асосан, Украина шарқидаги тан олинмаган бўлгинчи ЛНР ва ДНР ҳудудлари яшовчиларидир.

Президент Путин шу йил апрелида ушбу ҳудудлар аҳолисига Россия паспорти олишни осонлаштирувчи фармонни имзолаганди.

Украина Россиянинг ушбу қадамини қоралаган.

Россия паспортини олган хорижликлар рўйхатида 14 минг инсон билан Ўзбекистон бешинчи ўринда.

Қозоғистондан 35 минг, Тожикистондан 30 минг, Арманистондан эса 17 минг инсон Россия фуқаролигини олган.

Бу ўзбекистонликларнинг энг кўп Россия пасполртини олишлари эмас.

Расмий рақамларга қараладиган бўлса, 2017 йилда 23 минг 334 нафар, 2018 йилда эса қарийб 29 минг ўзбекистонликлар Россия фуқаролигини олишган.

Демографик инқироз

Россия статистика қўмитаси берган маълумотларга кўра, Россия паспорти олганлар мамлакат аҳолисининг жорий йилдаги табиий камайишини компенсация қилган.

Жаъми 285 минг нафар хорижликлар фуқароликка қабул қилинган.

Январ-сентябр ойларида вафот этганлар сони туғилганлар сонидан 236,9 минг кишига кўп бўлган.

Россиялик экспертларга кўра, Россия агар шу суръатда паспорт беришни давом эттирса, 2030 йилга келиб, фуқаролик олганлар 3 миллион кишига етади.

Аммо бу кам. Айрим экспертларга кўра, демографик инқирозни ўнглаш учун ушбу рақамни камида йилига 500 мингга етказиш керак.

Ўтган ой Россия Меҳнат вазирлиги Россия фуқаролигини осонлаштирилган тартиб билан олувчи касб эгалари рўйхатини кенгайтиришни таклиф қилган.

Таклиф қабул қилингани тақдирда, яна 135 та касб эгалари, жумладан, қишлоқ хўжалиги муҳандислари, ветеринар, тарбиячи, балиқчи, токар, муҳаррир, математиклар, энтемолог ва турли йўналишлар бўйича врачлар Россия паспортини осонлаштирилган тартибда расмийлаштириш учун ҳужжат тақдим этишлари мумкин.

Икки фуқаролик

Ўтган ой Россия Думасининг МДҲ бўйича қўмита раисининг ўринбосари Константин Затулин Ҳамдўстлик доирасида умумий фуқароликни жорий этиш ҳақидаги таклиф билан чиққан.

Унинг ишонишича, эртами, кечми МДҲ ва Евросиё иқтисодий иттифоқига аъзо давлатлар шундай қарорга келади.

Кремлга яқин Спутник агентлигига кўра, депутат бу ҳақда ЕОИИ доирасидаги ҳамкорликка бағишланган йиғилишда гапирган.

Затулиннинг айтишича, у ушбу ғояни аввал ҳам бир неча марта илгари сурган, аммо танқидларга учраган.

Унинг эътироф этишича, кўпчилик бу ташаббусни миллий суверенитет учун "ўта хавфли" деб тушунади.

"Фикримча, Евросиё иқтисодий иттифоқининг ривожланиш мантиғи барчамизни бу қарорга даъват этади", - дея Затулиндан иқтибос келтирган Спутник агентлиги.

Затулинга кўра, МДҲ ва ЕОИИга аъзо давлатлар ватандошлари миллий паспортларини сақлаб қолган ҳолда умумий паспортга эга бўлишлари мумкин.

Затулин Думадаги бир қатор қонунчилик ташаббуси муаллифи.

Жорий тартибга мувофиқ, МДҲ давлатлари фуқаролари Россия ҳудудида 90 кунгача қолиши мумкин. Муддат тугагач, чегарани кесиб ўтиш талаб қилинади.

МДҲ фуқаролари умумий ҳисобда Федерал миграция хизматида қайддан ўтмасдан, 180 кундан ортиқ бўлмаган муддатда Россия ҳудудида бўлиш ҳуқуқига эга.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek