"Рождество террори": Россия байрам кунида Украина бўйлаб йирик ракета ва дрон ҳужуми уюштирди. Тафсилотлар

Рождество тонгида Россия Украинанинг бир қанча ҳудудларини 70 дан ортиқ ракета ва 100 дан зиёд дрон билан ўққа тутган. Украина расмийлари энергетика инфратузилмаси асосий нишон бўлганини айтмоқда. Оқибатда, мамлакатдаги кўплаб манзиллар қоронғилик ва совуқда қолган.

25 декабрь куни миллионлаб украиналиклар Рождество кунини нишонлашни бошлар экан, Россия уруш бошлангандан бери кузатилган энг йирик ялпи ҳужумлардан бирини амалга оширган.

Украина расмийлари, жумладан, президент Володимир Зеленский мамлакатнинг энергетика сектори асосий нишон бўлгани ҳақида гапирган.

Украина президенти Россия 70 дан ортиқ қанотли ракета ва қўшимчасига 100 дан зиёд дрон билан ҳужум қилгани ҳамда 50 дан кўпроғи уриб туширилганини маълум қилган.

Украина "душманнинг умумий ҳисобда 184 та ҳаво нишони" аниқланганини маълум қилган.

"59 та ракета ва 54 дрон уриб туширилди, 52 дрон эса ўз нишонига етиб бора олмади", дейилади Украина Ҳаво кучлари баёнотида.

Россия Ҳаркив, Киев, Днепропетровск, Полтава, Житомир, Ивано-Франкивск ҳамда Запорижядаги энергетика объектларини нишонга олган.

Ҳужумлар оқибатида инсоний талафотлар ҳам бўлгани маълум, аммо Украина ҳалок бўлганлар сонини ҳозирча очиқламаган.

Зеленский Россия шундоқ ҳам қийин кечаётган қишки об-ҳаво вақтида амалга оширилган бу ҳужум учун Рождество кунини атайин танлаганини таъкидлаб, ушбу амални "ғайриинсоний" дея атаган.

Украина энергетика вазири Герман Глаушченко ҳудудларда электр энергияси таъминотига чекловлар киритишга тўғри келганини билдирган.

Вазир Россияни Украина бўйлаб блекоут юзага келтиришга уринишда айблаган.

Ҳаркив 25 декабрь кунги ҳужум оқибатида энг йирик талафот кўрган ҳудудлардан бирига айланган.

Ҳудудий маъмурият раҳбари Олег Синегубов 500 минг ҳаркивлик электрсиз, яна 520 минг инсон эса иссиқлик таъминоти ва иссиқ сувсиз қолганини хабар қилган.

Пойтахт Кйивда эса одамлар метро станцияларига тушиб, яширинишга мажбур бўлган.

Давлатга қарашли Укренерго мамлакат аҳолисини камида 25 декабрь куни охирига қадар электр таъминотида жиддий узилишлар бўлиши эҳтимолидан огоҳлантирган.

Рождество куни ўртасига бориб, Россия ўзи амалга оширган ҳужумларни изоҳлаган.

Мудофаа вазирлиги тарқатган баёнотда Украина "ҳарбий-саноат комплексини таъминлаб келган энергетика инфратузилмаси узоқ масофага учувчи юқори аниқликдаги қуроллар ва дронлар билан ялпи ўққа тутилган"и ҳақида сўз боради.

"Ҳужумнинг мақсади тўлиқ рўёбга чиқди. Барча объектларга зарба берилди", дейилади расмий баёнотда.

"Рождество террори"

Украина расмийлари рус ракеталари Молдова ва Руминия ҳаво ҳудудини бузиб ўтганини даъво қилган.

НАТОга аъзо бўлмиш Руминия ўз ҳаво ҳудудида Россияга тегишли ракетани пайқамаганини билдирган бўлса, Молдова Украина тарқатган маълумотни тасдиқлаган.

"Мамлакатларимиз Рождествони нишонлаётган бир вақтда, Кремль Украина энергетика инфратузилмасини нишонга олиб ва Молдова ҳаво ҳудудини бузиб ўтиб, вайронагарчиликни танлади. Бу ҳаракатлар халқаро ҳуқуқнинг очиқ-ойдин бузилишидир", дея ёзган Молдова президенти Майя Санду X'даги ўз саҳифасида.

Бу йил бошидан бери Россия Украина энергетика секторига уюштирган 13-ҳужумга айланган.

Украина ташқи ишлар вазири Андрий Сибиҳа 25-кунги ҳужумларни "Рождество террори" дея атаган.

Қаҳратондаги бу ҳужумдан Украина қандай омон чиқади – таҳлил

Уил Вернон

BBC

Бу сафарги Рождество тонги Украинада ниҳоятда совуқ бошланди ва биз аллақачон йирик ҳужумларнинг оқибатларини камайтириш мақсадида ҳукумат томонидан бир нечта ҳудудларда электр таъминоти чекланганлиги ҳақида хабарлар олмоқдамиз.

Электр станцияларига зарбалар Украинада мунтазам ҳодисага айланиб бўлган. Сентябрь ойида Президент Зеленский Россия бомбалари туфайли Украинадаги энергия инфратузилмасининг 80 фоизи вайрон бўлганини айтган эди. Ўшандан бери ўққа тутишлар тўхтамади.

Таъмирлаш бригадалари мамлакатда электр энергиясини тиклаш учун босим ва доимий ўқ ёмғири остида ишламоқда.

Ҳамда Украина ҳужумларга қарши туриш йўлида инновацион ечимларни илгари сурмоқда.

Давлатга қарашли компаниялардан бири ер остида гидроэлектр станция қуришни режалаштираётгани, бу орқали уни ракеталар ва дронлардан ҳимоя қилиш мумкин бўлишини айтмоқда.

Бошқа компаниялар эса ҳаводан ҳимоя қилиниши мумкин бўлган замонавий энергия сақлаш қурилмаларини ишлаб чиқмоқда.

Аммо бу вақт талаб қилади.

Президент Зеленский Украинага шаҳарлари ва энергетика секторини Россия ҳужумларидан ҳимоя қилиш учун 10-12 та қўшимча Patriot ҳаво мудофаа тизимлари зудлик билан кераклигини таъкидлайди.

Ҳозирча, Ғарб давлатлари бу миқдордан анча кам Patriot тизимларини етказиб беришга ваъда қилган.