انڈیا: کورونا وائرس کے متاثرین میں چوتھے نمبر پر
،تصویر کا ذریعہGetty Images
جانز ہاپکنز یونیورسٹی کے اعداد و شمار کے مطابق رواں ہفتے کے آغاز میں انڈیا میں تین روز سے مسلسل کورونا کے 11000 متاثرین سامنے آ رہے ہیں۔
بتایا گیا ہے کہ لاک ڈاؤن میں نرمی کا ایک ہفتہ گزرنے کے بعد ہی کیسز بڑھتے جا رہے ہیں۔
انڈیا میں کل متاثرین کی تعداد تین لاکھ سے زیادہ ہو چکی ہے اور یہ دنیا میں چوتھے نمبر پر ہے۔ دارالحکومت دہلی میں متاثرین میں اضافے پر تشویش بڑھتی جا رہی ہے۔ وہاں کے ہسپتال مریضوں کی بڑی تعداد کے باعث دباؤ میں ہیں۔
لیکن کچھ اچھی خبریں بھی ہیں مقامی میڈیا کا کہنا ہے کہ حال ہی میں انڈیا کی سب سے بڑی کچی آبادی دھراوی میں کورونا کیسز میں کمی آئی ہے۔
این ڈی ٹی وی نے حکام کے حوالے سے بتایا ہے کہ اپریل سے اب تک کچی بستی کے سات لاکھ مریضوں کی سکریننگ کی ہے اور ان کے لیے کلینک قائم کیے ہیں۔
ماہرین کا کہنا ہے کہ ابھی انڈیا میں وبا اپنی اتنہائی سطح سے نہیں گزری۔ ماہرین میں سے کچھ توقع کر رہے ہیں کہ بدترین صورتحال مون سون کے موسم دوران ہو گی جو جولائی اور اگست کے مہینے میں ہے۔
