آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
کورونا وائرس کی وجہ سے دنیا بھر میں اب تک 44 لاکھ سے زیادہ افراد متاثر اور تین لاکھ سے زیادہ ہلاک ہو چکے ہیں جبکہ پاکستان میں کورونا کے کل متاثرین کی تعداد 37,176 ہو گی ہے اور ہلاکتوں کی کل تعداد 803 ہے۔ دوسری جانب جرمنی میں گذشتہ روز 100 سے زیادہ ہلاکتیں ہوئی ہیں اور 900 سے زیادہ نئے متاثرین سامنے آئے ہیں۔
کورونا وائرس کی وبا کے باعث بند کی جانے والی پاکستان اور ایران کی سرحد پر تجارتی راہداریاں کھول دی گئی ہیں۔
مقامی انتظامیہ کے مطابق چاغی میں پاکستان گیٹ اور زیروپوائنٹ سے تجارتی اشیاء کی درآمد شروع کر دی گئی ہے جب مشترکہ بازار کی راہداری پہلے ہی کھول دی گئی تھی۔
پاکستان گیٹ سے ایرانی ٹرالرز اور ایل پی جی گیس ٹینکرز کی آمد شروع ہو گئی ہے۔ زیرو پوائنٹ اور پاکستان گیٹ پر تجارتی سرگرمیاں ڈھائی ماہ سے معطل تھیں۔
پاکستان کے وزیرِ تعلیم شفقت محمود نے قومی اسمبلی کے خصوصی سیشن سے خطاب کرتے ہوئے کہا کہ ہم نے کوشش کی کہ ہم تمام صوبوں کو ساتھ لے کر چلیں اور کوشش کریں کہ ہم اس حوالے سے بہتر رابطہ قائم کر سکیں۔
انھوں کہا کہ وزیراعظم کی جانب سے این سی او سی بنایا گیا جس میں تمام صوبوں کی نمائندگی تھی۔
شفقت محمود کا مزید کہنا تھا کہ ہم نے فوری طور پر تعلیمی ادراے اور شادی ہال بند کیے لیکن کہا گیا کہ ہمارے فیصلے ابہام کا شکار ہیں۔
انھوں نے کہا کہ ہم نے لاک ڈاؤن میں نرمی غریبوں اور مزدوروں کے فائدے کے لیے کی۔
’کیا غریبوں کا خیال رکھنا کنفیوژن ہے؟‘
پاکستان کے وزیرِ منصوبہ بندی اسد عمر نے میڈیا سے گفتگو کرتے ہوئے کہا کہ ملک میں لاک ڈاؤن میں نرمی کے بعد سے لوگ حفاظتی تدابیر پر عمل نہیں کر رہے۔
انھوں نے کہا کہ اگر لوگوں کی جانب سے اسی طرح لاپرواہی جاری رہی تو وزیرِ اعظم اور قومی رابطہ کمیٹی کو مجبوراً بندشیں دوبارہ عائد کرنی پڑیں گی۔
کورونا وائرس کے حوالے سے ملکی صورتحال پر بحث کے لیے قومی اسمبلی کے خصوصی اجلاس میں بات کرتے ہوئے پاکستان تحریکِ انصاف کے رکنِ پارلیمان اور وفاقی وزیر برائے تعلیم شفقت محمود کا کہنا تھا کہ جو لوگ روز ہمیں لاک ڈاؤن لگانے کے حوالے سے بھاشن دیتے ہیں انھوں نے ورچوئل پارلیمان کے حوالے سے دی گئی تجاویز کو رد کیا جس کے باعث اس وقت ہم اس طرح سے سماجی فاصلہ نہیں اختیار کر پا رہے۔
انھوں نے کہا کہ اب تک پارلیمان کی نشست کو صرف حکومت پر تنقید کے لیے استعمال کیا گیا ہے۔
شفقت محمود نے کہا کہ جو لوگ ہم پر تنقید کر رہے ہیں کیا انھوں نے ان دہاڑی دار طبقے اور مزدوروں کی پرواہ کی؟
انھوں نے کہا پاکستان میں شرح اموات وہ نہیں ہے جو دیگر ممالک میں ہے جس کے لیے ہمیں خدا کا شکر ادا کرنا چاہیے۔
سماجی رابطوں کی ویب سائٹ ٹوئٹر کی جانب سے یہ اعلان کرنا کہ ان کے ملازمین ہمیشہ کے لیے گھر سے کام کر سکتے ہیں، کاروباری حلقوں میں کافی زیر بحث ہے۔
کئی لوگ کہہ رہے ہیں کے ٹوئٹر کے بعد ٹیکنالوجی سے منسلک دیگر ادارے بھی ایسے فیصلے کریں گے اور ایک ماہر نے کہا کہ یہ ایک ’عہد ساز‘ فیصلہ ہے۔
نیویارک میں مقیم سٹونی بروکس یونی ورسٹی کے پروفیسر سری سرینواسان نے کہا کہ شاید کچھ لوگ اس بات کو سنجیدگی سے نہ لیں لیکن ہم سیلیکون ویلی سے کافی کچھ سیکھ سکتے ہیں۔
’لوگ سمجھتے ہیں کہ گھر سے کام کرنے کا مطلب ہے کہ کام پر توجہ نہ دینا اور جسمانی طور پر دفتر میں موجودگی ضروری ہے لیکن ان حالات میں آپ دیکھ سکتے ہیں کہ لوگ یہ ثابت کر رہے ہیں کہ وہ گھر سے بھی کام کرتے ہوئے اپنے ذمہ داریاں پوری طرح نبھا سکتے ہیں۔ مجھے تو بہت لوگوں نے بتایا ہے کہ وہ گھر سے کام کرتے ہوئے زیادہ تھک جاتے ہیں۔
کورونا وائرس کے حوالے سے ملکی صورتحال پر بحث کے لیے قومی اسمبلی کے خصوصی اجلاس میں بحث کا آغاز کرتے ہوئے جمیعت علمائے اسلام ف کی رکن پارلیمان شاہدہ اختر علی کا کہنا تھا کہ دنیا بھر میں ایوانوں میں پالیسیاں بنائی جا رہی ہیں جن کا اثر عوام تک پہنچ رہا ہے لیکن اگر ہم اس پارلیمان کی اس نشست کے بعد ہم کسی نتیجے پر نہیں پہنچتے تو یہ ہماری بدقسمتی ہو گی۔
انھوں نے کہا کہ اگر حکومت کی جانب سے سنجیدگی نہیں دکھائی جائے گی تو ہمیں لوگ بھی سنجیدہ نہیں ہوں گے۔
نیوزی لینڈ نے کورونا وائرس پر بڑی حد تک قابو پانے کے بعد ملک میں لگائے گئے لاک ڈاؤن میں نرمی شروع کر دی ہے اور اب حکومت نے جنازوں میں زیادہ سے زیادہ 50 افراد کو شرکت کرنے کی اجازت دے دی ہے، جو کہ پہلے صرف 10 افراد تک تھی۔
حزب اختلاف کے رہنما سائمن برجز نے اس پابندی کو ’غیر انسانی‘ قرار دیا تھا۔
ملک میں الرٹ لیول اب کم کر کے درجہ دو پر آگیا ہے جس کے تحت دکانیں، ریستوران، سنیما گھر اور دیگر عوامی مقامات کو کھولنے کی اجازت دے دی گئی ہے۔
ان قواعد کے تحت اجتماعات میں زیادہ سے زیادہ 100 افراد کی موجودگی ہو سکتی ہے۔
دنیا بھر میں مختلف ممالک میں کہیں لاک ڈاؤن میں نرمی کی جا رہی ہے تو کہیں پابندیاں ہٹانے کے لیے احتجاج کیے جا رہے ہیں۔
آسٹریلیا میں حکومت کی جانب سے خاصی نرمی کی گئی ہے جس کے بعد ٹرینوں کی بحالی کے علاوہ پارکس اور مختلف ساحل بھی کھولے گئے ہیں۔
امریکی ریاسس شمالی کیرولائنا میں سینکڑوں افراد نے ریاست کو کھولنے سے متعلق احتجاج کیا تاکہ گورنر پر دباؤ ڈالا جا سکے کہ وہ ریاست میں کاروباری سرگرمیاں مکمل طور پر بحال کر دیں۔
برطانیہ میں بھی لاک ڈاؤن میں مرحلہ وار نرمی کے بعد اکثر افراد نے پارکس کا رخ کیا اور سائیکلنگ کرتے بھی دکھائی دیے۔
آسٹریلیا میں لوگ مچھلیاں پکڑنے میں بھی مصروف رہے۔
خیال رہے کہ ماہرین کی جانب سے خبردار کیا گیا ہے کہ لاک ڈاؤن میں قبل از وقت نرمی وائرس کے پھیلاؤ کا باعث بن سکتی ہے۔
صدر پاکستان ڈاکٹر عارف علوی نے میڈیکل یونیورسٹیز سے کہا ہے کہ وہ تحقیق کے عالمی معیارات کو پیش نظر رکھتے ہوئے صحت کے شعبے کو درپیش چیلنجز بالخصوص کورونا وائرس جیسی بیماریوں کی تحقیق پر خصوصی توجہ دیں۔
ریڈیو پاکستان کے مطابق انھوں نے یہ بات اسلام آباد میں کورونا وائرس کے بارے میں میڈیکل یونیورسٹیز کے وائس چانسلرز کے اجلاس کی صدارت کرتے ہوئے کہی۔
جامعات کے سربراہوں نے اجلاس کو کورونا کی وبا کے تناظر میں اپنے متعلقہ طبی اداروں کی طرف سے حفظان صحت کے لیے کیے گئے اقدامات سے آگاہ کیا۔
اجلاس کو بتایا گیا کہ یونیورسٹیز نے تعلیم کی آن لائن فراہمی اوردیگر تعلیمی سرگرمیاں جاری رکھنے کے لیے انفارمیشن ٹیکنالوجی پر مبنی نظام قائم کیا ہے۔
تھائی لینڈ میں حکام نے خبر دی ہے کہ گذشتہ 24 گھنٹوں کے دوران ملک میں کسی بھی جگہ سے کووڈ 19 کے مریض کی شناخت نہیں ہویی ہے اور نو مارچ کے بعد یہ پہلا موقع ہے کہ نئے کیسز کی تعداد صفر ہو۔
ملک بھر میں اب تک کل 3017 کیسز سامنے آئے ہیں جسے میں سے 56 افراد کی موت ہو چکی ہے جبکہ سوائے 163 افراد کے باقی تمام صحتیاب ہو چکے ہیں۔
پانی و بجلی کے وزیرعمرایوب خان نے کہا ہے کہ پاکستان تحریک انصاف کی حکومت صنعتی اور تعمیراتی شعبے کوکھولنے کے لئے بھرپور کوششیں کر رہی ہے جس کا مقصد کورونا وائرس کے باعث منجمد ہونے والی معیشت کو فعال بنانا ہے۔
ریڈیو پاکستان کے مطابق ایک نجی نیوز چینل سے گفتگو کرتے ہوئے انھوں نے کہا کہ حکومت مزدوروں اورمحنت کشوں کے حالات کے پیش نظرغریب لوگوں کوریلیف فراہم کرنے کے لیے اقدامات کر رہی ہے۔
بجلی کے شعبے میں مسائل سے متعلق ایک سوال کے جواب میں وفاقی وزیر نے کہا کہ خیبرپختونخوا میں مقیم کچھ لوگ بجلی کے واجب الادا بل ادا نہیں کر رہے جبکہ ہمیں وہاں لائن لاسز کے مسائل کا بھی سامنا ہے۔
آسٹریلیا اور چین کے درمیان تعلقات میں کشیدگی کا سلسلہ ابھی بھی جاری ہے اور اس بار یہ اختلافات گائے کے گوشت پر ہیں۔
سلسلہ کچھ یوں ہے کہ گذشتہ ماہ آسٹریلیا نے امریکہ کا موقف اختیار کرتے ہوئے مطالبہ کیا کہ کورونا وائرس کے آغاز اور پھیلاؤ میں چین کے کردار پر عالمی طور پر تحقیقات کی جائیں۔
اس پر چین کی جانب سے سخت رد عمل دیکھنے میں آیا اور آسٹریلیا میں چینی سفیر نے کہا کہ یہ ممکن ہے کہ چینی عوام آسٹریلین مصنوعات کا بائیکاٹ کر دیں۔
واضح رہے کہ چین آسٹریلیا کا سب سے بڑا تجارتی ساتھی ہے اور اس کی ایک تہائی سے زیادہ مصنوعات کی فروخت چین کو ہوتی ہے۔
اس تناظر میں چینی سفیر کا بیان آسٹریلیا میں ایک دھمکی کے طور پر لیا گیا۔
اور اس کے بعد گذشتہ روز چین نے عارضی طور پر آسٹریلیا سے گائے کا گوشت برآمد کرنے پر عارضی پابندی لاگو کر دی اور اس کی وجہ دی کہ گوشت پر لیبل غلط لگا ہوا تھا۔
دونوں ممالک کی جانب سے کہا گیا ہے کہ یہ فیصلہ سیاسی نہیں ہے لیکن ماہرین کا کہنا ہے کہ ایسے معاملات صرف اس وقت سر اٹھاتے ہیں جب سفارتی طور پر کوئی کشیدگی چل رہی ہوتی ہے۔
برطانیہ کے شہر بریڈ فورڈ کی ایشیائی برادری میں کچھ افراد ایسی جعلی خبریں اور افواہیں پھیلا رہے ہیں کہ غیر سفید فام مریضوں کو ہسپتال میں مرنے کے لیے چھوڑ دیا جائے گا۔
بریڈ فورڈ رائل انفرمری کے ڈاکٹر جان رائٹ نے اینستھیزیا دینے والی ایک ایشیائی نژاد ڈاکٹر سے یہ جاننے کی کوشش کی کہ انھیں کس وجہ سے گالم گلوچ سے بھرپور پیغامات موصول ہو رہے ہیں۔
انڈیا کی مغربی ریاست مہاراشٹر نے کل 35 ہزار قیدیوں میں سے 17 ہزار کو چھوڑنے کا فیصلہ کیا ہے تاکہ جیلوں میں کووڈ 19 کے پھیلاؤ کو روکا جا سکے۔
منگل کے روز ریاست کے وزیرِ داخلہ انل دیشمکھ کا کہنا تھا کہ ریاستی دارالحکومت ممبئی میں واقع آرتھر روڈ جیل میں اب تک 180 متاثرین سامنے آ چکے ہیں۔
ان کا مزید کہنا تھا کہ ’یہ اقدام اس لیے کیا گیا ہے تاکہ ریاست کی تمام جیلوں میں سماجی فاصلے کو یقینی بنایا جا سکے اور کووڈ 19 کے پھیلاؤ کو روکا جا سکے۔
ان کا مزید کہنا تھا کہ ان قیدیوں کو عارضی طور پر ضمانت پر رہا کیا جا رہا ہے اور ایسے تمام قیدی جو بڑے جرائم جیسے قتل، ریپ یا فراڈ کے جرائم میں قید ہیں وہ جیلوں میں ہی رہیں گے۔
انڈیا میں اب تک 70 ہزار سے زائد افراد کورونا وائرس سے متاثر ہوئے ہیں جبکہ 2293 اموات بھی ہوئی ہیں۔ مہاراشٹر ملک میں سب سے زیادہ متاثرہ ریاستوں میں سے ایک ہے اور یہاں 24 ہزار سے زائد متاثرین سامنے آ چکے ہیں۔
کوتکووسکی ان ہزاروں اسرائیلیوں میں سے ایک ہیں جنھیں اسی طرح کے پیغامات کے ذریعے ہوشیار کیا گیا تھا۔
کورونا وائرس پر قابو پانے کی لڑائی میں اسرائیل کی داخلہ سکیورٹی ایجنسی شن بیٹ کو لوگوں کی نقل و حرکت پر نظر رکھنے کے لیے اپنے خفیہ نظام کے استعمال کا اختیار دیا گیا ہے۔
جنوبی کوریا کے دارالحکومت سیئول کے علاقے اتائیون میں کورونا وائرس سے متاثرہ افراد کے کلسٹر کی شناخت ہوئی ہے جس کے بعد وہاں کل متاثرین کی تعداد 119 ہو گئی ہے۔
سیئول کا یہ ضلع نائٹ لائف کے لیے مشہور ہے۔
اس علاقے میں کورونا وائرس کی وبا کی شناخت اس وقت ہوئی جب حکومت نے سماجی فاصلوں کے سخت قوانین میں کچھ نرمی کی اور اس سے یہ ظاہر ہوتا ہے کہ معمول کی زندگی میں واپس آنے کے بعد وائرس کے دوبارہ پھیلنے کا خدشہ کتنا زیادہ ہے۔
واضح رہے کہ اس وبا سے نمٹنے والے ممالک میں جنوبی کوریا کے کارکردگی شاندار رہی ہے اور انھوں نے اس کے آغاز کے ساتھ ہی ملک میں بڑے پیمانے پر ٹیسٹنگ اور ٹریسنگ کا استعمال کرتے ہوئے ملک میں یومیہ کیسز کی تعداد کو بہت کی کم کر دیا تھا اور اس کے لیے انھیں ملک بھر میں لاک ڈاؤن بھی نافذ نہیں کرنا پڑا تھا۔
البتہ اتائیون میں کورونا سے متاثرہ افراد کی شناخت کرنا دشوار ہے کیونکہ کلبز جانے والے کئی افراد نے اپنے نام غلط بتائے۔
مجموعی طور پر جنوبی کوریا میں کل 11000 متاثرین کی شناخت ہوئی ہے جس میں سے 259 افراد کی موت ہوئی اور تقریباً ہزار کے علاوہ دیگر تمام افراد صحتیاب ہو چکے ہیں۔
پوری دُنیا میں کورونا وائرس کے پھیلاؤ کو روکنے کے لیے کئی ہفتوں سے جاری لاک ڈاؤن نے زندگی کو مشکل بنا دیا ہے، لیکن انڈیا کے زیرانتظام کشمیر میں یہ مشکلات مختلف اور زیادہ سنگین کیوں ہیں۔
جانیے سرینگر سے ہمارے نامہ نگار ریاض مسرور سے۔