وفاقی وزارت صحت کے مطابق اس وقت پاکستان کے ہسپتالوں میں زیر علاج کورونا مریضوں میں سے صرف 92 مریض وینٹیلیٹرز پر ہیں جبکہ 196 مریض ایسے ہیں جن کی حالت تشویشناک ہے مگر وہ وینٹیلیٹر پر نہیں ہیں۔
وفاقی وزارت صحت کے مطابق اس وقت پاکستان میں کورونا کے 6230 مریض مختلف ہسپتالوں میں زیر علاج ہیں جن میں سے 5940 مریضوں کی حالت تسلی بخش ہے۔
اپنے اپنے گھروں یا دیگر قرنطینہ مراکز میں موجود متاثرین کی تعداد 15832 ہے جبکہ دس مئی کی رات تک 8212 مریض صحت یاب ہوئے ہیں۔
وزارت صحت کے مطابق پورے ملک میں 735 ہسپتال ایسے ہیں جہاں پر کورونا کے مریضوں کو علاج معالجے کی سہولت فراہم کی جا رہی ہے۔ ان ہپستالوں میں قائم آئسولیشن وارڈز میں 21060 بستروں کی گنجائش ہے اور 1358 وینٹیلیٹرز دستیاب ہیں۔
پنجاب میں 207 ہسپتالوں میں 7753 بستروں کی گنجائش ہے جبکہ 378 وینٹیلیٹرز دستیاب ہیں۔
اس وقت پنجاب کے ہسپتالوں میں 4269 مریض زیر علاج ہیں جن میں سے 4218 کی حالت تسلی بخش ہے۔ 27 مریض ایسے ہیں جو وینٹیلیٹر پر تو نہیں ہیں مگر ان کی حالت نازک ہے جبکہ 24 مریض وینٹیلیڑ پر ہیں۔
سندھ میں 169 ہپسپتالوں میں 4688 بستروں کی گنجائش ہے اور 197 وینٹیلٹرز دستیاب ہیں۔
1237
مریض ہسپتالوں میں زیر علاج ہیں۔ 1138 مریضوں کی حالت تسلی بخش ہے جبکہ 73 کی حالت نازک ہے مگر وہ وینٹیلیٹر پر نہیں ہیں۔
26 مریض وینٹیلیٹر پر ہیں جبکہ باقی کے مریضوں کو ہسپتالوں میں داخل کرنے کی ضرورت محسوس نہیں کی گئی ہے اور وہ مختلف جگہوں پر قرنطینہ میں ہیں۔
خیبرپختونخواہ کے 200 ہپستالوں میں 5598 بستروں کی گنجائش ہے اور 581 وینٹیلیٹرز دستیاب ہے۔ا
س وقت641 مریض ہسپتالوں میں زیر علاج ہیں جن میں سے 517 کی حالت تسلی بخش ہے اور 89 مریض ایسے ہیں جن کی حالت نازک ہے مگر وہ وینٹیلٹر پر نہیں ہیں۔
اس وقت صوبے میں 35 مریض وینٹیلیٹر پر ہیں جبکہ باقی مریض گھروں اور دیگر مقامات پر قرنطینہ میں ہیں۔
بلوچستان میں 96 ہسپتال ہیں اور 2136 بستروں کی گنجائش ہے۔ 61 وینٹیلٹرز دستیاب ہیں۔ 28 مریض ہسپتالوں میں داخل ہیں اور تین وینٹیلیٹر پر ہیں، 25 کی حالت تسلی بخش ہے۔
گلگت بلستان میں 26 ہسپتالوں میں 151 بستروں کی گنجائش ہے اور 12 وینٹیلٹرز دستیاب ہیں۔ پانچ مریض اس وقت ہسپتالوں میں داخل ہیں کوئی بھی مریض وینٹیلٹر پر نہیں ہے۔ باقی مریض گھروں یا کسی اور مقام پر قرنطینہ میں ہیں۔
اسلام آباد کے 21 ہسپتالوں میں کورونا مریضوں کے لیے 430 بستروں کی گنجائش ہے۔ 90 وینٹیلٹرز دستیاب ہیں۔ ہسپتالوں میں داخل مریضوں کی تعداد 28 ہے۔ چار مریض اس وقت وینٹیلٹر پر ہیں۔
پاکستان کے زیر انتظام کشمیر
پاکستان کے زیر انتظام کشمیر میں 16 ہسپتال ہیں جبکہ ان پر 304 بستروں کی گنجائش ہے اور 39 وینٹیلٹرز دستیاب ہیں۔ وہاں 22 مریض زیر علاج ہیں اور صرف ایک مریض وینٹیلٹر پر ہے۔