انڈیا: وزیر اعظم مودی کی جانب سے 20 لاکھ کروڑ روپے کے معاشی پیکج کا اعلان

لائیو کوریج

1. 12 مئ 2020روس کے ہسپتال میں آتشزدگی، کورونا کے پانچ مریض ہلاک

   روس کے شہر سینٹ پیٹرزبرگ کے ایک ہسپتال کے انتہائی نگہداشت کے وارڈ (آئی سی یو) میں آتشزدگی سے کورونا وائرس کے پانچ مریض ہلاک ہوگئے ہیں۔

   روسی خبر رساں اداروں کے مطابق یہ آگ وینٹی لیٹر میں شارٹ سرکٹ کی وجہ سے لگی۔

   اطلاعات کے مطابق وینٹی لیٹرز کی کمی کے علاوہ موجودہ مشینوں کی حالت نامناسب ہے۔

   ابتدائی معلومات اور مقامی ذرائع ابلاغ کے مطابق ’ایک مشین پر اس کی صلاحیت سے زیادہ بوجھ پڑنے کی وجہ سے آگ بھڑک اٹھی۔‘

   ان اطلاعات میں ہسپتال کے ایمرجنسی ڈیپارٹمنٹ کے ایک اہلکار سے بیان لیا گیا تھا۔

   مرنے والے تمام مریض وینٹی لیٹرز کی مدد سے سانس لے رہے تھے۔

   حکام کے مطابق اس آگ پر اب قابو پا لیا گیا ہے اور ہسپتال سے 150 افراد کو نکال لیا گیا ہے۔

   تاحال یہ واضح نہیں کہ کتنے افراد زخمی ہوئے ہیں۔

   اس واقعے میں ملوث افراد کے خلاف مجرمانہ تفتیش کا آغاز بھی کر دیا گیا ہے۔

2. 12 مئ 2020ایران میں امام بارگاہیں عارضی طور پر کھول دی گئیں

   ایران میں حکومت نے لاک ڈاؤن میں نرمی اور کورونا وائرس کی روک تھام کے لیے کیے گئے اقدامات محدود کرنے کا فیصلہ کیا ہے۔

   اس کے تحت منگل سے امام بارگاہیں عارضی طور پر کھول دی گئی ہیں۔

   ماہِ رمضان میں مخصوص عبادات کے لیے تین راتوں کے دوران امام بارگاہیں کھلی رہیں گی۔ لیکن یہاں حفاظتی ہدایات پر عمل کرنا لازم ہوگا۔

   خبر رساں ادارے فارس کے مطابق یہ واضح نہیں کہ آیا امام بارگاہیں اس دوران کھلی رہیں گی۔

   پیر کو ایران کے رہبر اعلیٰ آیت اللہ خامنہ ای نے حکام سے کہا کہ رمضان میں لوگوں کی عبادت کی ضرورت پر غور کریں۔

   گذشتہ ہفتے کے دوران کم متاثرہ علاقوں میں امام بارگاہیں کھول دی گئی تھیں۔ لیکن اکثر علاقوں میں دو ماہ تک عبادت گاہیں بند رکھی گئی ہیں۔

   ملک میں 109,286 افراد میں کورونا کی تشخیص ہوئی ہے جبکہ 6685 اموات پیش آئی ہیں۔

3. 12 مئ 2020وزیر اعلیٰ بلوچستان کا سمارٹ لاک ڈاؤن کی خلاف ورزی پر گہری تشویش کا اظہار, محمد کاظم، بی بی سی اردو، کوئٹہ

   وزیراعلیٰ بلوچستان جام کمال خان نے سمارٹ لاک ڈاؤن کی خلاف ورزی اور عوام اور دکانداروں کی جانب سے احتیاطی تدابیر پر عملدرآمد نہ کرنے پر گہری تشویش کا اظہار کیا ہے۔

   اپنے ایک بیان میں وزیراعلیٰ نے کہا کہ کاروباری طبقے اور عوام نے اگر طے شدہ قواعد پر عملدرآمد نہ کیا تو حکومت کو مجبوری کے طور پر لاک ڈاؤن کر کے بہت سی چیزوں کو بند کرنا پڑے گا۔

   وزیر اعلیٰ کا کہنا تھا کہ دکاندار اور دیگر لوگ حکومت سے تعاون کرتے ہوئے رش ختم کریں۔

   انھوں نے کہا کہ مساجد میں احتیاطی تدابیر پر بہتر طور پر عملدرآمد کیا جا رہا ہے۔ ان کا کہنا تھا کہ ایس او پیز پر عملدرآمد کے لیے علما کرام کے شکر گزار ہیں۔

   واضح رہے کہ کوئٹہ شہر میں کورونا کے مقامی منتقلی کے کیسز میں تیزی کے ساتھ اضافہ ہورہا ہے اور اب تک 92 فیصد کیسز مقامی منتقلی کے ہیں۔

   چار روز قبل جب بلوچستان حکومت نے لاک ڈاﺅن کو ختم کرکے اسے اسمارٹ لاک ڈاﺅن میں تبدیل کیا تو اس کے ساتھ تاجروں پر بہت ساری پابندیاں عائد کی گئی تھیں لیکن ان پابندیوں پر بہت زیادہ عملدرآمد نہیں ہورہا ہے ۔

   اس صورتحال کے پیش نظر کورونا سے متعلق بلوچستان کمانڈ اینڈ آپریشن سینٹر نے لوگوں سے کہا گیا ہے کہ مارکیٹ جاتے ہوئے ایک دوسرے سے سماجی فاصلہ فاصلے پر رہیں اور ہر چیز کو چھونے سے گریز کریں ۔

   گھروں میں رہنے والے بزرگوں اور والدین سے بھی اپیل کی گئی ہے کہ وہ اپنے اپنے گھروں سے شاپنگ کے لیے جانے والی خواتین اور نوجوانوں کو ایس او پیز واحتیاطی تدابیر اختیار کرنے کا پابند کریں کیونکہ شہر میں دیکھا گیا ہے کہ لوگ مجمعے کی صورت میں جمع ہوتے ہیں اور اسی طرح دکانوں میں داخل ہوتے ہیں۔

4. 12 مئ 2020ڈیموکریٹس اپنے صدارتی امیدوار کے لیے الیکٹرونک ووٹنگ کر سکتے ہیں

   ڈیموکریٹک پارٹی کے ایک ترجمان کے مطابق کووڈ 19 کی وبا کی وجہ سے ان کی جماعت منگل کو الیکٹرونک ووٹنگ کے عمل کی منظوری سے جو بائڈن کو رواں سال امریکی صدارتی امیدوار کے طور پر نامزد کر سکتی ہے۔

   سابق صدر بائڈن ڈیموکریٹک پارٹی کے واحد صدارتی امیدوار ہوں گے اور ان کا مقابلہ موجودہ امریکی صدر اور رپبلیکن پارٹی کے امیدوار ڈونلڈ ٹرمپ سے ہوگا۔ صدارتی انتخابات کی ووٹنگ 3 نومبر کو ہوگی۔

   ڈیموکریٹک پارٹی کے برنی سینڈرز نے بھی جو بائڈن کی حمایت میں اپنی مہم ختم کر دی تھی۔ انھوں نے کہا تھا کہ وقت آگیا ہے کہ صدر ٹرمپ کو ہرانے کے لیے سب اکٹھے ہوجائیں۔

   جماعت کی ایک باقاعدہ تقریب میں جو بائڈن کو صدارتی امیدوار کے طور پر نامزد کیا جائے گا۔ یہ کنونشن 17 اگست کو ہوگا اور اسے جولائی کے وسط کی تاریخ سے ملتوی کردیا گیا تھا۔

   رپبلیکن پارٹی کا کنونشن 24 سے 27 اگست کو ہوگا اور اس کی تاریخ میں کوئی تبدیلی تاحال نہیں کی گئی۔

5. 12 مئ 2020برطانیہ کی تازہ صورتحال

   برطانیہ میں اس وقت کورونا کے متاثرین کی مجموعی تعداد 224,332 ہے جبکہ 32,141 اموات پیش آئی ہیں۔ اموات کے لحاظ سے یہ امریکہ کے بعد دوسرے نمبر پر سب سے زیادہ متاثرہ ملک ہے۔

   پیر کو انگلینڈ میں لوگوں کو لاک ڈاؤن میں نرمی کے بارے میں مزید معلومات سے آگاہ کیا گیا تھا۔

   حکومت نے کہا ہے کہ ایسے لوگ جو گھر سے کام نہیں کر سکتے وہ بدھ سے دفاتر آنا شروع کر دیں لیکن پبلک ٹرانسپورٹ میں سفر کے دوران دوسروں سے رابطے سے گریز کریں۔

   انگلینڈ میں گھر سے باہر کچھ سرگرمیوں کی اجازت دے دی گئی ہے۔

   لوگوں سے مطالبہ کیا گیا ہے کہ وہ بند جگہوں پر ماسک پہنیں اور ایسی جگہوں پر بھی جہاں سماجی فاصلہ ممکن نہیں۔

   حکومت نے ایسے لوگوں کے لیے قرنطینہ متعارف کرانے کا فیصلہ کیا ہے جو حال ہی میں بیرون ملک سے لوٹے ہیں۔ لیکن اس حوالے سے کوئی تاریخ نہیں دی گئی ہے۔

   سکاٹ لینڈ، ویلز اور شمالی آئیر لینڈ کی حکومتوں نے اپنے لوگوں کے لیے الگ ہدایات جاری کی ہیں جو کہ انگلینڈ کی ہدایات سے زیادہ سخت ہیں۔

   برطانوی وزیر خزانہ رشی سُونک کی جانب سے نوکریوں سے متعلق ایک سکیم کا اعلان متوقع ہے۔

6. 12 مئ 2020جاپان کی بیس بال لیگ کا جون سے آغاز متوقع

   جاپان کی بیس بال لیگ کے منتظمین نے اعلان کیا ہے کہ کورونا وائرس کی وجہ سے مارچ میں ملتوی ہونے والی لیگ اب جون میں دوبارہ شروع ہوگی۔

   نپون پروفیشنل بیس بال نے ایک اعلامیہ میں کہا ہے کہ لیگ میں شامل تمام 12 ٹیموں نے اس بات پر اتفاق کیا ہے کہ جون سے لیگ دوبارہ شروع ہوگی اور اس کے لیے وہ اپنی تمام تر تیاریاں کریں گے تاکہ وائرس کے پھیلاؤ سے بچا جا سکے۔

   بیس بال کا کھیل جاپان میں انتہائی مقبول ہے اور حتی ہے کہ بچوں کے لیے کھیلے جانے والی یوتھ لیگ بھی ٹی وی پر دکھائی جاتی ہے۔

   دوسری جانب دنیا بھر کی فٹبال لیگز بھی کورونا سے متاثر ہوئی تھیں لیکن جرمنی اب دنیا کا پہلہ ملک بننے جا رہا ہے جو اس لیگ کو دوبارہ شروع کرے گا اور 16 مئی سے مقابلے کھیلے جائیں گے۔

7. 12 مئ 2020لاک ڈاؤن میں 20 ہزار کلو سبزیاں مفت تقسیم کرنے والی خاتون

8. 12 مئ 2020اوکاڑہ کے نوجوان نے کیسے اپنے گاؤں میں سینیٹائزر عام کیے

9. 12 مئ 2020سماجی دوری: کورونا سے بچاؤ کے لیے پانچ اہم باتیں

   اگر آپ کو شبہ ہے کہ آپ کورونا وائرس کا شکار ہیں، یا آپ کسی ایسے شخص سے رابطے میں رہے ہیں جسے کورونا وائرس ہو چکا ہے، یا کسی ایسی جگہ ہو کر آئے ہیں جہاں اس وائرس کے بہت سارے کیسز موجود ہیں، تو خود کو سب سے الگ تھلگ کر لیں۔

   لیکن اس خود ساختہ تنہائی کا مطلب کیا ہے اور اس کا درست طریقہ کیا ہے؟ خود ساختہ تنہائی کے بارے میں یاد رکھنے والی پانچ اہم باتیں جانیے ہماری ساتھی ثمرہ فاطمہ کی اس ڈیجیٹل ویٹیو میں

10. 12 مئ 2020’لوگ کہتے ہیں ہم مریض مارنے کے پیسے لیتے ہیں‘

11. 12 مئ 2020کورونا وائرس سے سب سے زیادہ متاثرہ افراد کن ممالک میں ہیں؟

    جانز ہاپکنز یونیورسٹی کے اعداد و شمار کے مطابق کورونا کے سب سے زیادہ متاثرین مندرجہ ذیل ممالک میں موجود ہیں:

    امریکہ 1,347,916

    سپین 227,436

    برطانیہ 224,332

    روس 221,344

    اٹلی 219,814

    فرانس 177,547

    جرمنی 172,576

    برازیل 169,594

    ترکی 139,771

    ایران 109,286

    چین 84,011

    کینیڈا 71,264

12. 12 مئ 2020پاکستان میں کورونا وائرس سے کل اموات 706، ہلاک ہونے والوں میں سے 75 فیصد مرد

    تازہ ترین سرکاری اعداد و شمار کے مطابق پاکستان میں کووڈ 19 سے اب تک 706 اموات ہو چکی ہیں۔

    ہلاک ہونے والوں میں سے اکثریت کی تعداد یعنی تقریباً پچاس فیصد افراد کی عمر 60 سے 79 برس کے درمیان تھی جبکہ کل ہلاکتوں میں سے 75 فیصد مرد ہیں۔

    40-59 برس کے مریض:

    مرد - 12.29 فیصد

    خواتین - 8.1 فیصد

    60-79 برس کے مریض:

    مرد - 35.51 فیصد

    خواتین - 13.84 فیصد

13. 12 مئ 2020پاکستان میں مجموعی کورونا متاثرین میں سے 77 فیصد مرد

    سرکاری اعداد و شمار کے مطابق پاکستان میں اب تک 32 ہزار سے زیادہ کورونا وائرس کے متاثرین کی شناخت ہو چکی ہے جس میں سے 77 فیصد مرد ہیں۔

    عمر کے لحاظ سے متاثرین کی ترتیب:

    20 سے 39 برس کے مریض:

    مرد - 33.36 فیصد

    خواتین: 9.15 فیصد

    40 سے 69 برس کے مریض:

    مرد - 24.7 فیصد

    خواتین: 6.13 فیصد

14. 12 مئ 2020آسٹریلیا میں بڑے معاشی بحران کا خدشہ

    کئی ہفتوں بعد اب آسٹریلیا کے اراکین پارلیمان چیمبرز میں واپس آنا شروع ہوگئے ہیں۔

    ملک میں وائرس پر کچھ حد تک قابو پا لیا گیا ہے لیکن لاک ڈاؤن اور کاروبار کی بندش سے معیشت پر اثرات مرتب ہوئے ہیں۔

    جون تک آسٹریلیا کی مجموعی پیداوار یا جی ڈی پی 10 فیصد سے زیادہ تک گر سکتی ہے۔ ملک کے وزیر خزانہ کے مطابق یہ سب سے بڑی کمی ہوگی۔

    14 لاکھ افراد بے روزگار ہوسکتے ہیں۔

    ہوائی سفر 97 فیصد تک کم ہوچکا ہے۔

    گذشتہ ایک ماہ میں سٹاک مارکیٹ اپنی ایک تہائی قدر کھو چکا ہے۔

    ایک تہائی افراد، جو رہائش یا کھانے پینے کی صنعت سے وابستہ تھے، اپنی نوکریاں کھو چکے ہیں۔ تفریح کی صنعت سے وابستہ ایک چوتھائی لوگ بے روزگار ہوچکے ہیں۔

15. 12 مئ 2020پاکستان کے ہسپتالوں میں مریضوں کے لیے جگہ ختم ہو سکتی ہے؟

    عالمی ادارہ صحت نے خبردار کیا ہے کہ 'اگر حفاظتی تدابیر نہ اختیار کی گئیں تو جولائی کے وسط تک پاکستان میں کورونا کے مریضوں کی تعداد دو لاکھ سے تجاوز کر سکتی ہے۔'

    پاکستان میں بھی ڈاکٹروں اور طبی ماہرین کو ڈر ہے کہ اگر ایسا ہوا تو ملک میں صحت کا نظام اس بوجھ کو برداشت نہیں کر پائے گا کیونکہ تمام تر سرکاری ہسپتالوں کو ملا کر بھی مریضوں کی اتنی گنجائش نہیں۔

    کورونا کے تمام متاثرین کو ہسپتال جانے کی ضرورت نہیں ہو گی لیکن اگر ان میں سے نصف یا ایک چوتھائی افراد بھی ہسپتال آ گئے تو کیا ان کے لیے وہاں جگہ ہوگی بھی یا نہیں؟

    پاکستان میں موجود ہسپتالوں اور ان میں میسر سہولیات کے حوالے سے اعداد و شمار پر نظر ڈالی جائے تو معلوم ہوتا ہے کہ یہ خدشات حقیقت پر مبنی ہیں۔

    مکمل خبر

16. 12 مئ 2020جرمنی میں انفیکشن کی شرح کم ہو رہی ہے

    اوپر آپ جرمنی میں روزانہ نئے متاثرین سے متعلق ایک گراف دیکھ سکتے ہیں۔ یہ ملک کے محکمہ صحت نے جاری کیا ہے۔

    زرد رنگ ان متاثرین کے بارے میں بتاتا ہے جن میں اس روز کورونا کی تشخیص ہوئی ہے۔ جبکہ نیلے رنگ سے ان افراد کی نشاندہی کی گئی ہے جن میں علامات ظاہر ہوئی ہیں۔

    20 اپریل سے لاک ڈاؤن میں نرمی کی گئی تھی اور چھوٹی دکانیں کھولنے کی اجازت دی گئی تھی۔

    کچھ سکولوں میں طلبہ آنا شروع ہو جائیں گے۔ تب تک ملک کی مختلف ریاستیں مزید نرمی کر لیں گی۔

    کچھ علاقوں میں ریستوران اور بار کھولنے کی بھی اجازت مل جائے گی۔

    روزانہ نئے متاثرین ایک ہزار سے کم ہوچکے ہیں اور اپنی سب سے بڑی تعداد یا پیک سے کافی گِر چکے ہیں۔ یہ خدشات ظاہر کیے جا رہے ہیں کہ لاک ڈاؤن میں نرمی سے نئے متاثرین بڑھ سکتے ہیں۔

    تازہ اعداد و شمار کے مطابق گذشتہ ایک روز کے دوران جرمنی میں 933 افراد میں کورونا کی تشخیص ہوئی ہے۔

17. 12 مئ 2020کورونا وائرس کی علامات کیا ہیں؟

    کورونا وائرس کی دو اہم علامات ہیں۔ یہ بخار سے شروع ہوتا ہے جس کے بعد خشک کھانسی آتی ہے۔

    مگر آپ کیسے جانچ سکتے ہیں کہ آپ کو کورونا وائرس کے سلسلے میں اپنے ڈاکٹر کے پاس جانا چاہیے یا آپ جو محسوس کر رہے ہو سکتے ہیں وہ شاید عام نزلہ اور زکام ہے؟

18. 12 مئ 2020جنوبی کوریا: سیول کے نائٹ کلبز سے جڑے 101 نئے متاثرین

    جنوبی کوریا میں حکام نے کہا ہے کہ سیول میں نائٹ کلبز سے جڑے 101 نئے افراد میں کورونا وائرس کی تشخیص ہوئی ہے۔

    متاثرین میں یہ اضافہ حکومت کی جانب سے سماجی فاصلے کے اقدامات میں نرمی کے بعد ہوا ہے۔ اس سے یہ ظاہر ہوتا ہے کہ کورونا کی وبا کے دوران احکامات میں نرمی لانا کتنا مشکل ہے۔

    حکام نے سکولوں کو کھولنے کے فیصلے کو ایک ہفتے کے لیے مزید ملتوی کر دیا ہے۔

    جنوبی کوریا وسیع پیمانے پر ٹیسٹنگ اور کانٹیکٹ ٹریسنگ کر کے بغیر ملک گیر لاک ڈاؤن کیے، اپنے روزانہ کے کورونا کیسز کو دس سے کم کی سطح پر لے آیا تھا۔

    تاہم اس علاقے میں کانٹیکٹ ٹریسنگ اس لیے بھی مشکل ہے کیونکہ یہاں پر بہت سارے ایسے کلبز ہیں جہاں ہم جنس پرست افراد کا آنا جانا زیادہ ہے اور ایسے کلبز میں لوگ اپنی شناخت چھپاتے ہیں۔

19. 12 مئ 2020سٹون ہینج پر سالانہ عوامی اجتماع منسوخ کر دیا گیا

    رواں سال موسمِ گرما پر سٹون ہینج کے مقام پر تقریبات منسوخ کر دی گئی ہیں کیونکہ یہاں کورونا وائرس کے پھیلاؤ کی وجہ سے عوامی اجتماعات پر پابندی ہے۔

    روایتی طور پر یہاں اس موقع پر 10 ہزار سے زیادہ افراد اکٹھے ہوا کرتے تھے۔ یہ تہوار 21 جون کو موسم گرما کے وسط میں منایا جاتا ہے۔

    انگلش ہیرٹیج نے کہا ہے کہ وہ ’شرکا، رضاکاروں اور عملے کی حفاظت کے لیے‘ تقریب منسوخ کر رہے ہیں۔

    تاہم یہ تقریب سوشل میڈیا پر لائیو سٹریم کی جائے گی۔

    اس موقع پر طلوعِ آفتاب اس مقام کے عقب سے ہوتا ہے اور سورج کی کرنیں یادگار کے بیچ میں چمکتی ہیں۔

20. 12 مئ 2020’ایسے اجلاس کا کیا فائدہ کہ ایک ادھر سے سیاسی تقریر کرتا ہے، دوسرا اُدھر سے نشتر چلاتا ہے‘

    وفاقی وزیر برائے سائنس و ٹیکنالوجوی فواد چوہدری نے دو ٹویٹس پر مشتمل ایک پیغام میں لکھا کہ انھوں نے اسمبلی کے ڈپٹی سپیکر قاسم سوری کو ایک خط میں لکھا ہے کہ اسمبلی کے اجلاس کے دوران سیاسی معاملات کے بجائے ممبران اسمبلی کو کورونا وائرس کے حوالے سے معلومات فراہم کی جائیں۔ انھوں نے مزید کہا کہ ’ایسے اجلاس کا کیا فائدہ کہ ایک ادھر سے سیاسی تقریر کرتا ہے، دوسرا ادھر سے نشتر چلاتا ہے۔‘