عالمی ہلاکتیں 1 لاک 24 ہزار سے بڑھ گئیں، کہیں لاک ڈاؤن جاری کہیں پابندیاں نرم

لائیو کوریج

1. 13 اپريل 2020ورلڈ بنک: جنوبی ایشیا میں ’بدترین معاشی بحران‘ کا خدشہ

   عالمی بینک نے کورونا وائرسں کی وبا کے باعث انڈیا سمیت جنوبی ایشیائی ممالک میں پچھلے 40 سالوں کے بدترین معاشی بحران کی پیش گوئی کی ہے۔

   اس خطے میں آٹھ ممالک شامل ہیں اور دنیا کی آبادی کا ایک چوتھائی حصہ موجود ہے۔ عالمی بنک کے مطابق اس سال خطے میں 1.8 سے 2.8 فیصد کے درمیان شرح نمو کا امکان ہے، جو چھ ماہ پہلے پیش کیے جانے والے 6.3 فیصد سے کم ہے۔

   توقع ہے کہ اپریل میں شروع ہونے والے مالی سال میں انڈیا کی معیشت میں 1.5 فیصد سے 2.8 فیصد تک اضافہ ہوگا۔ عالمی بنک کی پیش گوئی کے مطابق انڈیا کے علاوہ سری لنکا، نیپال، بھوٹان اور بنگلہ دیش میں بھی اقتصادی ترقی میں کمی نظر آئے گی۔

   عالمی بنک کا کہنا ہے کہ پاکستان، افغانستان اور مالدیپ، ان تینوں ممالک میں معاشی بحران کا خدشہ ہے - اور بینک نے خبردار کیا ہے کہ خطے میں غربت کے خاتمے کے لیے دہائیوں سے لیے جانے والے اقدامات، اب خطرے میں ہیں۔

2. 13 اپريل 2020دنیا بھر میں ہلاکتیں ایک لاکھ 14 ہزار سے زیادہ, متاثرین: 1848503 | اموات: 114185 | صحتیاب: 2805892

   جانز ہاپکنز یونیورسٹی کی جانب سے جاری کردہ اعداد و شمار کے مطابق دنیا بھر میں کورونا وائرس سے متاثرہ افراد کی تعداد 18 لاکھ 48 ہزار جبکہ اموات ایک لاکھ 14 ہزار سے تجاوز کر گئی ہیں۔

   اس وقت کورونا وائرس سے سب سے زیادہ متاثرہ ملک امریکہ ہے جہاں مصدقہ متاثرین کی کل تعداد 556044 ہے۔

   اب تک اس وبا سے 2805892 افراد صحتیاب بھی ہو چکے ہیں۔

3. 13 اپريل 2020بریکنگ, کورونا: گذشتہ پانچ ہفتوں میں چین میں ایک دن میں متاثرین کی سب بڑی تعداد, چین میں کل متاثرین: 82160 | اموات: 3341

   چین میں گذشتہ 24 گھنٹوں کے دوران مزید 108 نئے کیس سامنے آئے ہیں جو کورونا مریضوں کی تعداد میں بتدریج اضافہ ہے۔

   یہ گذشتہ پانچ ہفتوں میں چین میں کورونا وائرس کیسز کی سب سے بڑی تعداد ہے جن میں ایک بڑی تعداد ایسے افراد کی ہے جو بیرون ملک سے سفر کر کے آئے ہیں۔

   قومی ہیلتھ کمیشن کے مطابق ان کیسز میں 98 ایسے تھے جو بیرونِ ملک سے آئے تھے۔ اس کے علاوہ 61 افراد ایسے بھی ہیں جن کے ٹیسٹ تو مثبت آئے لیکن ان میں علامات ظاہر نہیں ہوئیں۔

   اب تک چین میں مجموعی طور پر 82160 افراد میں اس وائرس کی تشخیص ہو چکی ہے جبکہ 3341 افراد اب تک ہلاک ہو چکے ہیں۔

4. 13 اپريل 2020کورونا وائرس: میکسیکو میں 442 نئے کیسز، 23 اموات

   میکسیکو میں صحت کے حکام کے مطابق ملک میں گذشتہ 24 گھنٹوں کے دوران 442 نئے کیسز سامنے آئے جبکہ کورونا وائرس سے 23 اموات ہوئیں۔

   ملک میں اب تک 4661 متاثرین اور 296 اموات ہو چکی ہیں۔

   خیال رہے کہ گذشتہ ہفتے ملک کے ڈپٹی وزیرِ صحت ہیوگو لوپیزگاٹیل نے کہا تھا کہ ملک میں اس 26 ہزار پانچ سو کورونا مریض موجود ہو سکتے ہیں۔

5. 13 اپريل 2020کورونا وائرس: ’امریکہ میں جلد اقدامات لے کر جانیں بچائی جا سکتی تھیں‘

   امریکہ میں متعدی امراض کے سرکاری ماہر ڈاکٹر اینتھونی فاؤچی کا کہنا ہے کہ ملک میں کورونا کے خدشے کے پیشِ نظر آغاز میں اقدامات اٹھا کر ’جانیں بچائی جا سکتی تھیں۔‘

   انھوں نے یہ بات امریکی ٹی وی چینل سی این این سے بات کرتے ہوئے کی۔ انھوں نے کہا کہ ’اگر ہم نے آغاز میں ہی سب کچھ بند کر دیا ہوتا تو شاید صورتحال کچھ بہتر ہوتی۔‘ تاہم انھوں نےکہا کہ یہ فیصلے لینا بہت پیچیدہ عمل ہے۔

   امریکہ میں اب تک پانچ لاکھ 47 ہزار سے زائد کورونا وائرس کیسز سامنے آ چکے ہیں جبکہ ملک میں اموات کی تعداد 21 ہزار سے تجاوز کر چکی ہے۔

   ڈاکٹر فاؤچی نے یہ بھی کہا امریکہ میں کچھ علاقوں میں معمول کی سرگرمیاں مئی کے آغاز تک بحال ہو جائیں گی۔

6. 13 اپريل 2020آندریا بچیلی کی خالی گرجا گھر میں دل موہ لینی والی پرفارمنس

   کلاسیکی موسیقار آندریا بچیلی نے ایسٹر کے موقع پر اٹلی کے شہر میلان میں کانسرٹ منقعد کیا لیکن وہ شہر کے اہم گرجا گھر میں اکیلے ہی گاتے رہے۔

   اس کانسرٹ کا نام میوزک فار ہوپ رکھا گیا تھا اور اسے یوٹیوب پر براہ راست نشر کیا گیا۔ بچیلی کی دل موہ لینے والی پرفارمنس کے بعد سوشل میڈیا پر لاکھوں افراد نے انھیں داد دی اور شکریہ ادا کیا۔

   بچیلی نے کانسرٹ کے آغاز میں کہا کہ یہ براہ راست دکھائی جانے والا کانسرٹ لاکھوں لوگوں کو اکھٹا کرنے میں مدد کرے گا۔

   انھوں نے کہا کہ ’ہم دنیا کے زخمی دل کو گلے لگائیں گے اور پوری دنیا کے لوگوں کو بتائیں گے کہ ہماری موسیقی ہی ہماری پہچان ہے۔

   اپنے آحری گانے امیزنگ گریس کے لیے بچیلی گرجا گھر سے باہر آئے اور سنسنان گلیوں کو دیکھتے ہوئے گانا گایا جس کے کلپس ہزاروں لوگوں نے شیئر بھی کیے۔

7. 13 اپريل 2020دنیا کی تازہ ترین صورتحال, متاثرین: 1840093 | اموات: 113672 | صحتیاب: 2805892

   • جانز ہاپکنز یونیورسٹی کی جانب سے جاری کردہ اعداد و شمار کے مطابق اب تک دنیا بھر میں کل متاثرین کی تعداد 18 لاکھ سے تجاوز کر گئی ہے جبکہ ہلاکتیں ایک لاکھ 13 ہزار سے زائد ہو چکی ہیں۔
   • اتوار کے روز مسیحی برادری نے ایسٹر کی تقریبات مذہبی جوش و جذبے کے ساتھ نت نئے طریقوں سے منائیں۔
   • اتوار کے روز برطانیہ میں 737 ہلاکتوں کے بعد ملک میں مجموعی طور پر ہلاکتوں کی تعداد 10 ہزار سے تجاوز کر گئی ہے۔
   • برطانیہ کے وزیرِ اعظم بورس جونسن کو ہسپتال سے ڈسچارج کر دیا گیا ہے۔
   • اٹلی میں تین ہفتوں کے دوران سب سے کم اموات سامنے آئیں ہیں۔
   • یورپی یونین کمیشن کے صدر کا کہنا ہے کہ عمر رسیدہ افراد کو شاید اگلے برس تک قرنطینہ میں رہنا پڑے۔
   • امریکہ میں متعدی امراض کے سرکاری ماہر ڈاکٹر فاؤچی کا کہنا ہے ہے امریکہ میں ’جانیں بچائی جا سکتی تھیں اگر آغاز میں کووڈ 19 کا پھیلاؤ روکنے سے متعلق اقدامات کیے جاتے۔
   • نیویارک میں ایک روز میں 758 اموات سامنے آئیں۔

8. 13 اپريل 2020کورونا وائرس: گھریلو کام کاج بڑھنے کے باعث برطانیہ میں آنکھوں کی چوٹوں میں اضافہ

   کورونا وائرس لاک ڈاؤن کے متعدد ایسے برے نتائج تھے جو اب سامنے آ رہے ہیں اور برطانیہ ان میں سے ایک یہ ہے کہ گھریلو کام کاج کے بڑھنے کے باعث لوگوں کو آنکھوں میں زیادہ چوٹیں لگنا شروع ہو گئی ہیں۔

   آکسفورڈ آئی ہسپتال کا کہنا ہے کہ وہ لوگ جنھیں آپریشن کی ضرورت تھی یا جنھیں آنکھوں میں چوٹیں آئی ہیں ان میں اضافہ دیکھنے میں آیا ہے۔

   ہسپتال میں ایک ہفتے کے دوران چھ ایسے مریض آئے جن کی آنکھوں میں زخم لگے تھے۔ ہسپتال کے مطابق عام طور اس قسم کے ایک یا اس سے زیادہ کیس دو یا تین ہفتے بعد آتے ہیں۔

   ہسپتال کا کہنا تھا کہ جب لوگ گھریلو مرمت یا باغبانی جیسے مشاغل اپنائیں تو انھیں چاہیے کہ وہ آنکھوں کو محفوظ رکھنے کے لیے حفاظتی چشمے لگائیں۔

9. 13 اپريل 2020ترکی میں کرفیو: طیب اردوان کا وزیر داخلہ کا استعفیٰ منظور کرنے سے انکار

   ترکی کے وزیرِ داخلہ نے اتوار کی رات کو دو روزہ کرفیو کے اچانک اعلان پر استعفیٰ دینے کا اعلان کیا لیکن صدر رجب طیب اردوان نے اسے منظور کرنے سے انکار کر دیا ہے۔

   صدر کے دفتر کے ترجمان نے کہا ہے کہ وزیرِ داخلہ اپنا کام کرتے رہیں گے۔

   وزیر داخلہ سلیمان سوئلو نے استعفیٰ دیتے ہوئے بیان دیا تھا کہ وہ کرفیو نافذ کرنے کی پوری ذمہ داری لیتے ہیں اور ایسا انھوں نے ’اچھی نیت‘ سے کیا تھا تاکہ کورونا وائرس کے پھیلاؤ کو روکا جا سکے۔

   یاد رہے کہ ترکی کی حکومت نے جمعہ کی رات اچانک 31 بڑے شہروں میں 48 گھنٹوں کے لیے کرفیو نافذ کر دیا تھا تاہم اس کے نتیجے میں دوکانوں پر شہریوں کا شدید رش دیکھنے میں آیا جس کے بعد حکومت کو تنقید کا سامنا کرنا پڑا۔

   خیال رہے کہ اتوار تک ترکی میں کورونا وائرس کے 52 ہزار کیسز سامنے آ چکے ہیں۔

10. 13 اپريل 2020امریکہ میں کچھ گرجا گھروں میں معمول کی سرگرمیاں جاری رہیں

    امریکہ میں ایسٹر کے موقع پر اکثر گرجا گھر خالی تھے تاہم کچھ میں معمول کے مطابق سرگرمیاں جاری رہیں۔

    جن گرجا گھروں نے عمارتوں کو عقیدت مندوں کے لیے بند نہیں کیا ان کا مؤقف ہے کہ وہ لوگوں کے درجہ حرارت دیکھ کے انھیں اندر آنے کی اجازت دے رہے ہیں اور ہاتھ سینیٹائز کرنے اور فاصلہ رکھنے جیسی احتیاطی تدابیر پر عمل بھی کر رہے ہیں۔

    اس کے علاوہ تقریباً آٹھ امریکی ریاستوں میں اب بھی مذہبی اداروں کے لیے گھر تک محدود رہنے کے احکامات جاری نہیں ہوئے اور ایسا ہونے سے قبل قانونی چارہ جوئی عمل میں لانی ہو گی۔

    کچھ افراد گرجا گھروں میں تقریبات پر پابندی کو امریکی آئین میں دی گئی مذہبی آزادی کی خلاف ورزی قرار دے رہے ہیں۔

11. 13 اپريل 2020بریکنگ, تیل معاہدہ: تیل کی عالمی پیداوار میں 10 فیصد کمی پر اتفاق

    کورونا وائرس کی عالمی وبا کے باعث تیل کی قیمتوں میں کمی کے پیشِ نظر تیل پیدا کرنے والے ممالک نے عالمی تیل کی پیداوار کو 10 فیصد کم کرنے کا معاہدہ کر لیا ہے۔

    خیال رہے کہ رواں برس تیل کی قیمتوں میں اس وقت کمی دیکھنے میں آئی تھی جب کورونا وائرس کی عالمی وبا کے نتیجے میں لاک ڈاؤنز کے باعث اس کی مانگ میں شدید کمی دیکھنے میں آئی تھی۔

    تیل کی برآمدات کرنے والے ممالک کے ادارے اوپیک کے علاوہ ان مزاکرات میں روس، امریکہ اور میکسیکو بھی شامل تھے۔

    اس معاہدے کے باعث دنیا بھر میں یکم مئی سے تیل کی پیداوار میں یومیہ 97 لاکھ بیرلز کی کمی دیکھنے میں آئے گی۔

    ایک اندازے کے مطابق دنیا بھر میں کورونا وائرس کی عالمی وبا کے بعد سے تیل کی مانگ میں ایک تہائی کمی واقعہ ہوئی ہے۔

    اس معاہدے کے باعث سعودی عرب اور روس کے درمیان تیل کی جنگ اختتام پذیر بھی ہو سکتی ہے۔

12. 13 اپريل 2020انڈیا کی سب سے مشہور اور مہنگی ’دارجلنگ‘ چائے کو کورونا سے کیا خطرہ ہے؟

    کورونا وائرس کی وجہ سے انڈیا میں ملکی سطح پر جاری لاک ڈاؤن نے دنیا بھر میں مشہور دارجلنگ چائے کی ہریالی کو ماند کر دیا ہے۔

    اس کی وجہ سے پہلے بارش کے بعد پہلی کھیپ کو بہت نقصان ہوا ہے۔ لیکن اس کا کورونا سے کیا تعلق ہے؟ جانیے اس تحریر میں۔

13. 13 اپريل 2020بریکنگ, فرانس: ہسپتالوں میں اموات کی تعداد میں کمی، مجموعی ہلاکتیں 14 ہزار سے زائد

    فرانس کی وزارتِ صحت نے اعلان کیا ہے کہ ان کے ملک میں ہسپتالوں میں اموات اور انتہائی نگہداشت کے شعبوں میں لوگوں کی تعداد میں کمی آ رہی ہے۔

    وزارت کا کہنا ہے کہ ملک میں کورونا وائرس کی وبا اب ہموار سطح پر پہنچ گئی ہے یعنی اس میں اضافہ نہیں ہو رہا ہے۔

    فرانس میں گذشتہ 24 گھنٹوں کے دوران ہسپتالوں میں 315 ہلاکتیں ہوئیں جو سنیچر کے روز کی 353 ہلاکتوں سے کم ہے۔

    چنانچہ مجموعی طور پر فرانس میں ہسپتالوں اور کیئر ہومز میں کورونا وائرس سے ہلاکتوں کی تعداد 14 ہزار 393 ہوچکی ہے جو دنیا کی تیسری سب سے زیادہ تعداد ہے۔

    اس کے علاوہ ملک میں کووِڈ-19 سے متاثرہ افراد کی انتہائی نگہداشت کے شعبوں میں موجود تعداد میں مسلسل چوتھے روز بھی کمی آئی ہے اور اب یہ تعداد 6845 ہے۔

    فرانس کی وزارتِ صحت نے کہا ہے کہ بظاہر لگ رہا ہے کہ وبا عروج کو پہنچ چکی ہے لیکن انھوں نے کہا کہ محتاط رہنا ہوگا۔

14. 13 اپريل 2020ایسٹر کے موقع پر پروازوں میں تاریخی کمی

    ایسٹر کا تہوار روایتی طور پر سفر کے اعتبار سے مصروف ترین دورانیہ ہوتا ہے لیکن اس مرتبہ ایسا نہیں ہے۔

    گذشتہ سال ایسٹر کی جمعرات کے موقع پر دو لاکھ 906 پروازیں فضا میں تھی جبکہ اس مرتبہ ایسٹر کی جمعرات کے موقع پر 68 ہزار 621 پروازیں ٹریک کی گئیں۔

    گذشتہ سال اور اس سال ایسٹر کی جمعرات پر برطانیہ کے اوپر فضائی ٹریفک کی صورتحال فلائٹ ریڈار 24 نامی ویب سائٹ کے اس نقشے میں دیکھیے۔

    برطانیہ میں طے شدہ فلائٹس کے تعداد گذشتہ سال کے اسی ہفتے کے مقابلے میں90.7 فیصد گھٹ چکی ہےجبکہ اسی دورانیہ میں عالمی طور پر 59.2 فیصد گرواٹ دیکھنے میں آئی ہے۔

15. 13 اپريل 2020کورونا وائرس: چین میں افریقی برادری کو تفریق کا سامنا, ڈینی ونسنٹ، بی بی سی نیوز ہانگ کانگ

    گذشتہ ہفتے کے اوائل میں یہ افواہیں سامنے آئیں کہ چین کے شہر گوانگ ژو میں افریقی برادریوں میں کورونا وائرس تیزی سے پھیل رہا ہے۔

    اس کے فوراً بعد طبی حکام نے افریقی تارکینِ وطن کے گھر گھر جا کر ٹیسٹنگ شروع کر دی۔

    اب گھروں کا مالکان اور ہوٹلوں نے سینکڑوں افریقیوں کو نکالنا شروع کر دیا ہے۔ برادریوں کے رہنماؤں سمیت کئی افراد کو کورونا کا ٹیسٹ منفی آنے کے باوجود قرنطینوں میں منتقل کر دیا گیا ہے۔

    چین میں کئی افریقی سفیروں نے چینی وزیرِ خارجہ کے نام ایک خط میں اس مبینہ تفریق اور بدنامی کے خلاف شکایت کی ہے۔

    سنیچر کو زمبابوے میں چینی سفارتخانے نے ٹویٹ کے ذریعے ان تمام الزامات کو مسترد کرتے ہوئے لکھا کہ ‘چین میں چینی اور غیر ملکی، ہر شہری کے ساتھ یکساں سلوک کیا جاتا ہے۔’

    گوانگ ژو میں 2000 کی دہائی کے اواخر میں ایشیا کی سب سے بڑی افریقی برادری آباد تھی مگر حالیہ سالوں میں ان کی تعداد میں کمی آئی ہے۔

    کئی لوگوں کا کہنا ہے کہ انھیں بار بار تفریق، ویزا پابندیوں اور کاروبار میں مشکلات کا سامنا کرنا پڑتا ہے۔

16. 13 اپريل 2020بی بی اردو کی کوریج میں خوش آمدید

    دنیا بھر میں کورونا وائرس کے متاثرین اور اس سے ہونے والی ہلاکتوں کی تعداد بڑھتی جا رہی ہے۔ اس سلسلے میں بی بی سی اردو کی لائیو کوریج مسلسل جاری ہے۔ اتوار کو دنیا میں کیا کیا ہوا، جاننے کے لیے کلک کریں